Joshua 6

¹Ghelɨ Jèlikò nɨ̀n fo meyn ɨ̀chfɨ mbàyn nɨ̀ àŋena ɨ nà chi-à, wùl ɨ zɨ̂ wì, fvɨ̂ wì bòm ta àŋena nà n-fayn ghelɨ Isìlæ̀.

²Bôbo ɨ bè sɨ̂ Joshwà na, “Mɨ nì-à a wà tɨm yɨ ntèʼ Jèlikò nɨ̀ fòyn àŋena baʼsɨ̂ nɨ̀ ghelɨ iwòŋ ghɨ to nɨ̀ àŋena nô ghɨ̀ jɨ̀m. ³À na ghɨ mɨ achi à kà, zɨ̂ ghelɨ iwoŋ nɨ̀ và ɨ jèlɨ jɨŋ kali ntèʼ nâ yèyn ìngal ìmòʼ. Yi n-kelɨ sɨ jèl sɨ kal ntèʼ nâ yèyn sɨ a mɨ̂chi ntufa yaʼî wì achi. ⁴Yi se sɨ jèl, ngàŋsɨ ndô Fɨyinisɨ̀ nsòmbo ɨ lì tɨ̀soŋ ma ghɨ faytɨ nɨ̀ ndoŋsɨ ayaʼsɨ ɨ nà toŋ ndû asɨ nɨ̀ ghelɨ ghì a ghɨ bèʼi àntayntayn a mɨ̂kàyn nɨ̀ Bôbo. Yi jêl, à na ghɨ a mɨchi nsòmbo, yi jèl ɨ kal ìngal nsòmbo ngàŋsɨ ndô Fɨyini sìsɨ toŋ ndû nɨ̀ tɨ̀soŋ tìtɨ̀. ⁵Yi nî yvɨ̀ nô mɨ ɨlvɨ gha ta àŋena tòŋ tɨsoŋ ɨ̀ lòtɨ̀, yi byal nô sɨ a ŋaŋ a ka mbàyn àteyn fe. Yì fe nô mɨ ɨlvɨ gha, ghelɨ Isìlæ̀ nô ghɨ̀ jɨ̀m ɨ zɨ ndu kɨ ndu a ntèʼ nâ ghè.”

⁶Joshwà ɨ wâyn Nûn ɨ jàŋtɨ̀ ngàŋsɨ ndô Fɨyini ɨ bè sɨ̂ àŋena na, “Yì beʼi àntayntayn a mɨ̂kàyn nɨ̀ Bôbo, ngàŋ sɨ lisɨ nsòmbo li tɨsoŋ ɨ̀ nà toŋ ndû asɨ.” ⁷Wu n-tàŋi tî ɨ bè sɨ̂ ghelɨ iwòŋ nɨ̀ ghelɨ Isìlæ̀ na, “Yì lali ɨ̀ jèl jɨ̀ŋ kàli ntèʼ Jèlikò. Yi se sɨ jèl, ghelɨ ghì a ghɨ n-kelɨ ɨfwo iwòŋ ɨ nà ndû asɨ àntayntayn a mɨ̂kàyn nɨ̀ Bôbo.”

⁸À nà n-ghɨ ta Joshwà tàŋi mèsi, ngàŋsɨ ndo Fɨyini sisɨ̀ nsòmbo ɨ nà ndû asɨ àntayntayn a mɨ̂kàyn nɨ̀ Bôbo toŋ ndû nɨ̀ tɨ̀soŋtɨ. ⁹Ghelɨ ghì a ghɨ n-kelɨ ɨfwo iwòŋ nà n-ndû asɨ nɨ̀ ngàŋsɨ ndô Fɨyini sìsɨ a sɨ na n-toŋ tɨsoŋ tî, ghelɨ iwòŋ ghɨli ɨ gvî ibàm antayntayn a mɨ̂kàyn nɨ̀ Bôbo, ngàŋ sîsɨ̀ ɨ toŋ ndû nɨ̀ tɨ̀soŋtɨ kɨ̀ sɨ ayùŋ sɨ ayùŋ. ¹⁰Joshwà nà n-ghɨ ma wù n-kayn meyn sɨ̂ ghelɨ Isìlæ̀ na, “Ka yi n-byal, ka wùl nɨ̂n yvɨ̀ gya sisɨ. Ka wùl sɨ̂ zɨ̀ nɨ̂n bè ìwo nô sɨ chem achi ghè a ka mà be na yì byal a yì kæ sɨ byal.” ¹¹Ghelɨ ghì a ghɨ n-bèʼi àntayntayn a mɨ̂kàyn nɨ̀ Bôbo nô nɨ̀ ghelɨ Isìlæ̀ ghɨ̀ jɨ̀m ɨ jèl ɨ̀ jɨŋ kali ntèʼ àteyn ìngal ìmòʼ ɨ kasi ndù ɨ chi alèʼ ghè a àŋena nɨn bɨ̀ ateyn.

¹²Ɨtuʼ nà bɨs layn gvî kɨ tèyn, Joshwà ɨ bè ngàŋsɨ ndô Fɨyinisɨ̀ ɨ bèʼì àntayntayn a mɨ̂kàyn nɨ̀ Bôbo. ¹³Ngàŋsɨ ndô Fɨyini sìsɨ̀ nsòmbo a sɨ nà n-kelɨ tɨ̀soŋ tìtɨ nà n-jêl ndû asɨ nɨ ɨsîsɨ̀ a sɨ n-bèʼi àntayntayn a mɨ̂kàyn nɨ̀ Bôbo, toŋ ndû nɨ̀ tɨ̀soŋtɨ kɨ̀ sɨ ayùŋ sɨ ayùŋ. ¹⁴A nà ghɨ a ànkùmtɨ achi àŋena jèl ɨ jɨŋ kali ntèʼ àteyn ìngal ìmòʼ ɨ kasi kfa ɨ nà jelɨ̀ jɨ̂ŋ kalî kɨ tèyn sɨ a mɨ̂chi ntufa.

¹⁵A nà sɨ ghɨ a mɨ̂chi nsòmbo àŋena bɨs ɨ làlì ɨ fi jèl ɨ jɨŋ kali ntèʼ àteyn kɨ̀ ta ghɨ nà n-jelɨ̀ kalɨ, ìngal nsòmbo. Iwo zɨ̀-ì a àŋena nɨn nì sɨ a ninyɨŋ nà n-ghɨ na ghɨ n-jɨŋ kal ntèʼ àteyn ìngal nsòmbo. ¹⁶Àŋena nɨn jel ɨ jɨŋ kali ìngal nsòmbo, ngàŋsɨ ndô Fɨyini sɨ toŋ tɨ̀soŋ tɨ àŋena nô sɨ a ŋaŋ, Joshwà ɨ bè sɨ̂ sugèyʼsɨ̀ na, “Ghesɨna byal nô sɨ a ŋaŋ, bòm ta Bôbo Fɨyini fu meyn ntèʼ yèyn sɨ̂ ghesɨna. ¹⁷Yi n-kelɨ sɨ bebsɨ ntèʼ nâ yèyn nô mɨ nɨ̀ ghà vzɨ̂ a kɨ n-ghɨ ateyn sɨ dyèyn na à n-kelɨ Bôbo Fɨyini kelɨ ɨfwo ɨ̀ jɨ̀m nɨ̀ nyamsɨ baʼsɨ̂ nɨ̀ ghelɨ. Yì visi kɨ̀ Lahàb nɨ̀ ghelɨ ndo nɨ̀ ŋweyn bòm ta wù ti meyn lèytɨ̀ gvè sìsɨ̀ a ghesɨ̀nà tî tum a Jèlikò. ¹⁸Mɨtì ka wùl sɨ̂ zɨ̀ nɨn kùm àfo a Bôbo Fɨyini a ntèʼ nâ ghàyn. Wùl kæ sɨ mòm a wù gvi nɨ̀ ndòyn atu nɨ̀ ghelɨ Isìlæ̀ a Fɨyini fɨ̀ bebsɨ àŋena. ¹⁹Aso ɨkwo a fɨfâ nô à jɨ̀m nɨ̀ a baŋnɨ-a nɨ̀ ɨ̀fwo vzɨ̀ a ghɨ fàytɨ nɨ̀ ìdyayn i nɨ ɨvzɨ̂ a ghɨ fàytɨ nɨ̀ àkasa nɨn ghɨ yi kelɨ sɨ faytɨ sɨ lem sɨ̂ Bôbo Fɨyini alèʼ ghè a ghɨ n-lem ɨfwo ŋweyn ateyn.”

²⁰A nà ghɨ ta ghɨ tòŋ tɨsoŋ, àŋena yvɨ ɨ byal nô nɨ̀ gyà i to nô mɨ ɨlvɨ gha mbàyn Jèlikò ɨ fe, sugèyʼsɨ Isìlæ̀ sɨ nyɨŋ koʼ ɨ zɨ a ntèʼ afu ɨ tɨm yɨ ntèʼ àteyn. ²¹Àŋena nɨn zuetɨ meyn nô mɨ ghà a ntèʼ afu nɨ̀ mɨ̀nyuè. Àŋena nɨn zuètɨ ghɨ̀lûmnɨ̀ nɨ̀ ghɨ̀ki nɨ̀ woynda nɨ̀ ghɨ̀ lema, baʼsɨ̂ nô mɨ nɨ̀ gha ɨ̂lvɨ̀ ta kɨ n-kelɨ azuê ta nyamsɨ mbòloʼ nɨ̀ njɨ̀sɨ̀ nɨ̀ njàkâysɨ̀.

²²Joshwà nà n-ghɨ ma wù be meyn sɨ̂ gvè sìsɨ̀ sɨ̀ bò a àŋena nɨn læ ndu nyaʼtɨ ki ntèʼ Jèlikò na, “Yì ndu a ndo nɨ̀ Lahàb ɨ̀ lì fvɨ̀ nɨ̀ ŋweyn nɨ̀ ghelɨ ndo nɨ̀ ŋweyn nô ghɨ̀ jɨ̀m kɨ̀ ta yi n-læ chfɨ̀nɨ sɨ̂ ŋweyn.” ²³Gvè sìsɨ̀ ɨ ndù li fvɨ̀ nɨ̀ Lahàb nɨ̀ bò ŋweyn nɨ̀ nà ŋweyn nɨ̀ woynà ŋweyn nɨ̀ ghelɨ ŋweyn nô ghɨ̀ jɨ̀m. Ghɨ n-li àŋena tî ɨ fvɨ ndu lèm ɨ baʼsɨ alèʼ ghè a ghelɨ Isìlæ̀ nɨn bɨ̀ ateyn.

²⁴Sugèyʼsɨ Isìlæ̀ sɨ nyòʼ ntèʼ àteyn baʼsɨ̂ nô mɨ nɨ̀ ghà vzɨ̂ a kɨ nà n-ghɨ ateyn ɨ visi kɨ aso ɨkwo a fɨfâ nɨ̀ a baŋnɨ-a nɨ̀ ɨ̀fwo vzɨ̀ a ghɨ fàytɨ nɨ̀ ìdyayn i nɨ ɨvzɨ̂ a ghɨ fàytɨ nɨ̀ àkasa. Ghɨ n-vìsi tî ɨ lì ɨ lèm alèʼ ghè a ghɨ n-lêm ɨfwo Bôbo ateyn. ²⁵Mɨtì Joshwà ɨ nì ghɨ faŋ tɨ̀ zue Lahàb nɨ̀ ghelɨ ŋweyn nô ghɨ̀ jɨ̀m. Ghɨ n-faŋ tɨ̀ zue ŋweyn bòm ta wu n-lèytɨ gvè sìsɨ̀ a Joshwà nɨn tum a Jèlikò. Lahàb ŋêyn ghelɨ ŋweyn ɨ nà sɨ chî kɨ a Isìlæ̀ sɨ koʼ sɨ chem layn.

²⁶A nà n-ghɨ ta ghɨ bèbsɨ ntèʼ Jèlikò, Joshwà ɨ fu nfàsì-fàsì na, “Ndòyn Bôbo Fɨyini nɨn ghɨ nô mɨ atu nɨ̀ ndà vzɨ̂ a wù zɨ̀tɨ̀ sɨ kasi sɨ bàʼlɨ ntèʼ Jèlikò.”

“Wù we achɨ ateyn nô mɨ ɨlvɨ gha,

a wâyn lûmnɨ ɨ wu asɨ nɨ̀ ŋweyn kfɨ,

ɨ̀ we àchfɨ̂ a mbàyn, a wâyn lûmnɨ̀ nɨ̀ ŋweyn ɨtwelâ kfɨ.”

²⁷Bôbo Fɨyini ɨ gàmtɨ̀ Joshwà, nô mɨ ndà Kenàn ɨ keli na Joshwà nɨ̀n ghɨ kɨ nô wul ɨ̀ngaŋtɨnɨ.