Leviticus 13

Tɨsaʼ kûm tɨ̀koʼi tɨ ɨwùyn tîtɨ̀ a tɨ n-dyâŋ.

¹Bôbo Fɨyini nɨn læ meyn bè sɨ̂ Mosìs ŋêyn Alòyn na, ²“Wùl ti kæ nà kelɨ àdzɨ̀, kèsa à koʼ isɨ afo a ŋweyn ɨwùyn, kèsa à n-ghɨ àlêʼ a ŋweyn ɨwùyn ta kɨ vɨ̀blɨ ma kɨ kàʼ a kɨ ndu sa ikoʼi, ɨ̀ dyàŋ sɨ̂ wùl, a ghɨ na kelɨ sɨ lì sɨ ndù nɨ̀ ŋweyn sɨ̂ Alòyn ɨ ngàŋ ndô Fɨyini, kèsa sɨ̂ wayn ŋweyn a ghɨ kɨmɨ ngàŋ ndô Fɨyini. ³Ngàŋ ndô Fɨyini ti kæ sɨ ndù fàytɨ ki àdzɨ̀ ateyn ɨ̀ yeyn na nyuŋ sìsɨ̀ a sɨ n-ghɨ afu kfɨnɨ meyn ɨ̀ nà sɨ fɨfɨ fɨfɨ, kɨ chem zɨ, a yi na dyêyn na à n-ghɨ ìkoʼi ma yi kàʼ a yi dyaŋ sɨ̂ wùl, a wù feʼtɨ na wù n-layn wi ta isaʼi nɨn dyêyn. ⁴Alêʼ a vɨblɨnɨ-a nâ kì ti kæ sɨ nà fɨfɨ fɨfɨ, bula kɨ chem ɨ̀ zɨ, nyuŋ sìsɨ̀ a sɨ n-ghɨ afu ɨ ghɨ bula sɨ kfɨnɨ nà fɨfɨ fɨfɨ, a ngàŋ ndô Fɨyini lem wul àteyn alèʼ kɨ̀ ŋêyn nìnyɨŋ sɨ a mɨchi nsòmbo. ⁵Ngàŋ ndô Fɨyini lêm, à na ghɨ a mɨchi nsòmbo a wù fî fàytɨ kì ŋweyn, ɨ̀ kæ sɨ yeyn na alêʼ ateyn a bû kfɨ̀nɨ, bula kɨ yam ndù a ŋweyn ɨwùyn, wu fi lèm kfeynsɨ ŋweyn sɨ-a mɨchi nsòmbo. ⁶A à na ghɨ a mɨchi nsòmbo a ngàŋ ndô Fɨyini fî kìni kfeynsɨ, ɨ̀ kæ sɨ yeyn ma àdzɨ̀ ateyn a yum meyn, ɨ̀ faŋ tɨ̀ yam sɨ ndù a ŋweyn ɨwùyn, a ngàŋ ndô Fɨyini feʼtɨ na wù n-layna, na à tî nà ghɨ kɨ ìsɨ afo ta yi kòʼ a ŋweyn ɨwùyn, a wùl àteyn na kelɨ sɨ su ndzɨsɨ ŋweyn sɨ nà layna. ⁷Mɨtì wùl àteyn kæ sɨ ndù àdzɨ̀ ateyn a yam ndù a ŋweyn ɨwùyn ma ngàŋ ndô Fɨyini sɨ ghɨ ma wù be meyn na wù n-layna, a wù na kelɨ sɨ kasi sɨ ndù sɨ yeyn ngàŋ ndô Fɨyini. ⁸Ngàŋ ndô Fɨyini ti kæ sɨ kini kfeynsɨ ŋweyn ɨ̀ yeyn ma àdzɨ̀ ateyn a yam meyn ndù a ŋweyn ɨwùyn, a wù feʼtɨ na wùl àteyn nɨn layn wi, kelɨ ìkoʼi ma yi kàʼ a yi dyaŋ sɨ̂ wùl.”

⁹“Wùl kæ sɨ keli ikoʼi a yi antêynɨ̀ ma yi kàʼ a yi dyaŋ sɨ̂ wùl, ghɨ lì ɨ ndù nɨ̀ ŋweyn sɨ̂ ngàŋ ndô Fɨyini, ¹⁰ngàŋ ndô Fɨyini faytɨ̂ kì ŋweyn, ɨ̀ kæ sɨ yeyn ma aleʼa vɨblɨ meyn a ŋweyn ɨwùyn, ɨ̀ nì nyuŋsɨ kasi nà fɨfɨ fɨfɨ afu, kɨ kasî ndû sɨ àdzɨ̀, ¹¹a à na ghɨ na wù n-kelɨ ìkoʼi i bzɨ-i a ŋweyn ɨwùyn, a ngàŋ ndô Fɨyini feʼtɨ na wù n-layn wi, mɨtì ɨ̀ faŋ tɨ̀ lèm ŋweyn alèʼ ŋêyn nìnyɨŋ bòm ta wù sɨ ghɨ ma wù yeyn meyn na wùl àteyn bu fì layn wi.”

¹²“Mɨtì ngàŋ ndô Fɨyini kæ sɨ yeyn ma yi yam meyn kɨ̀ ɨwuyn ŋweyn ɨ̀ jɨ̀m sɨ zɨtɨ̀ atu sɨ kàlì sɨ chem ɨvɨ̀, ¹³a wù faytɨ ɨ̀ ki ŋweyn, ɨ̀ kæ sɨ yeyn ma ikoʼi ateyn i yam meyn kɨ̀ ɨwuyn ŋweyn ɨ̀ jɨ̀m, ɨ̀ nì ɨwuyn ŋweyn na fɨfɨ fɨfɨ, a wù feʼtɨ na wùl àteyn nɨn layna bòm ta ɨwuyn ŋweyn kfɨnɨ meyn kɨ ɨ̀ jɨ̀m nà sɨ fɨfɨ fɨfɨ. ¹⁴Mɨtɨ̀ ma ɨ̀dzɨ̀ kæ sɨ fvɨ̀ a ŋweyn ɨwùyn, a wù na layn wi. ¹⁵Ngàŋ ndô Fɨyini ti kæ faytɨ ki wul àteyn, ɨ̀ yeyn àdzɨ̀, a wù feʼtɨ na wù n-layn wi. Àdzɨ̀ ateyn a nɨn dyêyn na wùl àteyn nɨn kelɨ ìkoʼi ma yi kàʼ a yi dyaŋ sɨ̂ wùl. ¹⁶Àdzɨ̀ ateyn a kæ sɨ yum nà kasî fɨfɨ fɨfɨ, a wùl àteyn na kelɨ sɨ ndù sɨ yeyn ngàŋ ndô Fɨyini, ¹⁷na ngàŋ ndô Fɨyini faytɨ̂ kì ŋweyn ɨ̀ kæ sɨ yeyn àdzɨ̀ ateyn ma kɨ kasi meyn nà fɨfɨ fɨfɨ, ɨ̀ be na wùl àteyn nɨn layna, a wù na sɨ layna.”

¹⁸“Fɨmɨfɨ ti kæ sɨ koʼ wul, ɨ̀ to, ¹⁹alêʼ ateyn a kasi vɨ̀blɨ nà fɨfɨ fɨfɨ, kèsa bâŋ fɨfɨ ndù ndu, a wùl àteyn na kelɨ sɨ ndù sɨ dyeyn ngêŋ ŋweyn sɨ̂ ngàŋ ndô Fɨyini. ²⁰Wù kæ sɨ ndù, ngàŋ ndô Fɨyini faytɨ ɨ̀ ki ɨ̀ yeyn na alêʼ ateyn a chem meyn ɨ̀ zɨ, nyuŋ sìsɨ̀ a sɨ n-ghɨ afu kasi nà sɨ fɨfɨ fɨfɨ, a wù feʼtɨ na wùl àteyn nɨn layn wi. Yi ti n-dyêyn na ikoʼi zɨtɨ meyn alèʼ a fɨ̂mɨ̀ nâ ghè ma yi kàʼ a yi dyaŋ sɨ̂ wùl. ²¹Mɨtì ngàŋ ndô Fɨyini kæ sɨ ki alêʼ ateyn ɨ̀ faŋ tɨ̀ yeyn nyuŋsɨ fɨfâsɨ̀ afu, kɨ ghɨ bula kɨ chem ɨ̀ zɨ, ma kɨ sɨ yum ndu-à, wu lèm wul àteyn alèʼ kɨ̀ ŋêyn nìnyɨŋ sɨ a mɨchi nsòmbo. ²²Alêʼ ateyn a kæ sɨ nà yam ndù kɨ ndu, a ngàŋ ndô Fɨyini feʼtɨ na wùl àteyn nɨn layn wi, a ghɨ ìkoʼi ma yi kàʼ a yi dyaŋ sɨ̂ wùl. ²³Mɨtì alêʼ ateyn a kæ sɨ nà ghɨ bula kɨ kfɨnɨ, fî ghɨ bula kɨ yam, a à na ghɨ kɨ àlas a fɨ̂mɨ̀ kì a fɨ nì koʼ, a ngàŋ ndô Fɨyini feʼtɨ na wù n-layna.”

²⁴“Wùl kæ sɨ nyòʼ alêʼ ɨwuyn nɨ̀ ŋweyn, ɨ̀ yeyn ma kɨ sɨ bâŋ fɨfɨ ndû ndu kèsa fɨfɨ fɨfɨ, ²⁵a ngàŋ ndô Fɨyini faytɨ̂ ki alêʼ ateyn, ɨ̀ kæ sɨ yeyn ma nyuŋ sìsɨ̀ a sɨ n-ghɨ afu kfɨnɨ meyn nà fɨfɨ fɨfɨ, alêʼ ateyn a fî ɨ̀ chem zɨ, ngàŋ ndô Fɨyini ɨ fèʼtɨ̀ na wùl àteyn nɨn layn wi, a ghɨ ìkoʼi i bzɨ-i ta yi zɨ̀tɨ̀ alèʼ nâ ghè ma yi kàʼ a yi dyaŋ sɨ wùl. ²⁶Mɨtì ma ngàŋ ndô Fɨyini kæ sɨ ki alêʼ ateyn, ɨ̀ faŋ tɨ̀ yeyn nyuŋsɨ fɨfâsɨ̀ afu, bula kɨ chem ɨ̀ zɨ, ma kɨ sɨ yum ndu-à, a wù na kelɨ sɨ lèm wul àteyn alèʼ kɨ̀ ŋêyn nìnyɨŋ sɨ a mɨchi nsòmbo. ²⁷Ngàŋ ndô Fɨyini lêm, à na ghɨ a mɨchi nsòmbo wu fi faytɨ ɨ ki ŋweyn, ɨ̀ kæ sɨ yeyn alêʼ ateyn kɨ yam ndu-à, a wù feʼtɨ na wùl àteyn nɨn layn wi, a ghɨ ìkoʼi ma yi kàʼ a yi dyaŋ sɨ̂ wùl. ²⁸Ngàŋ ndô Fɨyini ti kæ sɨ yeyn alêʼ ateyn bula kɨ kfɨnɨ, yam ndù wì, ma kɨ sɨ yum ndu-à, a à nà ghɨ kɨ àmbɨ̀blɨ alèʼ kì a wù tî nyòʼ, a ngàŋ ndô Fɨyini feʼtɨ na wùl àteyn nɨn layna, na à n-ghɨ kɨ àlas alèʼ kì a wù tî nyòʼ.”

²⁹Wùl ɨ wi, kèsa wùl ɨ lûmnɨ̀ kæ sɨ kelɨ àdzɨ̀ a ŋweyn atu kèsa a ŋweyn idyèl, ³⁰a ngàŋ ndô Fɨyini faytɨ ki àdzɨ̀ ateyn, ɨ̀ kæ sɨ yeyn ma kɨ chem meyn ɨ̀ zɨ, nyuŋ sìsɨ̀ a sɨ n-ghɨ afu ɨ bâŋ kêʼ ta mɨghi, læ̂ kɨ tèyn, a ngàŋ ndô Fɨyini feʼtɨ na wùl àteyn nɨn layn wi, na à n-ghɨ ìghasàghàsà, ikoʼi yi ghɨ atu kèsa idyèl, yusà, ma yi kaʼ a yi dyaŋ sɨ̂ wùl. ³¹Mɨtì ngàŋ ndô Fɨyini kæ sɨ faytɨ ki ìnkì i àdzɨ̀ nâ kèyna ɨ̀ yeyn bula kɨ chem ɨ̀ zɨ, nyuŋsɨ fɨmnɨsɨ ghɨ wi afu, a wù na kelɨ sɨ lem wul àteyn alèʼ kɨ̀ ŋêyn nìnyɨŋ sɨ a mɨchi nsòmbo. ³²À na ghɨ a mɨchi nsòmbo, ngàŋ ndô Fɨyini ɨ fi faytɨ ki alêʼ ateyn, ɨ̀ kæ sɨ yeyn bula yi yam ndù, nyuŋ sìsɨ̀ a sɨ n-ghɨ afu ɨ bu fì bâŋ kêʼ wì ta mɨghi, bula kɨ chem ɨ̀ zɨ, ³³a ghɨ kom atu a ŋweyn, kèsa idyel i ŋweyn ɨ̀ vìsi kɨ alêʼ kì a ighasàghàsà ateyn i nɨn ghɨ ateyn. A ngàŋ ndô Fɨyini fî lèm kfèynsɨ ŋweyn alèʼ sɨ a mɨchi nsòmbo kɨ̀ ŋêyn nìnyɨŋ. ³⁴À na ghɨ a mɨchi nsòmbo ngàŋ ndô Fɨyini ɨ fi faytɨ ki alêʼ ateyn, ɨ̀ kæ sɨ yeyn bula yi yam ndù a ŋweyn ɨwùyn, bula kɨ chem ɨ̀ zɨ, a ngàŋ ndô Fɨyini be na wùl àteyn nɨn layna. A wùl àteyn na kelɨ sɨ sù ɨ ndzɨsɨ ŋweyn sɨ nà layna. ³⁵Mɨtì ma ighasàghàsà ateyn i kæ sɨ yam ndù ɨwuyn nɨ̀ wùl àteyn ma ngàŋ ndô Fɨyini sɨ ghɨ ma wù be meyn na wù n-layna, ³⁶a ngàŋ ndô Fɨyini fî fàytɨ kini ŋweyn, ɨ̀ kæ sɨ yeyn na ighasàghàsà ateyn i yam meyn ndù a ŋweyn ɨwùyn, wù bû nà fî ki na alêʼ ateyn a nɨn kelɨ nyuŋsɨ sɨ bâŋ kêʼ ta mɨghi a, bòm ta yi sɨ dyêyn na wùl àteyn nɨn layn wi. ³⁷Ngàŋ ndô Fɨyini kæ sɨ yeyn alêʼ ateyn bula kɨ kfɨnɨ, ma nyuŋsɨ fɨmnɨsɨ koʼ meyn ateyn, a à na ghɨ na alêʼ ateyn a to meyn, a ngàŋ ndô Fɨyini be na wù n-layna, a wùl àteyn na sɨ layna.

³⁸Wùl ɨ̀ wi kèsa wul ɨ̀ lûmnɨ̀ kæ nà kelɨ ɨ̀lwêʼ a ŋweyn ɨwùyn ma wu vɨblɨ meyn nà fɨfɨ fɨfɨ, ³⁹a ngàŋ ndô Fɨyini faytɨ ɨ̀ ki ɨlwêʼ ateyn, ɨ̀ kæ sɨ yeyn na wu n-fɨ̂m fɨfɨ ndû ndu, a yi na dyeyn na à n-ghɨ kɨ ìsɨ afo ta yi koʼ a ŋweyn ɨwùyn, a ghɨ wi ikoʼi, yi dyêyn na wùl àteyn nɨn layna.

⁴⁰Nyuŋsɨ atu nɨ̀ wùlsɨ ti kæ sɨ choʼtɨ, atu a ŋweyn a kos, a wù na bu layna. ⁴¹Nyuŋsɨ kæ sɨ mæ̀ ɨchfɨ atu nɨ̀ wùl, wu kos, a wù na bu layna. ⁴²Mɨtì ma wù kæ nà kelɨ alas kɨ bâŋ fɨfɨ ndù ndu, alèʼ nâ ghè a kɨ kòs a ŋweyn atu tì kèsa a ŋweyn ɨchfɨ atu, a à na ghɨ ìkoʼi ta yi fvɨ̀ afu ma yi kàʼ a yi dyaŋ sɨ̂ wùl. ⁴³Yi kæ sɨ gàyn tî a wù ndu ɨ̀ yeyn ngàŋ ndô Fɨyini a wù faytɨ kini ŋweyn, ɨ̀ kæ sɨ yeyn alêʼ ateyn kɨ bâŋ fɨfɨ ndù ndu têyn ta ikoʼi ma yi kàʼ a yi dyaŋ sɨ̂ wùl, ⁴⁴a à na ghɨ na wù n-kelɨ ìkoʼi, a ngàŋ ndô Fɨyini feʼtɨ na wù n-layn wi bòm àdzɨ̀ nâ kì a ŋweyn atu.

⁴⁵“Wùl ti kæ sɨ kelɨ ikoʼi i bzɨ-i têyn ta iyeyn nâ yèyni ma yi kàʼ a yi dyaŋ sɨ̂ wùl, a wù na kelɨ sɨ nà mâʼ kɨ ɨ̀shwâʼ ɨ ndzɨsɨ, shwaʼì wì atu, lêm àwu ɨchfɨ̀ nɨ̀ ŋweyn wu nà byalɨ bè na, ‘Mɨ n-layn wi, Mɨ n-layn wi.’ ⁴⁶Wùl àteyn na layn wi sɨ chem ta ka ikoʼi ateyn i mæ sɨ a ŋweyn ɨwùyn, kelɨ sɨ fvɨ̀ sɨ a alèʼ ghè a ghelɨ Isìlæ̀ bɨ̀ ateyn sɨ nà chî kɨ alèʼ ŋêyn nìnyɨŋ.”

Tɨsaʼ kûm nfɨ̀mtɨ̀

⁴⁷“Nfɨ̀mtɨ̀ ti kæ sɨ ku nô mɨ ndzɨ sɨ̀ kà, kèsa à n-ghɨ ndzɨsɨ ma ghɨ tɨm nɨ̀ àmbyèyn a, kèsa ghɨ faytɨ nɨ̀ àbâs a ndzɨsɨ a fɨfâ, ⁴⁸kèsa à n-ghɨ àbâs a ndzɨsɨ ma ghɨ bò bo kèsa ghɨ tɨm nɨ̀ àmbyèyn a, kèsa à n-ghɨ gvɨ̂ nyàm kèsa afo ta ghɨ faytɨ nɨ̀ gvɨ̂ nyàm. ⁴⁹Nfɨ̀mtɨ̀ àteyn kæ sɨ nà ghɨ a ndzɨsɨ, kèsa a gvɨ̂ nyàm, kèsa abâs a ndzɨsɨ ta ghɨ bo, kèsa ghɨ tɨm tɨm, kèsa à n-ghɨ àfo ma ghɨ faytɨ nɨ̀ gvɨ̂ nyàm, nà nyêm ndû ndu, kèsa bâŋ ndû ndu, a à na ghɨ na nfɨ̀mtɨ̀ àteyn sɨ yam ndu-à, a ghɨ na kelɨ sɨ ndù sɨ dyèyn sɨ̂ ngàŋ ndô Fɨyini. ⁵⁰Ghɨ dyêyn tì, ngàŋ ndô Fɨyini ɨ faytɨ ki nfɨ̀mtɨ̀ àteyn, ɨ lì àfo ateyn ɨ lèm sɨ a nyɨŋ sɨ a mɨchi nsòmbo. ⁵¹À na ghɨ a mɨchi nsòmbo, ngàŋ ndô Fɨyini ɨ fi faytɨ ki afo ateyn, ɨ̀ kæ sɨ yeyn ma nfɨ̀mtɨ̀ ateyn yam meyn a ndzɨsɨ nâ ghè, kèsa à n-ghɨ ndzɨsɨ tɨmnɨsɨ ma sɨ bonɨsɨ a, kèsa à n-ghɨ gvɨ̂ nyàm, kèsa ghɨ nî nô mɨ ghà nɨ̀ àfo ateyn a, a à na ghɨ na nfɨ̀mtɨ̀ àteyn nɨn ghɨ nfɨ̀mtɨ̀ ibɨ, afo ateyn a bu layn wi. ⁵²Ngàŋ ndô Fɨyini yeyn ti, wu nyòʼ afo ateyn kèsa à n-ghɨ nô mɨ ghà bòm ta nfɨ̀mtɨ̀ àteyn nɨn dyaŋà.”

⁵³“Mɨtì ma ngàŋ ndô Fɨyini kæ sɨ faytɨ ki ɨ̀ yeyn bula nfɨ̀mtɨ̀ àteyn yam ndù a dzɨsɨ nâ ghè, kèsa à n-ghɨ ndzɨsɨ ma ghɨ tɨm nɨ̀ àmbyèyna, kèsa ghɨ bobo, kèsa ghɨ faytɨ nɨ̀ gvɨ̂ nyàm a, ⁵⁴a wù be a ghɨ su afo nâ kì a nfɨ̀mtɨ̀ àteyn kù tî, a wù fî lèm alèʼ sɨ a nyɨŋ sɨ a mɨ̂chi nsòmbo. ⁵⁵Ghɨ sû mèsì àfo ateyn, ngàŋ ndô Fɨyini ɨ fi faytɨ kini, ɨ̀ kæ sɨ yeyn na nfɨ̀mtɨ̀ ateyn bû kfɨ̀nɨ ta yì tî nà ghɨ, a wù nyoʼ ndzɨsɨ ateyn nô mɨ ta nfɨ̀mtɨ̀ àteyn bû yam, kèsa yì n-ghɨ dzɨ a antêynɨ̀ ndzɨsɨ nâ ghè ma yì n-ghɨ abe a. ⁵⁶Mɨtì ngàŋ ndô Fɨyini kæ sɨ faytɨ ki ndzɨsɨ ateyn, ɨ̀ yeyn na ghɨ su meyn, nfɨ̀mtɨ̀ àteyn mæ̂, a wù sɨ ɨ̀ choʼ alêʼ kì a nfɨ̀mtɨ̀ tî ku a ndzɨsɨ nâ ghè, kèsa à n-ghɨ ndzɨsɨ ma ghɨ fàytɨ nɨ̀ gvɨ̂ nyàm, kèsa ghɨ bobo, kèsa ghɨ tɨm nɨ̀ àmbyèna. ⁵⁷Mɨtì ma nfɨ̀mtɨ̀ àteyn kæ kasi fvɨ̀ a ndzɨsɨ nâ ghè, kèsa yì fvɨ̀ afo nâ ghè a ghɨ bo tî kèsa ghɨ tɨm tɨm, kèsa à n-ghɨ àfo ma ghɨ faytɨ nɨ̀ gvɨ̂ nyàm, a à na ghɨ na yì n-yam ndu-à, a ghɨ na kelɨ sɨ nyoʼ afo ateyn. ⁵⁸Mɨtì ma ghɨ kæ sɨ sù ndzɨ nâ sìsɨ̀, kèsa à n-ghɨ àfo ma ghɨ bobo, kèsa ghɨ tɨm tɨm, kèsa à n-ghɨ àfo ma ghɨ faytɨ nɨ̀ gvɨ̂ nyàm, nfɨ̀mtɨ̀ àteyn mæ̂, a ghɨ na fì kelɨ sɨ sù sɨ kfeynsɨ ta ka afo ateyn a na layna.”

⁵⁹Ɨteyn nâ tèyntɨ̀ nɨn ghɨ tɨ̀saʼ kûm nfɨ̀mtɨ̀ ɨlvɨ ta yì kù ndzɨsɨ ma ghɨ tɨm nɨ̀ àmbyèyn a, kèsa ndzɨsɨ ma ghɨ bo bo, kèsa ndzɨsɨ fɨfâsɨ̀, kèsa nô mɨ ghà ta ghɨ faytɨ nɨ̀ gvɨ̂ nyàm, tɨ ghɨ sɨ dyèyn na afo ateyn a nɨn layna ma kɨ n-layn wi a.