Numbers 3

Ghelɨ ndo nɨ̀ Levì

¹Akeynà nɨn ghɨ àzɨyn a woyn Alòyn ŋêyn Mosìs ta ghɨ n-læ nyàʼ ɨtuʼ ghè a Bôbo Fɨyini nɨ̀n tàŋi sɨ̂ Mosis a kfɨyn Sinày. ²Alòyn nà n-kelɨ woyn ghɨ lûmnɨ̀ ghɨ̀ kæ̀, Nadàb ɨ ghɨ wayn ɨwû àsɨ nɨ̀ Abihù nɨ̀ Elezà baʼsɨ̂ nɨ̀ Itamà. ³À ti azɨyn a woyn ghɨ lûmnɨ̀ nɨ̀ Alòyn ghì a ghɨ n-læ yisi ɨ lèm na àŋena na felɨ̀ ta ngàŋsɨ ndô Fɨyini. ⁴Nadàb ŋêyn Abihù nɨ̀n fe meyn ɨ kfɨtɨ asɨ nɨ̀ Bôbo Fɨyini a nse ìyum a Sinày. Àŋena nɨ̀n kfɨ̀tɨ bòm ta ghɨ n-læ nyòʼ ileŋ asɨ nɨ̀ Bôbo isaʼi dyêyn wì na àŋena nyoʼ. Àŋena nà n-kelɨ wi woyn, a faŋ kɨ Elezà ŋêyn Itamà ɨ nà felɨ̀ ta ngàŋsɨ ndo Fɨyini ɨtuʼ nɨ̀ bò àŋena.

⁵Bôbo Fɨyini nɨ̀n bè meyn sɨ̂ Mosìs na, ⁶“Li gvi nɨ̀ ghelɨ ndo nɨ̀ Levì sɨ̂ Alòyn ɨ ngàŋ ndo Fɨyini i ngaŋtɨnɨ ta ka àŋena na gâmtɨ̀ ŋweyn. ⁷Àŋena nɨn kelɨ sɨ nà gamtɨ Alòyn, felɨ̀ sɨ̂ ghelɨ Isìlæ̀ nô ghɨ̀ jɨ̀m a fɨndo nɨ̀ Bôbo Fɨyini. Àŋena na nî ìfêl nô ì jɨ̀m a fɨndo nɨ̀ Bôbo nɨ̀ mbæ̀sɨ ateynsɨ. ⁸Àŋena nɨn kelɨ sɨ nà lî alêʼ a ghelɨ Isìlæ̀ tôʼnɨ̀ nɨ̀ ɨ̀fwo vzɨ̀ a wu n-ghɨ a fɨndo nɨ̀ Bôbo nô ɨ̀ jɨ̀m. ⁹Fu ghelɨ isas i ndo nɨ̀ Levì ghɨ na gâmtɨ̀ Alòyn ŋêyn woyn ŋweyn. Ma choʼ meyn àŋena antêynɨ̀ nɨ̀ ghelɨ Isìlæ̀ na àŋena na nî ìfêl nâ yèynì. ¹⁰Choʼ Alòyn ŋêyn woyn ŋweyn àŋena na felɨ̀ ta ngàŋsɨ ndô Fɨyini. À kæ kɨŋtɨ baʼsɨ̂ nô mɨ ndà ɨ̀ lvɨ̀ a fɨndo nɨ̀ Bôbo Fɨyini, a ghɨ na kelɨ sɨ zue ŋweyn.”

¹¹Bôbo Fɨyini nɨ fi meyn bè sɨ̂ Mosìs na, ¹²“Wa kya na ma choʼ meyn ghelɨ isas i ndo nɨ̀ Levì alèʼ nɨ̀ woyn ghɨ lûmnɨ̀ ɨ ghɨ asɨ a Isìlæ̀. Ghelɨ isas i ndo nɨ̀ Levì nɨn ghɨ ghelɨ̀ ghem, ¹³bòm ta woyn ghɨ lûmnɨ̀ ɨ ghɨ asɨ a Isìlæ̀ nɨn ghɨ ghelɨ̀ ghem. À nà n-ghɨ ta mà zuètɨ woyn ghɨ lûmnɨ̀ ɨ ghɨ asɨ a Ijìb, ma lèm woyn ghɨ lûmnɨ̀ ɨ ghɨ asɨ a Isìlæ̀ sɨ a nyɨŋ nɨ̀ woyn nyâmsɨ lûmnɨ̀sɨ̀ na à kelɨ mà. À n-ghɨ mà Bôbo Fɨyini.” ¹⁴Bôbo Fɨyini nɨn fi meyn taŋi sɨ̂ Mosìs a nse iyum a Sinày ɨ bè na, ¹⁵“Taŋ ghɨ̀lûmnɨ Levì nô ghɨ̀ jɨ̀m ta ghɨ chem njoŋ sɨ ndù asɨ asas a ndosɨ asas a ndosɨ ɨ taŋ ɨchfɨ ndo ɨchfɨ ndo.” ¹⁶Mosìs ɨ kæ taŋ kɨ ighel ta Bôbo Fɨyini bè.

¹⁷Levì nà n-kelɨ woyn ghɨ lûmnɨ̀ ghɨ̀ tal, azɨyn àŋena ɨ ghɨ Geshòn nɨ̀ kohàt kɨmɨ nɨ̀ Mèlalì.

¹⁸Geshòn nà n-kelɨ woyn ghɨ lûmnɨ̀ ghɨ̀ bò ɨ Libnì ŋêyn Shimè. Ghɨ nà n-toŋtɨ̂ asas a ndosɨ nɨ̀ ghelɨ Geshòn kɨ̀ azɨyn nâ ghàyn.

¹⁹Kohàt nà n-kelɨ woyn ghɨ lûmnɨ̀, azɨyn a àŋena ɨ ghɨ ɨ ghɨ Amlàm nɨ̀ Izà nɨ̀ Heblòn kɨmɨ nɨ̀ Uzèl. Ghɨ nà n-toŋtɨ̂ asas a ndosɨ nɨ̀ ghelɨ Kohàt kɨ̀ azɨyn nâ ghàyn. ²⁰Mèlalì nà n-kelɨ woyn ghɨ̀ bò azɨyn a àŋena ɨ ghɨ Malì ŋêyn Mushì.

À ti azɨyn asas a ndosɨ nɨ̀ ghelɨ Levì ɨchfɨ ndo ɨchfɨ ndo. ²¹Ghelɨ isas i ndo nɨ̀ Geshòn nà n-ghɨ ma ghɨ fvɨ̀ ɨchfɨ ndo nɨ̀ Libnì ɨ̀ fvɨ̀ ɨchfɨ ndo nɨ̀ Shimè. ²²Akôyn a ghɨlûmnɨ̀ nô ghɨ̀ jɨ̀m ta ghɨ nà ghɨ ma ghɨ chem meyn njoŋ sɨ ndù asɨ nà n-ghɨ nkamsɨ nsòmbo nɨ̀ ghelɨ ighɨ ì tâyn. ²³Ghelɨ isas i ndo nɨ̀ Geshòn nɨn læ kas mɨtwo mɨ̀ àŋena dzɨ abàs ghè a ɨchfɨ-iyvɨ i nɨn sœ ateyn ibàm i fɨndo nɨ̀ Bôbo. ²⁴Wul ɨ̀ vzɨ̀ a wù nà n-tisɨ achfɨ̂ a ndosɨ nɨ̀ Geshòn nà n-ghɨ Elìyasàf ɨ wâyn Layèl. ²⁵Ifêl i ghelɨ isas i ndo nɨ̀ Geshòn nà n-ghɨ sɨ nà toʼnɨ nɨ̀ fɨndo fɨ Bôbo Fɨyini fɨ nɨ̀ ɨ̀fwo vzɨ̀ a ghɨ chɨ̀l atu àteyn baʼsɨ̂ nɨ̀ àbâs afo kì a kɨ n-ghaŋlɨ ɨchfɨ ateyn. ²⁶Àŋena nɨn kelɨ kɨmɨ sɨ nà toʼnɨ nɨ̀ abâs a ndzɨsɨ kì a ghɨ ghaŋsɨ jɨ̀ŋ kal ɨwe fɨndo nɨ̀ Bôbo, tôʼnɨ̀ nɨ̀ àbaŋ ifu a kɨ̀mɨ nɨ̀ abàs a ndzɨsɨ kì a kɨ n-ghaŋlɨ ɨchfɨ ɨwe afu, tôʼnɨ̀ kɨmɨ nɨ̀ nkfɨ̀sɨ ateynsɨ. Àŋena nɨn kelɨ kɨmɨ sɨ nà nî nô mɨ ìfêl ì kà ta ghɨ n-nî nɨ̀ ɨ̀fwo nâ wèyn a fɨndo nɨ̀ Bôbo Fɨyini. ²⁷Kohàt nà n-ghɨ bò ghelɨ isas i ndo nɨ̀ Amlàm ghɨ kɨmɨ bò ghelɨ isas i ndo nɨ̀ Izàl, nɨ̀ ghelɨ isas i ndo nɨ̀ Heblòn, ghɨ kɨ̀mɨ bò ghelɨ isas i ndo nɨ̀ Uzèl. À ti asas a ndosɨ nɨ̀ kohàt. ²⁸Akôyn a ghɨ̀lumnɨ̀ ghì nô ghɨ̀ jɨ̀m isas i ndo nɨ̀ Kohàt a ghɨ chèm njoŋ ìmòʼ sɨ ndù asɨ nà n-ghɨ ghelɨ nkamsɨ nfama nɨ̀ ghelɨ ighɨ ntufa. Àŋena nɨn kelɨ sɨ nà toʼnɨ nɨ̀ fɨ̀ndo fɨ Bôbo Fɨyini fɨ. ²⁹Ghelɨ isas i ndo nɨ̀ Kohàt nà n-kelɨ sɨ bɨ̀ abàs itsɨyn a ngùŋ fɨ̀ndo nɨ̀ Bôbo Fɨyini. ³⁰Wul ɨ̀ vzɨ̀ a wù nà n-tisɨ achfɨ̂ a ndosɨ nɨ̀ ghelɨ Kohàt nà n-ghɨ Elizafàn ɨ wâyn Uzìyèl. ³¹Ifêl i ghelɨ isas i ndo nɨ̀ Kohàt nà n-ghɨ sɨ nà toʼnɨ nɨ̀ àntayntayn a Mɨ̂kàyn nɨ̀ Bôbo Fɨyini à, tôʼnɨ̀ nɨ̀ àbaŋ abayn a laynɨ-a, tôʼnɨ̀ nɨ̀ àfo kì a ghɨ n-tom lâmsɨ̀ atu àteyn, tôʼnɨ̀ kɨmɨ nɨ̀ ɨ̀bwaŋ ifu. Àŋena nɨn kelɨ sɨ nà tôʼnɨ̀ kɨmɨ nɨ̀ ɨ̀fwo vzɨ̀ a ghɨ n-nî ifêl ateyn a fɨndo nɨ̀ Bôbo, nɨ̀ àbâs a ndzɨsɨ kì a kɨ n-kɨ̂ŋtɨ̀ alêʼ kì a kɨ layn gòʼsɨ̀. Àŋena nɨn kelɨ sɨ nà nî nô mɨ ìfêl ì kà ta ghɨ n-nî nɨ̀ ɨ̀fwo nâ wèyn. ³²Atu a ghelɨ ghɨ tisɨnɨ isas i ndo nɨ̀ Levì nà n-ghɨ Elezà ɨ wâyn Alòyn ɨ ngàŋ ndô Fɨyini. Ghɨ n-læ meyn choʼ kɨmɨ ŋweyn na wu na kinî ghelɨ ghì a ghɨ n-felɨ̀ a fɨndo nɨ̀ Bôbo. ³³Mèlalì nà n-ghɨ bò ghelɨ isas i ndo nɨ̀ Malì ghɨ kɨmɨ bò ghelɨ isas i ndo nɨ̀ Mushì. À ti asas a ndosɨ nɨ̀ Mèlalì. ³⁴Akôyn a ghɨ̀lumnɨ̀ ghì nô ghɨ̀ jɨ̀m isas i ndo nɨ̀ Mèlalì a ghɨ chèm njoŋ ìmòʼ sɨ ndù asɨ nà n-ghɨ ghelɨ nkamsɨ ntufa nɨ̀ ghelɨ ighɨ ì bò. ³⁵Wul ɨ̀ vzɨ̀ a wù nà n-tisɨ achfɨ̂ a ndosɨ nɨ̀ ghelɨ Mèlalì nà n-ghɨ Zulìyèl ɨ wâyn Abihèl. Àŋena nà n-kelɨ sɨ bɨ̀ a ngùŋ fɨ̀ndo nɨ̀ Bôbo abàs ikuè. ³⁶Ifêl i ghelɨ asas a ndosɨ nɨ̀ Mèlalì nà n-ghɨ sɨ nà toʼnɨ nɨ̀ tɨ̀wuwu tɨ fɨndo nɨ̀ Bôbo, tôʼnɨ̀ nɨ̀ mbàŋsɨ dyaŋsɨnɨsɨ nɨ̀ mɨ̀kfɨ̂s nɨ̀ ɨ̀byâŋ ɨfwo vzɨ̀ a mɨ̀kfɨ̀s nɨ̀n ti atu àteyn. Àŋena nɨn kelɨ kɨmɨ sɨ nà tôʼnɨ nɨ̀ ɨ̀fwo vzɨ̀ a wu n-ghɨ a fɨndo nɨ̀ Bôbo. Àŋena nɨn kelɨ sɨ nà nî nô mɨ ìfêl ì kà ta ghɨ n-nî nɨ̀ ɨ̀fwo nâ wèyn. ³⁷Àŋena nɨn kelɨ kɨmɨ sɨ nà tôʼnɨ̀ nɨ̀ mɨ̀kfɨ̀s mzɨ̀ a mɨ̀ jɨ̀ŋ kali ɨwe fɨndo nɨ̀ Bôbo nɨ̀ ɨ̀byâŋ ɨfwo vzɨ̀ a mɨ̀kfɨ̀s mɨ̀ àteyn nɨn ti atu àteyn, tôʼnɨ̀ kɨmɨ nɨ̀ mɨ̀choʼ mɨ̀ àteyn nɨ̀ nkfɨ̀sɨ ateynsɨ. ³⁸Mosìs ŋêyn Alòyn nɨ̀ woyn ŋweyn nà n-kelɨ sɨ bɨ̀ abàs ghè a ɨchfɨ-iyvɨ i nɨn sal ateyn dzɨ asɨ a fɨndo nɨ̀ Bôbo Fɨyini. À nà n-kelɨ kɨ sɨ nà tôʼnɨ àŋena nɨ̀ fɨ̀ndo fɨ Bôbo Fɨyini fɨ̀ alèʼ nɨ̀ ghelɨ Isìlæ̀. À kɨŋtɨ bàʼsɨ nô mɨ ndà a ngùŋ fɨ̀ndo nɨ̀ Bôbo a ghɨ na kelɨ sɨ zue ŋweyn. ³⁹Mosìs ŋêyn Alòyn nɨ̀n læ taŋ ghɨ̀lûmnɨ̀ isas i ndo nɨ̀ Levì ghì a ghɨ chem meyn njoŋ sɨ ndù asɨ àŋena nà chɨ̂yntɨ̀ ghɨ nkam mɨ̀vɨm ɨ̀m bò njvàsɨ̀ bò kɨ̀ asas a ndosɨ asas a ndosɨ. Àŋena nɨn læ taŋ kɨ ighel ta Bôbo Fɨyini nɨ̀n læ bè sɨ̂ Mosìs.

⁴⁰Bôbo Fɨyini nɨ̀n bê meyn sɨ̂ Mosìs na, “Taŋ woyn ghɨ lûmnɨ̀ ɨ ghɨ asɨ nɨ̀ ghelɨ Isìlæ̀ nô ghɨ̀ jɨ̀m ta ghɨ chèm meyn njoŋ ìmòʼ sɨ ndù asɨ ɨ nyàʼ àzɨyn a àŋena. ⁴¹Lèm woyn ghɨ lûmnɨ̀ ɨ ghɨ asɨ isas i ndo nɨ̀ Levì alèʼ nɨ̀ woyn ghɨ lûmnɨ̀ ɨ ghɨ asɨ nɨ̀ ghelɨ Isìlæ̀. Lem kɨmɨ woyn nyamsɨ lûmnɨ̀sɨ̀ ɨsɨ asɨ sɨ nɨ̀ ghelɨ isas ndo nɨ̀ Levì nô sɨ̀ jɨ̀m alèʼ nɨ̀ woyn nyamsɨ lûmnɨ̀sɨ̀ ɨsɨ asɨ sɨ nɨ̀ ghelɨ Isìlæ̀. À n-ghɨ mà Bôbo Fɨyini. ⁴²Mosìs ɨ kæ taŋ woyn ɨ ghɨ asɨ nɨ̀ ghelɨ Isìlæ̀ kɨ̀ ighel ta Bôbo Fɨyini nɨ̀n læ̀ bè sɨ̂ ŋweyn. ⁴³Mosìs ŋêyn Alòyn nɨ̀n læ taŋ woyn ghɨ lûmnɨ̀ ɨ ghɨ asɨ ghì a ghɨ chem meyn njoŋ sɨ ndù asɨ isas i ndo nɨ̀ Levì àŋena nà chɨ̂yntɨ̀ ghɨ nkam mɨ̀vɨm ɨ̀m bò njvàsɨ̀ bò nɨ̀ ghelɨ ighɨ ì bò nɨ̀ ghelɨ mɨ̀vɨ̂m nsòmbo njvàsɨ̀ tal ta ghɨ nyàʼ izɨyn izɨyn.”

⁴⁴Bôbo Fɨyini nɨn fi meyn bè sɨ̂ Mosìs na, ⁴⁵“Lèm woyn ghɨ lûmnɨ̀ ɨ ghɨ asɨ isas i ndo nɨ̀ Levì alèʼ nɨ̀ woyn ghɨ lûmnɨ̀ ɨ ghɨ asɨ nɨ̀ ghelɨ Isìlæ̀. Lem kɨmɨ woyn nyamsɨ lûmnɨ̀sɨ̀ ɨsɨ asɨ sɨ nɨ̀ ghelɨ isas ndo nɨ̀ Levì nô sɨ̀ jɨ̀m alèʼ nɨ̀ woyn nyamsɨ lûmnɨ̀sɨ̀ ɨsɨ asɨ sɨ nɨ̀ ghelɨ Isìlæ̀. Ghelɨ Levì nɨn ghɨ ghelɨ̀ ghem. À n-ghɨ mà Bôbo Fɨyini. ⁴⁶Woyn ghɨlûmnɨ̀ ɨ ghɨ asɨ nɨ̀ ghelɨ Isìlæ̀ nɨn dvɨ̀ chwò woyn ghɨ lûmnɨ̀ ndo nɨ̀ Levì nɨ̀ woyn ighɨ ì bò nɨ̀ woyn mɨ̀vɨm nsòmbo njvàsɨ̀ tal. Ghɨ n-kelɨ sɨ kasi sɨ yuyn atu a woyn nâ ghèyn. ⁴⁷Wà na fsɨ àso ɨkwo a fɨfâ atu a wûl kɨ chem ndù kilù, kɨ̀ ighel ta ɨfyêʼ ɨ ndo Fɨyini nɨn dyêyn. ⁴⁸Wà fsɨtɨ ɨkwo nâ wèyn a ghɨ yuyn atu a woyn Isìlæ̀ ghì a ghɨ dvɨ̀ chwò ɨ ghɨ Levì tî wa fu sɨ̂ Alòyn ŋêyn woyn ŋweyn. ⁴⁹Mosìs ɨ kæ fsɨ ɨ̀kwo vzɨ̀ a ghɨ n-yuyn atu a woyn ghɨ lûmnɨ Isìlæ̀ ghì ateyn a ghɨ n-dvɨ̂ chwô woyn ghɨ lûmnɨ̀ Levì ⁵⁰Wu n-chɨ̀yntɨ fsɨ ɨkwo nâ wèyn sɨ̂ woyn ɨ ghɨ asɨ nɨ̀ ghelɨ Isìlæ̀ wu ghɨ kilùsɨ̀ njvàsɨ̀ tâyn nɨ̀ àbeʼa kɨ̀ ta ɨfyeʼ ndô Fɨyini nɨn dyêyn. ⁵¹Mosìs nɨn fu meyn ɨ̀kwo vzɨ̀ a ghɨ n-yuyn atu a woyn ghɨ lûmnɨ̀ Isìlæ̀ ateyn sɨ̂ Alòyn ŋêyn woyn ŋweyn kɨ̀ ta Bôbo Fɨyini nɨn bè.”