Judges 4

Dèbolà ɨ koʼ sɨ a wûl ɨ tisɨnɨ a Isìlæ̀

¹Ehùd nɨ̀n læ kfɨ, ghelɨ Isìlæ̀ ɨ fi zɨ̀tɨ̀ sɨ ni mbɨ asɨ nɨ̀ Bôbo Fɨyini. ²Bôbo Fɨyini ɨ visi Jabìn ɨ fòyn Kenàn vzɨ̀ a wu nà n-saʼ ntèʼ Hazò, wu tɨm yɨ àŋena. Atu a sugèyʼsɨ̀ nɨ̀ fòyn Jabìn a nà n-ghɨ Siselà, chî a ntèʼ Haloshet-Hagoyìm. ³Jabìn nà n-kelɨ mɨ̀nchaʼ mɨ̀ ìwòŋ ighɨ bulamòʼ ma ghɨ faytɨ nɨ̀ àkas a. Wu n-læ meyn fu ngeʼ i kaynɨ sɨ̂ ghelɨ Isìlæ̀ sɨ a bèŋ mɨ̀vɨm ɨ̀m bò. Ghelɨ Isìlæ̀ ɨ dzɨ̀ na Bôbo Fɨyini gamtɨ àŋena.

⁴À nà n-ghɨ ɨtuʼ nâ ghè a tisɨ̂ Dèbolà tisɨ̂ ghelɨ Isìlæ̀. Dèbolà nà n-ghɨ nfèʼtɨ̀ ighaʼnɨ, lûm ŋweyn ɨ ghɨ Labidò. ⁵Wù nà n-saʼ nsaʼsɨ isas isom i li ma ghɨ sɨ toŋtɨ̂ kɨ àlêʼ ateyn na Isom i Dèbolà. Lamà ŋêyn Betèl nà n-lêm ìghami alèʼ nâ ghè ilaʼ i kfɨynsɨ a Eflèm. Ghelɨ Isìlæ̀ nà n-koʼ yeyn kɨ ŋweyn afu wu saʼ fu nsaʼsɨ àŋena. ⁶A nà ghɨ achi a li-a, Dèbolà ɨ tum jàŋ Balàk ɨ wâyn Abinwàm, ɨ wul ɨ̀ ntèʼ Kadèsh a Naftalì ɨ bè sɨ̂ ŋweyn na, “Bôbo Fɨyini, ɨ Fɨyini fɨ Isìlæ̀fɨ̀ bè na wà ndu lì ghelɨ Naftalì nɨ̀ ghelɨ Zebulòn nkamsɨ ìvɨm ɨ̀ koʼ nɨ̀ àŋena a kfɨ̂yn Tabò, ⁷na yi n-lyàtɨ̀ ni-à a Siselà ma à ti atu a sugèyʼsɨ̀ nɨ̀ Jabìn à li mɨ̀nchaʼ mɨ̀ ìwòŋ ɨ̀ lì sugèyʼsɨ ŋweyn ɨ̀ ndù nɨ̀ ɨ̀nseynsɨ a jvâ Kishòn, a yì gamtɨ a wà tɨm yɨ ŋweyn.”

⁸Balàk ɨ bè sɨ̂ ŋweyn na, “Wà kæ nà ghɨ sɨ ndu afu ghesɨ̀và amoʼ, a mà ndu, nà ghɨ wi sɨ ndù, ma bû ndù.”

⁹Dèbolà ɨ bè na, “Mɨ n-ndù kɨ nô ghesɨ̀và, mɨtì wa ghɨ wi sɨ nì sɨ fsɨ ɨkfɨm ateyn bòm dzɨ zɨ̀ a wà n-nî iwo nâ yèynì ateyn. Bôbo Fɨyini nɨn fu Siselà awu nɨ̀ wùl ɨ wi.” Dèbolà ɨ taŋi tì ɨ kæ sɨ lù sɨ ndù a ntèʼ Kedèsh ŋêyn Balàk. ¹⁰Àŋena ndu chem afu, Balàk ɨ bè ghelɨ Zebulòn nɨ̀ ghelɨ Naftalì ɨ fvɨ̀ a ŋweyn ibàm nkamsɨ ìvɨm. Dèbolà ɨ boŋ ndù ŋêyn àŋena.

¹¹A nà n-ghɨ ɨtuʼ nâ ghè, ma Hebà ɨ wul ɨ̀ Kên fvɨsɨ meyn ngêŋ ŋweyn sɨ antêynɨ̀ nɨ̀ ghelɨ Kên ghɨ li ɨ̀ ndù bàʼlɨ̀ ɨ̀two ŋweyn a ngùŋ fɨ̀kàʼ fɨ ôk a Zananìm baʼsɨ̂ ndû a Kedèsh. Ghelɨ Kên nâ ghèyn nà n-ghɨ woyn ndo nɨ̀ bò wi nɨ̀ Mosìs. ¹²A nà ghɨ ta ghɨ fèʼtɨ̀ sɨ̂ Siselà na Balàk ɨ wâyn Abinwàm koʼ meyn a kfɨyn Tabò, ¹³wu yvɨ̀ŋtɨ̀ sugèyʼsɨ ŋweyn nô sɨ̀ jɨ̀m nɨ̀ mɨ̀nchaʼ mɨ̀ ìwòŋ ighɨ bulamòʼ a Haloshet-Hagoyìm ɨ li ndù nɨ̀ àŋena a Jvâ Kishòn.

¹⁴Àŋena nɨ̂n ndù tî, Dèbolà ɨ kæ bè sɨ̂ Balàk na, “Ndù-a! Bôbo Fɨyini fu meyn Siselà a wa awu layn. Ba à n-ndû Bôbo Fɨyini ndû a wa asɨ ti?” Balàk ɨ lù a kfɨ̂yn Tabò ɨ nà kalì-à, sugèyʼsɨ ŋweyn sìsɨ̀ nkamsɨ ìvɨm ɨ kalì a ŋweyn ibàm. ¹⁵Balàk ɨ ndù ɨ se sɨ nù, Bôbo Fɨyini ɨ nì ifâyn ikaynɨ-i ɨ ku Siselà ŋêyn sugèyʼsɨ ŋweynsɨ nô sɨ̀ jɨ̀m baʼsɨ̂ nɨ̀ ɨsîsɨ̀ a sɨ nà n-nû nɨ̀ mɨ̀nchaʼ mɨ̀ ìwoŋ. Siselà ɨ chaʼ suʼi sɨ a fɨnchaʼ fɨ ìwoŋ afî a wù nà n-ghɨ atû àteyn ɨ nà sɨ nyɨŋa. ¹⁶Mɨtì Balàk ŋêyn sugèyʼsɨ ŋweynsɨ nyɨŋ ibàm i mɨnchaʼ nɨ̀ ghelɨ Siselà nâ ghì ɨ ndu chem a Haloshet-Hagoyìm ɨ zuetɨ àŋena nô ghɨ̀ jɨ̀m ɨ faŋ tɨ visi nô wul ɨ̀mòʼ.

¹⁷À nà n-ghɨ tì ma Siselà nyɨŋ meyn ndù zɨ ɨtwò nɨ̀ Jayèl ɨ wî Hebà, a ghɨ wul ɨ̀ Kên. Wu n-læ ndu zɨ ɨtwò nâ ghè bòm ta ghelɨ Hebà ɨ wul ɨ̀ Kên nà n-ghɨ nɨ̀ ɨ̀suyn ŋêyn Jabìn ɨ fòyn Hazò.

¹⁸A nà ghɨ ta Siselà nyɨŋ ndù chem, Jayèl ɨ fvɨ̀ ɨ ndù ɨchfɨ ɨtwò ɨ bè sɨ̂ ŋweyn na, “Zɨ gvi a bô, ka n-fàyn ìwo.” Wu zɨ ɨ nyɨ̀ŋì, wu chɨytɨ ŋweyn nɨ̀ ndzɨsɨ.

¹⁹Siselà nɨ̀n nyìŋi tî ɨ kæ bè sɨ̂ Jayèl na, “Ɨtoŋ mu nɨn yumî mà, fu ma nɨ̀ mu mà nyvɨ.” Jayèl ɨ choʼ nsàl gvɨ nyàm a ghɨ ìgheyn i nyâm ateyn ɨ bòtɨ̀ ɨ fu ili, wu nyvɨ. Jayèl ɨ kasi chɨytɨ ŋweyn.

²⁰Siselà ɨ bè sɨ̂ ŋweyn na, “Timi kɨ ɨchfɨ ɨtwò. Wùl kæ gvì ɨ̀ bɨ̀f sɨ̂ và na wùl nɨn ghɨ a ndo a, wa tuynsɨ.”

²¹Mɨtì Jayèl, ɨ wî Hebà ɨ lì fɨ̀choʼ ɨ lì ànkùm ɨ nyaʼtɨ jèl ɨ ndù Siselà ɨ buni-à ma wù bolɨ meyn nô sɨ a ŋaŋ, ɨ bayn fɨ̀choʼ fɨ ateyn a ŋweyn a buʼbuʼ àtu, fɨ chwò ɨ zɨ a nse, wu kfɨ.

²²Kɨ̀ têyn Balàk ɨ kɨŋ gvî nɨ̀ Siselà, Jayèl ɨ fvɨ ndu kòynɨ̀ nɨ̀ ŋweyn ɨ bè sɨ̂ ŋweyn na, “Gvi mà dyeyn wùl vzɨ̀ a wà n-kɨŋ. Ŋêyn Balàk ɨ zɨ ɨ yeyn Siselà wu nyɨŋa, nɨ̀ fɨ̀choʼ fìfɨ̀ a ŋweyn a buʼbuʼ ta fɨ chwò ɨ̀ zɨ̀ a nse, wù kfɨ.”

²³À ti achi kì a Fɨyini fɨ nɨn læ nì ghelɨ Isìlæ̀ ɨ tɨm yɨ Jabìn ɨ fòyn Kenàn ateyn. ²⁴Ghelɨ Isìlæ̀ nɨ̀n læ nà nû Jabìn ɨ fòyn Kenàn, adyaʼ a àŋena ɨ lemâ ndû kɨ asɨ. A nà ghɨ a ngòʼsɨ, àŋena zue ŋweyn.