Numbers 13

Mosìs ɨ tum gvèsɨ̀ a Kenàn

¹Bôbo Fɨyini nɨ̀n bê meyn sɨ̂ Mosìs na, ²“Tum ghelɨ ghɨ li ghɨ ndu nyàʼtɨ kì ilaʼ i Kenàn zɨ̀ a mɨ n-fu sɨ̂ ghelɨ Isìlæ̀. À na ghɨ nô mɨ isas i ndo i Isìlæ̀ ì kà wa choʼ wul ɨ tisɨnɨ ɨ̀mòʼ.”

³Mosìs ɨ ni kɨ ta Bôbo Fɨyini bè ɨ tum gvèsɨ̀ njvàsɨ̀ bò sɨ lù a nse iyum a Balàn ɨ ndù sɨ nyaʼtɨ sɨ ki Kenàn. Àŋena nô ghɨ̀ jɨ̀m nà n-ghɨ ghelɨ ghɨ tisɨnɨ a Isìlæ̀. ⁴Akeynà nɨn ghɨ àzɨyn a ghelɨ ghì a àŋena nɨn læ ndù.

À nà n-ghɨ isas i ndo nɨ̀ Lubèn, a ndù Shamùwà ɨ wâyn Zakù,

⁵a nà ghɨ isas i ndo nɨ̀ Simìyòn a ndù Shafàt ɨ wâyn Holì,

⁶a nà ghɨ isas i ndo nɨ̀ Judà a ndù Kalèb ɨ wâyn Jefunè,

⁷a nà ghɨ isas i ndo nɨ̀ Isakà a ndù Igàl ɨ wâyn Josèf,

⁸a nà ghɨ isas i ndo nɨ̀ Eflèm a ndù Hosìyà ɨ wâyn Nûn.

⁹A nà ghɨ isas i ndo nɨ̀ Benjamìn a ndù Baltì ɨ wâyn Lafù,

¹⁰a nà ghɨ isas i ndo nɨ̀ Zebulòn a ndù Gadìyèl ɨ wâyn Sodì.

¹¹A nà n-ghɨ isas i ndo nɨ̀ Mànasè ɨ wâyn Josèf a ndù Gadì ɨ wâyn Susì,

¹²a nà ghɨ isas i ndo nɨ̀ Dân a ndù Amèl ɨ wâyn Gèmalì,

¹³a nà ghɨ isas i ndo nɨ̀ Ashà a ndù Setù ɨ wâyn Mikèl,

¹⁴a nà ghɨ isas i ndo nɨ̀ Naftalì a ndù Nabì ɨ wâyn Vobsì,

¹⁵a nà ghɨ isas i ndo nɨ̀ Gâd a ndù Gewèl ɨ wâyn Makì.

¹⁶À ti azɨyn a gvè sìsɨ̀ a Mosìs nɨn læ tum na àŋena ndu nyàʼtɨ kì ilaʼ i Kenàn. Mosìs ɨ fu izɨyn i Hoshìyà ɨ wâyn Nûn na Joshwà.

¹⁷Mosìs nɨn læ se sɨ tum gvè nâ sèynsɨ̀ na sɨ ndu nyàʼtɨ kì Kenàn ɨ bè sɨ̂ àŋena na, “Yì koʼ ndù dzɨ a Negèv ɨ̀ ndù ilaʼ i kfɨynsɨ. ¹⁸Yì ndu ki yèyn nâ ilaʼ ateyn i nɨn ghɨ ti-a, ɨ̀ yèyn nâ ghelɨ ilaʼ afu nɨn dvɨ-à ma ghɨ n-læ a, ɨ̀ fì yèyn nâ ghelɨ ateyn nɨn kelɨ àdyaʼ ma ghɨ n-yolî a. ¹⁹Yì ndu ki kɨ̀mɨ nâ ilaʼ i àŋena nɨn jofà ma yi n-jofɨ̀ wì a, ɨ̀ fì kì na ntèʼsɨ àŋenasɨ nɨn ghɨ antêynɨ̀ mbàyn ma sɨ n-ghɨ àzɨ̀ azɨ a. ²⁰Yì ki kɨ̀mɨ na ɨfwo ɨ yɨnɨ nɨn koʼ afu ma wu n-koʼ wi-a, ɨ̀ yeyn na ɨ̀nkàʼ nɨn ghɨ afu ma mɨ̀ n-ghɨ wi a. Yì momsɨ nô mɨ a dzɨ ì kà sɨ gvi nɨ̀ mɨ̀tam mɨ̀ ìlaʼ nâ mèyn.” À nà n-ghɨ ɨ̀lvɨ vzɨ̀ a mɨ̀tâm mɨ̀ gɨ̀lebsɨ̀ ɨmzɨ̂ àsɨ nɨn bâŋ ateyn.

²¹Gvèsɨ ateynsɨ nɨn læ koʼ ɨ zɨ̀tɨ kɨ a nse ìyum a Zîn ɨ jèl ɨ ki ilaʼ ateyn ɨ ndu chem a Lehòb a ngùŋ Lebo Hamàt. ²²Àŋena nɨ̀n læ koʼ ɨ chwò dzɨ a Negèf ɨ ndu chem a Heblòn, a ghɨ alèʼ kì a woyn Anàk nà n-chi ateyn. Azɨyn a àŋena nà n-ghɨ Ahimàn ŋêyn Sheshày nɨ̀ Talmày. Ghɨ n-læ ku ntèʼ Heblòn bèŋsɨ̀ ɨ chwò nsòmbo jæ na ghɨ ku ntèʼ Zowàn a Ijìb. ²³Àŋena jelɨ kɨ têyn ɨ ndu chem ɨfyayn Eshkòl ɨ fàs ɨ̀kœ ɨ fɨ̂kàʼ ma nchfɨŋ mɨ̀tam mɨ̀ gɨ̀lêbsɨ kola meyn ateyn. Àŋena nɨn fàs tî ɨ tuŋ a mbàŋ ghelɨ ghɨ̀ bò ɨ bèʼì. Àŋena nɨn kfa meyn kɨmɨ nɨ̀ mɨ̀tam mɨ̀ bòmeglanèt nɨ̀ mɨ̀tam mɨ̀ figsɨ̀. ²⁴Ghɨ nà sɨ toŋtɨ̂ ɨ̀fyayn ateyn na Eshkòl bòm nchfɨŋ mɨ̀tam mɨ̀ gɨ̀lêbsɨ̀ mzɨ̀ a ghelɨ Isìlæ̀ nɨ̀n læ fàs afu.

²⁵Àŋena nɨn jèl ɨ ki ilaʼ ateyn sɨ a mɨchi mɨ̀vɨm ɨ̀n kæ̀ ɨ kasi kfa.

Saʼgha kûm Kenàn

²⁶Gvè sîsɨ̀ nɨn læ ndu ki ilaʼ ateyn, ɨ kasi kfa ɨ gvi yeyn Mosìs ŋêyn Alòyn baʼsɨ̂ nɨ̀ ghelɨ Isìlæ̀ nô ghɨ̀ jɨ̀m a Kadèsh a nse iyum a Balàn. Àŋena nɨn feʼtɨ meyn ta ilaʼ ateyn i nɨn ghɨ sɨ̂ ghelɨ Isìlæ̀ ɨ fi dyèyn mɨ̀tam mzɨ̀ a àŋena kfa nɨ̀ ɨ̀mêyn. ²⁷Àŋena nɨ̂n bè sɨ̂ Mosìs na, “Ghès tî ndù ilaʼ ghè a wà tî tùm na ghèsɨ̀ ndu ki, ilaʼ ateyn i ɨ ghɨ ɨfwo ɨ yɨnɨ ɨ koʼ ateyn nô a jûŋ, nô mɨ ghà ɨ̀ jùŋ ɨ ghɨ ateyn. À n-ghɨ mɨ̀tam ɨ̀n lì mzɨ̂ a ghès tî kfa nɨ̀ ɨ̀mêyn afu tèyn. ²⁸Mɨtì ghelɨ ilaʼ nâ ghì ɨ kelɨ àdyaʼ, ntèʼsɨ àŋenasɨ ɨ ghɨ ma ghɨ tɨm meyn mbàyn jɨ̀ŋ kàli. Ghèsɨ ti meyn yeyn kɨ̀mɨ ìnto i ghêl afu a ghɨ woyn woyn Anàk. ²⁹Ghelɨ Amalèk nɨn chî a Negèv, ghelɨ Hît nɨ̀ ghelɨ Jebùs nɨ̀ ghelɨ Amò ɨ chî ilaʼ i kfɨynsɨ. Ghelɨ Kenàn ɨ chî a ngùŋ jvà i ghaʼnɨ, ghɨli ɨ chî a mbæ̀ jvà Jodàn.” ³⁰Kalèb ɨ kæ chɨ̀lɨ ghelɨ ghì a ghɨ nà n-ti asɨ nɨ̀ Mosìs ɨ bè na, “Ghesɨ̀nà koʼ ndù fsɨ ilaʼ ateyn. Ghesɨ̀nà kàʼ a ghɨ tɨm yɨ àŋena.”

³¹Mɨtì ghelɨ ghɨ li ghì a ŋêyn àŋena nɨ̂n koʼ amoʼ ɨ bè na, “Ghesɨ̀nà kàʼ ghɨ bû tɨm yɨ àŋena, àŋena nɨn kelɨ àdyaʼ chwô ghesɨ̀nà.” ³²Àŋena ɨ nà sɨ fêʼtɨ̀ ndû kɨ nɨ̀ saʼgha ibɨ sɨ̂ ghelɨ Isìlæ̀ kûm ìlaʼ nâ zɨ̀ a àŋena tî ndu ki. Àŋena nà n-bê na, “Ilaʼ ateyn i nɨn kelɨ wi mɨ ɨ̀fwo ɨ yɨnɨ sɨ yɨsɨ ghelɨ ilaʼ nâ ghì. Ghelɨ ilaʼ afu nɨn dyêblɨ̀ kɨ tèyn fî ghaʼlɨ-à. ³³Ghèsɨ ti meyn yeyn kɨmɨ ghelɨ afu ghɨ dyêblɨ̀ kɨ tèyn fî ghaʼlɨ-à, a ghɨ woyn Anàk. Ghèsɨ̀ tî nà kêʼ ta ɨ̀ntwàyn a àŋena antêynɨ̀, àŋena ɨ yeyn kɨmɨ ghès tî.”