Joshua 7

Akàn ɨ nì mbɨ

¹Ghelɨ Isìlæ̀ nɨn bu læ yvɨnɨ Bôbo Fɨyini sɨ bebsɨ ɨfwo ɨ̀ jɨ̀m a Jèlikò ta Bôbo bè. Akàn ɨ wul ɨ̀ Judà nɨ̀n li meyn ɨ̀fwo ɨlvi vzɨ̀ a àŋena nà n-kelɨ sɨ bebsɨ, iwo ateyn i ɨ nì ɨtoŋ Bôbo nà yaf sɨ̂ ghelɨ Isìlæ̀ nô sɨ a ŋaŋ. Bò Akàn nâ wèyn nà n-ghɨ Kamì, bò Kamì ɨ ghɨ Zabdì, bò Zabdì ɨ ghɨ Zelà ɨ wul ɨ̀ Judà.

²Joshwà ɨ tum ghelɨ Isìlæ̀ na ghɨ ndu a ntèʼ Ây. Ntèʼ nâ yèyn nà n-baʼsɨ̂ sɨ̂ ntèʼ Bet-Avèn abàs ghè a ɨchfɨ-iyvɨ nɨn sal ateyn a Betèl. Wu n-bè na ghelɨ nâ ghèyn ndu nyàʼtɨ ki kal nɨ̀ ntèʼ Ây. Ghelɨ ateyn ɨ ndu ɨ ki ntèʼ àteyn.

³Àŋena ndu kasi gvì ɨ bè sɨ̂ Joshwà na, “Ghelɨ iwòŋ ghɨ̀ jɨ̀m nɨn kelɨ wi sɨ ndù a ntèʼ Ây. Yi n-jofɨ̀ na wà tsɨynsɨ kɨ̀ ghelɨ afu nkam sɨ̀ bò kèsa nkam sɨ̀ tal. Ka wa n-vìsi ghelɨ ghɨ̀ jɨ̀m yeyn ngeʼ ɨ̀ ndù a ntèʼ nâ ghè sɨ a lû bòm ta ghelɨ nɨn dvɨ̂ wì afu.” ⁴Joshwà ɨ kæ tum ghelɨ a ntèʼ Ây ghɨ koʼ ndû nkam sɨ̀ tal mɨtì ghelɨ Ây ɨ ndu tɨm yɨ àŋena. ⁵Ghelɨ ntèʼ Ây nɨn zuetɨ meyn ghelɨ Isìlæ̀ ghɨ koʼ ndû mɨ̀vɨm ɨ̀n tal njvàsɨ̀ ntufa ɨ fi nyɨŋ ibàm nɨ ghɨli kɨ̀ sɨ zɨ̀tɨ̀ ɨchfɨ mbàyn sɨ ndù sɨ chem alèʼ a ngòʼsɨ̀ a li-a ɨ tsɨyn kàysɨ̀ nɨ̀ àŋena a bo. Ghelɨ Isìlæ̀ ɨ nà fâyn nô sɨ a ŋaŋ.

⁶Ghelɨ Isìlæ̀ nɨn kasi kfa ɨ fèʼtɨ̀ iwo zɨ̀-ì a yi gàyn sɨ̂ Joshwà, ŋêyn chyeʼsɨ ŋweynsɨ ɨ bàytɨ̀ ndzɨsɨ ɨ fuʼ abɨ̂l a àŋena ɨtu ɨ fe àkfɨ̀ akfɨ a nse asɨ antayntayn a mɨ̂kàyn nɨ̀ Bôbo ɨ faŋ kɨ afu nô ta ka ɨtuʼ nî jɨ. ⁷Joshwà ɨ nà jemà bê na, “Bôbo Fɨyini fɨ ngaŋtɨnɨ fɨ, bòm ghà ta wà tî nì na ghèsɨ̀ dyaŋ jvâ Jodàn a? A ti bè na wà tî nà kɨŋ na ghèsɨ dyaŋ ta ka ghelɨ Amò tɨm yɨ̀ ghes ɨ̀ fì bèbsɨ ghes a? Yi ti nà jofɨ kɨ̀ na ghesɨ kwo faŋ kɨ injɨyn i jvà Jodàn izɨ-i. ⁸Mà ti kàʼ ma fi bè na gha a Bôbo ma mbàynɨ̀sɨ ghelɨ Isìlæ̀sɨ to meyn chwò àŋena? ⁹Ghelɨ Kenàn nɨ̀ ghelɨ ghì a ghɨ n-chi baʼsɨ sɨ̂ ghès nɨn yvɨ ìwo nâ yèynì ɨ̀ gvì nù zuètɨ ghès nô ghɨ̀ jɨ̀m a wùl læ̂ nà bu fì kya wi nô ìwo kûm ghes. Yi gàyn têyn a à na ghɨ ìwumi sɨ̂ và.”

¹⁰Mɨ̀tì Bôbo Fɨyini ɨ bè sɨ̂ Joshwà na, “Làli wà n-kelɨ wi sɨ na nyɨŋ a nse a dzɨ ghâyn. ¹¹Ghelɨ Isìlæ̀ ni meyn mbɨ. Àŋena bû lèm mɨ̀kâyn mzɨ̀ a mà tî yɨ̀ ghesɨ̀ àŋena. Àŋena li meyn ɨ̀fwo ɨlvi a Jèlikò ma ma ti meyn bè na ka wùl nɨ̂n kùm. Àŋena choŋ meyn ɨ̀fwo ateyn ɨ̀ lèytɨ̀ antêynɨ̀ ɨ̀fwo nɨ̀ àŋena nà wam sɨ̂ ma. ¹²À ti iwo zɨ̀-ì a ghelɨ Isìlæ̀ kàʼ ghɨ bû tɨm yɨ mbàynɨ̀ sɨ àŋenasɨ. Àŋena na seʼ mɨ ìwoŋ ì kà mbàynɨ̀ sɨ àŋenasɨ tɨm yɨ kɨ yɨ àŋena bòm mbɨ nâ yèyn. Mà na bu fì tôʼnɨ̀ wì nɨ̀ zɨ̀ a bu kɨ na yi bebsɨ meyn ɨ̀fwo vzɨ̀ a mà tî bè na yì bebsɨ.”

¹³“Ndu bè na ghelɨ ateyn su làynsɨ ngeŋsɨ àŋena nà gvɨ̂tɨ̀ sɨ yeyn ma a libɨs. Bè sɨ̂ àŋena na, ma ɨ Bôbo Fɨyini fɨ Isìlæ̀ bè na yi leytɨ meyn ɨ̀fwo alèʼ ghè a yi n-chi ateyn a ghɨ ɨ̀fwo wom. Yì kàʼ yi bu tɨm yɨ mbàynɨ̀ sisɨ a bu kɨ na yi bebsɨ meyn ɨ̀fwo ateyn.”

¹⁴“À læ nà ghɨ a libɨs, yi gvì asɨ nɨ̀ Bôbo Fɨyini kɨ̀ a tɨ̂laʼ a tɨ̂laʼ. Bôbo kæ sɨ choʼ mɨ ìlaʼ ì kà yi nà kya na wùl vzɨ̀ a wù mòm iwo nâ yèynì nɨn ghɨ ateyn. Yi gâyn tì, ghelɨ ilaʼ nâ ghì ɨ fvɨ gvi kɨ isas a ndo isas a ndo. Bôbo kæ choʼ mɨ ìsas i ndo ì kà, a wùl ɨ bɨ nâ wèyn na ghɨ ma wù fvɨ̀ ateyn. Yi gâyn tèyn ghelɨ isas i ndo nâ ghì ɨ fi fvɨ̀ gvi kɨ ɨchfɨ ndo ɨ chfɨ ndo a ka Bôbo fî choʼ ɨchfɨ ndo vzɨ̀ a wùl àteyn nɨn ghɨ ateyn, nô mɨ ɨlvɨ gha a ghelɨ chfɨ ndo nâ ghì fî fvɨ̀ gvì kɨ̀ wùl ìmoʼ ìmòʼ. ¹⁵Nô mɨ ndà vzɨ̀ a ka Bôbo choʼ nɨn ghɨ wul vzɨ̀ a wù choŋ ɨfwo ateyn, a yì na kelɨ sɨ nyòʼ ŋweyn nɨ̀ ghelɨ ŋweyn baʼsɨ̂ nɨ̀ ɨ̀fwo ateyn nô ɨ̀ jɨ̀m bòm ta wù bû lèm mɨ̀kâyn mɨ̀ Bôbo ɨ̀ nì ìwo i wuminɨ-i sɨ̂ ghelɨ Isìlæ̀.”

¹⁶Ɨtuʼ nà bɨs layn gvî kɨ tèyn Joshwà ɨ làlì ɨ lì ghelɨ Isìlæ̀ kɨ̀ a tɨ̂laʼ a tɨ̂laʼ ɨ ndù nɨ̀ àŋena asɨ nɨ̀ Bôbo, wu choʼ isas i ndo nɨ̀ Judà na à nì àŋena iwo iwuminɨ-i nâ yèynì. ¹⁷Joshwà ɨ lì asas a ndosɨ nɨ̀ Judà ɨ ndù nì ànkeyna asɨ nɨ̀ Bôbo, Bôbo choʼ ɨntweŋ ndo nɨ̀ Zelà na àŋena nɨn kya ìwo kûm ìwo nâ yèynì. Joshwà ɨ fi li gvì nɨ̀ ɨ̀ntweŋ Zelà, Bôbo choʼ isas i ndo nɨ̀ Zabdì na wùl ɨ̀ bɨ nâ wèyn nɨn ghɨ ateyn. ¹⁸Joshwà ɨ bè ghelɨ isas i ndo nɨ̀ Zabdì ɨ fvɨ gvì nô ghɨ̀ jɨ̀m asɨ nɨ̀ Bôbo kɨ fɨ̀moʼ fɨ̀mòʼ. Àŋena fvɨ gvì Bôbo choʼ Akàn na à mòm ŋweyn iwo nâ yèynì. Akàn nâ wèyn nà n-ghɨ wâyn kamì, ma à ti wâyn wâyn Zabdì, a ghɨ wâyn Zelà ma wù fvɨ̀ ɨchfɨ ndo nɨ̀ Judà.

¹⁹Joshwà ɨ bè sɨ̂ Akàn na, “Ngvɨmlɨ Bôbo Fɨyini fɨ Isìlæ̀ ɨ fèʼtɨ̀ mbɨ̂ zyâ sɨ̂ ŋweyn. Fèʼtɨ̀ iwo zɨ̀-i sɨ̂ ma a wà nì. Ka wa n-lèytɨ̀ nô ìwo sɨ̂ ma.”

²⁰Akàn ɨ bèynsɨ ɨ bè sɨ̂ Joshwà na, “Ma ni meyn kɨ̀ nô mbɨ sɨ̂ Bôbo ɨ Fɨyini fɨ Isìlæ̀. Iwo zɨ̀-ì a mà nɨ̀ nɨn ghɨ na, ²¹ma ti meyn yèyn awaf a Babilòn a li-a kɨ jofɨ̀ kɨ tèyn nɨ̀ àso ɨkwo a fɨfâ kɨ koʼ ndû kilù sɨ̀ tâyn nɨ a baŋnɨ-a kɨ koʼ ndû kilù ìmòʼ, ma lî ɨ̀ tɨm alêʼ a nse a ma ɨtwò ɨ̀ lèytɨ̀ ateyn. Mà tî lèm àso ɨkwo a fɨfâ isas ɨ̀ lèm ɨ̀fwo ɨlvi atu ateyn.”

²²Joshwà ɨ tum ghelɨ ghɨ ndu yeyn ɨfwo ateyn ɨtwò nɨ̀ Akàn nɨ̀ àso ɨkwo a fɨfâ kì isas ateyn. ²³Àŋena lì ɨ fvɨ̀ nɨ̀ ɨ̀fwo nâ vzɨ̀ ɨtwò afu ɨ li ndù nɨ̀ ɨ̀ŋweyn sɨ̂ Joshwà ŋêyn ghelɨ Isìlæ̀ nô ghɨ̀ jɨ̀m ɨ lèm ɨ̀fwo ateyn asɨ nɨ̀ Bôbo.

²⁴Joshwà ŋêyn ghelɨ Isìlæ̀ ɨ lì Akàn ɨ wâyn Zelà ɨ baʼsɨ nɨ̀ ɨ̀fwo vzɨ̀ a wu n-choŋ sɨ̂ Bôbo nɨ̀ woyn ŋweyn ghɨki nɨ ghɨ lûmnɨ̀ baʼsɨ̂ nɨ̀ nyamsɨ mbòloʼsɨ nɨ̀ njàkâysɨ nɨ̀ njɨ̀sɨ ŋweynsɨ. Àŋena nɨn li meyn kɨmɨ ɨ̀two ŋweyn nô mɨ nɨ̀ ghà vzɨ̂ a wu na n-kelɨ ɨ ndù nɨ̀ ɨ̀ŋweyn ibal i Ngeʼ. ²⁵Joshwà ɨ bɨf sɨ̂ ŋweyn na, “Bòm ghà ta wà gvì nɨ̀ ngeʼ a ghès atu a? Bôbo nɨn fu ngeʼ sɨ̂ và layn.”

Nô mɨ ɨlvɨ gha ghelɨ Isìlæ̀ ɨ tɨmlɨ zue ŋweyn nɨ̀ ghelɨ isas i ndo nɨ̀ ŋweyn ɨ chɨyntɨ nyòʼ tɨ̀gvɨyntɨ àŋena. ²⁶Àŋena nɨn nì tî ɨ kuʼ ngòʼsɨ̀ atu ìgvɨyn nɨ̀ Akàn. Ngòʼ nâ sìsɨ bu ghɨ kɨ alèʼ nâ ghè sɨ chem layn. Bôbo nà bu fì nyôʼsɨ̀ wì ɨtoŋ sɨ̂ ghelɨ Isìlæ̀. À ti iwo zɨ̀ a ghɨ n-toŋtɨ alêʼ nâ kì na Ibal i Ngeʼ.