Micah 4
Mbôynɨ̀ Bôbo Fɨyini læ̀ nà ghɨ atû mbzɨ ì jɨ̀m
1Mikà nɨn læ meyn fi fèʼtɨ̀ ntûm Bôbo ɨ bè na,
Mɨ̀chi nɨn koʼ gvi-à, ta ka kfɨyn ìghaʼnɨ zɨ̀ a ndô Fɨyini nɨ̀n ti ateyn na ngaŋtɨ̂ chwô nô mɨ kfɨyn ì kà a mbzɨ.
Kfɨ̀yn ndô Fɨyini nâ yèyn læ̀ nà ti atû kfɨynsɨ nô sɨ̀ jɨ̀m bòm ta a n-ghɨ nà kfɨ̀ynsɨ.
Yì læ̀ nà dyêf chwô nô mɨ kfɨyn ì kà.
Ghelɨ tɨlaʼ læ̀ nà koʼ afu kɨ̀ sɨ idvɨ̀ sɨ koʼsɨ̂ Bôbo Fɨyini.
2Ghelɨ læ̀ nà lû a tɨlaʼ kɨ̀ sɨ idvɨ̀ ghɨ gvì ɨ nà bê na,
“Yì gvi ghesɨ̀nà koʼ atû kfɨyn ìghaʼnɨ nɨ̀ Bôbo Fɨyini,
ghesɨ̀nà ndu a ndô Fɨyini ghè a ghelɨ ndo nɨ̀ Jàkôb nɨn koʼsɨ Bôbo Fɨyini ateyn.
Bôbo læ̀ yeʼî ghesɨ̀nà nɨ̀ dzɨsɨ ŋweynsɨ,
a ghesɨ̀nà na jelɨ̀ ateyn.
Ghɨ læ̀ nà yeʼî ghelɨ a Zayòn kûm Bôbo.
Ghelɨ læ̀ nà lû a Jèlusalèm ghɨ nà fêʼtɨ̀ ndû nɨ̀ ntûm Bôbo Fɨyini.
3Bôbo Fɨyini læ̀ saʼ fu nsaʼsɨ ghêlɨ tɨlaʼ kɨ̀ sɨ idvɨ̀.
Tɨlaʼ tɨ totɨ læ̀ nà kelî àngùmnɨ̀, Fɨyini fɨ saʼ fu nsaʼ àŋena.
Ghelɨ tɨlaʼ tɨ mbzɨ læ̀ lî mɨ̀nyue mɨ̀ ìwòŋ nɨ̀ àŋena ɨ̀ fàytɨ fɨsɨ ɨ̀ nà felɨ̀ gveynsɨ ateyn.
Àŋena læ̀ lî àwoŋ a àŋena ɨ̀ fàytɨ tɨ̀fô nà kâŋ ɨ̀nkâʼ ateyn
Ilaʼi læ̀ bu fì li wì ɨfwo iwòŋ sɨ kèʼ i li,
ɨ̀ læ̀ faŋ tɨ̀ fì tɨ̀ yèʼi sɨ nà tɨm iwoŋ.
4Nô mɨ ndà læ̀ nà duʼ kɨ a ŋweyn alèʼ nɨ̀ mbôynɨ̀ felɨ̀ gvêyn mɨ̀tam nɨ̀ ŋweyn,
Nô mɨ ndà læ̀ nà dêŋsɨ̀ duʼ kɨ isas i fɨkàʼ fɨ fîksɨ̀ nɨ̀ ŋweyn,
wùl ɨ̀ læ̀ nà bu fàynsɨ̀ wì wul ɨ̀lvɨ̀.
Yi læ̀ gâyn kɨ tèyn bòm ta à tàŋi Bôbo Fɨyini ɨ bò ɨ̀dwaʼ ɨ̀ jɨ̀m.
5Ghelɨ tɨlaʼ tɨ mbzɨ nô ghɨ̀ jɨ̀m kôŋ ghɨ nà koʼsɨ̂ mɨyini mɨ̀ àŋena.
Ghès ghelɨ Isìlæ̀ nɨn faŋa nà koʼsɨ̂ kɨ Bôbo Fɨyini, chî kɨ sɨ adyaʼ nɨ̀ ŋweyn,
ghès na koʼsɨ̂ kɨ Fɨyini feyfɨ nô ta ka ghɨ̀ læ̂ ghɨ̀.
Iwo zɨ̀ a Bôbo Fɨyini bàʼtɨ.
6Bôbo Fɨyini bè na,
“Ɨlvɨ nâ vzɨ̀ læ̀ kfeyna a mà kasi yvɨ̀ŋtɨ̀ ghelɨ ghì a mɨ n-læ jɨ̀ŋsɨ ghɨ nà jelɨ̀ zɨnɨ̂ kɨ zɨnɨ,
mà læ̀ kasî kfâ nɨ̀ ghelɨ ghem ghì a mɨ n-læ ni ghɨ li ndu nɨ̀ àŋena a tɨ̂tumà,
ma læ̀ kasî yvɨ̂ŋtɨ̀ ghelɨ ghem ghì a mà tî nì àŋena na chî kɨ a ngeʼ.
7Mà læ̀ ni-à a ghelɨ ghem ghì a ghɨ lvɨŋ ɨ̀ nà sɨ nges kɨ ngesɨ faŋ nà bu chi-à,
Mà læ̀ ni-à a ghelɨ ghem nâ ghì a ghɨ tî sàŋ sɨ aŋena ilaʼ kasi nà ghɨ ìlaʼ i to-i.
Bôbo Fɨyini læ̀ nà ghɨ fòyn saʼ àŋena a kfɨ̂yn Zayòn.
Wù læ̀ faŋa nà ghɨ kɨ fòyn sɨ̂ àŋena nô ta ka ghɨ̀ læ̂ ghɨ̀.
8Sɨ̂ zɨ̀ ghelɨ Jelusalem, sɨ̂ zɨ̀ ghî a yi nduʼ atû àbaŋ a n-chì chî ghelɨ̀ ghem,
sɨ̂ zɨ̀ ghî a yì tìmi atû kfɨ̂yn ɨ̀ nà kɨ̂ŋtɨ̀ woyn ghem a Zayòn,
mà læ̀ ni-à a yì kasî nà kelɨ àdyaʼ atû mbzɨ ì jɨ̀m kɨ̀ ighel ta yi n-læ nà kelɨ sɨ asɨ.
Zɨ̀ ghî a yi n-chi a Jèlusalèm læ̀ kasî nà saʼ kɨ ta yi n-læ nà saʼ sɨ asɨ.
9Yi n-byal dzɨ̂ ghà lvɨ̂yn a?
Yi ti ghɨ na yì bu fì kelɨ wi fòyn ma?
À kfɨtɨ mèsì ghelɨ ghɨ tofɨnɨ nɨ̀ zɨ̀ ma?
Yi n-luŋ ghà têyn ta wul ɨ wi ɨlvɨ ta wàyn nɨn lum a?
10Zɨ̀ ghelɨ Jèlusalèm yì na byalɨ dzɨ-à,
yì na byalɨ dzɨ̀ ta wul ɨ wi ɨlvɨ a wàyn lum.
Bòmta ɨlvɨ kfêyn meyn ta ka yì fvɨ sɨ a ntèʼ afêyn.
Ɨlvɨ kfêyn meyn ta ka yì leʼ ndù nà chî kɨ a tɨ̂taʼ.
Ghɨ nì lî ndû nɨ̀ zɨ̀ a Babilòn,
a yì ndu chèm nô mɨ afu a Bôbo Fɨyini bœsɨ zɨ.
Yi ndù chem nô mɨ afu a Bôbo Fɨyini kasi yuyn atu àki-a,
ɨ̀ fsɨ̀ zɨ sɨ ɨwu nɨ̀ mbàynɨ̀ sɨsɨ.
11Lvɨ̂yn nɨ̀n ghɨ ma tɨlaʼtɨ yvɨŋtɨ meyn kɨ̀ sɨ idvɨ̀ sɨ nu zɨ.
Àŋena nɨn bê na, “Ghesɨ̀nà wumsɨ Jelusalem.
Zayòn yeyn keʼɨ̀, iwo-i bu ɨchfɨ̀.”
12Àŋena nɨn taŋî mɨ ti, kya wi ikfâtɨ̀ i Bôbo Fɨyini,
àŋena nɨn kya wi iwo zɨ̀ a wù n-baʼtɨ sɨ nì.
Àŋena nɨn kya wi na wù n-yvɨ̂ŋtɨ̀ àŋena, ta ghɨ yvɨ̀ŋtɨ̀ àsaŋ a bola sɨ leŋ.
13“Zɨ̀ ghelɨ Jelusalem, yì ndu leŋ.
Mɨ n-ni-à a akœ àki-a na to kɨ tèyn nteŋ,
mɨ n-ni-à a yì na kelɨ àdyaʼ kɨ kfeynɨ-à,
yi n-chyeʼsɨ̂ tɨ̀laʼ tɨ mbzɨ nɨ ɨ̀vɨ tɨ dvɨ̂ kɨ tèyn.”
Yi n-fsɨtɨ̂ ɨ̀fwo vzɨ̀ a àŋena tî ghal fsɨ̀tɨ sɨ̂ ghelɨ sɨ adyaʼ ɨ̀ gvì nɨ̀ ɨ̀ŋweyn sɨ̂ Bôbo Fɨyini,
Yi n-fu ìghaʼ i àŋena sɨ̂ Bôbo vzɨ̀ a wù n-saʼ mbzɨ ì jɨ̀m.