Numbers 29

Ayɨ ɨchfɨ bêŋ

¹À na ghɨ achi a kɨ asɨ-a a njoŋsɨ nsòmbo nô mɨ a bêŋ ì kà yi yvɨ̀ŋtɨ̀ ɨ koʼsɨ Bôbo Fɨyini. Ka wùl nɨ̂n fèl ìwo antêynɨ̀ àwo ghè a wù lum fèl. À n-ghɨ àchi kì a ka yì toŋ tɨsoŋ ateyn. ²À na ghɨ achi nâ ghàyn, yi fu ifu i nyoʼnɨ-i yi lɨ̂mtɨ̀ fom sɨ̂ Bôbo Fɨyini, a ghɨ wâyn nyàm mbòloʼ ɨ lûmnɨ̀ nɨ̀ àyaʼa kɨ̀mɨ nɨ̀ woyn njɨ̀ sɨ lûmnɨ̀sɨ̀ nsòmbo sɨ ghɨ bèŋ. Nyam nâ sèynsɨ̀ na ghɨ kelɨ wi nseʼi. ³Yi se sɨ fu nyâm mbòloʼ, yi fu baʼsɨ ìfu ɨfwo ɨ yɨnɨ a ghɨ ɨ̀nkfɨ̂ŋ kilùsɨ̀ tal ma ghɨ gva meyn mɨ̀ faytɨ kfɨ ɨ̀ fyes nɨ̀ mɨ̀vɨ̂l, ɨ̀ se sɨ fu ayaʼ yi bàʼsɨ kilùsɨ ɨnkfɨ̀ŋ sɨ̀ bò ma ghɨ gva meyn mɨ̀ faytɨ kfɨ ɨ̀ fyes nɨ̀ mɨ̀vɨ̂l, ⁴ɨ̀ se sɨ fu nô mɨ̀ wâyn njɨ̀ ɨ̀ kfà antêynɨ̀ woyn njɨ̀sɨ̀ afî nsòmbo yi baʼsɨ kilù ɨnkfɨ̀ŋ ateyn. ⁵Yi se sɨ fu yi baʼsɨ ìfef sɨ ifu na Bôbo Fɨyini lesɨ fù mbɨ sisɨ, ɨ̀ yuyn atu à ki-a. ⁶Tɨfu nâ tèyntɨ̀ nɨn baʼsɨ̂ sɨ̂ tɨ̀fu tɨ nyoʼnɨ tìtɨ̀ a yi n-fu kɨ̀ njoŋ sɨ̀ jɨ̀m nɨ̀ mɨ̀chi ɨ̀n jɨ̀m baʼsɨ̂ nɨ̀ tɨ̀fu tɨ ɨfwo ɨ yɨnɨtɨ nɨ̀ tɨ̀futɨ nyvɨnɨtɨ kɨ̀ ighel ta isaʼi nɨn dyêyn. A n-ghɨ tɨ̀fu, ghɨ nyôʼ nyoʼ tɨ lɨ̂mtɨ̀ fom sɨ̂ Bôbo Fɨyini.

Achi kì a ghɨ n-yuyn atu ateyn

⁷À na ghɨ a mɨchi ìvɨm a njoŋsɨ nsòmbo, yi yvɨ̂ŋtɨ̀ ɨ koʼsɨ Bôbo Fɨyini. Ka yi n-yɨ afo kèsa fèl ìwo achi nâ ghè. ⁸Yi n-fu ìfu i nyoʼnɨ-i yi lɨ̂mtɨ̀ fom sɨ̂ Bôbo Fɨyini. Ifu ateyn i na ghɨ wâyn nyàm mbòloʼ ɨ lûmnɨ̀ nɨ̀ àyaʼa kɨ̀mɨ nɨ̀ woyn njɨ̀ sɨ lûmnɨ̀sɨ̀ nsòmbo sɨ ghɨ bèŋ. Nyam nâ sèynsɨ̀ nô sɨ̀ jɨ̀m na ghɨ kelɨ wi nseʼi. ⁹Yi se sɨ fu nô mɨ nyâm mbòloʼ ì kà yi fu baʼsɨ nɨ̀ ìfu ɨfwo ɨ yɨnɨ a ghɨ kilùsɨ ɨnkfɨ̀ŋ sɨ̀ tal ma ghɨ gva meyn mɨ̀ faytɨ kfɨ ɨ̀ fyes nɨ̀ mɨ̀vɨ̂l. Yì se sɨ fu ayaʼ yi fu kɨmɨ ìfu ɨfwo ɨ yɨnɨ a ghɨ kilùsɨ̀ ɨ̀nkfɨ̀ŋ sɨ̀ bò ma ghɨ gva meyn mɨ̀ faytɨ kfɨ ɨ̀ fyes nɨ̀ mɨ̀vɨ̂l. ¹⁰Yi se sɨ fu nô mɨ wâyn njɨ̀ ɨ̀ kfà antêynɨ̀ woyn njɨ̀sɨ̀ afî nsòmbo yi fu baʼsɨ kilù ɨ̀nkfɨ̀ŋ ateyn. ¹¹Yi n-fu kɨmɨ ìfef sɨ ifu sɨ̂ Bôbo Fɨyini na wù lesɨ fù mbɨsɨ sɨ baʼsɨ sɨ ifu afî a yì fu na Bôbo Fɨyini lesɨ fù mbɨsɨ fì yuyn atu à ki-a sɨ kfeynsɨ sɨ̂ ìfu i nyoʼnɨ-i zɨ̀ a ghɨ n-nyôʼ kɨ mɨchi ɨ̀n jɨ̀m baʼsɨ̂ nɨ̀ ìfu ɨfwo ɨ yɨnɨ nɨ̀ i nyvɨnɨ-i.

Ayɨ ibàʼlɨ̀ i mɨ̂twò

¹²À na ghɨ a mɨchi njvàsɨ̀ tâyn a njoŋsɨ nsòmbo, yi yvɨ̀ŋtɨ̀ ɨ koʼsɨ Bôbo Fɨyini. Ka yi n-fèl ìwo antêynɨ̀ àwo ghè a yì lum fèl. Yi n-kelɨ sɨ yɨ ayɨ nâ kèynà sɨ koʼsɨ Bôbo Fɨyini sɨ a mɨchi nsòmbo. ¹³À na ghɨ achi a kɨ asɨ-a yi fu ifu ghɨ nyôʼ nyoʼ yi lɨ̂mtɨ̀ fom sɨ̂ Bôbo Fɨyini. Ifu i nyoʼnɨ-i nâ yèynì nɨn ghɨ woyn nyamsɨ mbòloʼ njvàsɨ̀ tal, nɨ̀ ɨ̀ywaʼ ɨ̀ bwò kɨ̀mɨ nɨ̀ njɨ̀sɨ̀ njvàsɨ̀ kæ̀ ma sɨ chem meyn bèŋ. Nyamsɨ ateynsɨ nô sɨ̀ jɨ̀m na ghɨ kelɨ wi nseʼi. ¹⁴Yi se sɨ fu nô mɨ nyâm mbòloʼ ì kà antêynɨ̀ nyamsɨ nâ ghàyn njvàsɨ̀ tal, yi fu baʼsɨ nɨ̀ ìfu ɨfwo ɨ yɨnɨ a ghɨ kilùsɨ ɨnkfɨ̀ŋ sɨ̀ tal ma ghɨ gva meyn mɨ̀ faytɨ kfɨ ɨ̀ fyes nɨ̀ mɨ̀vɨ̂l. Yi se sɨ fu ɨywaʼ vzɨ̀ ɨ̀ bwò, yi fu kɨmɨ ìfu ɨfwo ɨ yɨnɨ a ghɨ kilùsɨ ɨnkfɨ̀ŋ sɨ̀ bò ma ghɨ gva meyn mɨ̀ faytɨ kfɨ ɨ̀ fyes nɨ̀ mɨ̀vɨ̂l, ¹⁵ɨ̀ se sɨ fu nô mɨ wâyn njɨ̀ ɨ̀ kfà antêynɨ̀ woyn njɨ̀sɨ̀ afî njvàsɨ̀ kæ̀, yi fu baʼsɨ kilù ɨ̀nkfɨ̀ŋ. ¹⁶Yi n-fu kɨmɨ ìfef sɨ ifu sɨ̂ Bôbo Fɨyini na wù lesɨ fù mbɨsɨ sɨ baʼsɨ sɨ ifu i nyoʼnɨ-i zɨ̀ a yi n-fu kɨ mɨchi ɨ̀n jɨ̀m tì nɨ̀ ìfu ɨfwo ɨ yɨnɨ baʼsɨ nɨ̀ ìfu i nyvɨnɨ-i.

¹⁷“À na ghɨ a ànkùmtɨ̀ achi a yì fu woyn nyâm mbòloʼ njvàsɨ̀ bò, nɨ̀ ɨ̀ywaʼ ɨ̀ bwò nɨ̀ woyn njɨ̀sɨ̀ njvàsɨ̀ kæ̀ sɨ ghɨ bèŋ. Nyam nâ sèynsɨ̀ nô sɨ̀ jɨ̀m na ghɨ kelɨ wi nseʼi. ¹⁸Yi se sɨ fu nyamsɨ mbòloʼ sìsɨ̀ nɨ̀ ɨ̀ywaʼ vzɨ̀, baʼsɨ̂ nɨ̀ woyn njɨ̀sɨ̀ ghî, yi fu kɨmɨ ìfu ɨfwo ɨ yɨnɨ nɨ̀ ìfu i nyvɨnɨ-i kɨ̀ ighel ta isaʼi nɨn dyêyn. ¹⁹Yi n-fu kɨmɨ ìfef sɨ ifu sɨ̂ Bôbo Fɨyini na wù lesɨ fù mbɨsɨ sɨ baʼsɨ sɨ ifu i nyoʼnɨ-i zɨ̀ a yi n-fu kɨ mɨchi ɨ̀n jɨ̀m tì nɨ̀ ìfu ɨfwo ɨ yɨnɨ-i baʼsɨ nɨ̀ ìfu i nyvɨnɨ-i.”

²⁰À na ghɨ a mɨchi ɨ̀n tal, yi fu woyn nyâm mbòloʼ, nɨ̀ ɨ̀ywaʼ ɨ̀ bwò nɨ̀ woyn njɨ̀sɨ̀ njvàsɨ̀ kæ̀ ma sɨ chem meyn bèŋ. Nyam nâ sèynsɨ̀ nô sɨ̀ jɨ̀m na ghɨ kelɨ wi nseʼi. ²¹Yi se sɨ fu nyamsɨ mbòloʼ sìsɨ̀ nɨ̀ ɨ̀ywaʼ vzɨ̀, baʼsɨ̂ nɨ̀ woyn njɨ̀sɨ̀ ghî, yi fu kɨmɨ ìfu ɨfwo ɨ yɨnɨ nɨ̀ ìfu i nyvɨnɨ-i kɨ̀ ighel ta isaʼi nɨn dyêyn. ²²Yi n-fu kɨmɨ ìfef sɨ ifu sɨ̂ Bôbo Fɨyini na wù lesɨ fù mbɨsɨ sɨ baʼsɨ sɨ ifu i nyoʼnɨ-i zɨ̀ a yi n-fu kɨ mɨchi ɨ̀n jɨ̀m tì nɨ̀ ìfu ɨfwo ɨ yɨnɨ baʼsɨ nɨ̀ ìfu i nyvɨnɨ-i.

²³“À na ghɨ a mɨchi ɨ̀n kæ̀, yi fu woyn nyâm mbòloʼ ìvɨm, nɨ̀ ɨ̀ywaʼ ɨ̀ bwò nɨ̀ woyn njɨ̀sɨ̀ njvàsɨ̀ kæ̀ ma sɨ chem meyn bèŋ. Nyam nâ sèynsɨ̀ nô sɨ̀ jɨ̀m na ghɨ kelɨ wi nseʼi. ²⁴Yi se sɨ fu nyamsɨ mbòloʼ sìsɨ̀ nɨ̀ ɨ̀ywaʼ vzɨ̀, baʼsɨ̂ nɨ̀ woyn njɨ̀sɨ̀ ghî, yi fu kɨmɨ ìfu ɨfwo ɨ yɨnɨ nɨ̀ ìfu i nyvɨnɨ-i kɨ̀ ighel ta isaʼi nɨn dyêyn. ²⁵Yi n-fu kɨmɨ ìfef sɨ ifu sɨ̂ Bôbo Fɨyini na wù lesɨ fù mbɨsɨ sɨ baʼsɨ sɨ ifu i nyoʼnɨ-i zɨ̀ a yi n-fu kɨ mɨchi ɨ̀n jɨ̀m tì nɨ̀ ìfu ɨfwo ɨ yɨnɨ baʼsɨ nɨ̀ ìfu i nyvɨnɨ-i.”

²⁶“À na ghɨ a mɨchi ɨ̀n tâyn, yi fu woyn nyâm mbòloʼ bulamòʼ, nɨ̀ ɨ̀ywaʼ ɨ̀ bwò nɨ̀ woyn njɨ̀sɨ̀ njvàsɨ̀ kæ̀ ma sɨ chem meyn bèŋ. Nyam nâ sèynsɨ̀ nô sɨ̀ jɨ̀m na ghɨ kelɨ wi nseʼi. ²⁷Yi se sɨ fu nyamsɨ mbòloʼ sìsɨ̀ nɨ̀ ɨ̀ywaʼ vzɨ̀, baʼsɨ̂ nɨ̀ woyn njɨ̀sɨ̀ ghî, yi fu kɨmɨ ìfu ɨfwo ɨ yɨnɨ nɨ̀ ìfu i nyvɨnɨ-i kɨ̀ ta isaʼi nɨn dyêyn. ²⁸Yi n-fu kɨmɨ ìfef sɨ ifu sɨ̂ Bôbo Fɨyini na wù lesɨ fù mbɨsɨ sɨ baʼsɨ sɨ ifu i nyoʼnɨ-i zɨ̀ a yi n-fu kɨ mɨchi ɨ̀n jɨ̀m tì nɨ̀ ìfu ɨfwo ɨ yɨnɨ baʼsɨ nɨ̀ ìfu i nyvɨnɨ-i.

²⁹“À na ghɨ a mɨchi ntufa, yi fu woyn nyâm mbòloʼ nfama, nɨ̀ ɨ̀ywaʼ ɨ̀ bwò nɨ̀ woyn njɨ̀sɨ̀ njvàsɨ̀ kæ̀ ma sɨ chem meyn bèŋ. Nyam nâ sèynsɨ̀ nô sɨ̀ jɨ̀m na ghɨ kelɨ wi nseʼi. ³⁰Yi se sɨ fu nyamsɨ mbòloʼ sìsɨ̀ nɨ̀ ɨ̀ywaʼ vzɨ̀, baʼsɨ̂ nɨ̀ woyn njɨ̀sɨ̀ ghî, yi fu kɨmɨ ìfu ɨfwo ɨ yɨnɨ nɨ̀ ìfu i nyvɨnɨ-i kɨ̀ ta isaʼi nɨn dyêyn. ³¹Yi n-fu kɨmɨ ìfef sɨ ifu sɨ̂ Bôbo Fɨyini na wù lesɨ fù mbɨsɨ sɨ baʼsɨ sɨ ifu i nyoʼnɨ-i zɨ̀ a yi n-fu kɨ mɨchi ɨ̀n jɨ̀m tì nɨ̀ ìfu ɨfwo ɨ yɨnɨ baʼsɨ nɨ̀ ìfu i nyvɨnɨ-i.”

³²“À na ghɨ a mɨchi nsòmbo, yi fu woyn nyâm mbòloʼ nsòmbo, nɨ̀ ɨ̀ywaʼ ɨ̀ bwò nɨ̀ woyn njɨ̀sɨ̀ njvàsɨ̀ kæ̀ ma sɨ chem meyn bèŋ. Nyam nâ sèynsɨ̀ nô sɨ̀ jɨ̀m na ghɨ kelɨ wi nseʼi. ³³Yi se sɨ fu nyamsɨ mbòloʼ sìsɨ̀ nɨ̀ ɨ̀ywaʼ vzɨ̀, baʼsɨ̂ nɨ̀ woyn njɨ̀sɨ̀ ghî, yi fu kɨmɨ ìfu ɨfwo ɨ yɨnɨ nɨ̀ ìfu i nyvɨnɨ-i kɨ̀ ta isaʼi nɨn dyêyn. ³⁴Yi n-fu kɨmɨ ìfef sɨ ifu sɨ̂ Bôbo Fɨyini na wù lesɨ fù mbɨsɨ sɨ baʼsɨ sɨ ifu i nyoʼnɨ-i zɨ̀ a yi n-fu kɨ mɨchi ɨ̀n jɨ̀m tì nɨ̀ ìfu ɨfwo ɨ yɨnɨ baʼsɨ nɨ̀ ìfu i nyvɨnɨ-i.”

³⁵“À na ghɨ a mɨchi nfama yi yvɨ̀ŋtɨ̀ ɨ koʼsɨ Bôbo Fɨyini. Ka wùl nɨn fèl ìwo antêynɨ̀ àwo ghè a wù lum fèl. ³⁶Yi n-kelɨ sɨ fu ifu ghɨ nyôʼ nyoʼ yi lɨ̂mtɨ̀ fom sɨ̂ Bôbo Fɨyini. Ifu i nyoʼnɨ-i nâ yèynì nɨn ghɨ wâyn nyàm mbòloʼ, nɨ̀ àyaʼa kɨ̀mɨ nɨ̀ woyn njɨ̀sɨ̀ nsòmbo ma sɨ chem meyn bèŋ. Nyamsɨ ateynsɨ nô sɨ̀ jɨ̀m na ghɨ kelɨ wi nseʼi. ³⁷Yi se sɨ fu nyam mbòloʼ zɨ̀ nɨ̀ àyaʼ kì bàʼsɨ nɨ̀ woyn njɨ̀sɨ̀ ghî, yi fu kɨmɨ ìfu ɨfwo ɨ yɨnɨ nɨ̀ ìfu i nyvɨnɨ-i kɨ̀ ighel ta isaʼi nɨn dyêyn. ³⁸Yi n-fu kɨmɨ ìfef sɨ ifu sɨ̂ Bôbo Fɨyini na wù lesɨ fù mbɨsɨ sɨ baʼsɨ sɨ̂ ìfu i nyoʼnɨ-i zɨ̀ a yi n-fu kɨ mɨchi ɨ̀n jɨ̀m tì nɨ̀ ìfu ɨfwo ɨ yɨnɨ baʼsɨ nɨ̀ ìfu i nyvɨnɨ-i.”

³⁹“À ti tɨfu tìtɨ̀ a yi n-kelɨ sɨ nà fu-a sɨ baʼsɨ sɨ̂ tɨ̀fu tìtɨ̀ a yì chfɨ̀nɨ̀ chfɨnɨ sɨ fu nɨ̀ ɨ tîtɨ̀ a yì chòʼnɨ choʼnɨ sɨ fu sɨ̂ Bôbo Fɨyini ɨlvɨ ayɨ nɨ̀ zɨ̀. Tɨfu nâ tèyntɨ̀ nɨn ghɨ tɨ̀futɨ nyoʼnɨtɨ nɨ̀ tɨ̀fu tɨ ɨfwo ɨ yɨnɨtɨ nɨ̀ tɨ̀futɨ nyvɨnɨtɨ baʼsɨ̂ nɨ̀ tɨ̀futɨ sɨ nà chi nɨ̀ mbôynɨ̀.”

⁴⁰Mosìs nɨ̀n feʼtɨ meyn awo kì a Bôbo Fɨyini bè nô à jɨ̀m sɨ̂ ghelɨ Isìlæ̀.