Micah 1
1À n-læ nà ghɨ ta fòyn Jotàm nɨ̀ fòyn Ahàz ŋêyn fòyn Hèzèkayà nà n-saʼ a Judà, Bôbo Fɨyini ɨ tum nfèʼtɨ̀ Mikà ma wù fvɨ̀ a nteʼ Molisèt nɨ̀ àwo kèynà na wù ndu làʼì a ntèʼsɨ Sàmalìyà nɨ̀ Jelusalem. 2Nfèʼtɨ̀ Mika nɨn ndu bè na,
Yì yvɨtɨ a ghelɨ tɨ̂laʼ tɨ mbzɨ tɨ̀ jɨ̀m.
Zɨ̀ ghî a yi n-chi a mbzɨ nô ghɨ̀ jɨ̀m, yì yvɨtɨ.
Bobo Fɨyini vzɨ̀ a wù n-saʼ mbzɨ ì jɨ̀m bè na yi n-ghalɨ zɨ lvɨ̂yn sɨ iwo ta yì nì bèbsɨ.
Yì yvɨtɨ. Bobo weyn n-taŋi gvîsɨ̀ sɨ̂ zɨ̀ a ndo ìlaynɨ nɨ̀ ŋweyn iyvɨ.
Bôbo Fɨyini nɨn bebsɨ̂ Sàmalìyà nɨ̀ Jelusalem
3Bôbo Fɨyini lali meyn sɨ alèʼ ghè a wù n-duʼ ateyn iyvɨ.
Wù lu meyn sɨ iyvɨ nà suʼî gvî a nse sɨ jèylɨ ɨlwêʼ ɨngaŋtɨnɨ vzɨ̀ a wu n-ghɨ a nse.
4Wù na tom àvɨ nô mɨ atû kfɨyn i kà,
yi saŋi ndu kɨ ta ileŋ
ɨlvɨ ta ghɨ lèm a ngùŋ ɨ̀vɨ̀s.
Wù na tom avɨ nô mɨ atû kfɨ̀yn ìkà, yi seyn ɨ nà kàli a mɨ̂fòŋlɨ kɨ ta jva ɨlvɨ ta yì to ɨ̀ nà kalì ɨwuyn kfɨyn.
5Awo nâ kèynà à jɨ̀m læ̀ nà gâyn tèyn bòm àtu a tonɨ-a nɨ̀ ghelɨ Isìlæ̀.
Awo nâ kèyna læ̀ nà gâyn kɨ bòm mbɨsɨ woyn Jàkôb.
Ghelɨ ndo nɨ̀ Jàkôb ti nî àwo abɨ-a nâ kèynà ngeʼ àŋena ghɨ nô gha?
Ngêʼ woyn Jàkôb fvɨ̀ kɨ̀ sɨ̂ ghelɨ Sàmalìya.
Ghɨ n-koʼsɨ̂ wo ɨ̀nfyèʼsɨ̀ vzɨ̀ a Juda tî a?
Ba ghɨ n-koʼsɨ̂ ɨ̀nfyêʼsɨ̀ ateyn a Jelusalem?
6Yi ti n-dyêyn na Bobo nɨn sàʼtɨ̀ ntèʼ Sàmalìyà, a yì na ghɨ kɨ ta ɨfwo ilɨŋ ɨlvɨ ta ghɨ yvɨ̀ŋtɨ̀.
Sàmalìyà læ̀ na kêʼ kɨ ta gveyn ɨlvɨ ta ghɨ jùʼ sɨ tòʼ mɨtam ateyn.
Mà læ̀ bɨŋ ngòʼ sîsɨ̀ a ghɨ bàʼlɨ mbàyn Sàmalìyà ateyn a sɨ kali afoŋlɨ.
Mà læ̀ choʼtɨ̂ ngòʼ sɨ̀sɨ̀ a ghɨ we achɨ a mbàyn Sàmalìyà ateyn nô sɨ̀ jɨ̀m.
7Ghɨ læ̀ zuelɨ ɨ̀fyeʼsɨ̀ vzɨ̀ a ghelɨ Samalìyà nɨn koʼsɨ nô ɨ̀ jɨm a wu na ghɨ kɨ ɨbweʼ ɨbweʼ.
Ghɨ læ̀ nyôʼ ɨ̀fwo ɨ jûŋ vzɨ̀ nô ɨ̀ jɨ̀m a ghɨ̀lûmnɨ̀ nɨn gvî fu sɨ̂ ghɨ̀ki a ndô Fɨyini, chî nɨ̀ àŋena.
Mà læ̀ bebsɨ̂ nô mɨ ànfèʼsɨ̀ à kà ta àŋena fàytɨ nà koʼsɨ-à.
Mà læ̀ nî ìwo nâ yèynì bòm ta ghelɨ Sàmalìyà kèli ɨfwo nâ wèyn bòm ta àŋena leʼ ma ɨ̀ ndù nà felɨ̀ àkfàlà sɨ̀ mɨ̀yini ɨ mɨ̂nlù, ghɨ lâʼ àŋena nɨ̀ ɨ̀fwo ateyn.
Yi ti n-dyêyn na mbàynɨ̀sɨ Sàmalìyà sɨ̀ læ̀ ghaytɨ̂ sfɨ ɨ̀fwo nâ wèyn sɨ̂ àŋena ɨ̀ kàsi ndù nà boŋ làʼ ɨ̀kfàlà a àŋena ndosɨ mɨyini, chî nɨ̀ àŋena.”
Mikà ɨ dzɨ̀ ngeʼ Jèlusalèm
8Nfèʼtɨ̀ Mikà ɨ kæ bè sɨ a ŋweyn a ngeŋ na; ngeʼ Sàmalìyà læ̀ bem ghaʼ mà, a mà na jêlɨ̀ kɨ nɨ̀ ɨ̀vɨ ɨ yum, jelɨ̀ kɨ nɨ̀ ìsas i yumi,
jelɨ̀ byalɨ dzɨ̂ kɨ ta ànyâmnɨ̀,
koynsɨ̂ dzɨ̂ kɨ ta àngêynɨ̀.
9Mà læ̀ dzɨ-à bòm ta ngeʼ kòli ghelɨ Sàmalìyà, àŋena na ghɨ kɨ sɨ læ̀ sɨ kfɨ nɨ̀ ɨ̀nyeyn,
ngeʼ àteyn sɨ ghɨ kɨ nô a Judà.
Ngeʼ àteyn sɨ ti kɨ ɨchfɨ Jelusalem,
ɨ ntèʼ ighaʼnɨ zɨ̀ a ghelɨ ghem nɨn chi ateyn.
10Ka yi n-vìsi mbàynɨ̀ sɨ ghesɨ̀nàsɨ yvɨ iwo nâ yèyni a nteʼ Gât.
Ka wùl nɨ̂n dzɨ̀ nô sakos.
Zɨ̀ ghî a yi n-chi a ntèʼ Bet Ofla, iwo i bu ghɨ wi a yi ɨchfɨ̀,
yì na dzɨ-à, bɨŋlɨ̂ abɨ̀l.
11Zɨ̀ ghî a yi n-chi a nteʼ Shafì, yì leʼ nɨ̀ àsas a yuma nɨ̀ zɨ̀ keyn ndù lèytɨ̀ a tɨ̂laʼ tɨ lûtɨ̀, yi n-wumi-à.
Ka wùl ta wù n-chi a ntèʼ Zanàn nɨ̂n læ̀ fì fvɨ̀ abe.
Idzɨ-i zɨ̀-i fvɨ̂ gvî a nteʼ Bet Ezèl, ma à ti abùʼ a leytɨnɨ-a,
mɨtɨ̀ alêʼ a bu ghɨ wi ta ka àŋena leytɨ ateyn.
12Ghelɨ ghì a ghɨ n-chi a nteʼ Malòt læ̀ nà yvɨ ìlûm nô sɨ a ŋaŋ, mɨtì ghɨ wi sɨ keli igâmtɨ̀,
bòm ngeʼ ta Bôbo Fɨyini nì yì gvî sɨ̂ àŋena a Jelusalem.
13Ghelɨ ghì a ghɨ n-chi a Lakìsh,
yì na gvɨ̂tɨ̀ sɨ leʼ. Yì baʼtɨ mɨ̀nchaʼ mɨ̀ ìwoŋ.
Nteʼ zɨ nɨn ghɨ ntèʼ Judà zɨ̀ a yì n-læ zɨ̀tɨ sɨ nà ni mbɨ jæ na ghelɨ Zayòn na ni-à.
Ghɨ n-ghâm Isɨlæ̀ nô mɨ sɨ a mbɨ ì kà,
ghâm kɨmɨ zɨ̀ sɨ ateyn.
14Yi ti n-ndyêyn na yi n-kelɨ sɨ fu ɨfwo ɨ jûŋ sɨ̂ ghelɨ Moliset-gât
bòm ta àŋena sɨ kɨŋ sɨ nà kfâ.
Tɨfôyn tɨ Isɨlætɨ̀ læ̀ yeyn mesì na ghelɨ nteʼ Azìb tî nà lɨsɨ̂ kɨ lɨsɨ àŋena.
15Mɨ n-tum wul a wù gvi tɨm yɨ̀ zɨ ghì a yi n-chi a nteʼ Màleshà.
Ghelɨ ghɨ tisɨnɨ ghɨ to a Isìlæ̀ læ̀ leʼa,
ɨ̀ ndù lèytɨ a Adulàm.
16Yì dzɨ ikfɨ i wôyn ghi ghì a yi n-kôŋ tî ɨ̀ kom ɨtu. Yì kom sòl ɨ̀tu.
Bom ta ghɨ læ̀ ghaytɨ̂ àŋena sɨ adyaʼ ɨ lì ndù nɨ̀ àŋena a tɨ̂laʼ ɨ tɨ̀lûtɨ̀.