Psalms 42
This book is a draft. It has been translated but has not yet finished checking, and is published here so the community can read and respond to it.
Njàŋ wùl ta ghɨ ghal ɨ̀ ndù nɨ̀ ŋweyn ilaʼ atum
Njàŋ wùl ta ghɨ ghal ɨ̀ ndù nɨ̀ ŋweyn ilaʼ atum
1Mɨ n-dzɨ̂ kɨ nô dzɨ sɨ nà duʼ ghesɨ̀ và a Fɨyini fɨ,
Kɨ̀ ighel ta fɨchue fɨ nɨn nyɨŋ, Fɨ nà zue-à, kɨŋ jva sɨ nyvɨ mu.
2Mɨ n-dzɨ̂ sɨ nà duʼ ghesɨ̀ Fɨyini fìfɨ a fɨ n-chi.
Mà ti læ̀ gvi yeyn và nô ɨtuʼ gha sɨ na duʼ a wa ngùŋ a?
3Idzɨ-ì sɨ ghɨ kɨ sɨ̂ mà têyn ta ɨfwo ɨ yɨnɨ,
Mɨ n-dzɨ̂ nɨ̀ntuʼ, dzɨ̂ nɨ̀nchuè
Ghelɨ nɨn lûʼsɨ̀ mà kɨ̀ mɨlvɨ ɨ̀n jɨ̀m bɨfɨ sɨ̂ mà na,
“Fɨyini fya fìfɨ̀ ba a?”
4Mɨ n-se sɨ kfàʼtɨ̀ ta mɨ n-læ nà lî ndû nɨ̀ ànoyn a ghelɨ̀-à a ndô Fɨyini,
Ghesɨ̀ àŋena nɨ̀ ghelɨ ghɨ li nà saŋlɨ̂ yem njàŋsɨ̀ koʼsɨ̂ Fɨyini,
Iwo ateyn i nà fu ngeʼ sɨ̂ mà.
5Mà ti n-kfâʼ nô ngeʼ tèyn bòm ghà?
Mà ti n-fɨmsɨ̂ nô ngêŋ yem têyn bòm ghà?
Mà na yeʼtɨ̂ kɨ ɨwùyn nɨ̀ Fɨyini fɨ̀,
koʼsɨ̂ kɨ ŋweyn.
Wù n-ghɨ Fɨyini femfɨ, ghɨ mbœ̀sɨ̀ yem.
6Ma kfaʼ meyn chwòsɨ̀ ngeʼ,
nà sɨ duʼa kfâʼtɨ̀ kɨ sɨ yeyn vâ.
Mɨ n-kfâʼtɨ̀ và a kfɨ̂yn Mizà, atû kfɨyn Hemòn,
Alèʼ ghè a jvà Jodàn nɨ̀n fvɨ̂ ateyn.
7Wà visi meyn ngeʼsɨ na suʼî a ma atu,
kû tèyn ta ife,
Sɨ lɨmsɨ meyn mà a isas i mu.
8BÔBO Fɨyini nɨ̀n dyêyn ìkôŋ ɨ mɨ̂kàyn nɨ̀ ŋweyn sɨ̂ mà kɨ̀ mɨchi ɨ̀n jɨ̀m.
Mɨ n-kfâ mɨ achi à kà, ma nà jema, yem njaŋsɨ̀,
Sɨ̂ Fɨyini fîfɨ̀ a fɨ n-nî ma chi-à.
9Mɨ n-dzɨ̂ sɨ̂ và kɨ̀ mɨlvɨ ɨ̀n jɨ̀m a Fɨyini femfɨ,
Wà n-ghɨ àlêʼ a leytɨnɨ-a nɨ̀ mà,
Bòm ghà ta wà lèsɨ̀ ma a?
Bòm ghà ta wà vìsi mbàynɨ̀ semsɨ na fu ngeʼ sɨ̂ mà têyn a?
10Mbàynɨ̀ semsɨ nɨn lûʼsɨʼ mà kɨ̀ mɨchi ɨ̀n jɨ̀m.
Àŋena nɨn bɨf kɨ nâ,
“Fɨyini fya fìfɨ̀ ba a?”
Iwo ateyn i nɨn kôytɨ̀ mà.
11Mà ti n-kfâʼ nô ngeʼ tèyn bòm ghà?
Mà ti n-fɨmsɨ̂ nô ngêŋ yem têyn bòm ghà?
Mà na yeʼtɨ̂ kɨ ɨwuyn nɨ̀ Fɨyini fɨ̀,
koʼsɨ̂ kɨ ŋweyn.
Wù n-ghɨ Fɨyini femfɨ, ghɨ mbœ̀sɨ̀ yem.