Numbers 28

Tɨsaʼ kûm tɨ̀fu

¹Bôbo Fɨyini nɨn be meyn sɨ̂ Mosìs na, ²“Fu tɨsaʼ tèyntɨ̀ sɨ̂ ghelɨ Isìlæ̀ ɨ bè sɨ̂ àŋena na, ‘Yì na fu tɨ̀fu sɨ̂ mà kɨ̀ ɨlvɨ ghê a yi n-kelɨ sɨ nà fu ateyn, a ghɨ tɨ̀fu ghɨ n-nyôʼ nyoʼ tɨ lɨ̂mtɨ̀ fom sɨ̂ mà.’ ³Bè sɨ̂ àŋena na ifu nâ yèynì nɨn ghɨ ìfu zɨ̀ a ka àŋena na fu sɨ̂ Bôbo Fɨyini, a ghɨ ìfu ghɨ nyôʼ nyoʼ. À na ghɨ nô mɨ achi à kà, yi sɨ woyn njɨ̀ sɨ̀ bò ma sɨ chem meyn bèŋ kelɨ wi nseʼi sɨ ifu i nyoʼnɨ-i. ⁴Yi fu ìmòʼ bɨsì bɨsì, yi ni fu ì lì aleŋ ɨlvɨ ikfa. ⁵Yi se sɨ fu, yi baʼsɨ ìfu ɨfwo ɨ yɨnɨ a ghɨ kilù ɨ̀nkfɨ̀ŋ ma ghɨ gva meyn mɨ̀ faytɨ kfɨ ɨ fyes nɨ̀ lità mɨ̀vɨ̀l. ⁶À ti ifu i nyoʼnɨ-i zɨ̀ a ka yì na fu kɨ mɨchi ɨ̀n jɨ̀m. Ghɨ n-læ zɨ̀tɨ sɨ fu ifu nâ yèynì a kfɨ̂yn Sinày a ghɨ ìfu ghɨ nyôʼ nyoʼ yi lɨ̂mtɨ̀ fom sɨ̂ Bôbo Fɨyini. ⁷Yi na se sɨ fu nô mɨ wâyn njɨ̀ ɨ̀ kfà, yi baʼsɨ lità mɨ̀lùʼ ɨn to ɨ̀ fsɨ̀ytɨ̀ asɨ nɨ̀ Bôbo Fɨyini. ⁸Yi nî se sɨ fu ànkùmtɨ̀ a wâyn njɨ̀ aleŋ ɨlvɨ ikfa, yi fu kɨmɨ ìfu ɨfwo ɨ yɨnɨ baʼsɨ̂ nɨ̀ ìfu i nyvɨnɨ-i kɨ̀ ta yì nì bɨsɨ fu. À n-ghɨ ìfu ghɨ nyôʼ nyoʼ yi lɨ̂mtɨ̀ fom sɨ̂ Bôbo Fɨyini.”

Tɨfu tìtɨ̀ a ghɨ n-fu ɨtuʼ ilaʼ

⁹À na ghɨ nô mɨ achi ɨtuʼ ilaʼ à kà, yi fu woyn njɨ̀ sɨ̀ bò ma sɨ chem meyn bèŋ, kelɨ wi nseʼi. Yi se sɨ fu yi fu baʼsɨ nɨ̀ ìfu i nyvɨnɨ-i kɨ̀mɨ nɨ̀ ìfu ɨfwo yɨnɨ a ghɨ kilùsɨ ɨnkfɨ̀ŋ sɨ̀ bò ma ghɨ gvâ meyn mɨ̀ faytɨ̂ kfɨ ɨ̀ fyes nɨ̀ mɨ̀vɨ̂l mɨ̀ olìfsɨ̀. ¹⁰À ti ifu i nyoʼnɨ-i zɨ̀ a yi n-kelɨ sɨ nà fu nô mɨ achi ɨtuʼ ilaʼ à kà sɨ baʼsɨ sɨ̂ ìfu i nyoʼnɨ-i zɨ̀ a ghɨ n-fu kɨ̀ mɨchi ɨ̀n jɨm nɨ̀ ìfu i nyvɨnɨ-i ateyn i.

Tɨfu tìtɨ̀ a ghɨ n-fu achɨ a kɨ̀ asɨ-a a njoŋ

¹¹À na ghɨ achi a kɨ asɨ-a nô mɨ a njoŋ ì kà, yi fu ifu i nyoʼnɨ-i sɨ̂ Bôbo Fɨyini a ghɨ woyn nyâm mbòloʼ sɨ lûmnɨ̀sɨ̀ sɨ̀ bò, nɨ̀ àyaʼa baʼsɨ̂ nɨ woyn njɨ̀sɨ̀ nsòmbo ma sɨ chem meyn bèŋ. Nyam nâ sèynsɨ̀ nô sɨ̀ jɨ̀m ɨ kelɨ wi nseʼi. ¹²Yi se sɨ fu nô mɨ nyâm mbòloʼ ì kà yi fu baʼsɨ nɨ̀ ìfu ɨfwo ɨ yɨnɨ a ghɨ kilùsɨ ɨnkfɨ̀ŋ sɨ̀ tal ma ghɨ gva meyn mɨ̀ faytɨ kfɨ ɨ̀ fyes nɨ̀ mɨ̀vɨ̂l. Yì se sɨ fu ayaʼ yi fu kɨmɨ ìfu ɨfwo ɨ yɨnɨ a ghɨ kilùsɨ̀ ɨ̀nkfɨ̀ŋ sɨ̀ bò ma ghɨ gva meyn mɨ̀ faytɨ kfɨ ɨ̀ fyes nɨ̀ mɨ̀vɨ̂l. ¹³Yi se sɨ fu nô mɨ wâyn njɨ̀ ɨ̀ kfà, yi fu baʼsɨ kilù ɨ̀nkfɨ̀ŋ ma ghɨ gva meyn mɨ̀ faytɨ kfɨ, ɨ̀ fyes nɨ̀ mɨ̀vɨ̂l. Ifu nâ yèynì nɨn ghɨ ìfu i nyoʼnɨ-i lɨ̂mtɨ̀ fom sɨ̂ Bôbo Fɨyini, a ghɨ ìfu ghɨ nyôʼ nyoʼ. ¹⁴Yi se sɨ fu nô mɨ nyâm mbòloʼ ì kà, yi fu baʼsɨ ìfu i nyvɨnɨ-i a ghɨ mɨ̀lûʼ ɨn to chem ndù litàsɨ̀ bò. Yi se sɨ fu ayaʼ, yi fu baʼsɨ nɨ̀ mɨlûʼ ɨn to mɨ chem ndû lità ìmòʼ nɨ̀ àbeʼa, ɨ̀ se sɨ fu nô mɨ wâyn njɨ̀ ɨ̀ kfà, yi baʼsɨ lità mɨ̀lûʼ ɨn to. À ti ifu i nyoʼnɨ-i zɨ̀ a yi n-kelɨ sɨ nà fu achi a kɨ asɨ-a nô mɨ a njoŋ ì kà a bêŋ. ¹⁵Yi n-kelɨ sɨ fu ifef sɨ ifu ta ka Bôbo Fɨyini lesɨ fù mbɨ, sɨ baʼsɨ sɨ̂ ìfu i nyoʼnɨ-i zɨ̀ a yi n-fu kɨ mɨchi ɨ̀n jɨ̀m tì nɨ̀ ìfu i nyvɨnɨ-i ateyn i.

Ifu ayɨ iyaʼsɨ

¹⁶À na ghɨ a mɨchi njvàsɨ̀ kæ̀ a njoŋ ɨ yî àsɨ, yi yɨ ayɨ iyaʼsɨ. ¹⁷À na ghɨ a mɨchi njvàsɨ̀ tâyn a njoŋ nâ ghàyn, yi zɨ̀tɨ̀ sɨ yɨ ayɨ, yɨ àbayn bula fɨ̀shɨ̀k ateyn sɨ a mɨchi nsòmbo. ¹⁸À na ghɨ achi a kɨ asɨ-a a mɨchi nâ ghàyn, yi yvɨ̀ŋtɨ̀ ɨ koʼsɨ ma. Ka wùl nɨ̂n fèl ìwo antêynɨ̀ àwo ghè a wù lum fèl. ¹⁹Yi yvɨ̂ŋtɨ̀ yi fu ifu ɨfwo ɨ yɨnɨ sɨ̂ Bôbo Fɨyini a ghɨ ìfu ghɨ nyôʼ nyoʼ. Ifu ateyn i na ghɨ woyn nyâm mbòloʼ sɨ ghɨ sɨ̀ bò kɨ̀mɨ nɨ̀ àyaʼa baʼsɨ̂ nɨ̀ njɨ̀sɨ̀ nsòmbo ma sɨ chem meyn bèŋ, kelɨ wi nseʼi. ²⁰Yi se sɨ fu nô mɨ nyâm mbòloʼ ì kà, yi fu baʼsɨ ìfu ɨfwo ɨ yɨnɨ a ghɨ ɨ̀nkfɨ̂ŋ a kilùsɨ̀ tal ma ghɨ gva meyn mɨ̀ faytɨ kfɨ ɨ̀ fyes mɨvɨl ateyn, ɨ̀ se sɨ fu ayaʼ yi bàʼsɨ kilùsɨ ɨnkfɨ̀ŋ sɨ̀ bò ma ghɨ gva meyn mɨ̀ faytɨ kfɨ ɨ̀ fyes mɨvɨl ateyn. ²¹Yi se sɨ fu nô mɨ wâyn njɨ̀ ɨ̀ kfà antêynɨ̀ woyn njɨ̀sɨ̀ afî nsòmbo yi fu baʼsɨ kilù ɨ̀nkfɨ̀ŋ. ²²Yi se sɨ fu yi baʼsɨ ìfef sɨ ifu na Bôbo Fɨyini lesɨ fù mbɨ sisɨ, ɨ̀ yuyn atu à ki-a. ²³Yì na fu tɨ̀fu nâ tèyntɨ̀ bàʼsɨ nɨ̀ ifu i nyoʼnɨ-i zɨ̀ a yi n-bɨsɨ fu kɨ̀ mɨchi ɨ̀n jɨ̀m tì. ²⁴À ti ta yi n-kelɨ sɨ nà fu ifu ɨfwo ɨ yɨnɨ nâ yèynì a ghɨ n-nyôʼ nyôʼ têyn a mɨchi nâ ghàyn nsòmbo, yi lɨ̂mtɨ̀ fom sɨ̂ Bôbo Fɨyini. Yi n-kelɨ sɨ nà fu-a baʼsɨ̂ nɨ̀ ìfu i nyoʼnɨ-i zɨ̀ a yi n-fu kɨ mɨchi ɨ̀n jɨ̀m baʼsɨ̂ nɨ̀ ìfu i nyvɨnɨ ateyn i. ²⁵À na ghɨ a mɨchi nsòmbo, yi yvɨ̀ŋtɨ̀ ɨ̀ kòʼsɨ Bôbo Fɨyini. Ka wùl nɨ̂n fèl ìwo antêynɨ̀ àwo ghè a wù lum felɨ̀.

Tɨfu tɨ ayɨ ɨlvɨ ta ghɨ kfì ɨfwo ɨ yɨnɨ

²⁶“À na ghɨ achi ghè a yi n-fu mɨtam mɨ̀ àsɨ sɨ̂ Bôbo Fɨyini ɨlvɨ ta yi n-yɨ ayɨ kì a ghɨ n-yɨ ɨlvɨ ta yì kfì ɨfwo sɨ a gvêynsɨ̀, yi yvɨ̀ŋtɨ̀ ɨ koʼsɨ Bôbo Fɨyini. Ka wùl nɨ̂n fèl ìwo antêynɨ̀ àwo ghè a wù lum fèl. ²⁷Yi n-kelɨ sɨ fu ifu i nyoʼnɨ-i a ghɨ woyn nyamsɨ mbòloʼ sɨ lûmnɨ̀sɨ̀ sɨ̀ bò, nɨ̀ àyaʼa nɨ̀ njɨ̀sɨ̀ nsòmbo ma sɨ chem meyn bèŋ, a ghɨ ìfu, lɨ̂mtɨ̀ fom sɨ̂ Bôbo Fɨyini. ²⁸Yi se sɨ fu nô mɨ nyâm mbòloʼ ì kà, yi fu baʼsɨ ìfu ɨfwo ɨ yɨnɨ a ghɨ ɨ̀nkfɨ̂ŋ kilùsɨ̀ tal ma ghɨ gva meyn mɨ̀ faytɨ kfɨ ɨ̀ fyes nɨ̀ mɨ̀vɨ̂l, ɨ̀ se sɨ fu ayaʼ yi baʼsɨ kilùsɨ ɨnkfɨ̀ŋ sɨ̀ bò ma ghɨ gva meyn mɨ̀ faytɨ kfɨ ɨ̀ fyes nɨ̀ mɨvɨl. ²⁹Yi se sɨ fu nô mɨ wâyn njɨ̀ ɨ̀ kfà antêynɨ̀ woyn njɨ̀sɨ̀ afî nsòmbo yi fu baʼsɨ kilù ɨ̀nkfɨ̀ŋ, ³⁰ɨ̀ se sɨ fu yi baʼsɨ ìfef sɨ ifu sɨ yuyn atu à ki-a. ³¹Yì na se sɨ fu ifu nâ yèynì nɨ̀ ìfu i nyvɨnɨ-i ateyn, yi baʼsɨ ìfu i nyoʼnɨ-i zɨ̀ a yi n-fu kɨ̀ mɨchi ɨ̀n jɨ̀m nɨ̀ ìfu ɨfwo ɨ yɨnɨ-i ateyn i. Ka nyàm na kelɨ nseʼi antêynɨ̀ nyàmsɨ̀ nâ ghàyn.”