Micah 2

Fɨyini fɨ nì fu ngeʼ sɨ̂ ghelɨ ghì a ghɨ n-yeʼtɨ ghelɨ ghɨ bolɨ.

¹Ngeʼ ìghaʼnɨ nɨn ghɨ sɨ̂ ghelɨ ghì a ghɨ n-baʼtɨ̂ sɨ nà ni mbɨ.

Ngeʼ ìghaʼnɨ nɨn ghɨ sɨ̂ ghelɨ ghì a ghɨ n-kfa nyiŋì a mɨ̂kùyn ghɨ nà baʼtɨ̂ kɨ àwo a bɨ-a!

Àŋena nɨn kfâ bàʼtɨ àwo abɨ-a nâ kèyn, ɨtuʼ na layn gvî kɨ tèyn ghɨ nà sɨ nî ndû kɨ ndu,

bòm ta àŋena nɨn kfâʼtɨ̀ na àŋena nɨn kelɨ adyaʼ.

²Wùl sɨ ateyn nɨ̀n yeyn gveyn ɨ̀ sèmtɨ wu ghal fsɨ kɨ fsɨ,

Wùl sɨ ateyn nɨ̀n yeyn ndô wùl ɨ̀ sèmtɨ, wu ghal fsɨ kɨ fsɨ.

Àŋena nɨn semtɨ̂ àbe a wûl, ghɨ lɨsɨ ŋweyn ɨ ghal sfɨ.

Àŋena nɨn semtɨ ɨfwo isas i ndo nɨ̀ wùl ghɨ ghàl fsɨ kɨ fsɨ.

³Bôbo Fɨyini kæ sɨ nà sɨ bè na,

“Mɨ baʼtɨ̂ sɨ fu ngeʼ sɨ̂ ghelɨ ghèyn yi bem kɨ tèyn,

wùl sɨ ateyn ɨ ghɨ wi sɨ leʼ ngeʼ àteyn.

Yì læ̀ nà bu fì jêl ghaŋsɨ̂ wì ɨwuyn,

bòm ta à læ̀ nà ghɨ ɨ̀lvɨ ngeʼ ìbemnɨ.

⁴À læ̀ nà ghɨ achi nâ ghè, a mbàynɨ̀ sisi na chyeʼ zɨ̀.

Mbàynɨ̀ sisɨ læ̀ nà yem njàŋsɨ ikoynsɨ isuyn fêʼtɨ̀ zɨ̀ ta yi n-ndzɨ̂ bê na,

‘Iyes i mæ̀ kɨ̀ têyn,

Fɨyini fɨ fsɨ meyn nse yes

ɨ̀ fu sɨ̂ mbàynɨ̀ seysɨ.”

⁵À ti iwo zɨ̀ a ghelɨ Bôbo Fɨyini læ̀ yvɨ̀ŋtɨ̀ ta ka nô mɨ ndà na lì alêʼ kì a kɨ kfèynɨ sɨ ŋweyn,

a nô wùl sɨ̂ zɨ̀ na ghɨ wi afu.

Nfèʼtɨ̀sɨ ànkaŋ

⁶Nfèʼtɨ̀sɨ ànkaŋ nɨ̀ àŋenasɨ nɨn bê na,

“Ka wa n-fì yòysɨ̀ ɨ̀tuŋlɨ̂ wes.

Fɨyini fɨ nɨn wumsɨ̂ wì ghes.”

⁷A ti itaŋi zɨ̀ a zɨ̀ woyn ndô Jàkôb nà kelɨ sɨ nà taŋi-à bê na,

Bôbo Fɨyini kàʼ wu bû nà nyôʼsɨ̀ ɨ̀toŋ,

na Bôbo Fɨyini kàʼ wu bû ni ìnkì iwo tèyn.

Ba awo kì a mɨ n-bè nɨn gvî kɨ nɨ̀ njùŋ?

Awo kì a mɨ n-bê nɨn gvî kɨ nɨ̀ njùŋ sɨ̂ ghelɨ ghì a ghɨ n-ghɨ àtì-ati.

⁸Bôbo Fɨyini bè na,

“Yi nî kɨ sɨ̂ ghelɨ̀ ghem ta yi n-ghɨ mbàynɨ̀sɨ̀ sɨ̂ àŋena,

Yi yeyn dàla wùl yi ghal fsɨ kɨ fsɨ, kfɨlà wì,

Yi nî kɨ ta ghelɨ a ghɨ lù ɨtwaʼ iwòŋ.

⁹Yi saŋ meyn fvɨ̀sɨ̀ ghɨ̀ki ghelɨ ghem sɨ a àŋena mɨ̂bè,

a ghɨ mɨ̀be àŋena koŋà.

Yi n-ghaytɨ̂ fsɨ ɨ̀fwo ɨjûŋ vzɨ̀ a mà bòysɨ woyn ghelɨ ghem ɨ̀ fu na àŋena keli kɨ̀ sɨ a moʼ.

¹⁰Yì lali lù.

Yi kàʼ yi bu nà fî chî afêyn nɨ̀ mbôynɨ̀,

Yi ni meyn àlêʼ ateyna na bu layn wi ta isaʼi nɨn dyêyn.

Mbɨ sisɨ bebsɨ meyn àlêʼ ateyn ma ghɨ kàʼ ghɨ bû fì fàytɨ nô sakos.

¹¹Nfèʼtɨ̀ kæ gvì ɨ lɨsɨ zɨ̀ ɨ̀ wam bè na,

“Yi nì kelɨ̂ mɨ̀lûʼ ɨn tô, mɨ dvɨ̂ kɨ tèyn, kɨ tɨ̀nki tɨ̀ jɨ̀m,”

a yì na kôŋ kɨ ìnki nfèʼtɨ̀ nâ zɨ̀-ì.

Fɨyini fɨ ɨ chfɨ̀nɨ̀ sɨ kasi sɨ yvɨ̀ŋtɨ ghelɨ ŋweyn

¹²“Yì na kya samoʼ a woyn ndo nɨ̀ Jàkôb na mà læ̀ kasî yvɨ̂ŋtɨ̀ zɨ̀.

Samoʼ mà læ̀ kasî yvɨ̂ŋtɨ̀ abɨ̂sɨ̀ a woyn Isìlæ̀ alêʼ àmòʼ.

Mà læ̀ yvɨ̂ŋtɨ̀ àŋena kɨ̀ ta ghɨ yvɨ̀ŋtɨ̀ bzɨsɨ ibèyn.

Ghelɨ Isìlæ̀ læ̀ kasî dvɨ-à ɨ̀ nà ghɨ kɨ̀ ta njɨ̀sɨ̀ ɨtwaʼ.

¹³Fɨyini fɨ̀fɨ̀ a fɨ n-dyêyn dzɨ læ̀ lî fvɨ̂ nɨ̀ àŋena sɨ a ndo àkòs ɨ̀ chèm asɨ nɨ̀ àŋena.

Àŋena læ̀ kôl ɨ̀chfɨ mbàyn ntèʼ ɨ̀ fvɨ̀.

Fòyn àŋena ɨ Bôbo Fɨyini læ̀ timi asɨ nɨ̀ àŋena ɨ̀ tòynɨ nɨ̀ àŋena ɨchfɨ mbàyn ɨ̀ chèm asɨ nɨ̀ àŋena.”