Numbers 2

Dzɨ̀ zɨ̂ a ka asas a ndosɨ nɨ̀ ghelɨ Isìlæ̀ bɨ ateyn

¹Bôbo Fɨyini nɨ̀n be meyn sɨ̂ Mosìs ŋêyn Alòyn na, ²“Ghelɨ Isìlæ̀ na se sɨ kas mɨtwo mɨ̀ àŋena alèʼ ghè a ghɨ bɨ̀ ateyn, ghɨ fu aghaf sɨ̂ fɨ̀ndo fɨ Bôbo Fɨyini fɨ. Nô mɨ ndà nɨn kelɨ kɨ sɨ nà kas ɨtwo ŋweyn alèʼ ghè a ghɨ chwæ̀ sɨ dyèyn na à n-ghɨ àlêʼ isas i ndo nɨ̀ àŋena.”

³Inôyn i ghelɨ Judà nɨn kelɨ sɨ bɨ̀ abàs a fɨndo nɨ̀ Bôbo ghè a ɨchfɨ-iyvɨ i nɨn sal ateyn alèʼ ghè a ghɨ chwæ̀ sɨ dyèyn na à n-kelɨ àŋena. Wùl ɨ̀ vzɨ̀ a ka wù na tisɨ̂ ìsas i ndo nɨ̀ Judà na ghɨ Nashòn ɨ wâyn Àminadàb. ⁴Ghelɨ anòyn nɨ̀ Judà nà n-chɨ̂yntɨ̀ ghɨ nkam mɨ̀vɨ̂m nsòmbo njvàsɨ̀ kæ̀ nɨ̀ ghelɨ ighɨ ntufa.

⁵Ghelɨ isas i ndo nɨ̀ Isakà nɨn bɨ̀ a ngùŋ nɨ̀ ghelɨ Judà. Wul ɨ̀ vzɨ̀ a ka wù na tisɨ àŋena na ghɨ Nètanèl ɨ wâyn Zuwà. ⁶Ghelɨ anòyn nɨ̀ Isakà nà n-ghɨ nkam mɨ̀vɨm ɨ̀n tâyn njvàsɨ̀ kæ̀ nɨ̀ ghelɨ ighɨ ì kæ̀.

⁷Ghelɨ isas i ndo nɨ̀ Zebulòn nɨn bɨ̀ a ngùŋ nɨ̀ ghelɨ Isakà. Wul ɨ̀ vzɨ̀ a ka wù na tisɨ àŋena na ghɨ Elìyàb ɨ wâyn Helòn. ⁸Ghelɨ anòyn nɨ̀ Isakà nà n-ghɨ nkam mɨ̀vɨm ɨ̀n tâyn njvàsɨ̀ nsòmbo nɨ̀ ghelɨ ighɨ ì kæ.

⁹Ghelɨ ghì a ghɨ nà n-ghɨ sɨ bɨ̀ alèʼ isas i ndo nɨ̀ ghelɨ Judà nà n-chɨ̂yntɨ̀ ghɨ ghelɨ nkam ɨvɨ nɨ̀ ghelɨ mɨ̀vɨ̂m nfama njvàsɨ̀ ntufa nɨ̀ ghelɨ ighɨ ì kæ̀. Ghelɨ Isìlæ̀ na se sɨ lu sɨ alèʼ ghè a àŋena bɨ̀ ateyn a nà ndû ìnôyn i ghelɨ Judà asɨ.

¹⁰Inôyn i ghelɨ Lubèn nɨn kelɨ sɨ bɨ̀ abàs itsɨyn a ngùŋ fɨ̀ndo nɨ̀ Bôbo alèʼ ghè a ghɨ chwæ̀ sɨ dyèyn na à n-kelɨ àŋena. Wùl ɨ̀ vzɨ̀ a ka wù na tisɨ̂ ghelɨ Lubèn na ghɨ Elizù ɨ wâyn Shedù. ¹¹Ghelɨ anòyn nɨ̀ Lubèn nà n-ghɨ nkam mɨ̀vɨm ɨ̀n kæ̀ njvàsɨ̀ ntufa nɨ̀ ghelɨ ighɨ ì tâyn. ¹²Ghelɨ isas i ndo nɨ̀ Simìyòn nɨn bɨ̀ a ngùŋ nɨ̀ ghelɨ Lubèn. Wul ɨ̀ vzɨ̀ a ka wù na tisɨ àŋena na ghɨ Shèlumèl ɨ wâyn Zùlishadày. ¹³Ghelɨ anòyn nɨ̀ Simìyòn nà n-ghɨ nkam mɨ̀vɨm ɨ̀n tâyn njvàsɨ̀ bulamòʼ nɨ̀ ghelɨ ighɨ ì tal. ¹⁴Ghelɨ isas i ndo nɨ̀ Gâd nɨn bɨ̀ a ngùŋ nɨ̀ ghelɨ Simìyòn. Wul ɨ̀ vzɨ̀ a ka wù na tisɨ àŋena na ghɨ Elìyasàf ɨ wâyn Dewèl. ¹⁵Ghelɨ anòyn nɨ̀ Gâd nà n-ghɨ nkam mɨ̀vɨm ɨ̀n kæ̀ njvàsɨ̀ tâyn nɨ̀ ghelɨ ighɨ ntufa nɨ̀ ghelɨ mɨ̀vɨm ɨ̀n tâyn. ¹⁶Ghelɨ ghì a ghɨ nà n-ghɨ sɨ bɨ̀ alèʼ isas i ndo nɨ̀ ghelɨ Lubèn nà n-chɨ̂yntɨ̀ ghɨ ghelɨ nkam ɨvɨ nɨ̀ ghelɨ nkamsɨ mɨ̀vɨm ɨ̀n tâyn nɨ̀ ghelɨ ighɨ ì kæ̀ nɨ̀ ghelɨ mɨ̀vɨm ɨ̀n tâyn. Ghelɨ Isìlæ̀ na se sɨ lu sɨ alèʼ ghè a àŋena bɨ̀ ateyn, inôyn i ghelɨ Lubèn ɨ nà ndû ibàm nɨ̀ ghelɨ Judà. ¹⁷Ghɨ na se sɨ lù sɨ alèʼ ghè a ghɨ bɨ̀ ateyn, inôyn i Judà ì nɨ̀ iyi Lubèn ì ɨ nà ndû asɨ, ghelɨ isas i ndo nɨ̀ Levì ɨ bèʼì fɨndo fɨ Bobo ɨ nà ndû a àŋena ibàm, inôyn i ghelɨ Isìlæ̀ i li ɨ gvî ibàm. Àŋena na lù kɨ a mbaŋi a mbaŋi kɨ̀ ighel ta àŋena tî bɨ̀ ɨlwèʼ ghè a ghɨ tî chwæ̀ sɨ dyèyn na à n-ghɨ ɨ̀lwêʼ asas a ndosɨ nɨ̀ àŋena. ¹⁸Inôyn i ghelɨ Eflèm nɨn kelɨ sɨ bɨ̀ abàs ghè a ɨchfɨ̂-iyvɨ i nɨn sœ ateyn a ngùŋ fɨ̀ndo nɨ̀ Bôbo alèʼ ghè a ghɨ chwæ̀ sɨ dyèyn na à n-kelɨ àŋena. Wùl ɨ̀ vzɨ̀ a ka wù na tisɨ̂ ghelɨ Eflèm na ghɨ Elishamà ɨ wâyn Amihùd. ¹⁹Ghelɨ anòyn nɨ̀ Eflèm nà n-ghɨ nkam mɨ̀vɨm ɨ̀n kæ̀ nɨ̀ ghelɨ ighɨ ì tâyn. ²⁰Ghelɨ isas i ndo nɨ̀ Mànasè nɨn bɨ̀ a ngùŋ nɨ̀ ghelɨ Eflèm. Wul ɨ̀ vzɨ̀ a ka wù na tisɨ àŋena na ghɨ Gàmalèl ɨ wâyn Bèdazù. ²¹Ghelɨ anòyn nɨ̀ Mànasè nà n-ghɨ nkam mɨ̀vɨm ɨ̀n tal njvàsɨ̀ bò nɨ̀ ghelɨ ighɨ ì bò. ²²Ghelɨ isas i ndo nɨ̀ Benjamìn nɨn bɨ̀ a ngùŋ nɨ̀ ghelɨ Mànasè. Wul ɨ̀ vzɨ̀ a ka wù na tisɨ àŋena na ghɨ Abidàn ɨ wâyn Gidiyonì. ²³Ghelɨ anòyn nɨ̀ Benjamìn nà n-ghɨ nkam mɨ̀vɨm ɨ̀n tal njvàsɨ̀ bò nɨ̀ ghelɨ ighɨ ì kæ̀. ²⁴Ghelɨ ghì a ghɨ nà n-ghɨ sɨ bɨ̀ alèʼ isas i ndo nɨ̀ ghelɨ Eflèm nà n-chɨ̂yntɨ̀ ghɨ ghelɨ nkam ɨvɨ nɨ̀ ghelɨ nkamsɨ nfama nɨ̀ ghelɨ ɨvɨ. Ghelɨ Isìlæ̀ na se sɨ lu sɨ alèʼ ghè a àŋena bɨ̀ ateyn, inôyn i ghelɨ Eflèm ɨ nà ndû ibàm nɨ̀ ghelɨ Levì. ²⁵Inôyn i ghelɨ Dân nɨn kelɨ sɨ bɨ̀ abàs ikuè a ngùŋ fɨ̀ndo nɨ̀ Bôbo alèʼ ghè a ghɨ chwæ̀ sɨ dyèyn na à n-kelɨ àŋena. Wùl ɨ̀ vzɨ̀ a ka wù na tisɨ̂ ghelɨ Eflèm na ghɨ Ahizà ɨ wâyn Amishadày. ²⁶Ghelɨ anòyn nɨ̀ Dân nà n-ghɨ nkam mɨ̀vɨ̂m ntufa njvàsɨ̀ bò nɨ̀ ghelɨ ighɨ nsòmbo. ²⁷Ghelɨ isas i ndo nɨ̀ Ashà nɨn bɨ̀ a ngùŋ nɨ̀ ghelɨ Dân. Wul ɨ̀ vzɨ̀ a ka wù na tisɨ àŋena na ghɨ Bagìyèl ɨ wâyn Oklàn. ²⁸Ghelɨ anòyn nɨ̀ Ashà nà n-ghɨ nkam mɨ̀vɨm ɨ̀n kæ̀ nɨ̀ ghelɨ ighɨ ì tâyn. ²⁹Ghelɨ isas i ndo nɨ̀ Naftalì nɨn bɨ̀ a ngùŋ nɨ̀ ghelɨ Ashà. Wul ɨ̀ vzɨ̀ a ka wù na tisɨ àŋena na ghɨ Ahilà ɨ wâyn Enàn. ³⁰Ghelɨ anòyn nɨ̀ Naftalì nà n-ghɨ nkam mɨ̀vɨm ɨ̀n tâyn njvàsɨ̀ tal nɨ̀ ghelɨ ighɨ ì kæ̀. ³¹Ghelɨ ghì a ghɨ nà n-ghɨ sɨ bɨ̀ alèʼ isas i ndo nɨ̀ ghelɨ Dân nà n-chɨ̂yntɨ̀ ghɨ ghelɨ nkam ɨvɨ nɨ̀ ghelɨ nkamsɨ mɨ̀vɨm ɨ̀n tâyn njvàsɨ̀ nsòmbo nɨ̀ ghelɨ ighɨ ntufa. Ghelɨ Isìlæ̀ na se sɨ lu sɨ alèʼ ghè a àŋena bɨ̀ ateyn, a lu gòʼsɨ̀ ìnôyn i ghelɨ Dân sɨ ɨlwèʼ ghè a ghɨ tî chwæ̀ sɨ dyèyn na à n-ghɨ ɨ̀lweʼ àŋena. ³²Ghɨ n-læ taŋ ghelɨ Isìlæ̀ kɨ̀ achfɨ̀ a ndosɨ achfɨ̀ a ndosɨ ɨlwèʼ ghè a àŋena bɨ̀ ateyn inòyn inòyn, àŋena nà chɨ̂yntɨ̀ ghɨ nkam ighɨ ntufa nɨ̀ nkamsɨ̀ tal nɨ̀ ghelɨ ighɨ ì tâyn nɨ̀ ghelɨ mɨ̀vɨm ɨ̀n tâyn. ³³Ghɨ n-læ se sɨ taŋ ghelɨ asas a ndosɨ nɨ̀ ghelɨ Isìlæ̀ ɨ faŋ tɨ̀ taŋ ghelɨ isas i ndo nɨ̀ Levì ta ghɨ nà n-taŋ ghelɨ ghɨ li kɨ ighel ta Bôbo Fɨyini nɨ̀n bè sɨ̂ Mosìs.

³⁴Ghelɨ Isìlæ̀ nɨn læ meyn nì nô mɨ ghà kɨ ighel ta Bôbo Fɨyini nɨ̀n læ bè sɨ̂ Mosìs. Àŋena nɨn læ bɨ kɨ ɨlwèʼ ghè a ghɨ n-læ chwæ̀ sɨ dyèyn na à n-ghɨ ɨ̀lwêʼ asas a ndosɨ nɨ̀ àŋena. Àŋena na se sɨ lù sɨ alèʼ ghè a ghɨ bɨ̀ ateyn, ghɨ nà lû kɨ asas a ndosɨ asas a ndosɨ, lû kɨ achfɨ̀ a ndosɨ achfɨ̀ a ndosɨ.