Numbers 27

Woyn ghɨki nɨ̀ Zèlofehàd

¹Woyn ghɨki nɨ̀ Zèlofehàd na n-ghɨ wâyn Hefà, Hefà ɨ ghɨ wâyn Gilèd, Gilèd ɨ ghɨ wâyn Makì, Makì ɨ ghɨ wâyn Mànasè. Ghelɨ nâ ghèyn nà n-ghɨ ghelɨ asas a ndo nɨ̀ Mànasè ɨ wâyn Josèf. Azɨyn a woyn ghɨ̂kì nâ ghèyn nà n-ghɨ Malà nɨ̀ Nuwà nɨ̀ Hoglà nɨ̀ Milkà baʼsɨ̂ nɨ̀ Tizà. Àŋena nɨn læ meyn ndu, ²ɨ timi asɨ nɨ̀ Mosìs ŋêyn Elezà ɨ ngàŋ ndô Fɨyini nɨ̀ ghelɨ ghɨ tisɨnɨ a Isìlæ̀ baʼsɨ̂ nɨ̀ ghelɨ Isìlæ̀ nô ghɨ̀ jɨ̀m ɨchfɨ fɨndo nɨ̀ Bôbo Fɨyini ɨ be na, ³“Bò wes nɨn læ kfɨ a nse iyum kelɨ wi woyn ghɨ lûmnɨ̀. Wu n-bu læ nà ghɨ anòyn nɨ̀ tɨ̀bam tɨ Kolà tìtɨ̀ a tɨ n-læ to nɨ̀ àtu a sɨ̂ Bôbo Fɨyini. Wù n-læ kfɨ kɨ bòm mbɨ ŋweyn. ⁴Ba yi ti n-ghɨ na izɨyn i bò wes nɨn le sɨ a Isìlæ̀ bòm ta wù bu tî nà kelɨ wayn ɨ lûmnɨ̀ a? Yi fu alêʼ sɨ̂ ghès alèʼ nɨ̀ ghelɨ isas i ndo nɨ̀ bò wes.”

⁵Àŋena nɨn taŋi tî, Mosìs ɨ li ndù nɨ̀ ìwo ateyn i asɨ nɨ̀ Bôbo Fɨyini. ⁶Bôbo Fɨyini ɨ bè sɨ̂ ŋweyn na, ⁷“Iwo zɨ̀ a woyn ghɨki nɨ̀ Zèlofehàd nɨn bê nɨn ghɨ kɨ nô samoʼ. Wà n-kelɨ sɨ fu alêʼ sɨ̂ àŋena alèʼ nɨ̀ ghelɨ isas i ndo nɨ̀ bò àŋena na àŋena na kelɨ-a Wa n-kelɨ sɨ fu kɨmɨ alêʼ a bò àŋena sɨ̂ àŋena.

⁸“Bè sɨ̂ ghelɨ Isìlæ̀ na, ‘Wùl ɨ̀ kæ kfɨ, kelɨ wi wayn ɨ lûmnɨ̀ a ghɨ fu alêʼ a ŋweyn sɨ̂ woyn ghɨ̂kì nɨ̀ ŋweyn. ⁹Wù kæ nà kelɨ wi woyn ghɨ̂kì, ghɨ fu ɨlwêʼ ŋweyn sɨ̂ woynà ŋweyn ghɨ lûmnɨ̀. ¹⁰Wùl àteyn kæ kfɨ kelɨ wi woyn ghɨ̂nì a ghɨ fu alêʼ a ŋweyn sɨ̂ woynà bò ŋweyn. ¹¹À kæ nà ghɨ bula bò ŋweyn tî nà kelɨ woyn ghɨ̂nì a ghɨ fu alêʼ a ŋweyn sɨ̂ wùl ìsas i ndo nɨ̀ àŋena vzɨ̀ a wù n-baʼsɨ sɨ̂ ŋweyn à na kelɨ kɨ nô ŋweyn. Ghelɨ Isìlæ̀ nɨn kelɨ sɨ nà lêm isaʼ nâ yèynì kɨ̀ ighel ta Bôbo Fɨyini nɨ̂n bè sɨ̂ Mosìs.’”

Bobo Fɨyini ɨ choʼ Joshwà na wù li alêʼ a Mosìs

¹²Bôbo Fɨyini nɨn be meyn sɨ̂ Mosìs na, “Koʼ atû kfɨ̀yn Abalìm ɨ ki dyàŋsɨ̀ nɨ̀ ìlaʼ zɨ̀ a mà fu sɨ̂ ghelɨ Isìlæ̀. ¹³Wa n-yeyn ìlaʼ ateyn nô mɨ ɨlvɨ gha ɨ̀ kfɨ ndu yeyn ghɨ̀bo ghya kɨ̀mɨ ta wâynà vâ Alòyn tî kfɨ. ¹⁴Wa n-kfɨ-a bòm ta a nà n-ghɨ ta ghelɨ Isìlæ̀ to nɨ̀ àtu a sɨ̂ mà a jvâ a nse iyum a Zîn, zɨ̂ Alòyn ɨ faŋ tɨ̀ yvɨnɨ ma sɨ dyeyn sɨ̂ ghelɨ Isìlæ̀ na mɨ n-layna.” Jvà nâ yèyn nà n-ghɨ jvâ Melibà a Kadèsh a nse iyum a Zîn.

¹⁵Mosìs ɨ kæ be sɨ̂ Bôbo Fɨyini na, ¹⁶“Mɨ n-jêm na Bôbo Fɨyini ɨ Fɨyini fìfɨ̀ a fɨ n-fu ichi nô mɨ sɨ̂ ghà ta kɨ n-zuêsɨ̀ choʼ wul wù na tisɨ̂ ghelɨ Isìlæ̀, ¹⁷lî seʼ nɨ̀ àŋena iwòŋ kasi kfâ. Wù n-kelɨ sɨ nà tisɨ àŋena ta ka ghelɨ Bôbo Fɨyini na ghɨ wi ta njɨ̀sɨ̀ bula nchì.”

¹⁸Bôbo Fɨyini ɨ kæ be sɨ̂ Mosìs na, “Li Joshwà ɨ wâyn Nûn, a ghɨ wul kelɨ àtem a to-a ɨ lèm àwu à kya a ŋweyn atu. ¹⁹Wà lêm wa bè wù timi asɨ nɨ̀ Elezà ɨ ngàŋ ndô Fɨyini nɨ̀ ghelɨ Isìlæ̀ nô ghɨ̀ jɨ̀m wà lèm ŋweyn sɨ a wûl ɨ tisɨnɨ vzɨ̀ a mà choʼ. ²⁰Fu adyaʼ à kya a li-a sɨ̂ ŋweyn ta ka ghelɨ Isìlæ̀ nô ghɨ̀ jɨ̀m na yvɨnɨ̂ ŋweyn. ²¹Joshwà na ndù asɨ nɨ̀ Elezà ɨ ngàŋ ndô Fɨyini sɨ bɨf iwo zɨ̀ a Fɨyini fɨ nɨn kɨŋ, a Elezà bɨf iwo sɨ̂ Bôbo Fɨyini nɨ̀ yùlîm ɨ̀ fèʼtɨ̀ sɨ̂ ŋweyn. À ti ta Joshwà na tisɨ ghelɨ Isìlæ̀ ɨlvɨ ta àŋena nɨn seʼ iwoŋ tisɨ̂ ɨlvɨ ta àŋena nɨn kasi kfa.”

²²Bôbo nɨn taŋi tî, Mosìs ɨ lì Joshwà wu ndu timi asɨ nɨ̀ Elezà ɨ ngàŋ ndô Fɨyini nɨ̀ ghelɨ Isìlæ̀ nô ghɨ̀ jɨ̀m kɨ̀ ighel ta Bôbo Fɨyini bè sɨ̂ ŋweyn. ²³Mosìs ɨ kæ lèm ɨwu ŋweyn atu nɨ̀ Joshwà kɨ ighel ta Bôbo Fɨyini nɨ̀n læ bè ɨ lèm ŋweyn sɨ a wûl ɨ tisɨnɨ asɨ nɨ̀ ghelɨ Isìlæ̀ nô ghɨ̀ jɨ̀m.