Numbers 12
Meliyàm ŋêyn Alòyn ɨ nà ghêʼ Mosìs
1À nà n-ghɨ ta ghelɨ Isìlæ nɨn ghɨ a Haselòt, Meliyàm ŋêyn Alòyn ɨ nà sɨ taŋî kûm Mosìs bòm ta wù mala wul ɨ wî Kûsh. 2Àŋena nà n-bɨfɨ na, “Bôbo Fɨyini nɨn taŋî toynɨ̂ kɨ a Mosìs ma? Wù n-taŋî toynɨ̂ kɨmɨ a ghes.” Bôbo Fɨyini ɨ yvɨ ìwo zɨ̀ a àŋena nɨn bê.
3Mosìs nà n-ghɨ wul ngvɨmlɨ̂ ngêŋ ŋweyn nô sɨ a ŋaŋ wùl ɨ bu ghɨ wi a mbzɨ ta ŋweyn.
4Bôbo Fɨyini nɨn yvɨ̀ tî nô mɨ ɨlvɨ gha ɨ bè sɨ̂ Mosìs nɨ̀ Alòyn ŋêyn Meliyàm na àŋena fvɨ gvì a fɨndo nɨ̀ Bôbo, àŋena ghɨ̀ tal fvɨ̀ ɨ ndù. 5Bôbo Fɨyini ɨ kæ suʼi sɨ kàlì atuŋ a mbàʼ sɨ timi ɨchfɨ fɨndo nɨ̀ ŋweyn sɨ bè na Alòyn ŋêyn Meliyàm fvɨtɨ gvì asɨ. 6Àŋena ɨ fvɨ̀tɨ gvì wu bè sɨ̂ àŋena na, “Yì yvɨtɨ iwo zɨ̀ a ka mà be sɨ̀ zɨ̀.”
“À n-ghɨ ɨlvɨ ta nfèʼtɨ̀ ì ghaʼnɨ nɨ̀ Bôbo Fɨyini nɨn ghɨ a yi antêynɨ̀
ma nà fvɨ̂ a ŋweyn ikèʼ a ndayn
taŋî sɨ̂ ŋweyn a jêm.”
7“Yi n-ghɨ wi tî sɨ̂ Mosìs ɨ wul ɨ̀ fèlɨnɨ nɨ̀ mà,
Ma lem meyn ŋweyn na wù na kinî ghelɨ̀ ghem nô ghɨ̀ jɨ̀m.”
8“Mɨ n-ni-à taŋî sɨ̂ Mosìs ikêʼ nɨ̀ ìkeʼì,
taŋî kɨ a ndayn, taŋî wì a ngàynsɨ̀,
wu yeyn kɨ nô ta Bôbo Fɨyini nɨn ghɨ.
Yi n-fâyn wì sɨ nà dɨ̂mlɨ̀ kûm Mosìs ɨ wul ɨ̀ fèlɨnɨ nɨ̀ mà bòm ghà?”
9Bôbo Fɨyini nɨ̀n nyoʼsɨ meyn ɨ̀toŋ sɨ̂ àŋena nô sɨ a ŋaŋ ɨ lù ɨ visi àŋena afu.
10À na ghɨ ta mbàʼ lù sɨ atû fɨ̀ndo nɨ̀ Bôbo, Alòyn ɨ yeyn ɨwuyn Meliyàm ɨ fɨfɨ kɨ ta awœ ma à ku ànsàsì. 11Alòyn ɨ bè sɨ̂ Mosìs na, “Mɨ n-chwotɨ̂ a bô ka wa n-fù ngeʼ sɨ̂ ghès bòm mbɨ zɨ̀ a ghèsɨ̀ ngùtɨ̀ nì. 12Ka wa n-vìsi Meliyàm na ghɨ ta wayn ɨlvɨ ta ghɨ se sɨ bzɨ ma wù kfɨ meyn ɨlvà nɨ̀ nà ŋweyn nà sɨ fœ̀-à.”
13Mosìs ɨ dzɨ̀ sɨ̂ Bôbo Fɨyini na, “Mɨ n-chwotɨ̂ na wà chuʼ ŋweyn a Fɨyini fɨ.”
14Bôbo Fɨyini ɨ bèynsɨ̀ ɨ bè sɨ̂ Mosìs na, “À nà n-chfɨ bò ŋweyn mɨchya a ŋweyn ikèʼ, a iwumi ateyn i faŋ a ŋweyn atu sɨ a mɨchi nsòmbo. Fvɨ̀sɨ ŋweyn sɨ alèʼ ghè a ghɨ bɨ̀ ateyn sɨ a mɨchi nsòmbo. À na ghɨ ibàm i mɨchi nâ ghàyn, a wà kasi lì zɨ nɨ̀ ŋweyn alèʼ ghè a ghɨ bɨ̀ ateyn.” 15Mosìs ɨ fvɨ̀sɨ̀ Meliyàm sɨ alèʼ ghè a ghɨ bɨ̀ ateyn na wù chi mɨchi nsòmbo, ghelɨ ɨ faŋ kɨ alèʼ ghè a ghɨ bɨ̀ ateyn sɨ chem ta ka wù kasi gvì.
16A nà ghɨ ta Meliyàm kàsi gvì, ghelɨ Isìlæ̀ ɨ kæ lu sɨ a Hazelòt sɨ ndù sɨ bɨ a nse iyum a Balàn.