Leviticus 11

Ɨfwo ɨ yɨnɨ vzɨ̀ a wu n-layn nɨ ɨvzɨ̂ a wu n-layn wi

¹Bôbo Fɨyini nɨn læ meyn bè sɨ̂ Mosìs ŋêyn Alòyn na, ²“Bè sɨ̂ ghelɨ Isìlæ̀ na, ‘Antêynɨ̀ nyamsɨ ghè a sɨ n-jêl atû nse nô sɨ̀ jɨ̀m, yì na kfɨlɨ ɨsêynsɨ̀ têyn. ³Yì kàʼ a yì kfɨl nô mɨ nyam ì kà ta yì n-kelɨ ntaʼ avɨ̀, yɨ ɨ̀fwo ɨ yɨnɨ, kasî koʼsɨ-à, chama.’”

⁴“Nyam sɨ lisɨ nɨn ghɨ lum yɨ ɨ̀fwo ɨ yɨnɨ sɨ nà kasî koʼsɨ-à, chama, mɨtì kelɨ wi ntaʼ àvɨ̀, sɨ lisɨ kelɨ ntaʼ àvɨ̀ mɨtì yɨ ɨ̀fwo ɨ yɨnɨ kasî koʼsɨ̂ wì. Yi n-kelɨ wi sɨ nà kfɨl ìnkì nâ zɨ̀-ì. Ka yì na kfɨl nyam tèyn ta Kàmêl. Yì n-yɨ ɨ̀fwo ɨ yɨnɨ kasî koʼsɨ-à, chama, mɨtì kelɨ wi ntaʼ àvɨ̀. Yì n-layn wi ta isaʼ i nɨn dyêyn. ⁵Fɨkfɨ̂ fɨ ɨtwaʼ fɨ nɨn yɨ ɨfwo ɨ yɨnɨ fɨ nà kasî koʼsɨ-à, chama, mɨ̀tì layn kfeynɨ̂ wì sɨ̂ zɨ̀ sɨ kfɨl bòm ta fɨ n-kelɨ wi ntaʼ àvɨ̀. ⁶Fɨ̀bàʼ ɨ̀tùŋlɨ fɨ nɨn kasî koʼsɨ̂ ɨ̀fwo ɨ yɨnɨ chama, layn kfeynɨ̂ wì sɨ̂ zɨ̀ sɨ kfɨl bòm ta fɨ n-kelɨ wi ntaʼ àvɨ̀. ⁷Nkfɨnyàm nɨ̀n layn kfeynɨ̂ wì ta ka yì na kfɨla nô mɨ ta yì n-kelɨ ntaʼ àvɨ̀ ma yì gwosɨ meyn kɨ̀ nô ì jɨ̀m mɨtì yɨ ɨ̀fwo ɨ yɨnɨ kasî koʼsɨ̂ wì. ⁸Ka yì na kfɨl tɨ̀nkì tɨ nyâm nâ tèyntɨ̀, kèsa kum nô mɨ kum ɨkfɨ ateyn bòm ta sɨ n-layn wi.”

⁹“Antêynɨ̀ nyamsɨ ghê a sɨ n-chi a jvâ, yì na kfɨl kɨ nyam na yì n-kelɨ ngaʼsɨ nɨ̀ tɨ̀wô tɨ samnɨtɨ. ¹⁰Mɨtì yi n-kelɨ sɨ nà nyasi nô mɨ ghà ta kɨ n-chi a jvâ, kelɨ wi tɨwô tɨ samnɨtɨ nɨ̀ ngaʼsɨ kèsa kɨ n-chi a jvâ ì ghaʼnɨ, kèsa kɨ n-chi a jvâ yi kalì kali a. ¹¹Ta yi nyasi ɨfwo nâ wèyn, ka wùl nɨn læ̀ mòm sɨ kfɨl njwò àfo antêynɨ̀ ɨ̀fwo nâ ghàyn. Ka wùl nɨn læ̀ kùm nô mɨ kum akfɨ afo antêynɨ̀ ɨ̀fwo nâ ghàyn. ¹²Yì na nyasî nô mɨ ghà ta kɨ n-chi a jvâ, kelɨ wi tɨwô tɨ samnɨtɨ nɨ̀ ngaʼsɨ.”

¹³“Ɨmêyn nɨ̀n ghɨ mɨ̀nyuyn mzɨ̀ a yi n-kelɨ sɨ nà nyasi-à, kfɨlɨ wi. Ka yi n-læ̀ kfɨl mbuʼ àwùmawum nɨ̀ àngùluŋ a, nô mɨ ìnki ì kà. ¹⁴Ka wùl nɨn læ̀ kfɨl fɨ̀nsù fɨ awumawum fɨ baŋnɨ fɨ. Ka wùl nɨn læ kfɨl nô mɨ fɨ̀nsù fɨ awumawum fɨ fɨmnɨ fɨ fɨ̀ kà. ¹⁵Ka wù nɨn læ̀ kfɨl àŋòʼangumi, nô mɨ ìnki ì kà. ¹⁶Ka yi n-læ̀ kfɨl àngêynɨ̀ a bes, nɨ̀ àngêynɨ̀ a toŋnɨ-a, nɨ̀ ngvɨ̂ jvà ì ghaʼnɨ, nɨ̀ tɨ̀nkì tɨ awumawum kɨ tɨ̀ jɨ̀m, ¹⁷nɨ̀ àngêynɨ̀ a lænɨ-a, nɨ̀ ngvɨ̂ jvà ì lænɨ, nɨ̀ àngêynɨ̀ a ghaʼnɨ-a, ¹⁸nɨ̀ àngêynɨ̀ a fɨfâ, nɨ̀ àngêynɨ̀ a nse ìyum a, nɨ̀ ngvɨ jvà i fɨfâ, ¹⁹nɨ̀ mɨ̀nyuyn mzɨ̀ nô ɨ̀n jɨ̀m a mɨ̀ n-kelɨ afyeyn a dyâ nɨ̀ àchfɨ̂ a dyâ, nɨ̀ fɨ̀nyuyn fɨ hubùfɨ̀ baʼsɨ̂ nɨ̀ njwo ìfò.

²⁰“Yi n-kelɨ sɨ nà nyasi nô mɨ ghà ta kɨ n-tâyn tayn, fî ŋâŋlɨ̀ a nse, ²¹a bu kɨ ɨ̀fwo vzɨ̀ a wu n-kelɨ tɨwô, ŋaŋlɨ̀-à, fî kelɨ afyeyn a li-a, châʼ chaʼ nɨ̀ ànkeyna. ²²Yi ti n-dyêyn na yì kàʼ a yì kfɨl ngumisɨ kɨ tɨ̀nki tɨ̀ jɨ̀m, nɨ̀ ɨ̀nchwèsɨ, baʼsɨ̂ nɨ̀ ìngvɨ̀yn i. ²³Yì kàʼ a yì na kfɨl ɨ̀fwo nâ wèyn, mɨtì nyasî ɨ̀fwo ɨ taynɨ ɨ lvi vzɨ̀ nô ɨ̀ jɨ̀m a wu n-ŋâŋlɨ̀ a nse.”

²⁴“Nyam sɨ lisɨ sèynsɨ̀ nɨn ghɨ ma yì kæ sɨ kùm akfɨ ateyn yi bu nà fî layn asɨ nɨ̀ Bôbo Fɨyini. À kùm nô mɨ ndà wu bû nà fî layna nô ta ka ɨtuʼ nî jɨ. ²⁵Nyàm kæ kfɨ antêynɨ̀ nyàmsɨ̀ nâ ghàyn, à kùm nô mɨ ndà akfɨ ateyn, a wù na kelɨ sɨ su ndzɨsɨ ŋweyn, ɨ̀ sù mɨ tì nà layn kfeynɨ̂ wi nô ta ka ɨtuʼ nî jɨ.”

²⁶“Nyàm na ghɨ kelɨ ntaʼ àvɨ̀ bula yì faytɨ gwòsɨ̀, kèsa à n-ghɨ nyam yɨ àfo kasî koʼsɨ̂ wì sɨ cham, ka wùl nɨn læ̀ kùm bòm ta yì n-layn kfeynɨ̂ wì sɨ̂ zɨ̀. À kæ sɨ kùm nô mɨ ndà akfɨ a nyâm antêynɨ̀ nyàmsɨ̀ nâ ghàyn, a wù na bu layn kfeynɨ̂ wì ta isaʼ i nɨn dyêyn. ²⁷Nyàm kæ nà jelɨ̀ kɨ nô nɨ̀ àfyeyn à kæ̀ mɨtì kelɨ ngèsɨ̀, a yì na layn wi sɨ̂ zɨ̀. Ka wùl nɨn læ kùm akfɨ ateyn. À kùm mɨ ndà, wù bû nà fî layn kfeynɨ̂ ta isaʼ i nɨn dyêyn nô ta ka ɨtuʼ nî jɨ. ²⁸À kùm nô mɨ ndà akfɨ a nyâm nâ kì, a wù na kelɨ sɨ su ndzɨsɨ ŋweyn, ɨ̀ sù mɨ tì nà layn wi nô ta ka ɨtuʼ nî jɨ. Ɨkfɨ nyâmsɨ̀ nâ wèyn nɨn layn kfeynɨ̂ wì sɨ̂ zɨ̀ ta isaʼ i nɨn dyêyn.”

²⁹“Ka wùl nɨn læ̀ kùm àfo antêynɨ̀ ɨ̀fwo ghàyn a wu n-ŋâŋlɨ̀ a nse ta fɨ̀nsòŋnɨ̀ nɨ̀ chwokùʼ, nɨ̀ ɨ̀byâs ɨ ghaʼlɨnɨ kɨ tɨ̀nki tɨ̀ jɨ̀m. ³⁰Ka wùl nɨn læ̀ kùm fɨ̀nkùnâ yvà-yvà. Ka wùl nɨn læ̀ kùm àbas nô mɨ ìnki ì kà. Ka wùl nɨn læ̀ kùm fɨ̀nàʼanaʼ. ³¹Ɨfwo nâ wèyn a wu n-ŋâŋlɨ̀ chwô a nse tèyn nɨn layn kfeynɨ̂ wì sɨ̂ zɨ̀. À kùm nô mɨ ndà akfɨ afo antêynɨ̀ ɨ̀fwo nâ ghàyn, a wù na layn kfeynɨ̂ wì nô ta ka ɨtuʼ nî jɨ. ³²Afo a kæ kfɨ antêynɨ̀ ɨ̀fwo nâ ghàyn, ɨ̀ chem nô mɨ atû ghà, kèsa ghɨ nî nô mɨ ghà nɨ̀ àfo nâ kì, a kɨ na bu fì layn wi. Kɨ kæ sɨ chem nô mɨ atû àfo ma ghɨ fàytɨ nɨ̀ fɨ̀kâʼ fɨ̀, kèsa ghɨ fàytɨ nɨ̀ ndzɨsɨ, kèsa ghɨ fàytɨ nɨ̀ gvɨ̂ nyàm, kèsa ghɨ faytɨ nɨ̀ fɨ̀ntsɨ fɨ, ghɨ we afo ateyn a mu, ɨ̀ we nô mɨ tì a kɨ na layn kfeynɨ̂ wì nô ta ka ɨtuʼ nî jɨ a kɨ jæ sɨ nà layna. ³³Afo ateyn a kæ sɨ chem a ntòyn àchàʼ, a nô mɨ ghà a ntòyn nâ ghè na bu layn wi, ghɨ kelɨ kɨ sɨ zuelɨ ntòyn ateyn. ³⁴Mû kæ sɨ fvɨ̀ a ntòyn nâ ghàyn, ɨ̀ kùm àfo ghɨ yɨ a, kɨ bû nà fî layna. Wùl kàʼ wu bû fì nyvɨ afo ma kɨ fvɨ̀ a ntòyn nâ ghè. ³⁵Nô mɨ ghà ta ìnki akfɨ afo nâ kèynà chèm ateyn bu fì layn wi. Kèsa kɨ chem ichɨ, kèsa a ntòyn, a ghɨ na kelɨ sɨ zuelɨ ichɨ ateyn, kèsa ntòyn àteyn, bòm ta ɨfwo nâ wèyn na bu fì layn wi, yi kelɨ wi sɨ fì sɨ nì iwo ateyn. ³⁶Mɨtì, ma akfɨ afo nâ kì kæ sɨ chem a isɨ i lɨmàlɨ̀mà, kèsa à n-ghɨ ibɨ i mu, a jvà nâ zɨ̀ na bu layn kɨ layn. Mɨtì ma à kæ sɨ fvɨ̀sɨ̀ nô mɨ ndà akfɨ afo nâ kì a kɨ nì chèm a jvâ nâ ghè, a wù na bu layn wi. Wù kæ fvɨ̀sɨ afo ateyn nô mɨ nɨ̀ ghà, a afo ateyn a na layn wi. ³⁷Akfɨ a afo nâ kì kæ sɨ chem nô mɨ atû ngœ̀ ghà, a ngœ̀ àteyn na bu layn kɨ layn. ³⁸Mɨtì ma ghɨ kæ sɨ chfɨ ngœ̀, akfɨ afo nâ kì ɨ chem ateyn, a ngœ̀ àteyn na bu fì layn kfeynɨ̂ wì sɨ̂ zɨ̀.”

³⁹“Nyàm kæ kfɨ a ghɨ nyam, isaʼ i dyêyn na ghɨ kàʼ a ghɨ kfɨl, wùl kûm àkfɨ ateyn, wu bû nà fî layna nô ta ka ɨtuʼ nî jɨ. ⁴⁰À kfɨl nô mɨ ndà sɨ a akfɨ a nyâm nâ ghè, a wù na kelɨ sɨ su ndzɨsɨ ŋweyn, ɨ̀ sù mɨ tì nà layn kfeynɨ̂ wì nô ta ka ɨtuʼ nî jɨ. À kæ sɨ kum nô mɨ ndà akfɨ a nyàm nâ kì, a wù na kelɨ sɨ su ndzɨsɨ ŋweyn, ɨ̀ sù mɨ tì nà layn kfeynɨ̂ wì nô ta ka ɨtuʼ nî jɨ.”

⁴¹“Yi n-kelɨ sɨ nà nyasi nô mɨ ghà ta kɨ n-ŋâŋlɨ̀ a nse. Ka wùl nɨn læ̀ kfɨl. ⁴²Yi n-kelɨ wi sɨ kfɨl afo kɨ ŋâŋlɨ̀ a nse, kèsa kɨ n-gûf ɨ̀lvâ a nse, kèsa kɨ n-jelɨ̀ nɨ̀ àfyeyn à kæ̀ a, kèsa kɨ n-kelɨ àfyeyn sɨ a idvɨ̀. Yi n-kelɨ sɨ na nyasi tɨ̀nkì tɨ ɨfwo nâ vzɨ̀. ⁴³Ka wùl nɨn læ̀ lɨ̀ŋ ngêŋ ŋweyn nà chaʼnɨ-à bòm ɨ̀fwo nâ wèyn. Ka wùl nɨn læ̀ nì ìwo nɨ̀ ɨ̀fwo nâ wèyn nà chaʼnɨ-à, bu layn kfeynɨ̂ wì ta isaʼ i nɨn dyêyn. ⁴⁴À n-ghɨ mà Bôbo Fɨyini, ɨ Fɨyini fifɨ. Yì lem ngêŋ sisɨ sɨ a nyɨŋ nà layna bòm ta mɨ n-layn. Ka yi n-læ̀ vìsi na ɨfwo nâ wèyn a wu n-ŋâŋlɨ̀ a nse tèyn ni yì na layn wi. ⁴⁵À n-ghɨ mà Bôbo Fɨyini. À n-læ fvɨ̀sɨ ma zɨ sɨ a Ijìb sɨ nà ghɨ Fɨyini fifɨ. Yi na layna bòm ta mɨ n-layn.”

⁴⁶“À ti tɨ̀saʼ tìtɨ̀ a yi n-kelɨ sɨ nà lemà kûm nyamsɨ nɨ̀ mɨ̀nyûyn baʼsɨ̂ nɨ̀ ɨ̀fwo vzɨ̀ a wu n-chi a jvâ nô ɨ̀ jɨ̀m, nɨ ɨvzɨ̂ a wu n-ŋâŋlɨ̀ a nse nô ɨ̀ jɨ̀m. ⁴⁷Yi n-kelɨ sɨ nà kya sɨ a nyɨŋ kûm ɨfwo vzɨ̀ a wu n-layn, nɨ ɨvzɨ̂ a wu n-layn wi. Yi n-kelɨ sɨ nà kya ɨfwo vzɨ̀ a yì kàʼ a yì yɨ, kya ɨvzɨ̂ a yì kàʼ yi bû yɨ.”