Psalms 34

Na ghɨ na koʼsɨ̂ Fɨyini bòm njùŋ ŋweyn

Njàŋ ta Devìt nɨ̀n læ betɨ ɨ nà yema, kem dyêyn sɨ̂ Abimelèk na yi n-jaʼ jaʼ, wu sàŋ na wù lu sɨ a ŋweyn a ngùŋ

¹Mà na koʼsɨ̂ BÔBO kɨ̀ mɨlvɨ ɨ̀n jɨ̀m Mà na beyn ŋweyn kɨ̀ mɨlvɨ ɨ̀n jɨ̀m.

²Mà na dyala kûm BÔBO. Zɨ̀ ghelɨ ghɨ bolɨ, yì yvɨtɨ nà saŋlɨ-à

³Yì gvi ghesɨ̀nà na koʼsɨ̂ BÔBO akaʼ àmòʼ Yì gvi ghesɨ̀nà na ngvɨmlɨ̂ ŋweyn.

⁴Ma jem meyn BÔBO yvɨ mà Wù bœsɨ meyn mà Mà bu fâyn wì afo.

⁵À n-samsɨ̂ mɨ ndà ŋweyn wu nà saŋlɨ̂ kɨ saŋlɨ Wù læ̀ lêytɨ̀ wì ikêʼ i ŋweyn bòm ìwumi.

⁶Ghelɨ ghɨ jɨŋnɨ nɨn dzɨ̂ sɨ̂ BÔBO wu yvɨ Ɨ bœ̀sɨ̀ àŋena sɨ a àŋena ngeʼsɨ nô sɨ̀ jɨ̀m.

⁷Samoʼ nchì BÔBO nɨn chî ghelɨ ŋweyn Wù n-bœ̂sɨ̀ àŋena sɨ a ngeʼsɨ nɨ̀ àŋena.

⁸Yì mom læ̂ ɨ̀ yeyn njùŋ BÔBO Njùŋ nɨ̀n ghɨ sɨ̂ ɨvzɨ̂ a wù lèytɨ̀ isas i tɨ̂wò nɨ̀ BÔBO.

⁹Zɨ̀ ghelɨ BÔBO na ngvɨmlɨ̂ læ̂ ŋweyn Ghelɨ BÔBO bû tìmi nà wutɨ̂ àfo.

¹⁰Nô mɨ woyn nyâm àbo kàʼ a ghɨ na kfɨ jeŋ Mɨtì wùl ɨ̀ vzɨ̀ a wù n-ki Fɨyini bû tìmi nà wo àfo.

¹¹Yì gvi a woynda ɨ̀ yvɨ̀tɨ mà yeʼi zɨ sɨ nà ngvɨmlɨ BÔBO

¹²À na kôŋ mɨ ndà sɨ nà chi ichi i juŋì, na ichi ateyn i fî dyèbtɨ̀ Wu nà nî àwo kèynà têyn:

¹³Ka wù na wam ànkaŋ Ka itaŋi i bzɨ-i na fvɨ̀ a ŋweyn ɨchfɨ̀.

¹⁴Wu kasi sɨ a ibàm awo a bɨ-a Ɨ nà nî àwo a juŋà. Wù na kɨŋ mbôynɨ̀ kɨ nɨ̀ àtem a ŋweyn à jɨ̀mà.

¹⁵BÔBO nɨn tôʼnɨ̀ nɨ̀ ghelɨ àtì-ati, Yvɨ ìdzɨ̂ i àŋena.

¹⁶BÔBO bêyn meyn jɨm sɨ̂ ghelɨ awo a bɨ-a Wùl læ̀ bu fì kfâʼtɨ̀ wì iwo kûm àŋena.

¹⁷BÔBO nɨn yvɨ ìdzɨ̂ i ghelɨ àti-ati Fvɨsɨ̀ àŋena sɨ a àŋena ngeʼsɨ.

¹⁸BÔBO nɨn baʼsɨ̂ sɨ ghelɨ ghì a n-ghɨ ghɨ afɨm Gâmtɨ̀ ghelɨ ghì a ghɨ n-yeʼtɨ àŋena.

¹⁹Nô mɨ ta ngeʼsɨ ghelɨ àtì-atisɨ nɨn dvɨ̂ BÔBO nɨn fvɨsɨ àŋena sɨ ateyn

²⁰BÔBO nɨn kinî ghelɨ àtì-ati Nô àvɨf a wûl sɨ ateyn a ghɨ wi sɨ kòlà

²¹Mɨtì ngeʼsɨ ghelɨ awo a bɨ-asɨ nɨn zuetɨ̂ àŋena A BÔBO fu ngeʼ sɨ̂ ghelɨ ghì a ghɨ n-bâyn ghelɨ àtì-ati.

²²BÔBO nɨn gâmtɨ̀ ghelɨ ghɨ felɨnɨ nɨ̀ ŋweyn À yèʼtɨ mɨ ndà ɨwuyn nɨ̀ ŋweyn wu bû yèyn ngeʼ.