Leviticus 14

Tɨsaʼ kûm ghelɨ ghì a ghɨ to nɨ̀ tɨ̀koʼi tɨ dyaŋnɨtɨ

¹Bôbo Fɨyini nɨ̀n læ meyn bè sɨ̂ Mosìs na, ²“Ɨtêyntɨ̀ nɨn ghɨ tɨ̀saʼ tìtɨ̀ a wùl ɨ̀ vzɨ̀ a wù to nɨ̀ ìkoʼi i dyaŋnɨ-i nɨn kelɨ sɨ nà lema ɨlvɨ ta ghɨ gvì nɨ̀ ŋweyn na ngàŋ ndô Fɨyini su ŋweyn ta isaʼi nɨn dyêyn. ³Ngàŋ ndô Fɨyini nɨn kelɨ sɨ fvɨ sɨ a alèʼ ghè a ghɨ bɨ̀ ateyn, sɨ ndù sɨ faytɨ sɨ ki sɨ yeyn na wù to meyn samoʼ a. ⁴Wù na ghɨ ma wù to meyn, ngàŋ ndô Fɨyini ɨ bè wù gvi nɨ̀ mɨ̀nyûyn ɨ̀m bò, mɨ kelɨ wi nseʼi, nɨ̀ àbâs a fɨ̂kàʼ fɨ sedàfɨ̀ nɨ̀ àbâs a ndzɨsɨ-a kɨ bɨ̂ylɨ̀ bâŋ baŋ baʼsɨ̂ nɨ̀ tɨ̀fvɨtɨ ìnlàŋtɨ̀. ⁵Ghɨ gvî nɨ̀ ɨ̀ŋweyn, ngàŋ ndô Fɨyini ɨ bè ghɨ sɨ fɨnyuyn fɨlifɨ atû ntòyn àchàʼ mu ɨ ghɨ ateyn ma ghɨ tù isɨ i lɨmà lɨ̀mà. ⁶Ghɨ sɨ, ngàŋ ndô Fɨyini ɨ lì fɨ̀nyuyn fɨ lifɨ fìfɨ̀, nɨ̀ àbâs a fɨ̂kàʼ fɨ sedàfɨ̀ nɨ̀ àbâs a ndzɨsɨ kì baʼsɨ̂ nɨ̀ tɨ̀fvɨtɨ ìnlàŋ tìtɨ̀, ɨ chɨ̀yntɨ̀ ɨ we a mu afî a mɨ̀lûŋ mɨ̀ fɨ̀nyùyn mzɨ̂ a ghɨ nì sɨ̀ tî nɨn ghɨ ateyn. ⁷Wù we, wu mɨ̀sì mɨ̀luŋ mɨ̀ àteyn ìngal nsòmbo ɨwuyn nɨ̀ wùl ɨ̀ vzɨ̀ a wù tî nà koʼi, ɨ bè na wù to meyn, ɨ kæ visi fɨnyuyn fɨli fìfɨ̀ na fɨ tayn.”

⁸“Wùl ɨ̀ vzɨ̀ a wù tî nà koʼi nɨn kelɨ sɨ su ndzɨsɨ ŋweyn sɨ kom nyuŋsɨ sɨ a ŋweyn ɨwùyn nô sɨ̀ jɨ̀m, sɨ su ɨwuyn ŋweyn. Wu n-kom tì, nà sɨ layn ta isaʼi nɨn ndyêyn ma wù kàʼ a wù gvi alèʼ ghè a ghɨ bɨ̀ ateyn mɨtì nà kelɨ sɨ chi abe sɨ a mɨchi nsòmbo bula wù zɨ a ŋweyn ɨtwò. ⁹À na ghɨ a mɨchi nsòmbo, wu fi kom leynsɨ àtu a ŋweyn, nɨ̀ ìdyel i nɨ̀ gvɨynsɨ asɨsɨ baʼsɨ̂ nô mɨ nɨ̀ nyuŋ sɨ̀ kà ta sɨ n-ghɨ a ŋweyn ɨwùyn. Wù n-kelɨ kɨmɨ sɨ su ndzɨsɨ ŋweyn, sɨ sù ɨwuyn ŋweyn sɨ nà ghɨ nɨ̀ ìlayn i.

¹⁰“À na ghɨ a mɨchi nfama, wu gvì nɨ̀ ɨ̀ywaʼ ɨ̀ bwò, nɨ̀ wâyn njɨ̀ ìmòʼ. Nyam nâ sèynsɨ̀ nɨn kelɨ sɨ nà ghɨ kɨ bèŋ kelɨ wi nseʼi, baʼsɨ̂ nɨ̀ ìfûʼ i ɨnkfɨ̀ŋì ma ghɨ gva meyn mɨ̀ faytɨ kfɨ wù gwôtɨ̀ ɨlwêʼ ìvɨ̀m ɨ̀ lì ɨ̀lwêʼ ɨ̀ twal ɨ̀ fyes nɨ̀ mɨ̀vɨ̂l ɨ̀ fu ifu ɨfwo ɨ yɨnɨ ateyn baʼsɨ̂ nɨ̀ àlêʼ a mɨ̂vɨ̀l mɨ̀ olìfsɨ̀. ¹¹Ngàŋ ndô Fɨyini zɨ̀ a yi n-bè na wùl àteyn nɨn layn ta isaʼi nɨn dyêyn, nɨn kelɨ sɨ ndu nɨ̀ ŋweyn baʼsɨ̂ nɨ̀ ìfu i ŋweyni asɨ nɨ̀ Bôbo Fɨyini ɨchfɨ fɨndo nɨ̀ ŋweyn.

¹²“Wù n-ndû, wu lì àyaʼ amòʼ nɨ̀ àlêʼ a mɨ̂vɨ̀l kì ɨ làysɨ̀ iyvɨ sɨ a ifu na Bôbo Fɨyini lesɨ fù mbɨ̂ wùl nâ vzɨ̀. ¹³Ngàŋ ndô Fɨyini nɨn kelɨ sɨ sɨ ayaʼ ateyn alèʼ a laynɨ-a ghè a ghɨ n-sɨ ifu i nyoʼnɨ-i ateyn nɨ̀ ìfu i sɨ loyn ilêsɨ̀ ifu. À n-kelɨ ngàŋ ndô Fɨyini ifu zɨ̀ a ghɨ n-fu sɨ dyèyn na wùl ɨ̀ ni meyn mbɨ, a kelɨ kɨmɨ ŋweyn ifu zɨ̀ a ghɨ n-fu sɨ loyn ilêsɨ̀ ifu bòm ta ifu ateyn i nɨn layn kfeynɨ-à. ¹⁴Ngàŋ ndô Fɨyini nɨn kelɨ sɨ li mɨluŋ mɨ̀ àteyn ɨ̀n lì, sɨ yoʼ atùŋlɨ ɨkœ ɨ two nɨ̀ wùl ɨ̀ vzɨ̀ a wù fu ifu ateyn sɨ fì sɨ yoʼ ɨ̀n lì a lum àwu ɨkœ ɨ two, baʼsɨ̂ nɨ̀ lum àvɨ̀ ɨkœ ɨ two. ¹⁵Wù yoʼ, wu bòtɨ̀ àlêʼ a mɨ̂vɨ̀l a li-a a ŋweyn ital awu ɨkœ nɨ̂nkœ̀, ¹⁶ɨ̀ tuŋ baŋ àwu ɨ̀kœ ɨtwo nɨ̀ ŋweyn a mɨ̂vɨ̀l ghê a ŋweyn ital awu ɨ mɨ̀sì ìngal nsòmbo asɨ nɨ̀ Bôbo Fɨyini. ¹⁷Ngàŋ ndô Fɨyini àteyn nɨn yoʼ mɨ̀vɨl mɨ̀ àteyn ɨ̀n lì atùŋlɨ ɨkœ ɨ two nɨ̀ wùl ɨ̀ vzɨ̀ a ghɨ n-sû ŋweyn, ɨ̀ yòʼ ɨ̀n lì a lum àwu ɨkœ ɨ two ɨ̀ yoʼ kɨ̀mɨ a lum àvɨ̀ ɨkœ ɨ two nɨ̀ ŋweyn. Wù n-kelɨ sɨ yoʼ mɨvɨl nâ mèyn kɨ̀ ɨlwèʼ ghè a ghɨ nì yoʼ mɨluŋ mɨ̀ àyaʼ mzɨ̀ ateyn tì. ¹⁸Wù yoʼ, wu lì àbes a mɨ̂vɨ̀l nâ kì a ŋweyn awu, ɨ yòʼ atu nɨ̀ wùl nâ vzɨ̀ sɨ yuyn atu a ŋweyn ta ka Bôbo Fɨyini lesɨ fù mbɨ ŋweyn.

¹⁹“Wù yoʼ, wu fu ifu sɨ yuyn atu a wûl nâ vzɨ̀, ta ka Fɨyini fɨ lesɨ fù mbɨ ŋweyn. Ngàŋ ndô Fɨyini mesì, wu kæ sɨ nyam ìfu i nyoʼnɨ-i zɨ̀. ²⁰Wù sɨ nyam àteyn, wu ndu fu atû àbaŋ ifu baʼsɨ̂ nɨ̀ ìfu ɨfwo ɨ yɨnɨ, ta ka wù yuyn atu a ŋweyn a wù na sɨ ghɨ nɨ̀ ìlayn i.

²¹“Wùl ɨ koʼinɨ nâ vzɨ̀ kæ nà kelɨ wi ɨkwo sɨ yuyn ɨfwo nâ wèyn, a wù fu wâyn àyaʼ ɨ̀mòʼ a ghɨ laysɨ iyvɨ sɨ a ifu sɨ̂ Bôbo Fɨyini sɨ yuyn atu a ŋweyn ateyn. Wu n-fu kɨmɨ ìfûʼ i ɨnkfɨ̀ŋ ma ghɨ gva meyn mɨ̀ faytɨ kfɨ, ɨ̀ gwòtɨ̀ ɨlwêʼ ìvɨm, ɨ̀ lì alêʼ àmoʼ ɨ̀ fyes mɨvɨl ateyn sɨ a ifu ɨfwo ɨ yɨnɨ baʼsɨ̂ nɨ̀ àlêʼ a mɨ̂vɨ̀l a. ²²Wu n-fu kɨmɨ ɨ̀lwàlàtoto ɨ̀ bwò kèsa woyn mɨnlàynɨ̀ ɨ̀m bò, kɨ̀ ta awu a ŋweyn a ndù chem, fɨlifɨ ɨ ghɨ sɨ loyn ilêsɨ̀ ifu, fɨlifɨ ɨ ghɨ sɨ a ifu i nyoʼnɨ-i.

²³“À na ghɨ a mɨchi nfama, a wù na kelɨ sɨ gvi nɨ̀ ɨfwo nâ wèyn a ka ghɨ su ŋweyn ateyn sɨ̂ ngàŋ ndô Fɨyini ɨchfɨ fɨndo nɨ̀ Bôbo Fɨyini, asɨ nɨ̀ Bôbo. ²⁴Ngàŋ ndô Fɨyini nɨn kelɨ sɨ lì ayaʼ ifu nâ kì-à nɨ̀ àlêʼ a mɨ̂vɨ̀l ki-à, sɨ làysɨ̀ asɨ nɨ̀ Bôbo Fɨyini sɨ a ifu sɨ a nyɨŋ, a kelɨ ŋweyn. ²⁵Wù sɨ àyaʼ ateyn, wu lì mɨ̀luŋ mɨ̀ àteyn ɨ̀n lì, ɨ yoʼ atùŋlɨ ɨkœ ɨ two nɨ̀ wùl ɨ̀ vzɨ̀ a ghɨ n-kɨŋ sɨ sù, ɨ fi yoʼ a lum àwu ɨkœ ɨ two, baʼsɨ̂ nɨ̀ lum àvɨ̀ ɨkœ ɨ two. ²⁶Ngàŋ ndô Fɨyini nâ zɨ̀ nɨn kelɨ sɨ bòtɨ mɨvɨl ɨn lì a ŋweyn ital awu ɨkœ nɨ̂nkœ̀, ²⁷sɨ tuŋ baŋ àwu ɨ̀kœ ɨ two nɨ̀ ŋweyn ateyn sɨ mɨ̀sì ìngal nsòmbo asɨ nɨ̀ Bôbo Fɨyini. ²⁸Ngàŋ ndô Fɨyini àteyn nɨn lì mɨ̀vɨl ɨ̀n lì a ŋweyn ital awu, ɨ̀ yoʼ atùŋlɨ ɨkœ ɨ two nɨ̀ wùl ɨ̀ vzɨ̀ a ghɨ n-sû ŋweyn, ɨ̀ yòʼ a lum àwu ɨkœ ɨ two ɨ̀ yoʼ kɨ̀mɨ a lum àvɨ̀ ɨkœ ɨ two nɨ̀ ŋweyn. Wù n-kelɨ sɨ yoʼ kɨ ɨlwèʼ ghè a wù nì yoʼ mɨluŋ mɨ̀ àyaʼ ifu sɨ loyn ilêsɨ̀ ifu ateyn. ²⁹Wù yoʼ wu lì àbes a mɨ̂vɨ̀l nâ kì a kɨ fàŋ a ŋweyn awu, ɨ yoʼ atu nɨ̀ wùl nâ vzɨ̀ a ghɨ n-kɨŋ sɨ su ŋweyn ta ka Bôbo Fɨyini lesɨ fù mbɨ ŋweyn. ³⁰Wù yoʼ, wù lì woyn ɨ̀lwàlàtoto kèsa woyn mɨnlàynɨ̀ ghì a wùl àteyn fu ɨ sɨ, ³¹ɨ fu fɨlifɨ sɨ a ifu ta ka Bôbo lesɨ fù mbɨ ŋweyn, ɨ fu fɨlifɨ sɨ a ifu i nyoʼnɨ-i, baʼsɨ̂ nɨ̀ ìfu ɨfwo ɨ yɨnɨ. À ti dzɨ zɨ̀ a ka ngàŋ ndô Fɨyini yuyn atu a wûl vzɨ̀ a wù n-sû asɨ nɨ̀ Bôbo Fɨyini.”

³²À ti tɨsaʼ tìtɨ̀ a tɨ n-ghɨ sɨ̂ wùl ɨlvɨ ta wù n-kelɨ ikoʼi i dyaŋnɨ-i, kelɨ wi ɨfwo vzɨ̀ a ghɨ nî ghɨ fu na ghɨ su wul ta isaʼi nɨn dyêyn.

Tɨsaʼ kûm nfɨ̀mtɨ̀ a ndo

³³Bôbo Fɨyini nɨ̀n be meyn sɨ̂ Mosìs ŋêyn Alòyn na, ³⁴“Yi læ̀ zɨ̂ ilaʼ i Kenàn afî a mɨ n-fu sɨ̂ zɨ̀, na à na kelɨ kɨ nô zɨ̀, a mà ni a nfɨ̀mtɨ̀ ku ndo sɨ lisɨ ilaʼ nâ ghè. ³⁵Yì ku nô mɨ ndo ndà, bò ndo nâ vzɨ̀ ɨ fèʼtɨ sɨ̂ ngàŋ ndô Fɨyini na, ‘Ma yeyn meyn àfo a ma ndo kɨ kêʼ ta nfɨ̀mtɨ̀.’ ³⁶Wù fêʼtɨ̀, ngàŋ ndô Fɨyini ɨ bè wù ndu fvɨ̀sɨ̀ ɨ̀fwo sɨ a ndo nâ ghè nô ɨ̀ jɨ̀m jæ ta ka wù gvi ɨ̀ ki nfɨ̀mtɨ̀ àteyn, bu tì a nô mɨ ghà a ndo afu na bu layn wi. Wù fvɨsɨ̀ ɨ̀fwo ateyn, ngàŋ ndô Fɨyini ɨ zɨ kini ndo àteyn. ³⁷Ngàŋ ndô Fɨyini ki nfɨ̀mtɨ̀ àteyn, ɨ̀ kæ yeyn ma yì kfɨ̂ meyn ɨ̀bûʼ ɨwuyn ndo wu nyêm ndû ndu kèsa bâŋ ndû ndu, ³⁸a wu fvɨ kɨ̀ŋ ɨ̀chfɨ ndo, a wu chi sɨ a mɨchi nsòmbo. ³⁹À na ghɨ a mɨchi nsòmbo, a ngàŋ ndô Fɨyini fî kàsi ndù kìni ndo àteyn, ɨ̀ kæ yeyn ma nfɨ̀mtɨ̀ àteyn gwosɨ meyn ndù ɨwùyn ndo, ⁴⁰a wù be na ghɨ choʼtɨ ngòʼ sìsɨ̀ a nfɨ̀mtɨ̀ ku, ɨ̀ fvɨ̀ ntèʼ àteyn ndù màʼì alèʼ ghè a ghɨ n-maʼì ɨfwo vzɨ̀ a wu n-layn wi ateyn ta isaʼi nɨn dyêyn. ⁴¹Ghɨ màʼì, ngàŋ ndô Fɨyini bè ghɨ komi ɨwuyn ndo nâ vzɨ̀ nô ɨ̀ jɨ̀m antêynɨ̀ ɨ̀ fvɨ̀ ntèʼ nâ zɨ̀ ɨ̀ màʼì alèʼ ghè a ghɨ n-maʼì ɨfwo vzɨ̀ a wu n-layn wi ateyn. ⁴²Ghɨ maʼì, ghɨ lì ngòʼ sɨ lûsɨ̀ ɨ kasi we ɨlwèʼ ghè a ghɨ chòʼtɨ ngòʼ nâ sìsɨ̀ ateyn, ɨ tu achaʼ ɨ kasi màytɨ̀ ɨ̀wuyn ndo nâ vzɨ̀ ateyn.

⁴³“Nfɨ̀mtɨ̀ àteyn kæ fi ku ɨwuyn ndo nâ vzɨ̀ ma ghɨ sɨ ghɨ ma ghɨ komi meyn, ɨ̀ kfɨ̀nɨ ngòʼ sîsɨ̀ a nfɨ̀mtɨ̀ tî kù sɨ a asɨ, ɨ̀ kàsi màytɨ̀, ⁴⁴a ngàŋ ndô Fɨyini fî ndù kìni ndo àteyn, nfɨ̀mtɨ̀ àteyn kæ nà ghɨ ma yì fi meyn yam ndù, a à na ghɨ nô nfɨ̀mtɨ̀ ìbɨ, ndo àteyn layn wi ta isaʼi nɨn dyêyn. ⁴⁵Yì kæ nà ghɨ ma yì fi meyn ku, a ghɨ na kelɨ sɨ bɨ̀s, sɨ bèʼi ngòʼsɨ̀ nɨ̀ ɨ̀nkâʼ mzɨ̀ a ghɨ bàʼlɨ ndo nâ zɨ̀ ateyn, baʼsɨ̂ nɨ̀ àchaʼ kì a ghɨ màytɨ̀ ateyn sɨ fvɨ ntèʼ sɨ màʼì alèʼ ghè a kɨ n-layn wi ta isaʼi nɨn dyêyn.

⁴⁶“À kæ zɨ nô mɨ ndà a ndo nâ ghè a mɨchɨ ghè a yì n-kelɨ sɨ nà ghɨ ikɨŋ akɨŋ, a wù na layn kfeynɨ̂ wì ta isaʼi nɨn dyêyn nô sɨ chem aleŋ ɨlvɨ ikfa. ⁴⁷À kæ nyìŋì nô mɨ ndà a ndo nâ ghè kèsa wù yɨ̀ afo ateyn, a wù na kelɨ sɨ su ndzɨsɨ ŋweyn.

⁴⁸“Mɨtì ma ghɨ kæ màytɨ̀ ndo àteyn, ngàŋ ndô Fɨyini fî kini ɨ̀ yeyn bula nfɨ̀mtɨ̀ àteyn yam, a wù be sɨ̂ ghelɨ na ndo àteyn sɨ layna ta isaʼi nɨn dyêyn bòm ta nfɨ̀mtɨ̀ àteyn mæ meyn. ⁴⁹Sɨ nì na ndo àteyn na layn ta isaʼi nɨn dyêyn, ngàŋ ndô Fɨyini nɨn kelɨ sɨ li mɨnyuyn ɨ̀m bò nɨ̀ àbâs a fɨ̂kàʼ fɨ sedàfɨ̀ nɨ̀ àbâs a ndzɨsɨ a baŋnɨ-a, baʼsɨ̂ nɨ̀ ìnlàŋ ì, ⁵⁰sɨ sɨ fɨnyuyn fɨ̀ mòʼ atû ntòyn àchàʼ ghê a yì n-kelɨ mu mzɨ̀ a ghɨ tù isɨ i lɨmà lɨ̀mà tì. ⁵¹Wù sɨ, wu lì fɨ̀nyuyn fɨ lifɨ fìfɨ̀, nɨ̀ àbâs a fɨ̂kàʼ fɨ sedà kì nɨ̀ àbâs a ndzɨsɨ kì baʼsɨ̂ nɨ̀ ìnlàŋ zɨ-ì, ɨ̀ chɨ̀yntɨ̀ ɨ chfɨ̀ a mu afî a mɨ̀lûŋ mɨ̀ fɨ̀nyùyn mzɨ̂ nɨn ghɨ ateyn, ɨ̀ mɨ̀sì a ndo nâ ghè ìngal nsòmbo. ⁵²Wù n-kelɨ sɨ laynsɨ ndo àteyn nɨ̀ mɨ̀lûŋ mɨ̀ fɨ̀nyùyn nâ mzɨ̀, nɨ̀ mu mzɨ̀ a ghɨ tù isɨ i lɨmà lɨ̀mà tì, nɨ̀ fɨ̀nyuyn fɨ lifɨ fìfɨ̀, nɨ̀ fɨ̂kàʼ fɨ sedàfɨ̀, nɨ̀ ìnlàŋì baʼsɨ̂ nɨ̀ àbâs a ndzɨsɨ a baŋnɨ-a kì. ⁵³Wu n-laynsɨ̂ tì, ɨ̀ kæ visi fɨnyuyn fɨli fìfɨ̀ na fɨ tayn. À ti ta ngàŋ ndô Fɨyini nɨn nì na ndo àteyn kasi nà layna ta isaʼi nɨn dyêyn.”

⁵⁴À ti tɨsaʼ kûm tɨ̀koʼi tɨ dyaŋnɨtɨ ta ighasàghàsà, ⁵⁵nɨ̀ nfɨ̀mtɨ̀ ɨlvɨ ta yì kù ndzɨsɨ kèsa ndo, ⁵⁶nɨ̀ àdzɨ̀ a, nɨ̀ ìsɨ afo ikoʼnɨ-i kèsa alêʼ a vɨblɨnɨ-a. ⁵⁷Ɨteyn nâ tèyntɨ̀ nɨn ghɨ tɨ̀saʼ tìtɨ̀ a tɨ n-dyêyn na afo nɨ layna ma kɨ n-layn wi a.

À n-ghɨ tɨ̀saʼ kûm tɨ̀koʼi tɨ dyaŋnɨtɨ, nɨ̀ nfɨ̀mtɨ̀.