Numbers 1

Ghɨ taŋ ghelɨ Isìlæ̀

¹À n-læ nà ghɨ achi a kɨ asɨ-a a njoŋsɨ̀ bò a ànkùmtɨ̀ a bêŋ ta ghelɨ Isìlæ̀ fvɨ̀ sɨ a Ijìb, Bôbo Fɨyini ɨ taŋi sɨ̂ Mosìs a fɨndo nɨ̀ Bôbo a nse iyum a Sinày. Wù n-læ taŋi ɨ be na, ²“Taŋ ghelɨ Isìlæ̀ nô ghɨ̀ jɨ̀m kɨ̀ asas ndosɨ asas ndosɨ, ɨ taŋ kɨ ɨchfɨ ndo ɨchfɨ ndo ɨ nyàʼ àzɨyn a àŋena. ³Zɨ̂ Alòyn nɨn kelɨ sɨ taŋ ghɨ̀lûmnɨ Isìlæ̀ nô ghɨ̀ jɨ̀m kɨ̀ inòyn inòyn. Yì taŋ kɨ̀ ɨghî a ghɨ chem bèŋ mɨ̀vɨm ɨ̀m bò sɨ ndù asɨ ma ghɨ kàʼ a ghɨ tɨm iwoŋ. ⁴Yì na ndù nô mɨ isas i ndo ì kà yi lì wul ɨ̀ tisɨnɨ ta ka wù na gàmtɨ̀ zɨ. ⁵Akeynà nɨn ghɨ àzɨyn a ghelɨ ghì a ka ghɨ na gàmtɨ zɨ̀. Wùl ìsas i ndo nɨ̀ Lubèn na ghɨ Elizù ɨ wâyn Shedù.

⁶Ɨwû ìsas i ndo nɨ̀ Simìyòn ɨ ghɨ Shèlumèl ɨ wâyn Zùlishadày.

⁷Wùl ìsas i ndo nɨ̀ Judà ɨ ghɨ Nashòn ɨ wâyn Àminadàb.

⁸Ɨwû ìsas i ndo nɨ̀ Isakà ɨ ghɨ Nètanèl ɨ wâyn Zuwà.

⁹Ɨwû ìsas i ndo nɨ̀ Zebulùn ɨ ghɨ Elìyàb ɨ wâyn Helòn.

¹⁰A nà ghɨ a woyn nɨ̀ Josèf, wùl ìsas i ndo nɨ̀ Eflèm ɨ ghɨ Elishamà ɨ wâyn Amihùd, ɨwû ìsas i ndo nɨ̀ Mànasè ɨ ghɨ Gàmalèl ɨ wâyn Bèdazù.

¹¹Wùl ìsas i ndo nɨ̀ Benjamìn na ghɨ Abidàn ɨ wâyn Gidiyonì.

¹²Ɨwû ìsas i ndo nɨ̀ Dân ɨ ghɨ Ahizà ɨ wâyn Amishadày.

¹³Wùl ìsas i ndo nɨ̀ Ashà na ghɨ Bagìyèl ɨ wâyn Oklàn.

¹⁴Ɨwû ìsas i ndo nɨ̀ Gâd ɨ ghɨ Elìyasàf ɨ wâyn Dewèl.

¹⁵Wùl ìsas i ndo nɨ̀ Naftalì na ghɨ Ahilà ɨ wâyn Enàn.”

¹⁶À ti ghelɨ ghì a ghɨ n-læ choʼtɨ a Isìlæ, a ghɨ ghelɨ ghɨ tisɨnɨ asas a ndosɨ nɨ̀ ghɨ̀bo àŋena. Àŋena nà ghɨ ghelɨ ghɨ tisɨnɨ asas a ndosɨ a Isìlæ̀.

¹⁷Mosìs ŋêyn Alòyn ɨ lì ghelɨ nâ ghèyn a ghɨ nyàʼ azɨyn a àŋena têyn, ¹⁸àŋena ɨ yvɨ̀ŋtɨ̀ ghelɨ Isìlæ nô ghɨ̀ jɨ̀m achi a kɨ asɨ-a. Ghɨ n-yvɨ̀ŋtɨ tî ɨ taŋ àŋena asas a ndosɨ asas a ndosɨ ɨ taŋ àchfɨ̂ a ndosɨ ɨ taŋ ghɨ̀lûmnɨ̀ ghì a ghɨ chem bèŋ mɨ̀vɨm ɨ̀m bò sɨ ndù asɨ, kɨ̀ izɨyn izɨyn. ¹⁹Mosìs nɨ̀n læ meyn nyàʼ àzɨyn a ghelɨ Isìlæ̀ a nse ìyum a Sinày kɨ̀ ighel ta Bôbo Fɨyini nɨn læ bè.

²⁰À nà n-ghɨ isas i ndo nɨ̀ Lubèn ɨ wayn ɨwû àsɨ nɨ̀ Jàkôb, ghɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fi taŋ kɨ ɨchfɨ ndo ɨchfɨ ndo. ²¹Ghɨ n-læ taŋ ghɨ lûmnɨ̀ isas i ndo nɨ̀ Lubèn ghɨ nà chɨ̂yntɨ̀ ghɨ nkam mɨ̀vɨm ɨ̀n kæ̀ njvàsɨ̀ ntufa nɨ̀ ghelɨ ighɨ ì tâyn.

²²À nà n-ghɨ isas i ndo nɨ̀ Simìyòn, ghɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fî taŋ kɨ ɨchfɨ ndo ɨchfɨ ndo. ²³Ghɨ n-læ taŋ ghɨ lûmnɨ̀ isas i ndo nɨ̀ Simìyòn ghɨ nà chɨ̂yntɨ̀ ghɨ nkam mɨ̀vɨm ɨ̀n tâyn njvàsɨ̀ bulamòʼ nɨ̀ ghelɨ ighɨ ì tal.

²⁴À nà n-ghɨ isas i ndo nɨ̀ Gâd, ghɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fi taŋ kɨ ɨchfɨ ndo ɨchfɨ ndo. ²⁵Ghɨ n-læ taŋ ghɨ lûmnɨ̀ isas i ndo nɨ̀ Gâd ghɨ nà chɨ̂yntɨ̀ ghɨ nkam mɨ̀vɨm ɨ̀n kæ̀ njvàsɨ̀ tâyn nɨ̀ ghelɨ ighɨ ntufa nɨ̀ ghelɨ mɨ̀vɨm ɨ̀n tâyn. ²⁶À nà n-ghɨ isas i ndo nɨ̀ Judà, ghɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fi taŋ kɨ ɨchfɨ ndo ɨchfɨ ndo. ²⁷Ghɨ n-læ taŋ ghɨ lûmnɨ̀ isas i ndo nɨ̀ Judà ghɨ nà chɨ̂yntɨ̀ ghɨ nkam mɨ̀vɨ̂m nsòmbo njvàsɨ̀ kæ̀ nɨ̀ ghelɨ ighɨ ntufa.

²⁸À nà n-ghɨ isas i ndo nɨ̀ Isakà, ghɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fi taŋ kɨ ɨchfɨ ndo ɨchfɨ ndo. ²⁹Ghɨ n-læ taŋ ghɨ̀lûmnɨ̀ isas i ndo nɨ̀ Isakà ghɨ nà chɨ̂yntɨ̀ ghɨ nkam mɨ̀vɨm ɨ̀n tâyn njvàsɨ̀ kæ̀ nɨ̀ ghelɨ ighɨ ì kæ̀.

³⁰À nà n-ghɨ isas i ndo nɨ̀ Zebulòn, ghɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fi taŋ kɨ ɨchfɨ ndo ɨchfɨ ndo. ³¹Ghɨ n-læ taŋ ghɨlûmnɨ̀ isas i ndo nɨ̀ Zebulòn ghɨ nà chɨ̂yntɨ̀ ghɨ nkam mɨ̀vɨm ɨ̀n tâyn njvàsɨ̀ nsòmbo nɨ̀ ghelɨ ighɨ ì kæ̀.

³²Ghɨ n-læ meyn ndù a woyn nɨ̀ Josèf ɨchfɨ ndo nɨ̀ Eflèm, ɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fî taŋ kɨ ɨchfɨ ndo ɨchfɨ ndo. ³³Ghɨ n-læ taŋ ghɨ lûmnɨ̀ isas i ndo nɨ̀ Eflèm ghɨ nà chɨ̂yntɨ̀ ghɨ nkam mɨ̀vɨm ɨ̀n kæ̀ nɨ̀ ghelɨ ighɨ ì tâyn.

³⁴À nà n-ghɨ kɨmɨ a woyn nɨ̀ Josèf ɨchfɨ ndo nɨ̀ Mànasè, ghɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fî taŋ kɨ ɨchfɨ ndo ɨchfɨ ndo. ³⁵Ghɨ n-læ taŋ ghɨ lûmnɨ̀ isas i ndo nɨ̀ Mànasè ghɨ nà chɨ̂yntɨ̀ ghɨ nkam mɨ̀vɨm ɨ̀n tal njvàsɨ̀ bò nɨ̀ ghelɨ ighɨ ì bò.

³⁶À nà n-ghɨ isas i ndo nɨ̀ Benjamìn, ghɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fi taŋ kɨ ɨchfɨ ndo ɨchfɨ ndo. ³⁷Ghɨ n-læ taŋ ghɨ lûmnɨ̀ isas i ndo nɨ̀ Benjamìn ghɨ nà chɨ̂yntɨ̀ ghɨ nkam mɨ̀vɨm ɨ̀n tal njvàsɨ̀ tâyn nɨ̀ ghelɨ ighɨ ì kæ̀.

³⁸À nà n-ghɨ isas i ndo nɨ̀ Dân, ghɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fi taŋ kɨ ɨchfɨ ndo ɨchfɨ ndo. ³⁹Ghɨ n-læ taŋ ghɨ lûmnɨ̀ isas i ndo nɨ̀ Dân ghɨ nà chɨ̂yntɨ̀ ghɨ nkam mɨ̀vɨ̂m ntufa njvàsɨ̀ bò nɨ̀ ghelɨ ighɨ nsòmbo.

⁴⁰À nà n-ghɨ isas i ndo nɨ̀ Ashà, ghɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fi taŋ kɨ ɨchfɨ ndo ɨchfɨ ndo. ⁴¹Ghɨ n-læ taŋ ghɨ lûmnɨ̀ isas i ndo nɨ̀ Ashà ghɨ nà chɨ̂yntɨ̀ ghɨ nkam mɨ̀vɨm ɨ̀n kæ̀ nɨ̀ ghelɨ ighɨ ì tâyn.

⁴²À nà n-ghɨ isas i ndo nɨ̀ Naftalì, ghɨ taŋ ghɨ̀lûmnɨ̀ kɨ̀ izɨyn izɨyn. Ghɨ n-læ meyn taŋ nô mɨ ndà ta wù chem bèŋsɨ̀ mɨ̀vɨm ɨ̀m bò sɨ ndù asɨ ma wù kàʼ a wù tɨm iwoŋ. Ghɨ n-læ nà taŋ àŋena kɨ̀ asas a ndosɨ asas a ndosɨ fi taŋ kɨ ɨchfɨ ndo ɨchfɨ ndo. ⁴³Ghɨ n-læ taŋ ghɨlûmnɨ̀ isas i ndo nɨ̀ Naftalì ghɨ nà chɨ̂yntɨ̀ ghɨ nkam mɨ̀vɨm ɨ̀n tâyn njvàsɨ̀ tal nɨ̀ ghelɨ ighɨ ì kæ̀.

⁴⁴Ɨghêyn nɨn ghɨ ghɨ̀lûmnɨ̀ ghì a Mosìs ŋêyn Alòyn baʼsɨ̂ nɨ̀ ghelɨ ghɨ tisɨnɨ ghì a Isìlæ̀ nɨ̀n læ taŋ. Ghelɨ ghɨ tisɨnɨ ateyn nà n-ghɨ njvàsɨ̀ bò, nô mɨ ndà ɨ lî kɨ àlêʼ a ghelɨ isas i ndo nɨ̀ àŋena. ⁴⁵Àŋena nɨn læ taŋ ghelɨ Isìlæ̀ nô ghɨ jɨ̀m ta ghɨ chem bèŋsɨ̀ mɨ̀vɨm ɨ̀m bò sɨ ndù asɨ ma ghɨ kàʼ a ghɨ tɨm iwoŋ kɨ̀ isas i ndo isas i ndo. ⁴⁶Ghɨ n-læ taŋ ghelɨ ghɨ nà chɨ̂yntɨ̀ ghɨ nkam ighɨ ntufa nɨ̀ ghelɨ nkamsɨ̀ tal nɨ̀ ghelɨ ighɨ ì tâyn nɨ̀ ghelɨ mɨ̀vɨm ɨ̀n tâyn.

⁴⁷Ghɨ n-læ se sɨ taŋ ghelɨ achfɨ̀ a ndosɨ nɨ̀ ghelɨ Isìlæ̀, ɨ faŋ tɨ̀ taŋ tɨ̀ bàʼsɨ ghelɨ isas i ndo nɨ̀ Levì, ⁴⁸bòm ta Bôbo Fɨyini nɨ̀n bè meyn sɨ̂ Mosìs na, ⁴⁹“Wà n-kelɨ wi sɨ taŋ ghelɨ isas i ndo nɨ̀ Levì, kèsa sɨ taŋ sɨ baʼsɨ àŋena nɨ̀ ghelɨ Isìlæ̀ ghɨ li. ⁵⁰Mɨtì, wa nì lêm ghelɨ Levì a àŋena na felɨ̀ a fɨndo nɨ̀ Bôbo tôʼnɨ̀ nɨ̀ ɨ̀nfeynfɨ baʼsɨ̂ nô mɨ nɨ̀ ghà ta kɨ n-ghɨ a fɨndo nâ ghè. Àŋena nɨn kelɨ sɨ nà beʼi fɨ̀ndo fɨ ateyn baʼsɨ̂ nɨ̀ ɨ̀fwo vzɨ̀ a wu n-ghɨ ateyn, kelɨ sɨ bàʼlɨ mɨtwo mɨ̀ àŋena a ngùŋ àteyn. ⁵¹Bôbo kæ nà kɨŋ na yì lù sɨ alèʼ ghè a yì bɨ̀ ateyn, a suʼsɨ ghelɨ ndo nɨ̀ Levì ɨ̀ suʼsɨ fɨ̀ndo fɨ Bôbo ɨ bèʼì. Wù nî nà kɨŋ na ghɨ kasi bàʼlɨ̀ nô mɨ wo, a bàʼlɨ kɨ ghelɨ ndo nɨ̀ Levì. À kæ ndù bàʼsɨ nô mɨ ndà a ngùŋ fɨ̀ndo nɨ̀ Bôbo, kelɨ wi sɨ ndù, a ghɨ zue ŋweyn. ⁵²Ghelɨ Isìlæ̀ nɨn kelɨ sɨ nà kas mɨtwo mɨ̀ àŋena kɨ̀ inòyn inòyn ɨlwèʼ ghè a ghɨ lem nchwæ ateyn sɨ dyèyn na à n-ghɨ àlêʼ isas i ndo nɨ̀ àŋena. ⁵³Ghelɨ isas i ndo nɨ̀ Levì nɨn kelɨ sɨ nà lum kas kal nɨ̀ mɨ̀two mɨ̀ àŋena a ngùŋ fɨ̀ndo nɨ̀ Bôbo ta ka ngeʼ faŋ tɨ̀ kòli ghelɨ Isìlæ̀. Ghelɨ ndo nɨ̀ Levì nɨn kelɨ sɨ nà tôʼnɨ nɨ̀ fɨ̀ndo fɨ Bôbo Fɨyini fɨ.”

⁵⁴Ghelɨ Isìlæ̀ nɨ̀n læ meyn nì nô mɨ ghà kɨ ighel ta Bôbo Fɨyini nɨn læ bè sɨ Mosìs.