Micah 3
Mikà ɨ yòl sɨ̂ ghelɨ ghɨ tisɨnɨ a Isìlæ̀
1Mɨ n-læ meyn taŋi sɨ̂ ghelɨ ghɨ tisɨnɨ a Isìlæ̀ ɨ bè na,
“Zɨ̀ ghelɨ ghɨ tisɨnɨ isas i ndo nɨ̀ Jàkôb, yì yvɨtɨ.
Zɨ̀ ghî a yi n-saʼ a Isìlæ̀, yì yvɨtɨ.
Yi n-kelɨ sɨ nà kya iwo zɨ̀ a yi n-ghɨ àtì-ati, kya izɨ-ì a yi n-ghɨ wi àtì-ati.
2Zɨ̀ ghî a yi n-bâyn njùŋ, kôŋ mbɨ,
yi n-yvɨ̂ ghelɨ̀ ghem ta yì yvɨ̀ nyamsɨ,
solî ɨ̀vɨf àŋena.
3Zɨ̀ ghî a yi n-kfɨl ghelɨ̀ ghem ta yì kfɨlɨ njwò,
yi n-yvɨ̂ ghelɨ ghem têyn,
zuelɨ̂ ɨ̀vɨf àŋena.
Zɨ ghî a yi n-kaʼtɨ ghelɨ ghem
ta ghɨ kaʼtɨ njwò sɨ we a ntòyn.
4Yì læ̀ nà dzɨ̂ sɨ̂ Bôbo Fɨyini,
mɨtì wu yvɨtɨ̂ wì.
Ɨlvɨ nâ vzɨ̀ læ̀ kfeyna, a wù beyn jɨm sɨ̂ zɨ̀ bòm àwo a bɨ-a kì a yì nì.
5Bôbo Fɨyini nɨn bê sɨ̂ nfèʼtɨ̀ sɨ ànkaŋsɨ na,
“Yi n-kɨŋ na ghelɨ̀ ghem le dzɨ,
wùl nɨ̀n yuyntɨ̂ zɨ̀, yi bè sɨ̂ ŋweyn na wu nì yeyn njùŋ.
Wùl ɨ̀ leʼ na yi n-yuyntɨ̂ wì zɨ, yi bè sɨ̂ ŋweyn na wu yeyn ìwo.”
6“Bòm tèyn, yì na kya na ɨlvɨ̂ vzɨ tɨmsɨ meyn.
Ɨtuʼ nɨn jɨ a, a wùl sɨ̂ zɨ̀ na màʼ njòʼ bu fì kelî wì sɨ taŋ.
Ɨchfɨ̂ iyvɨ-i nɨn nì sœ̂ sɨ̂ nfèʼtɨ̀ sɨ ankaŋsɨ,
abe a nì fɨmà a àŋena na bu yeyn wi ɨlwêʼ.
7Iwumi-i læ̀ ku ghelɨ ghì a ghɨ n-fêʼtɨ̀ awo,
asas a ghelɨ ghì a ghɨ n-fyeŋ mɨnyaʼ læ̀ bayna.
Àŋena læ̀ nà lêytɨ̀ àkêʼ,
bòm ta àŋena læ̀ nà dzɨ̂ na Fɨyini dyeyn iwo sɨ̂ àŋena fɨ fɨ̂ysɨ̀ wì.
8Mɨtì sɨ̂ mà Mikà, Bôbo Fɨyini fu meyn àdyaʼ sɨ̂ mà kɨ kfeynɨ-à,
ayvɨs a ŋweyna nɨn ghɨ sɨ̂ mà kfeynɨ-à,
wu fu meyn adyaʼ a ŋweyn sɨ̂ mà kɨ kfeynɨ-à ɨ̀ dyèyn dzɨsɨ àti ati nɨ̀ ŋweyn sɨ̂ mà nô sɨ̀ jɨ̀m.
Wù fu meyn àtem a to-a sɨ̂ mà, ma na kfeynɨ̂ sɨ nà fêʼtɨ̀ mbɨsɨ woyn Jàkôb sɨ̂ àŋena.
Mɨ kfeynɨ̂ sɨ nà fêʼtɨ̀ mbɨsɨ Isìlæ̀ sɨ̂ àŋena.
9Zɨ̀ ghelɨ ghɨ tisɨnɨ isas i ndo nɨ̀ Jàkôb, yì yvɨtɨ.
Zɨ̀ ghelɨ ghɨ saʼnɨ a Isìlæ̀, yì toʼ yvɨ̀tɨ,
Yi n-bâyn àwo kì a kɨ n-ghɨ ajûŋ,
fyeʼtɨ̂ nô mɨ ghà ta kɨ n-ghɨ àtì ati.
10Yi n-bâʼlɨ̀ Zayòn ɨ ntèʼ Fɨyini atû mɨ̀luŋ,
yi n-bâʼlɨ̀ Jèlusalèm atû àwo a bɨ-a.
11Ghɨ n-yuyntɨ̂ kɨ yuyntɨ ghelɨ ghɨ tisɨnɨ a Jelusalem na àŋena na nì ìfêl i àŋena.
Ghɨ n-lâʼ kɨ laʼ ngàŋsɨ ndô Fɨyinisɨ̀ jæ na àŋena yeʼi iwo i Fɨyini.
Nfèʼtɨ̀sɨ nɨn n-fêʼtɨ̀ àwo a Jelusalem kɨ̀ ma ghɨ yùyntɨ yuyntɨ àŋena.
Àŋena nɨn nî mɨtì lêm kɨ na Bôbo Fɨyini nɨn ghɨ ŋêyn àŋena, bê na,
nô ìwo i bzɨ-i ili kàʼ yi bû gàyn sɨ̂ àŋena,
na Bôbo Fɨyini nɨn ghɨ ŋêyn àŋena.
12Bòm tèyn ghɨ læ̀ felɨ̀ Zayòn kɨ̀ ta ghɨ fèlɨ̀ gveyn bòm zɨ̀.
Jelusalem læ̀ nà ghɨ ta ilɨŋ ta ghɨ yvɨ̀ŋtɨ̀ʼ,
ghɨ læ̀ leʼ visî ndô Fɨyini a ɨtwaʼ koʼ ateyn.