Leviticus 12

Wul na bzɨ-à, ghɨ sù ŋweyn ta isaʼi nɨn dyêyn

¹Bôbo Fɨyini nɨ̀n læ meyn bè sɨ̂ Mosìs na, ²“Bè sɨ̂ ghelɨ Isìlæ̀ na, ‘Wùl ɨ wi tìmi ɨlvâ, ɨ̀ bzɨ wayn ɨ lûmnɨ̀, a wù nà layn wi sɨ a mɨchi nsòmbo, kɨ̀ ighel ta wù nî wu nà layn wi ta isaʼi nɨn ndêyn ɨlvɨ ta wù yeyn ɨlvɨ ŋweyn, ³a à na ghɨ a mɨchi nfama, a ghɨ na kelɨ sɨ sɨ anam a wayn àteyn. ⁴Ghɨ na sɨ ànam a wayn nô mɨ ɨlvɨ gha, nà àteyn ɨ fi chi mɨ̀chi mɨ̀vɨm ɨ̀n tal njvàsɨ̀ tal, nô ta ka wù layni ɨ̀ mèsì, wu kelɨ wi sɨ kùm afo a laynɨ-a, kelɨ wi sɨ ndù ɨchfɨ fɨndo nɨ̀ Bôbo Fɨyini nô ta ka mɨ̀chi mɨ̀ àteyn chwo. ⁵Wul ɨ wi kæ sɨ bzɨ wayn ɨ wi a wù na layn wi sɨ a tɨwe tɨ̀ bò, kɨ̀ têyn ta wù nî wu nà ghɨ ɨlvɨ ta wù yeyn ɨlvɨ ŋweyn. Tɨwe nâ tìtɨ̀ chwô tɨ̀ bò, wu fi chi kfeynsɨ mɨ̀chi mɨ̀vɨm ntufa njvàsɨ̀ ntufa jæ ta ka wù lanî mèsì sɨ a mɨ̂lùŋ afî a mɨ̀ fvɨ̀ a ŋweyn ɨwùyn.’”

⁶“À nà ghɨ ta mɨ̀chi nâ mzɨ̀ chwò meyn, kèsa wù bzɨ wayn ɨ lûmnɨ̀ ma ɨ wayn ɨ wi-a, a wù na kelɨ sɨ gvi nɨ̀ wâyn njɨ̀ ma wù chem meyn bèŋ sɨ̂ ngàŋ ndô Fɨyini ɨchfɨ fɨndo nɨ̀ Bôbo Fɨyini sɨ ifu i nyoʼnɨ-i, nɨ̀ wâyn àlàlàtoto kèsa wâyn fɨ̀nlàynɨ̀ sɨ ifu sɨ loyn ilêsɨ̀ ifu. ⁷Wù gvî nɨ̀ ɨ̀fwo nâ wèyn, ngàŋ ndô Fɨyini ɨ ndu fu sɨ̂ Bôbo Fɨyini ta ka fɨ lesɨ fù wul ɨ wi àteyn, a wù lani sɨ a mɨ̂lùŋ afî a mɨ̀ tî fvɨ̀ a ŋweyn ɨwùyn.

“Ɨteyn nâ tèyntɨ̀ nɨn ghɨ tɨ̀saʼ tìtɨ̀ a wul ɨ wi nɨn kelɨ sɨ lèm ɨlvɨ ta wù bzɨ wayn ɨ lûmnɨ̀ kèsa wayn ɨ wi. ⁸Wul ɨ wi ateyn kæ sɨ nà kelɨ wi wâyn njɨ̀, a wù gvi nɨ̀ mɨ̀nlàynɨ̀ ɨ̀m bò, kèsa woyn àlàlàtoto ghɨ̀ bò, fɨ̀mòʼfɨ ghɨ na ngàŋ ndô Fɨyini fu ifu i nyoʼnɨ-i ateyn, fɨlifɨ ɨ ghɨ na ngàŋ ndô Fɨyini fu, Bôbo Fɨyini lesɨ fù wùl ɨ wi nâ vzɨ̀. Wù na fu ɨfwo nâ wèyn ngàŋ ndô Fɨyini ndû fù nô mɨ ɨlvɨ gha, Fɨyini fɨ lèsɨ fu mbɨsɨ ŋweyn, wu nà sɨ kasî layna.”