Judges 5
Ŋwàʼlɨ̀ Ghelɨ ghɨ Tisɨnɨ
Njàŋ Dèbolà
1À n-læ nà ghɨ ta Isìlæ̀ yɨ iwoŋ, Dèbolà ŋêyn Balàk ɨ wâyn Abinwàm ɨ yem njàŋ yèyn tèyn;
2“À n-gvî ɨlvɨ ta ghelɨ ghɨ tisɨnɨ a Isìlæ̀ nɨn ndû asɨ iwòŋ,
À n-gvî ɨlvɨ ta ghelɨ àntsɨ chòʼnɨ sɨ fu ngeŋsɨ àŋena kɨ̀ nô sɨ a àŋena a ngeŋsɨ,
Ghesɨ̀nà na koʼsɨ̂ Bôbo Fɨyini.”
3“Tɨfôyntɨ̀, yì yvɨtɨ, yì faytɨ yvɨ̀tɨ a ghelɨ ghɨ tisɨnɨ.
Mà na yema koʼsɨ̂ Bôbo Fɨyini, mà na yem njàŋsɨ̀ koʼsɨ̂ ŋweyn,
Mà na yema buʼ ɨ̀fwo koʼsɨ̂ Bôbo Fɨyini ɨ Fɨyini fɨ Isìlæ̀.”
4“À nà n-ghɨ ta wà fvɨ̀ sɨ a Seyì a Bôbo,
À nà n-ghɨ ta wà lù sɨ ilaʼ i Edòm,
nse ɨ nèʼà, ivɨ-i nà sfɨsà sfɨsa
samoʼ, ɨlwêʼ nɨn læ meyn fɨ̀m, ivɨ-i suʼi nô sɨ a ŋaŋ.
5Kfɨynsɨ nɨ̀n læ meyn nèʼà ta wà n-gvî a Bôbo,
kɨ̀mɨ ighel ta kfɨ̂yn Sinày nɨn læ nèʼa ta wà gvì ateyn a Bôbo Fɨyini fɨ Isìlæ̀.”
6“À nà n-ghɨ ɨtuʼ nɨ̀ Shamgà ɨ wâyn Anàt,
ɨtuʼ ghê a Jayèl nà n-saʼ ghesɨ̀nà ghelɨ Isìlæ̀ ateyn, ghelɨ ɨ leʼ ɨ nà bu jelɨ̀ wì a dzɨsɨ tosɨ.
Ghelɨ nà sɨ jelɨ̀ kɨ a mɨdzɨ̀tɨ̂ mɨ̀ ɨ̀twaʼ.
7Ɨlweʼ chimi kɨ têyn moŋ a mɨ̂ntèʼtɨ̂ ɨntelâ ilaʼ i Isìlæ̀,
ɨlweʼ chimi kɨ tèyn sɨ chem ta ka mà lali, ɨ ma Dèbolà.
Ta ka mà lali ta nì sɨ̂ ghelɨ Isìlæ̀.
8Ghelɨ Isìlæ̀ nɨ̀n læ meyn choʼnɨ sɨ nà koʼsɨ mɨyini ɨnfɨ,
mbàynɨ̀sɨ àŋenasɨ ɨ kæ gvì sɨ nu àŋena.
A ghɨ tì nô wùl ɨ kelɨ wi iwoŋ, kelɨ wi nkyàsɨ iwòŋ
nô wul ɨ̀mòʼ antêynɨ̀ nɨ̀ ghelɨ Isìlæ̀ nkam mɨ̀vɨm ɨ̀n kæ̀ ɨ kelɨ wi afo sɨ nu nɨ̀ ànkeyna.
9Mɨ n-saŋlɨ̂ nô sɨ a ŋaŋ sɨ̂ ghelɨ ghɨ tisɨnɨ a Isìlæ̀,
sɨ̂ ghelɨ ghì a ghɨ chòʼnɨ kɨ̀ nô sɨ a àŋena ngeŋsɨ ɨ̀ seʼ iwoŋ.
Ghesɨ̀nà na koʼsɨ̂ Bôbo Fɨyini.”
10“Zɨ̀ ghî a yi n-jelɨ̀ atû njàkây sɨ fɨfâsɨ̀,
zɨ̀ ghî a yì fàytɨ zɨ̀sɨ njàkây sisɨ ɨ̀ koʼ dùʼì atu, yì yvɨtɨ
zɨ̀ ghî a yi n-jelɨ̀ a nse,
yì yvɨtɨ, 11yì yvɨtɨ gyasɨ ghelɨ ghì a ghɨ n-yem njàŋsɨ̀ ɨlwèʼ ghè a ghɨ n-tu mu ateyn,
yema fêʼtɨ̀ ta Bôbo gàmtɨ̀ ghɨ tɨm yɨ,
yema fêʼtɨ̀ ta sugèyʼsɨ Isìlæ̀sɨ̀ tɨ̀m meyn yɨ mbàynɨ̀sɨ àŋena.
Ghelɨ Bôbo Fɨyini
nɨ̀n lù meyn kàlì ɨchfɨ ntèʼ.”
12“‘Làli a Dèbolà, làli!
Làli wa yem àywo-mbaŋ.
Làli a Balàk!
Lì ghelɨ ghì a ghesɨ̀nà ghàytɨ ɨ nà kfâ nɨ̀ àŋena a wâyn Abinwàm!’”
13“Ghɨlûmnɨ̀ ghì a ghɨ n-læ faŋ,
nɨ̀n læ meyn kàlì ɨ koli ghelɨ ghɨ tisɨnɨ.
Ghelɨ Bôbo Fɨyini,
nɨ̀n læ meyn kalì ɨ koli mà na ghes àŋena nu mbàynɨ̀ sɨ bemnɨsɨ.
14Ghɨli nɨ̀n lù a Eflèm ma à n-læ nà ghɨ ghelɨ Amalèk sɨ asɨ ɨ gvì,
Ghelɨ Benjamìn nɨn læ meyn boŋ gvì ŋêyn ghelɨ ghì a ghɨ nà jelɨ̀ ibàm nɨ̀ và.
Ɨtu ɨ sugèyʼsɨ̀ nɨ̀n læ meyn lù a Makì ɨ gvì,
Ɨtu ɨ sugèyʼsɨ̀ nɨn læ meyn lù a Zebulòn ɨ gvì.
15Ghelɨ ghɨ tisɨnɨ nɨ̀ ghelɨ Isakà nɨn læ meyn ndu koli Dèbolà ŋêyn Balàk,
Samoʼ ghelɨ Isakà nɨn læ meyn ndù ibàm nɨ̀ Balàk ŋêyn àŋena nyɨŋ kàlì chem ibal.
Ghɨ nà ndû mɨtì ghelɨ isas i ndo nɨ̀ Lubèn ɨ faŋ tɨ̀ ndù bòm ta àŋena nà n-ti wi ɨchfɨ̂ ɨ̀mòʼ, kya wi iwo zɨ̀ a ka ghɨ ni.
16Yì tî fàŋ a ngùŋ nɨ̀ bzɨsɨ bòm ghà?
Yì tî fàŋ ibèyn i bzɨsɨ sɨ nà yvɨtɨ ta nchìsɨ̀ nɨn jâŋtɨ̀ bzɨsɨ ma?
Ghelɨ isas i ndo nɨ̀ Lubèn nɨ̀ læ faŋ tɨ̀ ndù bòm ta àŋena nà n-ti wi ɨchfɨ̂ ɨ̀mòʼ, kya wi iwo zɨ̀ a ka ghɨ ni.
17Ghelɨ Gilèd nɨ̂n læ meyn faŋ kɨ injɨyn i jvâ Jodàn.
Ghelɨ Dân ti n-læ faŋ kɨ a ngùŋ ngùʼsɨ bòm ghà?
Ghelɨ Ashà nɨn læ meyn faŋ kɨ a mbæ̀ jvà
ɨ nà chî kɨ afu.
18Mɨtì ghelɨ Zebulòn ɨ lèm na àŋena nɨn ndû kfɨtɨ kɨ asɨ iwòŋ,
ghelɨ Naftalì nɨn læ meyn boŋ lèm na àŋena ndù kfɨtɨ kɨ asɨ iwòŋ.”
19“Tɨfôyn tɨ Kenàn tɨ̀ nɨn læ meyn gvi nù ghès,
àŋena nɨn læ meyn gvi nù ghès a ntèʼ Tanàk a mbæ̀ jvà Megidò,
mɨtì ɨ faŋ tɨ̀ lì aso ɨkwo sɨ lu nɨ̀ ànkeyna. Àŋena nɨn bû læ lì nô afo àmòʼ.
20Nô mɨ mɨ̀njêyn sɨ iyvɨ nɨ̀n læ meyn nù sɨ̂ ghesɨ̀nà,
mɨ̀njêyn nà n-jêl iyvɨ nû Siselà.
21Jvà Kishòn nɨ̀n læ meyn lì ɨ chwò nɨ̀ àŋena,
ɨ jva bula yì timi yum, ɨ jvâ Kishòn,
wa ndû kɨ nɨ̀ asɨ-a a mà, wa to kɨ to!
22Yi nà n-gâyn tì, ɨvɨ nyamsɨ nɨ̀ àŋena ɨ kûm nô sɨ adyaʼ,
nyamsɨ Siselàsɨ̀ ɨ leʼa, nyɨŋ ta sɨ n-sɨnɨ̂ ìnyɨŋ.
23Nchì Bôbo Fɨyini ɨ bè na, ‘Njva ku meyn ntèʼ Melòz,
Ndi ibɨ nɨn ghɨ atu nɨ̀ àŋena,
bòm ta àŋena nɨ̀n bu læ fvɨ̀ sɨ gàmtɨ Bôbo Fɨyini,
na ŋêyn sugèyʼ sɨ Bôbosɨ nu mbàynɨ̀sɨ ŋweyn.’”
24“Fɨyini fɨ boysɨ meyn Jayèl chwò nô ghɨ̀ki ghɨ̀ jɨ̀m,
Fɨyini fɨ boysɨ meyn Jayèl ɨ wî Hebà, ɨ wul ɨ̀ Kên,
Fɨyini fɨ boysɨ meyn ŋweyn chwò ghɨ̀kì ghì a ghɨ n-chi a mɨ̂twò nô ghɨ̀ jɨ̀m.
25Siselà nɨ̀n loyn meyn mu, Jayèl ɨ fu igheyn i nyâm ma yi tabtɨ meyn,
wu fu igheyn i nyâm sɨ̂ ŋweyn abàlì kɨ kfeynɨ̂ sɨ̂ tɨ̀fôyn tɨ̀,
26wu n-kem-kem fu tî ɨ lì fɨ̀choʼ ɨ ghal awu àmòʼ,
ɨ fi lì ànkùm ɨ ghal awu a li-a
ɨ kùm fɨ̀choʼ fɨ ateyn atu nɨ̀ Siselà, ɨ zuelɨ àtu a ŋweyn
ɨ sàytɨ kɨ saytɨ buʼbuʼ àtu nɨ̀ ŋweyn.
27Siselà ɨ fe kɨ a ŋweyn asɨ,
ɨ nyɨŋi kɨ afu ɨ kfɨ.
Siselà nɨn læ fe asɨ nɨ̀ Jayèl ɨ nyiŋi kɨ afu.
Wù n-læ fe mɨ wo ɨ kfɨ kɨ kfɨ.”
28“Nà Siselà ɨ ki fvɨ̀sɨ abùʼ a wundù,
ɨ bwal dzɨ̀ antêynɨ̀ ndo ɨ bɨf nâ,
‘Wâyn wom làla ghà têyn sɨ kfa a?
Mɨ n-yvɨ wi ta fɨ̀nchaʼ fɨ ŋweynfɨ nɨn kûm gvî.’
29Wùl ìjèl nɨ̀ ŋweyn vzɨ̀ a wù tof kfèynɨ ɨ bèynsɨ̀ ìwo zɨ̀ a wù bɨfɨ,
nà Siselà ɨ nà sɨ kûmtɨ̀ kɨ kumtɨ iwo nâ zɨ̀ a wul ɨwi nâ vzɨ̀ bè sɨ̂ ngêŋ ŋweyn na,
30‘Mɨ n-kya kɨ nô tèyn na ghɨ tɨm meyn yɨ iwoŋ nà sɨ gwô ɨ̀fwo vzɨ̀ a ghɨ ghal fsɨ̀tɨ:
wul ɨ̀ lûmnɨ̀ nɨn lî wayn ɨ wi ɨ̀mòʼ kèsa ghɨ̀ bò.
Ghɨ n-fu ndzɨsɨ sɨ̂ Siselà sɨ jôf kɨ tèyn,
ɨ ndzɨsɨ ma ghɨ faytɨ meyn tɨm,
ɨ ndzɨsɨ ma ghɨ faytɨ meyn tɨ̀m nô a jûŋ ta ka mà na lɨmtɨ̂ a ma ɨmzɨ̀.
Ghɨ yɨ̀ ɨfwo nâ wèyn nô ɨ̀ jɨ̀m iwòŋ.’”
31“Mɨ n-jêm na mbàynɨ̀ shyasɨ nô sɨ̀ jɨ̀m kfɨtɨ kɨ̀ ta Siselà a Bôbo Fɨyini.
Jêm na ghelɨ ghì a ghɨ n-kôŋ vâ na bayn kɨ ta ɨchfɨ̂-iyvɨ,
ɨlvɨ ta yi sal gvì kɨ̀ gvi nà bayn nô sɨ a ŋaŋ.”
Ghɨ n-læ tɨm yɨ iwoŋ nâ zɨ̀, mbôynɨ̀ ɨ gvì a Isìlæ̀ ɨ faŋ kɨ faŋ sɨ a bèŋsɨ̀ mɨ̀vɨm ɨ̀n kæ̀.