Judges 3

Ghelɨ tɨlaʼ ghì a ghɨ n-læ faŋ a Kenàn

¹Ɨghêyn nɨn ghɨ ghelɨ tɨlaʼ ghì a Bôbo nɨn læ visi a Kenàn. Wu n-læ visi àŋena sɨ mom ghelɨ Isìlæ ghì a ghɨ nà n-ghɨ bula ghɨ timî tɨ̀m iwoŋ a Kenàn. ²Bôbo nɨn læ nì têyn ta ka ajâŋ a Isìlæ̀ kì a kɨ nà n-bu duʼ tɨ̀ tɨm iwoŋ yeʼi sɨ tɨm. ³Ghelɨ tɨ̂laʼ ghì a Bôbo nɨn læ visi antêynɨ̀ nɨ̀ ghelɨ Isìlæ̀ nà n-ghɨ ghelɨ ghì a ghelɨ ghɨ tisɨnɨ nà n-saʼ a Fìlisìyà ghɨ̀ tâyn. Wù n-læ meyn visi kɨmɨ ghelɨ ghì nô ghɨ̀ jɨ̀m a ghɨ nà n-ghɨ a Kenàn. Wù n-visi meyn kɨmɨ ghelɨ Sidòn nɨ̀ ghelɨ Hîv ghì a ghɨ nà n-ghɨ a Lebanòn, ilaʼ i kfɨynsɨ, kɨ̀ sɨ zɨ̀tɨ̀ a kfɨ̂yn Bal Hemòn sɨ ndù sɨ chem ɨchfɨ ntèʼ Lebo Hamàt. ⁴Bôbo nɨn læ visi ghelɨ tɨlaʼ nâ ghì sɨ mom ghelɨ Isìlæ̀ sɨ yeyn na àŋena na bu yvɨnɨ̂ tɨ̀saʼ tìtɨ̀ a wu n-læ fu sɨ̂ ghɨ̀bo àŋena toynɨ̂ a Mosìs a.

⁵Ghelɨ Isìlæ̀ ɨ nà sɨ chi koʼ kɨ tì ŋêyn ghelɨ Kenàn, nɨ̀ ghelɨ Hêt, nɨ̀ ghelɨ Amò, nɨ̀ ghelɨ Belìz, nɨ̀ ghelɨ Jebùs. ⁶Àŋena nà n-chî tì, lî woyn ghêl nâ ghì sɨ a ghɨ̂kì, boŋ fu woyn àŋena sɨ a ghɨ̂kì sɨ̂ ghelɨ nâ ghì, fî koʼsɨ̂ mɨyini mɨ̀ àŋena.

Onyèl ɨ koʼ sɨ a wûl ɨ tisɨnɨ a Isìlæ̀

⁷Ghelɨ Isìlæ̀ nɨn læ meyn nì mbɨ asɨ nɨ̀ Bôbo Fɨyini, ɨ visi ŋweyn ɨ nà sɨ kwo koʼsɨ̂ kɨ Bâl nɨ̀ Ashelà. ⁸Ɨtoŋ Bôbo Fɨyini ɨ yaf sɨ̂ ghelɨ Isìlæ̀ nô sɨ a ŋaŋ, wu visi fòyn Kushan-Lìsàtayìm vzɨ̀ a wù nà n-saʼ ìlaʼ i Alam Naʼalìm, wu tɨm yɨ àŋena. Ghelɨ Isìlæ̀ ɨ faŋ nà sɨ chî kɨ isas isaʼ nɨ̀ ŋweyn sɨ a bèŋsɨ̀ nfama. ⁹Ghelɨ Isìlæ̀ ɨ læ dzɨ̀ sɨ̂ Bôbo Fɨyini, wu tum Onyèl na wù gamtɨ àŋena. Onyèl nâ wèyn nà n-ghɨ wâyn Kenàz. Kenàz ɨ ghɨ wâynà Kalèb ɨtwelâ. ¹⁰Ayvɨs a Bôbo Fɨyini a ɨ fu adyaʼ sɨ̂ Onyèl wu nà sɨ tisɨ̂ ghelɨ Isìlæ̀, lî seʼ nɨ̀ àŋena ɨtwaʼ iwòŋ. Bôbo Fɨyini nɨ̀n læ meyn fu adyaʼ wu tɨm yɨ Kushan-Lìsàtayìm, ɨ fòyn ìlaʼ i Alàm. ¹¹À ti iwo zɨ̀ a yi n-læ gàyn ghelɨ Isìlæ̀ ɨ faŋ tɨ̀ fì tɨ̀ tɨm iwoŋ, ɨ yvɨ̀tɨ̀ sɨ a bèŋ mɨ̀vɨm ɨ̀n kæ̀ sɨ koʼ sɨ chem ta ka Onyèl ɨ wâyn Kenàz kfɨ.

Ehùd ɨ koʼ sɨ a wûl ɨ tisɨnɨ a Isìlæ̀

¹²Ghelɨ Isìlæ̀ nɨn læ meyn fi nì mbɨ asɨ nɨ̀ Bôbo Fɨyini, wu visi Eglòn ɨ fòyn ìlaʼ i Mowàb ɨ tɨm yɨ àŋena. ¹³Ghelɨ Eglòn ŋêyn ghelɨ Amòn nɨ̀ ghelɨ Amalèk ɨ tas iwoŋ ɨ ndu nù ghelɨ Isìlæ̀ ɨ tɨm yɨ Jèlikò ɨ ntèʼ zɨ̀ a asom a nà n-koʼ ateyn. ¹⁴Ghelɨ Isìlæ̀ nɨ̀n læ meyn chi bèŋ njvàsɨ̀ nfama isas isaʼ nɨ̀ Eglòn ɨ fòyn Mowàb.

¹⁵A nà ghɨ ta ghelɨ Isìlæ̀ fì dzɨ̀ sɨ̂ Bôbo Fɨyini, wu tum Ehùd na wù gamtɨ àŋena. Ehùd nâ wèyn nà n-ghɨ nɨ̀nkœ̀ a ghɨ wâyn Gelà ɨ wul ɨ̀ Benjamìn. Ghelɨ Isìlæ̀ ɨ tum ŋweyn na wù ndu fu ifu i àŋena sɨ̂ Eglòn ɨ fòyn Mowàb. ¹⁶A nà n-ghɨ tì ma Ehùd tsɨ meyn ìfô i ngvèleŋ yi fêʼnɨ̀ dyêf kɨ tèyn ɨ̀ kul ichɨ ibɨ̀ nɨ̀ ŋweyn antêynɨ̀ ndzɨsɨ ɨkœ ɨ two. ¹⁷Eglòn ɨ fòyn Mowàb nà n-ghɨ wul kûylɨ̀-à; Ehùd ɨ ndu fu ifu i ghelɨ Isìlæ̀ zɨ̀ sɨ̂ ŋweyn, ¹⁸ɨ bè sɨ̂ ghelɨ ghì a ghɨ nì bèʼì ifu ateyn na ŋêyn àŋena na kfâ. ¹⁹Àŋena jèl ɨ ndu baʼsɨ a Gilgàl, a afàf a mɨyini mɨ̀ ngòʼsɨ̀, Ehùd ɨ kæ kasi sɨ ndù sɨ be sɨ̂ Eglòn na, “Mbæ̀, mɨ n-kelɨ ìwo sɨ nyaʼtɨ sɨ be sɨ̂ và.”

Fòyn ɨ bè sɨ̂ nchìsɨ ŋweynsɨ na sɨ fvɨ ndù abe. Àŋena fvɨ̀.

²⁰Ehùd ɨ kɨŋtɨ ndù a ngùŋ nɨ̀ ŋweyn, a ghɨ tì ma wù sɨ duʼ kɨ nìnyɨŋ a lûm ndo ì lì a ntoʼ dzɨ a iyvɨ ɨ bè sɨ̂ ŋweyn na, “Fɨyini fɨ tum meyn mà sɨ̂ và.” Fòyn ɨ làlì ɨ timi iyvɨ. ²¹Ehùd ɨ choʼ ifô zɨ̀ a wù nì kùl ichi ibɨ̀ tî nɨ̀nkœ̀, ɨ chuʼ fòyn kɨ̀ ɨlvà. ²²Ifô ateyn i ɨ zɨ mèsi kɨ mesi baʼsɨ̂ kɨ nɨ̀ àsoŋi ateyn a ɨ fi chwò ɨ fvɨ̀ nô a ŋweyn a jɨm. Ifô ateyn i nɨ̀n læ zɨ tî iso i tsɨytɨ kɨ tsɨytɨ asoŋi ateyn, mɨ̀tû mɨ̀ ŋweyn ɨ fvɨ̀. Ehùd ɨ visi ndu kɨ nɨ̀ ifô ateyn i a ŋweyn ɨlvà, ²³ɨ fvɨ̀ dzɨ a ajeŋ ghè a kɨ nà n-ghɨ ibàm i ndo ɨ fò ndo atu nɨ̀ fòyn Eglòn ɨ leʼ.

²⁴A nà ghɨ ta Ehùd fvɨ̀ leʼ lù, nchìsɨ ntoʼ sìsɨ̀ ɨ kasi gvì ɨ yeyn ma ghɨ fo meyn àchfɨ̂ a ndo nâ kì iyvɨ. Àŋena nà sɨ kfâʼ kɨ na, à kàʼ a na ghɨ ma fòyn ndu meyn ikfɨ̀l. ²⁵Nchìsɨ ntoʼ sìsɨ̀ ɨ lam chwòsɨ̀, iwo ateyn i ɨ nà sɨ bem ghaʼ àŋena, àŋena lì ànchoʼ ɨ choʼ ɨchfɨ ndo ɨ yeyn fòyn wu nyɨŋ a kî ndo ma wù kfɨ meyn.

²⁶À nà n-ghɨ ta àŋena nɨn chîtɨ̀ na fòyn choʼ ɨchfɨ ndo, Ehùd ɨ leʼ ndu kɨ ndû ɨ ndu chwò afàf a mɨyini mɨ̀ ngòʼsɨ̀ afî ɨ zɨ a ntèʼ Seylà. ²⁷Wu n-zɨ afu tì ɨ ndu toŋ isoŋ ilaʼ i kfɨynsɨ a Eflèm, ghelɨ Isìlæ̀ ɨ yvɨ̀ŋtɨ gvì ŋêyn àŋena lù sɨ afu ɨ nà sɨ ndu-à, wu tisɨ̂ ndû nɨ̀ àŋena.

²⁸Ehùd ɨ kæ bè sɨ̂ ghelɨ Isìlæ̀ na, “Yì na gvî kɨ a ma ibàm, Bôbo fu meyn mbàynɨ̀ sisɨ ɨ ghelɨ Mowàb a yi awu.” Àŋena jùmtɨ̀ ŋweyn ŋêyn àŋena kàlì ɨ ndu timi alèʼ a jvâ Jodàn ghè a ghɨ nà n-dyâŋ ateyn nɨ̀ ɨ̀vɨ ndû a Mowàb. Àŋena nɨn tìmi tî ɨ nà visî wì na wùl ɨ̀ Mowàb fî dyàŋ. ²⁹Àŋena nɨn læ meyn zuetɨ ghelɨ Mowàb achi nâ ghè nkamsɨ ìvɨm, a ghɨ nô sugèyʼsɨ bemnɨsɨ. Nô wùl ɨ̀ mòʼ nɨn bu læ faŋ antêynɨ̀ nɨ̀ àŋena. ³⁰Sɨ zɨ̀tɨ̀ kɨ achi nâ ghè, ghelɨ Mowàb ɨ nà sɨ chî kɨ isas isaʼ nɨ̀ ghelɨ Isìlæ̀. Ghelɨ Isìlæ̀ ɨ keli mbôynɨ̀ sɨ a bèŋsɨ̀ mɨ̀vɨ̂m nfama.

Shamgà ɨ koʼsɨ sɨ a wûl ɨ tisɨnɨ a Isìlæ̀

³¹Wùl ɨ̀ vzɨ̀ a wu n-læ koʼ sɨ a wûl ɨ tisɨnɨ ibàm nɨ̀ Ehùd nà n-ghɨ Shamgà ɨ wâyn Anàt. Wu n-læ meyn zuetɨ ghelɨ Fìlisìyà ighɨ ntufa kɨ nɨ̀ nkuna ɨ boŋ fsɨ ghelɨ Isìlæ̀ sɨ a àŋena ɨwu.