Psalms 29

Gyà Bôbo Fɨyini nɨn kelɨ àdyaʼ

Njàŋ Devìt

¹Nchìsɨ Bôbo Fɨyinisɨ̀, yì na beyn ŋweyn

Yì na beyn Bôbo Fɨyini, wù n-ŋwaʼà, kelɨ àdyaʼ.

²Yì na beyn Bôbo Fɨyini wù n-kelɨ ìzɨyn i juŋì

Yì na koʼsɨ̂ Bôbo Fɨyini, wù n-layna fî dêŋsɨ̀-à.

³Gyà Bôbo Fɨyini nɨ̀n kû atû jvasɨ

Fɨyini fɨ ŋwaʼnɨfɨ nɨn dɨ̂m ta ivɨ,

Bôbo Fɨyini nɨn byaytɨ̂ ta ivɨ atû jvasɨ tosɨ.

⁴Gyà Bôbo Fɨyini nɨ̀n kelɨ àdyaʼ

Gyà Bôbo Fɨyini nɨ̀n kelɨ àdèŋ.

⁵Gyâ Bôbo Fɨyini nɨ̀n kôytɨ̀ ɨ̀nkâʼ mɨ̀ sedà a Lebanòn.

Bôbo Fɨyini saytɨ meyn ɨ̀nkâʼ mɨ̀ àteyn kɨ̀ isàʼ isaʼ.

⁶Wù ni meyn kfɨynsɨ Lebanònsɨ na châʼtɨ̀ ta woyn nyâm,

Wù ni meyn kfɨ̂yn Hemòn na châʼtɨ̀ ta wâyn nyàm ɨtwaʼ.

⁷Gyà Bôbo Fɨyini nɨ̀n myâyn ta ivɨ.

⁸Gyà Bôbo Fɨyini nɨ̀n nêʼ ɨ̀lwêʼ a nse iyum;

BÔBO nɨn nêʼ ɨ̀lwêʼ a nse iyum a Kadèsh

⁹Gyà Bôbo Fɨyini nɨ̀n nêʼ ɨ̀nkâʼ mɨ̀ ôksɨ̀

Yì yaysɨ meyn tɨ̀fvɨ tɨ ɨnkàʼ Aku-a sɨ bayn kɨ tèyn ntol.

Ghɨ n-bê kɨ ghɨ̀ jɨ̀m a ndô Fɨyini na, “BÔBO nɨn ŋwaʼà.”

¹⁰Bôbo Fɨyini nɨ̀n duʼ achɨ a tɨ̂fòyn atû ànkuŋ;

Bôbo Fɨyini faŋ meyn sɨ a fòyn kɨ̀ sɨ a mɨlvɨ ɨ̀n jɨ̀m.

¹¹Bôbo Fɨyini nɨ̀n fu àdyaʼ sɨ̂ ghelɨ ŋweyn;

Bôbo Fɨyini nɨ̀n boysɨ̂ ghelɨ ŋweyn fu mbôynɨ̀.