Micah 5

Fɨyini fɨ ɨ chfɨ̀nɨ̀ na ghɨ læ̀ bzɨ̂ fòyn a Betɨ̀lèhêm

¹Ghelɨ Jelusalem, yì baʼtɨ sugèyʼ sisɨ,

mbàynɨsɨ jɨŋ meyn kàli ntèʼ ghesɨ̀nà.

Àŋena nɨn leŋ fòyn Isìlæ̀,

àŋena nɨn leŋ ŋweyn kɨ̀ ikèʼ nɨ̀ mbàŋ.

²Bôbo Fɨyini bè na, “Zɨ̀ ghelɨ Betɨ̀lèhêm a Eflatà,

à læ̂ gòʼsɨ̀ kɨ ntèʼ zɨ a Judà,

mɨtì ma ghɨ sɨ læ̀ sɨ nì na fòyn fvɨ̀ a yi antêynɨ̀.

Fòyn læ̀ fvɨ̂ a yì antêynɨ̀ ɨ̀ nà saʼ Isìlæ̀,

fòyn nâ wèyn læ̀ fvɨ̂ isas i ndo ma yi n-læ meyn nà sɨ ghɨ nô sɨ ɨtuʼ ɨmu,

fòyn nâ wèyn nɨn læ meyn nà sɨ ghɨ jæ ta ka mbzɨ zɨtɨ.”

³Bôbo Fɨyini nɨn bèyn jɨm sɨ̂ ghelɨ Isìlæ̀,

sɨ yaʼi ta ka wul ɨwi vzɨ̀ a wàyn nɨn lum ŋweyn bzɨ,

a woynà ŋweyn ghelɨ Isìlæ̀ ghì a ghɨ n-ghɨ a tɨ̂tumà kasî kfa,

ɨ̀ chɨ̀yntɨ̀ ŋêyn woynà àŋena.

⁴Fòyn nâ wèyn læ̀ koʼa, nà chî ghelɨ ŋweyn ta nchì bzɨsɨ,

wù læ̀ nà tisɨ̂ ghelɨ ŋweyn nɨ̀ àdyaʼa ma kɨ lù sɨ̂ Bôbo Fɨyini,

wù læ̀ nà tisɨ̂ ghelɨ ŋweyn nɨ̀ àdeŋà izɨyn nɨ̀ Bôbo Fɨyini ɨ Fɨyini fɨ ŋweyn.

Ghelɨ ŋweyn læ̀ nà chî nɨ̀ mbôynɨ̀, bòm adyaʼa ŋweyn.

Adyaʼa ŋweyn a læ̀ ni-à a ghɨ na ngvɨmlɨ̂ ŋweyn kɨ mbzɨ ì jɨ̀m.

⁵Ghelɨ ŋweyn læ̀ nà chî nɨ̀ mbôynɨ̀ bòm ŋweyn.

Bôbo læ̀ bœsɨ̀ ghelɨ ŋweyn ɨ̀ fu ngeʼ sɨ̂ ghelɨ ghɨ li

Ghelɨ Asilìyà kæ læ̀ kèʼ ghesɨ̀nà

ɨ̀ bɨ̀ytɨ̀ mbàyn sîsɨ̀ a sɨ jɨ̀ŋ kàli ntèʼsɨ ghesɨ̀nà,

a ghesɨ̀nà choʼtɨ nchìsɨ̀ nsòmbo,

kèsa ghelɨ ghɨ tisɨnɨ nfama ta ka ghɨ nu àŋena.

⁶Ghelɨ ghɨ tisɨnɨ nâ ghèyn læ̀ tɨm yɨ ghelɨ Asilìyà iwòŋ.

Àŋena læ̀ tɨm yɨ ìlaʼi Nimlòd iwòŋ.

Fòyn ghesɨ̀nà læ̀ bœ̂sɨ ghesɨ̀nà sɨ awu nɨ̀ ghelɨ Asilìyà

ɨlvɨ ta àŋena gvì ɨ zɨ a ghesɨ̀nà ilaʼ

ɨ̀ ghal fsɨ ɨlwêʼ ghesɨ̀nà nô ɨ̀ jɨ̀m.

⁷Ghelɨ Jàkôb ghì a ghɨ læ̀ faŋ,

læ̀ na chî a tɨlaʼ tɨ dvɨ̂ kɨ tèyn

àŋena læ̀ nà ghɨ ta amyâʼ ta Bôbo Fɨyini tum,

àŋena læ̀ nà ghɨ ta ivɨ ɨlvɨ ta yi myêʼlɨ̀ atû ɨ̀nfùʼ

fsɨ wi adyaʼ sɨ̂ wùlɨ̀ mɨ̀sòŋ sɨ suʼi,

fsɨ wi adyaʼ sɨ̂ wùl sɨ yum.

⁸Ghelɨ ndo nɨ̀ Jàkôb ghì a ghɨ læ̀ faŋ læ̀ nà chî a tɨlaʼ tɨ dvɨ̂ kɨ tèyn,

àŋena læ̀ nà chî antêynɨ̀ nɨ̀ ghelɨ tɨlaʼ ghɨ dvɨ̂ kɨ tèyn,

àŋena læ̀ nà ghɨ ta nyamsɨ abo antêynɨ̀ nyamsɨ sɨ lisɨ,

àŋena læ̀ nà ghɨ ta woyn nyam àbo antêynɨ̀ ìnoyn i njɨ̀sɨ̀,

yeyn njɨ̀ ku kfɨl kɨ kfɨl

ma wùl kàʼ wu bû gàmtɨ̀ njɨ̀ sɨ ateyn.

⁹Zɨ̀ ghelɨ Isìlæ̀ læ̀ nà tɨm iwoŋ zɨ̂ mbàynɨ̀ sisɨ yɨ kɨ yɨ,

yì læ̀ bebsɨ̂ mbàynɨ̀ sisɨ nô sɨ̀ jɨ̀m.

¹⁰Bôbo Fɨyini bè na “À læ̀ nà ghɨ achi nâ ghè

a mà zuetɨ nyamsi kfaŋ sìsɨ̀ a yi n-tɨm iwoŋ nɨ̀ ɨ̀nseynsɨ,

à læ̀ nà ghɨ achi nâ ghè a mà bebsɨ mɨ̀nchaʼ mɨ̀ iwòŋ nɨ̀ zɨ̀.

¹¹Mà læ̀ bebsɨ̂ ntèʼsɨ ghaʼlɨnɨsɨ a yi ilaʼ

ɨ̀ bɨ̀ytɨ̀ ɨ̀lwêʼ vzɨ̀ a yi n-leʼ lêytɨ̀ ateyn nô ɨ̀ jɨ̀m.

¹²Mà læ̀ bebsɨ̂ ɨvɨ̂ŋ vzɨ̀ a wu ghɨ a yi antêynɨ̀ nô ɨ̀ jɨ̀m,

wùlɨ̀ fɨ̀nyaʼ læ̀ nà bu ghɨ wi a yi antêynɨ̀.

¹³Mà læ̀ bebsɨ̂ ɨ̀nfyèʼsɨ̀ vzɨ̀ a yì fàytɨ,

ɨ̀ bèbsɨ tɨ̀fam titɨ nô tɨ̀ jɨ̀m

a yì na bu koʼsɨ wì ɨ̀nfyèʼsɨ̀,

afo ma yì fàytɨ nɨ̀ ɨ̀wu.

¹⁴Mà læ̀ kos ɨ̀toʼ Ashelà nɨ̀ zɨ̀ nô ɨ̀ jɨ̀m,

ɨ̀ bèbsɨ mèsì kɨ̀ mesi ntèʼ sɨ ghaʼlɨnɨsɨ nɨ̀ zɨ̀.

¹⁵Mà læ̀ nyôʼsɨ̀ ɨ̀toŋ nô sɨ a ŋaŋ ɨ sɨ̀sɨ̀

àtu a tonɨ-a kì a ghelɨ tɨlaʼ tɨ mbzɨ ghɨ li dyèyn sɨ̂ mà.