Numbers 11

Ghelɨ Isìlæ̀ ɨ nà dzɨ ngeʼ àŋena Bôbo Fɨyini ɨ yvɨ

¹À n-læ meyn nà ghɨ achi a li-a, ghelɨ Isìlæ̀ ɨ nà dzɨ̂ ngeʼ àŋena, Bôbo Fɨyini ɨ yvɨ ɨ nyòʼsɨ̀ ɨ̀toŋ ɨ nì ɨvɨs ɨ fvɨ̀ antêynɨ̀ nɨ̀ àŋena ɨ nyòʼlɨ̀ ɨ zuetɨ àŋena ghɨ li a mbæ̀sɨ alèʼ ghè a ghɨ n-bɨ̀ ateyn. ²Àŋena ɨ dzɨ̀ sɨ̂ Mosìs na wù gamtɨ àŋena, wu jèm sɨ̂ Bôbo Fɨyini ɨvɨs ateyn ɨ lɨma. ³Yi n-gàyn tî, ghɨ nà sɨ toŋtɨ̂ àlêʼ nâ kì na Tabelà bòm ta ɨvɨs ɨ Bôbo Fɨyini nɨ̂n fvɨ̀ afu ɨ nyòʼlɨ̀ ghelɨ.

⁴Yi n-gàyn tî, sèm ɨ nà sɨ kfɨ ghelɨ ɨtum ghì a ghɨ nà n-jelɨ̀ ŋêyn ghelɨ Isìlæ̀ sɨ yɨ ɨfwo ɨ yɨnɨ ɨ jûŋ vzɨ̀ a àŋena nà n-yɨ a Ijìb. Ghelɨ Isìlæ̀ ɨ nà sɨ boŋ dzɨ̀-à bê na, “Ndà fu njwò ghèsɨ̀ kfɨl a. ⁵Ghès nɨn kfâʼtɨ̀ sfɨ sìsɨ̀ a ghès tî nà kfɨl a Ijìb yuyn wi yuyn, fî kelɨ àboʼ kɨ̀ a tɨ̂nkì a tɨ̂nkì, kelɨ kɨmɨ mɨ̀fôlɨ̀ ɨ̀nlɨ̀mtɨnɨ̂ mzɨ̀ a ghɨ n-kfê ɨfwo ɨ yɨnɨ ateyn kɨ̀ a tɨ̂nkì a tɨ̂nkì. ⁶Mɨtì à na sɨ ghɨ lvɨ̂yn ma achfɨ̂ à kèsa kfɨtɨ meyn ghèsɨ̀ bu kelɨ wi afo sɨ yɨ a bu kɨ manà.”

⁷Manà nà n-ghɨ ta ìsɨ i Kòlìyandà fɨfɨ ndû ndu, ghɨ kɨmɨ ta afo a li-a ghɨ toŋtɨ̂ na lesìn. ⁸Ghelɨ nà n-jelɨ̀ kumtɨ̂ manà, ghɨ gvà iti kèsa ghɨ chuʼ a fɨ̂kɨ̀ ɨ kfè kfe kèsa ghɨ faytɨ̂ àbayn a kfaŋ ateyn. Abayn ateyn a nà nî kɨ nà ku ta afo a ghɨ fàytɨ nɨ̀ mɨ̀vɨ̂l mɨ̀ olìfsɨ̀. ⁹Amyaʼà nà n-chi suʼî alèʼ ghè a ghɨ bɨ̀ ateyn, manà ɨ boŋ suʼi.

¹⁰Mosìs nɨ̀n yvɨ meyn ta nô mɨ ghelɨ ndo ì kà nɨn dzɨ̂ achfɨ̀ a mɨ̂twò nɨ̀ àŋena. Bôbo Fɨyini ɨ nyòʼsɨ̀ ɨ̀toŋ sɨ̂ àŋena nô sɨ a ŋaŋ iwo ateyn i ɨ nà fu ngeʼ sɨ̀ Mosìs nô sɨ a ŋaŋ. ¹¹Wu bɨf sɨ̂ Bôbo Fɨyini na, “Wà n-fu ngeʼ sɨ̂ wùl ɨ̀ felɨnɨ nɨ̀ và tèyn bòm ghà? Mà jàs a gha na wà lem adɨli a ghelɨ ghèyn nô ghɨ̀ jɨ̀m a ma atu a? ¹²À bu tî bòm ma ghelɨ ghèyn, bula à bzɨ ma àŋena. Wà n-bê na mà bala àŋena ta nlì wayn nî wu bala wayn, ɨ̀ ndù nɨ̀ àŋena ilaʼ ghè a wà n-læ chfɨ̀nɨ sɨ fu sɨ̂ ghɨ̀bo àŋena bòm ghà? ¹³Mà ti kàʼ ma lì wo njwò sɨ fu sɨ̂ ghelɨ ghèyn ghɨ̀ jɨ̀m a? Àŋena faŋ meyn nà dzɨ̂ kɨ dzɨ bê sɨ̂ mà na, ‘Fu njwò ghèsɨ̀ kfɨl.’ ¹⁴Mà kàʼ ma bû tòʼnɨ̀ nɨ̀ ghelɨ ghèyn ghɨ̀ jɨ̀m kɨ̀ sɨ a ma ngeŋ adɨli ateyn a nɨn dɨlɨ̀ ghaʼ mà. ¹⁵À kæ nà ghɨ dzɨ zɨ̀ a ka wà fu ngeʼ sɨ̂ mà ateyn tèyn, wa laynsɨ zue ma. Dyèyn atem a juŋà sɨ̂ mà ɨ zue ma ta ka mà faŋ tɨ̀ fì tɨ̀ yeyn ngeʼ nâ yèyn.”

Mosìs ɨ choʼtɨ ghelɨ ghɨ tisɨnɨ mɨ̀vɨ̂m nsòmbo

¹⁶Bôbo Fɨyini nɨ̀n bê meyn sɨ̂ Mosìs na, “Jàŋtɨ ghelɨ ghì a ghɨ n-kya na à n-ghɨ ghelɨ ghɨ tisɨnɨ a Isìlæ̀ mɨ̀vɨm nsòmbo zɨ̂ àŋena gvi tìmi ɨchfɨ fɨndo nɨ̀ Bôbo. ¹⁷Mɨ n-nì suʼî gvî taŋi ghesɨ̀và afu, ɨ̀ fabtɨ ayvɨs à kì a kɨ n-ghɨ sɨ̀ và, ɨ̀ fù sɨ̂ àŋena ta ka ghɨ na gâmtɨ̀ và nɨ̀ àdɨli nâ kèynà a wà na bu fì jɨ̂ŋ wì vâ nìnyɨŋ.”

¹⁸Bè sɨ̂ àŋena na, “Yì lem ngêŋ sisɨ sɨ a nyɨŋ nà gvɨ̂tɨ̀-à bòm ta yì læ̀ kfɨl njwò a libɨs. Bôbo Fɨyini ti meyn yvɨ̀ ta yi n-byaytɨ̂ dzɨ̂ bê na, ‘Ndà fu njwò a, yi ti meyn nà loblɨ̂ a Ijìb.’” Bôbo Fɨyini nɨn fu njwò sɨ̂ zɨ̀ lvɨ̂yn a yì kfɨl. ¹⁹Yi n-kfɨlɨ wi njwò àteyn kɨ̀ achi àmòʼ ɨ̀ faŋ tɨ̀ kfɨl kɨ mɨchi ɨ̀n bò, kèsa mɨchi ɨ̀n tâyn, ɨ̀ faŋ tɨ̀ kfɨl kɨ mɨchi ìvɨm kèsa mɨchi mɨ̀vɨm ɨ̀m bò. ²⁰Yi n-kfɨl sɨ a njoŋ ìfɨ̀blɨ̀ ɨ̀ kfɨ̀lɨ̀ têyn a yì na fvɨ̀ a yi a ntoŋsɨ ɨzue, a yì na bu kòŋ wì sɨ kfɨl. Yi na ghɨ tèyn bòm ta yi ti meyn chas Bôbo Fɨyini vzɨ̀ a wù n-ghɨ zɨ̂ àŋena nà byaytɨ̂ dzɨ-à bê na, “Ghesɨ̀ tî lù nô ghà sɨ a Ijìb a?”

²¹Mosìs ɨ bèynsɨ̀ ɨ bè sɨ̂ Bôbo Fɨyini na, “Mɨ n-jelɨ̀ ghesɨ̀ sugèyʼsɨ̀ nkam ighɨ ntufa wà bê na, ‘Mɨ n-fu njwò a àŋena kfɨl sɨ a njoŋ ìfɨ̀blɨ̀ ma yì lù wo a?’ ²²Ghèsɨ kæ sɨ nyâm seysɨ nô sɨ̀ jɨ̀m nɨ̀ bzɨsɨ ɨ̀ kùtɨ sfɨsɨ sɨ a jvâ ì ghaʼnɨ nô sɨ̀ jɨ̀m sɨ bû kfèyn sɨ̂ àŋena.” ²³Bôbo Fɨyini ɨ bɨf sɨ̂ Mosìs na, “Ba yi ti n-ghɨ na awu a kema bu kelɨ wi adyaʼ ma? Wà n-yeyn lvɨ̂yn na iwo zɨ̀ a mà bè nɨn kfeyna ma yi n-kfeyn wi a?”

²⁴Bôbo nɨn bè tî, Mosìs ɨ fvɨ̀ ɨ ndu fèʼtɨ̀ àwo kì sɨ̂ ghelɨ a Bôbo Fɨyini bè, ɨ bè ghelɨ ghɨ tisɨnɨ ghì mɨ̀vɨ̂m nsòmbo ɨ timi jɨŋ kali fɨ̀ndo fɨ Bôbo Fɨyini. ²⁵Bôbo Fɨyini ɨ suʼi gvì antêynɨ̀ mbàʼsɨ̀ ɨ taŋi sɨ̂ Mosìs ɨ fsɨ ayvɨs a ŋweyn a li-a ɨ fu sɨ̂ Chyeʼ sìsɨ̀ mɨ̀vɨ̂m nsòmbo. A nà ghɨ ta àŋena kèli ayvɨs nâ kèynà ɨ nà sɨ jâŋ fêʼtɨ̀ àwo, ɨ fèʼtɨ̀ ɨ gòʼsɨ kɨ achi nâ ghè.

²⁶Yi nà n-gâyn tì ma chyeʼsɨ lisɨ sɨ̀ bò ɨ Eldàd ŋêyn Medàd ni meyn faŋ kɨ̀ alèʼ ghè a ghɨ bɨ̀ ateyn ɨ faŋ tɨ̀ ndù a fɨndo nɨ̀ Bôbo. Àŋena nà n-ghɨ kɨmɨ antêynɨ̀ chyeʼsɨ ghê a Mosìs nɨ̀n læ choʼtɨ. Àŋena nɨn læ faŋ mɨtì, ayvɨs a Bôbo ɨ gvi kɨmɨ sɨ̂ àŋena, àŋena nà jâŋ fêʼtɨ̀ àwo kɨ̀ alèʼ ghè a ghɨ bɨ̀ ateyn. ²⁷Wayndà ɨkùŋ ɨ nyɨŋ ndu bè sɨ̂ Mosìs na, “Eldàd ŋêyn Medàd nɨ̀n jâŋ fêʼtɨ̀ àwo alèʼ ghè a ghɨ bɨ̀ ateyn.”

²⁸Joshwà ɨ wâyn Nûn vzɨ̀ a wu nà n-gâmtɨ̀ Mosìs kɨ̀ sɨ a ɨtuʼ waynda nɨ̀ ŋweyn ɨ bè sɨ̂ Mosìs na, “Kàynà ka àŋena fî tàŋi a bôbo.”

²⁹Mosìs ɨ bɨf sɨ̂ ŋweyn na, “Wà n-ghêʼ àŋena a ma alèʼ a? Ndà fu ma Bôbo Fɨyini fu Ayvɨs a ŋweyn sɨ̂ ghelɨ ŋweyn nô ghɨ̀ jɨ̀m, àŋena na jâŋ fêʼtɨ̀ àwo a? ³⁰Mosìs ŋêyn chyeʼsɨ Isìlæ̀ sìsɨ̀ ɨ kæ kasi sɨ ndù sɨ alèʼ ghè a àŋena bɨ̀ ateyn.”

³¹Àŋena nɨ̂n ndù tî, Bôbo Fɨyini ɨ nì afyef a ɨ tàynsɨ̀ mɨ̀nyuyn ɨ̀n lì ghɨ toŋtɨ̂ na kwêlsɨ̀ mɨ tàynɨ gvì dzɨ a jvâ ì ghaʼnɨ ɨ nà tâynɨ̀ kal alèʼ ghè a ghɨ bɨ̀ ateyn, fu àghaf a nse kɨ chem ndû ntàm ìmòʼ. Mɨ n-suʼi tî ɨ yam alêʼ ma wùl kàʼ a wù li achi a fɨblɨ-à sɨ jèl. ³²Ghelɨ nɨ̂n làli achi nâ ghè ɨ yisi ku kɨ têyn ɨ kfa ku nɨ̀ntuʼ, ɨtuʼ layn àŋena nà bu ku kɨ ku. Wùl nɨ̀n bu læ ku mɨnyuyn a nkwòsɨ̀ mɨ læ chwô nkwòsɨ̀ ìvɨm. Àŋena nɨn kù tî, ɨ saŋ kal alèʼ ghè a ghɨ bɨ̀ ateyn. ³³Mɨtì àŋena nà bu kfɨl kɨ kfɨl njwò àteyn, Bôbo Fɨyini ɨ nyòʼsɨ̀ ɨ̀toŋ sɨ̂ àŋena nô sɨ a ŋaŋ ɨ tum ikoʼi i bemnɨ-i yi zuetɨ àŋena. ³⁴Yi n-gàyn tî, ghɨ nà sɨ toŋtɨ̂ àlêʼ ateyn na, Kiblot Atavà bòm ta ghɨ n-gvìmi ghelɨ ghì a ghɨ nà n-dzɨ̂ ɨfwo ɨ yɨnɨ ɨ jûŋ afu.

³⁵Ghelɨ Isìlæ̀ nɨ̂n lù sɨ a Kiblot Atavà ɨ ndu bɨ̀ a Hazelòt.