Numbers 14

Ghelɨ Isìlæ̀ ɨ to nɨ̀ àtu a sɨ̂ Mosìs

¹Ghelɨ Isìlæ̀ nɨ̀n chi meyn dzɨ kɨ nɨ̀ gyasɨ tosɨ têyn ɨtuʼ ɨ ni layn. ²Àŋena nà n-dzɨ̂ tì ghâm Mosìs ŋêyn Alòyn bê na, “Yi tî nà jôf na ghèsɨ̀ kfɨtɨ a Ijìb kèsa a nse ìyum afêyn. ³Bôbo Fɨyini nɨn gvî nɨ̀ ghès ilaʼ afêyn na ghèsɨ̀ kfɨtɨ iwòŋ bòm ghà? Ghès nɨn kfɨtɨ à, a ghɨ li wôyn ghes nɨ̀ ghɨ̀ki ghesɨ sɨ a ɨkòs. Yi n-jofɨ̀ na ghèsɨ̀ kasi ndù a Ijìb.” ⁴Àŋena nɨn tàŋi tî ɨ be kɨ sɨ a àŋena ngeŋsɨ na, “Ghesɨ̀nà choʼ wul ɨ̀ tisɨnɨ antêynɨ̀ nɨ̀ ghesɨ̀nà ɨ̀ kàsi ndù a Ijìb.”

⁵Mosìs ŋêyn Alòyn ɨ kæ fe sɨ kfɨsɨ akêʼ a àŋena a nse asɨ nɨ̀ ghelɨ Isìlæ̀ nô ghɨ̀ jɨ̀m. ⁶Joshwà ɨ wâyn Nûn ŋêyn Kalèb ɨ wâyn Jefunè, a ghɨ ghelɨ antêynɨ̀ gvèsɨ̀ ghê a sɨ n-læ ndù sɨ nyaʼtɨ sɨ ki ilaʼ i Kenàn ɨ bàytɨ̀ ndzɨsɨ sɨ a àŋena ɨwùyn, ⁷ɨ bè sɨ̂ ghelɨ Isìlæ̀ na, “Ilaʼ zɨ̀ a ghès tî ndù nyàʼtɨ jèl ki nɨn jofɨ̀ nô sɨ a ŋaŋ. ⁸Bôbo Fɨyini ti kæ sɨ nà saŋlɨ̂ sɨ̂ ghesɨ̀nà, a wù li ndù nɨ̀ ghesɨ̀nà ilaʼ nâ ghè ɨ̀ fù sɨ̂ ghesɨ̀nà. Ilaʼ ateyn i nɨn ghɨ ɨfwo ɨ yɨnɨ koʼ ateyn nô a jûŋ nô mɨ ghà ɨ̀ jùŋ ɨ ghɨ ateyn. ⁹Ka yì na to nɨ̀ àtu a sɨ̂ Bôbo Fɨyini. Ka yì na fàyn ghelɨ ilaʼ nâ ghèyn bòm ta yi n-tɨm yɨ àŋena kɨ̀ sɨ a iwo i boli. Abaʼa lû meyn sɨ a àŋena atu mɨtì, Bôbo Fɨyini ɨ ghɨ ghesɨ̀na nɨ̀ àŋena. Ka yì na fàyn àŋena.”

¹⁰Mɨtì ghelɨ Isìlæ̀ nô ghɨ̀ jɨ̀m ɨ nà sɨ kɨŋ sɨ tɨmlɨ sɨ zue àŋena, iŋwâʼ i Bôbo Fɨyini ɨ gvɨ̀tɨ ɨ fvɨ̀ atû fɨ̀ndo nɨ̀ Bôbo ghelɨ Isìlæ̀ nô ghɨ̀ jɨ̀m ɨ yeyn. ¹¹Bôbo Fɨyini ɨ taŋi sɨ̂ Mosìs ɨ bè na, “Ghelɨ ghèyn læ̀ chas mà ndù chèm ti a? Àŋena nɨn bɨmi wì adyaʼ à kema nô mɨ ta mà nì awo a kaynɨ-a sɨ̂ àŋena. ¹²Mɨ n-nì mâʼ ìkoʼi i bemnɨ-i a yi zuetɨ àŋena, ɨ̀ nì a zɨ̂ woyn gha læ nà ghɨ ìlaʼ i ghaʼnɨ-i fî to chwô àŋena.”

¹³Mosìs ɨ bè sɨ̂ Bôbo Fɨyini na, “À n-læ fvɨ̀sɨ vâ ɨ ghelɨ Isìlæ̀ sɨ a Ijìb nɨ̀ àdyaʼ a bemnɨ-a nɨ̀ và a Bôbo. Wà kæ nì iwo nâ yèynì a ghelɨ Ijìb yvɨ. ¹⁴Ghelɨ Ijìb nɨn yvɨ-a ɨ̀ fèʼtɨ sɨ̂ ghelɨ ilaʼ afêyn a Bôbo Fɨyini. Ghelɨ Kenàn sɨ ghɨ ma ghɨ yvɨ meyn na wà n-ghɨ zɨ̂ ghelɨ̀ ghya a Bôbo, ɨ̀ fì yvɨ̀ na wà n-fvɨ̂ a àŋena ikèʼ a ndayn ɨlvɨ ta mbàʼ zyâ sùʼi. Àŋena yvɨ meyn kɨ̀mɨ na wà n-nî wa nà ndû a àŋena asɨ nɨ̀nchuè atuŋ a mbàʼ, ndû nɨ̀ntuʼ ilemi ɨvɨ̀s. ¹⁵Wà kæ zuetɨ ghelɨ nâ ghèyn kɨ ɨlvɨ ɨ̀mòʼ, a ghelɨ tɨlaʼ tìtɨ̀ a ghɨ yvɨ saʼgha nâ yèyn na bê na, ¹⁶‘Yi ghaʼ meyn Bôbo Fɨyini sɨ lì sɨ ndu nɨ̀ àŋena ilaʼ ghè a wu n-læ chfɨ̀nɨ ɨ yɨ mɨkâyn sɨ fu sɨ̂ àŋena wù zuetɨ àŋena a nse ìyum.’”

¹⁷“Mɨ n-jêm lvɨ̂yn na wà dyeyn adyaʼ à kya a Bôbo Fɨyini kɨ̀ ta wà n-læ chfɨ̀nɨ. Wà n-læ bè na, ¹⁸‘Bôbo Fɨyini nɨ̀n nyâŋsɨ̀ nyôʼsɨ̀ wì ɨtoŋ, kelɨ ìkôŋ yi kfeynɨ-à, lêsɨ̀ fu mbɨsɨ ghêl nɨ̀ àtu a tonɨ-a nɨ̀ àŋena. Mɨtì fu ngeʼ nô mɨ sɨ̂ ndà ɨlvɨ ta wù nì mbɨ, ɨ̀ fù ngeʼ sɨ̂ woyn àŋena sɨ chem ɨjwâŋ ɨ̀ kfæ̀ bòm mbɨ bò àŋena.’ ¹⁹Mɨ n-jêm na wà lesɨ fù mbɨ ghelɨ ghèyn a Bôbo bòm ìkôŋ i mɨ̂kàyn nɨ̀ và. Lèsɨ fu mbɨ àŋena kɨ̀ ta wà n-læ lèsɨ fu àŋena ɨtuʼ ta àŋena fvɨ̀ a Ijìb sɨ koʼ sɨ chem layn.”

²⁰Bôbo Fɨyini ɨ bèynsɨ̀ ɨ bè sɨ̂ Mosìs na, “Ma lesɨ meyn fu àŋena kɨ̀ ta wà bè. ²¹Samoʼ ta mɨ n-chi iŋwâʼ ì yemi ɨ ghɨ ma yi luyn meyn a mbzɨ, ²²nô wùl àntêynɨ̀ nɨ̀ ghelɨ ghì a ghɨ yèyn meyn ìŋwâʼ ì yemi nɨ̀ àwo a kaynɨ-a kì a mɨ n-læ nì a Ijìb ɨ fi nì a nse ìyum ɨ̀ faŋ tɨ̀ yvɨ̀nɨ ma ɨ̀ mòm mà ìngal ìvɨm læ̀ zɨ̂ wì ilaʼ nâ ghè. ²³Àŋena læ̀ yeyn wi mɨ yeyn ilaʼ nâ zɨ̀ a mɨ n-læ chfɨ̀nɨ ɨ yɨ mɨkâyn sɨ fu sɨ̂ ghɨ̀bo àŋena. Nô wul ɨ̀mòʼ ta wù chàs ma læ̀ yeyn wi ilaʼ nâ zɨ̀. ²⁴Mɨtì wul ɨ̀ felɨnɨ nɨ̀ mà ɨ Kalèb ɨ kelɨ nchînɨ̀ sɨ a nyɨŋ yvɨnɨ̂ mà kɨ nɨ̀ àtem a ŋweyna à jɨ̀mà. Mɨ n-ni-à a wù ndu zɨ ilaʼ ghè a wù tî ndù ki, a woyn ŋweyn keli ilaʼ ateyn kɨ̀ samoʼ. ²⁵Ɨtuʼ layn a libɨs wa kasi ɨ nà ndû dzɨ̀ a nse ìyum a dzɨ ta yì ndû a jvâ ì baŋnɨ bòm ta ghelɨ Amalèk nɨ̀ ghelɨ Kenàn nɨn chî dzɨ afoŋlɨ.”

Bôbo Fɨyini ɨ fu ngeʼ sɨ̂ ghelɨ Isìlæ̀

²⁶Bôbo Fɨyini nɨn bê meyn sɨ̂ Mosìs ŋêyn Alòyn na, ²⁷“Ghelɨ awo a bɨ-a ghèyn læ̀ dɨ̂mlɨ̀ kûm mà ndù chem wo a? Ma yvɨ meyn chwòsɨ̀ ta ghelɨ Isìlæ̀ nɨn dɨ̂mlɨ̀, ghâm mà.” ²⁸Bè sɨ̂ àŋena na, “Samoʼ ta mɨ n-chi mɨ n-nî kɨ àwo kì sɨ̂ zɨ̀ a mà vzɨ̀ ta yi n-bê. À n-bê mà Bôbo Fɨyini. ²⁹Yi n-kfɨtɨ̂ kɨ ghɨ̀ jɨ̀m a nse ìyum afêyn. Nô mɨ ndà ta ghɨ n-læ taŋ ŋweyn ta ghɨ nà n-taŋ ghelɨ ma wù chem meyn bèŋ mɨ̀vɨm ɨ̀m bò sɨ ndù asɨ wù na dɨ̂mlɨ̀ kûm mà nɨn kfɨ-a. ³⁰Nô wùl ɨ̀ mòʼ antêynɨ̀ nɨ̀ zɨ̀ læ̀ zɨ̂ wì ilaʼ ghè a mɨ n-læ chfɨ̀nɨ ɨ yɨ mɨkâyn sɨ fu sɨ̂ zɨ̀ na à na kelɨ zɨ̀. À læ̀ zɨ̂ kɨ Kalèb ɨ wâyn Jefunè ŋêyn Joshwà ɨ wâyn Nûn. ³¹Yì tî bè na ghɨ nì lî woyn ghi sɨ a ɨkòs, mɨtì mɨ n-lì zɨ̂ nɨ̀ àŋena a àŋena na dêŋsɨ̀ ilaʼ nâ ghàyn a yì nyàŋ têyn. ³²Mɨtì a yì kfɨtɨ kɨ̀ a nse ìyum afêyn. ³³Woyn ghi ɨ nì jelɨ̀ kal a nse ìyum afêyn kɨ̀ ta nchìsɨ nyâmsɨ nî sɨ nà jelɨ̀ kinî nyamsɨ. Àŋena læ̀ jɨ̂ŋ sɨ a bèŋsɨ̀ mɨ̀vɨm ɨ̀n kæ̀ nô ta ka yì kfɨtɨ mèsì bòm ta yi n-yvɨnɨ̂ wì ma. ³⁴Gvèsɨ̀ nɨn læ li mɨchi mɨ̀vɨm ɨ̀n kæ̀ sɨ jèl sɨ ki ilaʼ nâ zɨ̀. Yi n-yeyn ngeʼ sɨ a bèŋsɨ̀ mɨ̀vɨm ɨ̀n kæ̀, bèŋ ìmòʼ ɨ lî àlêʼ a achi àmòʼ. Yi n-yeyn ngeʼ nâ yèyn sɨ a bèŋsɨ̀ mɨ̀vɨm ɨ̀n kæ̀ bòm mbɨ sisɨ ɨ̀ kæ keli iwo zɨ̀ a yi n-ghɨ ɨlvɨ ta mà bèyn jɨm sɨ̂ zɨ̀. ³⁵À n-taŋî mà Bôbo Fɨyini. Mɨ n-nì àwo nâ kèyna sɨ̂ ghelɨ Isìlæ̀ ghɨ bɨ ghèyn nô ghɨ̀ jɨ̀m a ghɨ kul mɨ̀nàŋ kûm mà têyn. Àŋena læ̀ jɨ̂ŋ kfɨtɨ̂ kɨ ghɨ̀ jɨ̀m a nse ìyum afêyn.”

³⁶Ghelɨ ghì a Mosìs nɨn tum na ghɨ ndu jèlɨ̀ ki ilaʼ nâ zɨ̀, ɨghî ìvɨm a ghɨ n-kfa ɨ wam ànkaŋ kûm ìlaʼ nâ zɨ̀, ghelɨ Isìlæ̀ ɨ nà dɨ̂mlɨ̀-à bu yvɨnɨ̂ wì Bôbo Fɨyini, ³⁷wu tum ikoʼi i bemnɨ-i yi zuetɨ àŋena asɨ nɨ̀ Bôbo Fɨyini. ³⁸Ghɨ n-kfɨ̀tɨ tî, a faŋ kɨ Joshwà ɨ wâyn Nûn ŋêyn Kalèb ɨ wâyn Jefunè antêynɨ̀ nɨ̀ ghelɨ ghì njvàsɨ̀ bò a ghɨ n-læ ndù sɨ ki ilaʼ ateyn. ³⁹A nà ghɨ ta Mosìs fèʼtɨ iwo zɨ̀ a Bôbo Fɨyini bè sɨ̂ ghelɨ Isìlæ̀ nô ghɨ̀ jɨ̀m, àŋena ɨ dzɨ̀ nô sɨ a ŋaŋ. ⁴⁰Ɨtuʼ ɨ bɨsɨ layn, àŋena ɨ lù ɨ nà koʼ ndù dzɨ a ilaʼ i kfɨynsɨ bê na, “Ghèsɨ ni meyn mbɨ, ghès nɨn koʼ ndù ilaʼ ghè a Bôbo Fɨyini chfɨ̀nɨ̀ sɨ fu sɨ̂ ghès.”

⁴¹Mosìs ɨ bè sɨ̂ àŋena na, “Iwo ì zɨ-i nɨn kfeyn wi. Yi n-yvɨnɨ̂ wì Bôbo Fɨyini bòm ghà? ⁴²Bôbo Fɨyini nɨn ghɨ wi zɨ̂ àŋena. Ka yi n-koʼ ilaʼ afu. Yì kæ koʼ a mbàynɨ̀ sisɨ tɨm ɨ̀ yɨ̀ zɨ. ⁴³Ghelɨ Amalèk nɨ̀ ghelɨ Kenàn nɨn tɨm yɨ zɨ̀, Bôbo Fɨyini beyn meyn jɨm sɨ̂ zɨ̀, bòm ta yì bu yvɨnɨ̂ wì ŋweyn yi ghɨ sɨ kfɨ iwòŋ.”

⁴⁴Mosìs nɨ̀n tàŋi mɨtì, àŋena ɨ fvɨ̀ ɨ lu kɨ lu ɨ nà koʼ ndù dzɨ a ilaʼ i kfɨynsɨ nô mɨ ta Mosìs kèsa àntayntayn a mɨ̂kàyn nɨ̀ Bôbo Fɨyini nɨ̀n bû nèʼlɨ̀ sɨ alèʼ ghè a ghɨ n-bɨ̀ ateyn. ⁴⁵Àŋena nɨn koʼ tî ghelɨ Amalèk nɨ̀ ghelɨ Kenàn ghì a ghɨ nà n-chi ilaʼ i kfɨynsɨ nâ ghè ɨ fvɨ̀ ɨ kèʼ àŋena ɨ nyɨŋ a àŋena ibàm, ɨ leŋ kàli kɨ nɨ̀ àŋena têyn ɨ ndu chem a Homà.