Leviticus 15

Mu mzɨ̀ a mɨ̀ n-fvɨ̂ a wùl ɨwùyn, ni-à wu layn wi

¹Bôbo Fɨyini nɨ̀n be meyn sɨ̂ Mosìs ŋêyn Alòyn na, ²“Bè sɨ̂ ghelɨ Isìlæ̀ na mu kæ nà bɨm fvɨ̂ kɨ fvɨ ɨwùyn ɨ wùl ɨ lûmnɨ̀ nɨ̀ wùl, a mɨ̀ na layn wi. ³Mu mɨ̀ àteyn kæ faŋ nà fvɨ̂ kɨ fvɨ kèsa tèyna nô mɨ teyna, a wùl àteyn na layn wi. Mɨ̀ n-fvɨ̂ a dzɨ nâ ghàyn, mɨ nì wul àteyn nà layn wi.”

⁴“Wùl àteyn kæ sɨ nyìŋì nô mɨ ɨkuyn ɨ̀kfà, wu bû nà fî layna, ɨ̀ dùʼi nô mɨ a gha, kɨ bu nà fî layna. ⁵À kæ kùm nô mɨ ndà ɨkuyn wûl àteyn, a wù na kelɨ sɨ su ndzɨsɨ ŋweyn, sɨ sù ɨwuyn ŋweyn, ghɨ sɨ nà layn wi sɨ chem aleŋ ɨlvɨ ikfa. ⁶A kæ sɨ dùʼi nô mɨ ndà afo ma wùl àteyn duʼi meyn ateyn, a wù na kelɨ sɨ sù ɨwuyn ŋweyn baʼsɨ̂ nɨ̀ ndzɨsɨ ŋweynsɨ ghɨ sɨ nà layn wi sɨ chem aleŋ ɨlvɨ ikfa.”

⁷“À kæ sɨ kùm nô mɨ ndà wul àteyn, a wù na layn wi, kelɨ sɨ su ɨwuyn ŋweyn baʼsɨ̂ nɨ̀ ndzɨsɨ ŋweynsɨ, ghɨ sɨ nà layn wi sɨ chem aleŋ ɨlvɨ ikfa.”

⁸“Wùl àteyn kæ chfɨ mɨnchya mɨ̀ kûm wul, a wù na kelɨ sɨ su ɨwuyn ŋweyn, sɨ su ndzɨsɨ ŋweynsɨ, ghɨ sɨ nà layn wi sɨ chem aleŋ ɨlvɨ ikfa.”

⁹“Wùl àteyn kæ dùʼì nô mɨ achɨ a mɨtù, kèsa achɨ a fɨ̂nchaʼ, a achɨ ateyn a na layn wi. ¹⁰À kæ kùm nô mɨ ndà afo ma wùl àteyn duʼi meyn ateyn, a wù na layn wi sɨ chem aleŋ ɨlvɨ ikfa, ma à lìsì nô mɨ ndà afo ateyn, a wù na kelɨ sɨ sù ɨwuyn ŋweyn, sɨ su ndzɨsɨ ŋweynsɨ, ghɨ sɨ nà layn wi sɨ chem aleŋ ɨlvɨ ikfa.”

¹¹“Wùl nâ wèyn a mû nâ mèyn nɨn fvɨ a ŋweyn ɨwùyn kæ kùm wùl bula wù sû ɨ̀wu, a wùl vzɨ̀ a wù kùm na kelɨ sɨ su ndzɨsɨ ŋweyn, sɨ sù ɨwuyn ŋweyn, ghɨ sɨ nà layn wi sɨ chem aleŋ ɨlvɨ ikfa.”

¹²“Wùl àteyn kæ kum ntòyn àchàʼ, a ghɨ na kelɨ sɨ bɨ̀ytɨ ntòyn àteyn, ɨ̀ kæ kùm afo ma ghɨ faytɨ nɨ̀ fɨ̀kâʼfɨ̀, a ghɨ na kelɨ sɨ sùtɨ afo ateyn.”

¹³“Ghɨ kæ sù wul àteyn, a wù na kelɨ sɨ dùʼi a ndo sɨ a mɨchi nsòmbo, sɨ sù ɨ̀wuyn ŋweyn baʼsɨ̂ nɨ̀ ndzɨsɨ ŋweynsɨ, jæ ta ka wù na layna. ¹⁴À na ghɨ a mɨchi nfama, wu gvì nɨ̀ mɨ̀nlàynɨ̀ ɨ̀m bò, kèsa ɨ̀lwàlàtoto ɨ̀ bwo, ɨ fu sɨ̂ ngàŋ ndô Fɨyini ɨchfɨ fɨndo nɨ̀ Bôbo Fɨyini. ¹⁵Wù fu, ngàŋ ndô Fɨyini ɨ lì a li-a ɨ fu sɨ a ifu ta ka Fɨyini fɨ lesɨ fù ŋweyn, ɨ̀ lì a li-a ɨ̀ fù sɨ a ifu i nyoʼnɨ-i sɨ yuyn atu a wûl àteyn, na wù na sɨ layna. À ti ta wu n-nì, ɨ̀ yuyn atu a wûl nâ wèyn bòm ta mu mɨ̀ àteyn ti meyn nì wù na layn wi.”

¹⁶“Mu mɨ̀ wàyn kæ jas fvɨ̀ ɨwuyn nɨ̀ wùl ɨ lûmnɨ̀, a wù na kelɨ sɨ su ɨwuyn ŋweyn, ghɨ sɨ nà layn wi sɨ chem aleŋ ɨlvɨ ikfa. ¹⁷Nô mɨ ndzɨ sɨ̀ kà ta mu mɨ̀ àteyn kùm, kèsa mɨ̀ kùm gvɨ nyàm, a ghɨ na kelɨ sɨ sù, sɨ ghɨ sɨ nà layn wi sɨ chem aleŋ ɨlvɨ ikfa. ¹⁸Wùl ɨ lûmnɨ̀ kæ chi nɨ̀ wùl ɨ wi, mu mɨ̀ wayn fvɨ̂, a ŋêyn wùl ɨ wi àteyn na kelɨ sɨ su ɨwuyn àŋena, ghɨ sɨ nà layn wi sɨ chem aleŋ ɨlvɨ ikfa.”

¹⁹“Wùl ɨ wi kæ yeyn ɨlvɨ ŋweyn, a wù na layn wi sɨ a mɨchi nsòmbo, ma à kùm nô mɨ ndà ŋweyn, a wù na layn wi sɨ chem aleŋ ɨlvɨ ikfa.”

²⁰“Wù kæ nà yeyn ɨ̀lvɨ ŋweyn ɨ̀ dùʼì nô mɨ a gha, kèsa wù nyìŋì nyiŋi, a kɨ na layn wi. ²¹À kæ sɨ kum nô mɨ ndà ɨkuyn ɨ wul ɨ wi àteyn, a wù na kelɨ sɨ su ndzɨsɨ ŋweyn sɨ su ɨwuyn ŋweyn, ghɨ sɨ nà layn wi sɨ chem aleŋ ɨlvɨ ikfa. ²²À kæ kùm nô mɨ ndà afo ma wùl ɨ wi àteyn duʼi meyn ateyn, a wù na kelɨ sɨ su ndzɨsɨ ŋweyn, sɨ su ɨwuyn ŋweyn, ghɨ sɨ nà layn wi sɨ chem aleŋ ɨlvɨ ikfa. ²³Wùl kæ kùm afo kèsa ɨ̀kuyn ma wùl ɨ wi àteyn duʼi meyn ateyn, a wù na ghɨ wi nɨ̀ ìlayn i sɨ chem aleŋ ɨlvɨ ikfa.”

²⁴“Wùl ɨ lûmnɨ̀ kæ chi nɨ̀ wùl ɨ wi àteyn mɨ̀lûŋ kûm ŋweyn, a wù na layn wi sɨ a mɨchi nsòmbo, ma wùl ɨ lûmnɨ̀ àteyn kæ nyìŋì nô mɨ ɨkuyn ɨ̀kfà, a wu na layn wi.”

²⁵“Wùl ɨ wi kæ yeyn ɨlvɨ ŋweyn bula ɨlvɨ kfeyn, kèsa wù yeyn lòtɨ̀ lotɨ a, a wù na layn wi kɨ̀ ighel ta wù n-yeyn ɨlvɨ ŋweyn wu nà layn wi. ²⁶Nô mɨ ɨ̀kuyn ɨ̀kfà ta wùl ɨ wi nâ wèyn nyìŋì ateyn a mɨchi nâ ghàyn na layn wi kɨ̀ ighel ta wù n-yeyn ɨlvɨ ŋweyn yi nà ghɨ, ma wù dùʼì nô mɨ a gha a kɨ na layn wi kɨ̀ ighel ta wù n-yeyn ɨlvɨ ŋweyn yi nà ghɨ. ²⁷À kæ kùm nô mɨ ndà ɨkuyn kèsa afo ma wùl ɨ wi àteyn duʼi meyn ateyn, a wù na layn wi kelɨ sɨ sù ɨwuyn ŋweyn baʼsɨ̂ nɨ̀ ndzɨsɨ ŋweynsɨ, ghɨ sɨ nà layn wi sɨ chem aleŋ ɨlvɨ ikfa.”

²⁸“Wùl ɨ wi ateyn yeyn mèsì ɨlvɨ ŋweyn wu dùʼì a ndo sɨ a mɨchi nsòmbo jæ ta ka wù na layn ta isaʼi nɨn dyêyn, ²⁹a à na ghɨ a mɨchi nfama, a wù na kelɨ sɨ gvì nɨ̀ mɨ̀nlàynɨ̀ ɨ̀m bò kèsa woyn ɨ̀lwàlàtoto ghɨ̀ bò sɨ fu sɨ̂ ngàŋ ndô Fɨyini ɨchfɨ fɨndo nɨ̀ Bôbo. ³⁰Wù fu, ngàŋ ndô Fɨyini ɨ lì fɨlifɨ ɨ fu sɨ a ifu ta ka Bôbo Fɨyini lesɨ fù mbɨ̂ wùl ɨ wi nâ vzɨ̀, ɨ fu fɨlifɨ sɨ a ifu i nyoʼnɨ-i, sɨ yuyn atu a wûl ɨ wi nâ vzɨ̀ ateyn ta ka wù na layna. À ti ta wu n-nì, ɨ̀ yuyn atu a wul ɨ wi nâ vzɨ̀ bòm ta wù yeyn ɨlvɨ ŋweyn nà bu layn wi.”

³¹“Bôbo Fɨyini nɨn be meyn sɨ̂ Mosìs ŋêyn Alòyn na, ‘Yi n-kelɨ sɨ fu nfàsì-nfàsì sɨ̂ ghelɨ Isìlæ̀ kûm àwo kì a kɨ n-nî àŋena layn wi, ta ka àŋena faŋ tɨ̀ bèbsɨ alêʼ kì a mɨ n-ghɨ ateyn antêynɨ̀ nɨ̀ àŋena, bula tì, a àŋena kfɨtɨ.’”

³²À ti tɨ̀saʼ tìtɨ̀ a tɨ n-ghɨ sɨ̂ wul ɨ̀ lûmnɨ̀ ɨlvɨ ta mu nɨn bɨm fvɨ̀ kɨ fvɨ ɨwùyn ɨ wûl ɨ lûmnɨ̀ nɨ̀ ŋweyn, ghɨ nô mɨ sɨ̂ wùl ɨ lûmnɨ̀ ɨ̀ kfà ta wù n-layn wi bòm ta mu mɨ̀ wàyn fvɨ̀ ɨwùyn ɨ wùl ɨ lûmnɨ̀ nɨ̀ ŋweyn. ³³Tɨsaʼ nâ tèyntɨ̀ nɨn ghɨ kɨmɨ sɨ̂ wùl ɨ wi ɨlvɨ ta wù yeyn ɨlvɨ ŋweyn, ghɨ sɨ̂ wùl ɨ lûmnɨ̀ kèsa wul ɨ wi ɨlvɨ ta mu nɨn bɨm fvɨ̂ kɨ fvɨ a ŋweyn ɨwùyn. Tɨ n-ghɨ kɨmɨ sɨ̂ wùl ɨ lûmnɨ̀ ɨlvɨ ta wù chi nɨ̀ wùl ɨ wi wu layn wi ta isaʼi nɨn dyêyn.