Judges 6

Gidìyòn ɨ koʼ sɨ a wûl ɨ tisɨnɨ a Isìlæ̀

¹Ghelɨ Isìlæ̀ nɨ̂n fi meyn nì mbɨ asɨ nɨ̀ Bôbo Fɨyini, wu visi ghelɨ Midìyàn ɨ fu ngeʼ sɨ̂ àŋena sɨ a bèŋsɨ̀ nsòmbo. ²Ghelɨ Midìyàn ɨ fu chwòsɨ̀ ngeʼ sɨ̂ ghelɨ Isìlæ̀, àŋena faytɨ ɨ̀lwêʼ a kfɨynsɨ ɨ nà ndû lêytɨ̀ ateyn. Àŋena nà n-lêytɨ̀ antêynɨ̀ tɨ̀fò, fî lêytɨ̀ ɨ̀lwèʼ ghè a wu nà n-to sɨ ndù sɨ chem ateyn. ³Ghelɨ Isìlæ̀ nà n-tôʼ ɨ̀fwo a gvêynsɨ̀ nô mɨ ɨlvɨ gha, ghelɨ Midìyàn nɨ̀ ghelɨ Amalèk nɨ̀ ghelɨ ghɨ li ma ghɨ lù abàs ghè a ɨchfɨ̂-iyvɨ nɨn sal ateyn ɨ seʼ sɨ nu àŋena. ⁴Àŋena nà n-gvî bɨ̂ a Isìlæ̀, ghɨ bebsɨ nô mɨ ghà ta ghelɨ Isìlæ̀ tòʼ a gvêyn. Àŋena nà n-nî ghɨ bebsɨ ɨ̀fwo a gvêynsɨ̀ ɨ ndu chem nô a ntèʼ Gazà. Ghɨ nà n-se sɨ bebsɨ, ghɨ bû vìsi nô àfo ta wùl ɨ̀ Isìlæ̀ kàʼ a wù yɨ. Àŋena nà n-visî wì bzɨ njɨ̀, visî wì nyam mbòloʼ kèsa njàkâs. ⁵Àŋena nà n-se sɨ gvì ghɨ nà ŋefà kɨ ta ngumisɨ ma ghɨ li meyn nyamsɨ nɨ̀ ɨ̀fwo sɨ gvì sɨ kas mɨtwo ateyn. Ghɨ gvî tì, ghɨ bebsɨ nô mɨ ghà ilaʼ. ⁶Ghelɨ Midìyàn nâ ghì nɨn læ meyn nì ghelɨ Isìlæ̀ ɨ nà bu kelɨ wi nô àfo ɨ dzɨ̀ sɨ̂ Bôbo Fɨyini na wù gamtɨ àŋena.

⁷À nà n-ghɨ ta àŋena dzɨ̀ ɨ̀ chwòtɨ na Bôbo Fɨyini gamtɨ àŋena bòm ngeʼ zɨ̀ a ghelɨ Midìyàn nɨn fu, ⁸Bôbo Fɨyini ɨ tum nfèʼtɨ̀, yi bè sɨ̂ àŋena na, “Bôbo Fɨyini, ɨ Fɨyini fɨ Isìlæ̀ fɨ̀, bè na mà be sɨ̂ zɨ̀ na, à n-læ fvɨ̀sɨ ma zɨ sɨ a ndo àkòs a Ijìb. ⁹Mɨ n-læ ghal ɨ fsɨ zɨ sɨ a awu nɨ̀ ghelɨ Ijìb ɨ bœ̀sɨ̀ zɨ̀ sɨ awu nɨ̀ ghelɨ ghì a ghɨ nà n-yeʼtɨ zɨ nô ghɨ̀ jɨ̀m. Yi n-læ meyn se sɨ gvì, ma sàŋ ɨ fvɨ̀sɨ̀ àŋena ɨ fu ilaʼ i àŋena sɨ̂ zɨ̀. ¹⁰Mɨ n-bè sɨ̂ zɨ̀ na, ‘À n-ghɨ mà Bôbo Fɨyini, ɨ Fɨyini fifɨ. Ka yi n-læ̀ kòʼsɨ mɨyini mɨ̀ ghelɨ Amò ghèyn a yi n-chi a àŋena ilaʼ tèyn.’ Mɨtì yi faŋ tɨ̀ yvɨ̀nɨ ma.”

¹¹A nà ghɨ achi a li-a, nchì Bôbo Fɨyini ɨ gvì a ntèʼ Oflà ɨ dùʼì isas i fɨ̂kàʼ fɨ Ôk, a kelɨ Jòwâsh ɨ wul ɨ̀ Abìyezà. A ghɨ tì, Gidìyòn ɨ wâyn Jòwâsh ɨ nyaʼtɨ̂ leŋ wît alèʼ ghè a ghɨ nà n-nûʼ mɨtam ateyn ɨlvɨ ta ghɨ n-faytɨ mɨlûʼ. Wù nà n-lêytɨ̀ tì na ka ghelɨ Midìyàn yeyn. ¹²Nchì Bôbo Fɨyini ɨ fvɨ̀ ikèʼ nɨ̀ Gidìyòn, ɨ bè sɨ̂ ŋweyn na, “Sugèyʼ i bemnɨ yèyn, Bôbo nɨn ghɨ zɨ̂ ŋweyn amoʼ.”

¹³Gidìyòn ɨ bè na, “Mɨ n-nchwotɨ̂ sɨ bɨf iwo a bòbè. Wà bè na Bôbo nɨn ghɨ ghesɨ̀ àŋena, awo a bɨ-a keyn na gàyn sɨ̂ ghès têyn bòm ghà? Awo a kaynɨ-a kì ba a ghɨ̀bo ghes nɨ̂n læ fèʼtɨ na Bôbo nɨn læ ni sɨ̂ àŋena a? Àŋena nɨ̂n bè na, ‘Bôbo nɨn læ meyn fvɨ̀sɨ àŋena sɨ a Ijìb.’ Wù ti bèyn jɨm lvɨ̂yn ɨ̀ màʼì ghès sɨ̂ ghelɨ Midìyàn bòm ghà?”

¹⁴Bôbo ɨ fyeʼtɨ ki ŋweyn ɨ bè na, “Ndu kɨ nɨ̀ àdyaʼ kì a wà n-kelɨ tî ɨ fsɨ ghelɨ Isìlæ sɨ awu nɨ̀ ghelɨ Midìyàn. À n-tum mà tum và.”

¹⁵Gidìyòn ɨ bè sɨ̂ Bôbo na, “Mɨ n-nchwotɨ̂ sɨ bɨf iwo, nâ mà ti kàʼ a mà gamtɨ ti ghelɨ Isìlæ̀ ma mà fvɨ̀ isas i ndo nɨ̀ Mànasè, a ghɨ ìsas i ndo i boli ma à fì læ̂ gòʼsɨ̀ kɨ̀ ma ateyn a?”

¹⁶Bôbo ɨ bèynsɨ̀ ɨ bè na, “Mà na ghɨ kɨ ghɨ ghesɨ̀và. Mɨ n-gàmtɨ̀ và, a wà zuetɨ ghelɨ Midìyàn nâ ghì nô ghɨ̀ jɨ̀m.”

¹⁷Gidìyòn ɨ bèynsɨ̀ ɨ bè na, “Ma na kfeynɨ̂ a wa asɨ, wa dyèyn nchwæ na à n-taŋî kɨ nô và sɨ̂ mà. ¹⁸Mɨ n-chwotɨ̂ và, ka wa n-lù sɨ afêyn sɨ chem ta ka mà kasi gvì nɨ̀ ìfu ì yemi ɨ̀ fù sɨ̂ và.”

Bôbo Fɨyini ɨ bè na, “Mɨ n-chìtɨ̀-à a wà ndu ɨ̀ kàsi gvì.”

¹⁹Gidìyòn ɨ zɨ a ndo ɨ sɨ achôʼ a bzɨ ndoŋ ɨ kfè ɨ fèʼ ɨ̀nkfɨ̂ŋ ifùʼ ɨ lam abayn ateyn bula fɨ̀shɨ̀k. A nà ghɨ ta wù kfè mèsì, wu lì njwò àteyn ɨ we a nkwò ɨ we mu mɨ̀ njwò nâ mzɨ̀ a ntòyn ɨ gvi fu ɨfwo ɨ yɨnɨ nâ vzɨ̀ sɨ̂ nchì Fɨyini isas i fɨ̂kàʼ fɨ Ôk nâ ghè.

²⁰Nchì Fɨyini àteyn ɨ bè sɨ̂ ŋweyn na, “Li njwò àteyn nɨ̀ àbayn kì ɨ lèm atû ngòʼ afêyn ɨ sfɨ̀s mu mɨ̀ njwò nâ mèyn atu àteyn.” Gidìyòn ɨ ni kɨ ta yì bè. ²¹Nchì Bôbo Fɨyini nâ zɨ̀ ɨ nàysɨ̀ mbàŋ ŋweyn ɨ kùm njwò àteyn baʼsɨ̂ nɨ̀ àbayn a nɨ̀ ìsas i mbàŋ ì, ɨvɨs ɨ làlì a ngòʼ nâ ghè ɨ nyòʼ ɨ̀fwo ɨ yɨnɨ nâ vzɨ̀. Nchì Bôbo Fɨyini nâ zɨ̀ ɨ sami. ²²A nà ghɨ ta Gidìyòn kèli na à nì nà ghɨ nchì Bôbo Fɨyini, wu byal ɨ bè na, “Womê, Bôbo Fɨyini fɨngaŋtɨnɨ fɨ! Iwo i koli meyn mà. Ma yeyn meyn ìkêʼ i nchì Bôbo Fɨyini kɨ̀ nô a ndayn.”

²³Mɨtì Bôbo Fɨyini ɨ yvɨ̀sɨ̀ àtem a ŋweyn ɨ bè na, “Ka wa n-fàyn, wa n-kfɨ wi.”

²⁴Gidìyòn ɨ bàʼlɨ̀ àbaŋ ifu alèʼ nâ ghè ɨ fu izɨyn ateyn na, “Bôbo nɨn fu mbôynɨ̀.” Abaŋ ateyn a bu ti kɨ nô a Oflà sɨ koʼ sɨ chem layn, a ghɨ ntèʼ ndo nɨ̀ Abìyezà.

Gidìyòn ɨ bebsɨ àbaŋ ifu nɨ̀ Bâl.

²⁵A nà ghɨ nɨ̀ntuʼ kɨ̀mɨ achi nâ ghè, Bôbo Fɨyini ɨ bè sɨ̂ Gidìyòn na, “Li gvi nɨ̀ ànkùmtɨ̀ a nyâm mbòloʼ ilûmnɨ̀ antêynɨ̀ nyamsɨ nɨ̀ bò vâ, ɨzɨ̂ a yì n-ghɨ bèŋsɨ̀ nsòmbo. Wà gvî, wa bɨ̀ytɨ àbaŋ ifu kì a bò vâ bàʼlɨ̀ sɨ̂ Bâl tì ɨ mùʼ àtôʼ a Ashelà kì a kɨ n-ti a ngùŋ àteyn. ²⁶Wà nî, wa bàʼlɨ̀ àbaŋ ifu kɨ kfeynɨ̂ sɨ̂ Bôbo Fɨyini, ɨ Fɨyini fyafɨ, atû kfɨ̀yn afêyn ɨ lì ɨ̀tɨmlɨ atòʼ ɨ Ashelà vzɨ̀ ɨ faytɨ ɨ̀vɨs ateyn. Wà faytɨ, wa nyòʼ nyam zɨ̀ sɨ a ifu i nyoʼnɨ-i.”

²⁷Gidìyòn ɨ kæ li ghelɨ ghɨ felɨnɨ nɨ̀ ŋweyn ìvɨm na ŋêyn àŋena ni kɨ̀ ta Bôbo bè. Gidìyòn nɨ̀n læ nì iwo ateyn nɨ̀ntuʼ bòm ta wu nà n-fâyn ghelɨ isas i ndo nɨ̀ àŋena fî fâyn kɨmɨ ghelɨ ntèʼ nâ ghì.

²⁸Ɨtuʼ layn, ghelɨ ntèʼ nâ ghì ɨ yeyn kɨ ma ghɨ bɨytɨ meyn àbaŋ ifu nɨ̀ Bâl, fì mùʼ àtôʼ a Ashelà kì a kɨ nà n-ti a ngùŋ àteyn. Àŋena nɨ̀n fi meyn yeyn ta ghɨ nyòʼ ànkùmtɨ̀ a nyâm kì sɨ ifu atû àbaŋ ifu afî a ghɨ bàʼlɨ̀. ²⁹Àŋena yeyn tî, ɨ nà sɨ bɨf kɨ sɨ a àŋena ngeŋsɨ na, “À mòm ndà înkì iwo yèynì a?”

Ta àŋena se sɨ faytɨ sɨ bɨbtɨ ɨ kæ yvɨ na à mòm Gidìyòn ɨ wâyn Jòwâsh. ³⁰Ghelɨ ntèʼ nâ ghì ɨ bè sɨ̂ Jòwâsh na, “Li fvɨ gvi nɨ̀ wâyn vâ. Wu n-kfɨ-a. Wù bɨytɨ meyn àbaŋ ifu nɨ̀ Bâl ɨ̀ fì mùʼ àtôʼ a Ashelà kì a ngùŋ àteyn.”

³¹Jòwâsh ɨ bɨf sɨ̂ ghelɨ nâ ghì a ghɨ gèmtɨ̀ ŋweyn nɨ̀ ɨ̀toŋ ɨ yafɨnɨ tî na, “Ka yi n-sàʼ nsaʼ alèʼ nɨ̀ Bâl. Yi n-kɨŋ sɨ yuyn atu a Bâl ma? À tìmi nô mɨ ndà sɨ tɨm iwoŋ alèʼ nɨ̀ Bâl, a ɨtuʼ ni se sɨ layn ma ghɨ zue meyn ŋweyn. Bâl kæ nà ghɨ kɨ nô fɨyini, ghɨ bɨ̂ytɨ̀ àbaŋ ifu nɨ̀ ŋweyn, a wù tɨm iwoŋ i ŋweyn kɨ̀ sɨ a ŋweyn a ngeŋ.” ³²Ghɨ fu izɨyn sɨ̂ Gidìyòn achi nâ ghè na, Jelub-Bâl, yi bê na, “A n-tɨm kɨ Bâl iwoŋ i ŋweyn ŋêyn Gidìyòn,” a ghɨ bòm ta Gidìyòn bɨ̀ytɨ̀ abaŋ ifu nɨ̀ ŋweyn.

³³Ghelɨ Midìyàn nô ghɨ̀ jɨ̀m nɨ̀ ghelɨ Amalèk nɨ̀ ghelɨ ghɨ li abàs ghè a ɨchfɨ-iyvɨ nɨn sal ateyn ɨ tas iwoŋ ɨ dyàŋ jvâ Jodàn ɨ bɨ̀ ibal i Jezlèl. ³⁴Ayvɨs a Bôbo Fɨyini-à ɨ gvì sɨ̂ Gidìyòn, wu toŋ isoŋ ɨ jàŋtɨ̀ ghelɨ ndo nɨ̀ Abìyezà na àŋena gvi bàʼsɨ sɨ̂ ŋweyn. ³⁵Gidìyòn nɨ̀n fi meyn tum ghelɨ kɨ ɨlwêʼ ɨ̀ jɨ̀m a Mànasè ɨ bè na àŋena li ɨfwo iwòŋ ɨ̀ jùmtɨ̀ ŋweyn. Wù n-tum meyn kɨmɨ ntum sɨ̂ ghelɨ Ashà nɨ̀ ghelɨ Zebulòn nɨ̀ ghelɨ Naftalì ɨ bè na sugèyʼsɨ àŋenasɨ bôŋ gvì a ŋweyn ibàm.

³⁶Gidìyòn ɨ bè sɨ̂ Fɨyini fɨ̀ na, “Wà kæ nà ghɨ sɨ fu adyaʼ sɨ̂ mà na mà bœ̀sɨ Isìlæ̀ ta wà chfɨ̀nɨ̀ a mà keli iwo. ³⁷Mɨ n-màʼ gvɨ njɨ̀ yi kelɨ ìwî alèʼ ghè a ghɨ n-leŋ wît ateyn. Ɨtuʼ kæ layn, amyaʼa ghɨ kɨ ateyn, mɨtì nse ɨ yum a, a mà keli na wa n-fu àdyaʼ a mà bœsɨ ghelɨ Isìlæ̀ kɨ̀ ighel ta wà bè.” ³⁸Iwo ateyn i nɨ̀n gâyn meyn kɨ tî. Gidìyòn nɨ̀n lali meyn nɨ̀ bɨsi bɨsì ɨ kam gvɨ njɨ̀ nâ zɨ̀, mu fvɨ̀ ateyn ɨ luyn a kaŋ.

³⁹Gidìyòn ɨ fi bè sɨ̂ Fɨyini fɨ na, “Ka wa n-yòʼsɨ̀ ɨ̀toŋ sɨ̂ mà. Wa n-fì nî kfeynsɨ̂ kɨ ìwo ìmòʼ sɨ̂ mà: Mɨ n-fì mâʼ gvɨ njɨ̀ àteyn a nse, a ɨtuʼ se sɨ layn ma wà ni meyn nse na sayn a mɨtì gvɨ àteyn ɨ yuma.” ⁴⁰À n-læ meyn nà ghɨ nɨ̀ntuʼ achi nâ ghè, Fɨyini fɨ ni kɨ iwo zɨ̀ a Gidìyòn bɨf. Amyaʼà nɨn læ meyn saynsɨ kal nɨ̀ nse nô ì jɨ̀m, mɨtì gvɨ njɨ̀ àteyn ɨ nà bu yum kɨ tèyn.