Psalms 2

Ɨfôyn ɨ wûl vzɨ̀ a Bôbo choʼ lèm

¹Ghelɨ mbzɨ ti chɨ̀yntɨ̀ nà fɨm tèyn bòm ghà?

Àŋena nɨn yeyn kɨ ngeʼ salû bê na ghɨ n-nû Fɨyini.

²Tɨfôyn tɨ mbzɨ tɨ chɨyntɨ meyn.

Nà baʼtɨ̂ sɨ nu Bôbo Fɨyini,

Ŋêyn wùl ɨ̀ vzɨ̀ a wù yìsi ɨ̀ lem sɨ a fòyn.

³Àŋena nɨn bê na, “Ghesɨ̀nà teyntɨ nchaʼ sèynsɨ̀ a ghɨ kulɨ ghesɨ̀nà ateyn tèyn.

Na ghesɨ̀nà soysɨ ngeŋsɨ ghesɨ̀nà, ɨ̀ fvɨ̀ sɨ a ndo àkòs afêyn a ghesɨ̀nà nɨn ghɨ ateyn tèyn.

⁴Bôbo Fɨyini vzɨ̀ a wù n-duʼ achɨ a tɨ̂fòyn nɨ̀ ŋweyn iyvɨ

nɨn ki àŋena chyeʼ kɨ chyeʼ.

⁵Wù n-nyôsɨ̀ ɨ̀toŋ,

Byaytɨ̂ sɨ̂ àŋena, fî fâynsɨ̀ àŋena nô sɨ a ŋaŋ bê na,

⁶“Ma choʼ meyn lèm fòyn a Zayòn,

A kfɨyn ì laynɨ nɨ̀ mà.”

⁷Mɨ n-fèʼtɨ̀ ìsaʼ i Bôbo Fɨyini sɨ̂ zɨ̀ lvɨ̂yn;

BÔBO bè na,

“Sɨ zɨ̀tɨ layn, wà na ghɨ wayn sɨ̂ mà, Ma ghɨ bæ̀ sɨ̂ và.

⁸Wà kæ sɨ nà kôŋ à,

a mà fu mbzɨ yèyn sɨ̂ và,

Nɨ̀ tɨ̀laʼ tìtɨ̀ a tɨ n-ghɨ ateyn, a à na kelɨ kɨ nô và.

⁹Ma àŋena dɨm, a wà leŋ sàytɨ̀ àŋena nɨ̀ mbàŋ àkas,

Ma àŋena fì dɨm kɨ̀ dɨm, a wà bɨytɨ àŋena kɨ̀ ta ghɨ bɨ̀ytɨ̀ ntòyn àchaʼ.”

¹⁰Yi ti n-dyêyn na zɨ̀ tɨfôyn tɨ mbzɨ tɨ nɨn kelɨ sɨ nà tofa.

Zɨ̀ ghî a yi n-saʼ mbzɨ toʼnɨ̀.

¹¹Yì na fâyn Bôbo Fɨyini, koʼsɨ̂ ŋweyn.

Yì na saŋlɨ̂ nô sɨ a ŋaŋ, ngvɨmlɨ̂ BÔBO.

¹²Yì na ngvɨmlɨ̂ wâyn Fɨyini bu tì, a yì se sɨ ni awo à ki-a nâ kì,

a wù shɨŋ nyòʼsɨ̀ ɨ̀toŋ, ɨ̀ bebsɨ zɨ̀.

Ɨtoŋ ɨ yafɨnɨ nɨ̀ ŋweyn nɨn bem nô abɨ,

Mɨtì njùŋ ɨ ghɨ sɨ̂ ghelɨ ghì a ghɨ leʼ lèytɨ̀ a isas i tɨ̂wò nɨ̀ ŋweyn.