Joshua 5
Ŋwàʼlɨ̀ Joshwà
Joshwà ɨ sɨ ɨnwam ɨ ghelɨ Isìlæ̀
1A nà n-ghɨ ta tɨfôyn tɨ Amò tɨ̀ injɨyn i Jodàn nɨ̀ tɨ̀fôyntɨ Kenàn tìtɨ̀ a mbæ̀ jvà yvɨ̀ ta Bôbo yùmsɨ jva na ghelɨ Isìlæ̀ dyaŋ, àŋena kfɨ sayn ɨ nà sɨ fâyn sɨ nu ghelɨ Isìlæ̀.
2A nà n-ghɨ ɨtuʼ nâ ghè, Bôbo bè sɨ̂ Joshwà na, “Faytɨ mɨ̀nyuè nɨ̀ ngòʼsɨ̀ ɨ sɨ ɨnwam ghelɨ Isìlæ̀ ghì a ghɨ bu duʼ tɨ̀ sɨ nô ghɨ̀ jɨ̀m.” 3Joshwà ɨ faytɨ mɨ̀nyuè mɨ̀ àteyn ɨ sɨ ɨnwam ghelɨ Isìlæ̀ nâ ghì nô ghɨ̀ jɨ̀m a Gibiyat Halalòt.
4Joshwà nɨn sɨ ɨnwam ghelɨ Isìlæ̀ bòm ta ghelɨ ghì a ghɨ n-læ lù a Ijìb ma ghɨ kfeyn meyn sɨ tɨm iwoŋ nɨn læ meyn kfɨtɨ a dzɨ nô ghɨ̀ jɨ̀m a nse ìyum. 5Ghelɨ ghì a ghɨ n-læ lù a Ijìb nô ghɨ̀ jɨ̀m nà n-ghɨ ma ghɨ sɨ meyn ɨ̀nwam àŋena mɨtɨ̀ ghelɨ ghì a ghɨ n-mbzɨ a nse ìyum a dzɨ ta ghɨ lù a Ijìb ɨ ghɨ bula ghɨ sɨ ɨ̀nwam àŋena. 6Ghelɨ Isìlæ̀ nɨn læ meyn jelɨ kɨ a nse ìyum tèyn sɨ a bèŋ mɨ̀vɨm ɨ̀n kæ̀, ghelɨ ghì a ghɨ n-læ lù a Ijìb ma ghɨ kfeyn meyn sɨ tɨm iwoŋ nà n-ghɨ ma ghɨ kfɨtɨ meyn nô ghɨ̀ jɨ̀m bòm ta àŋena nà n-yvɨnɨ̂ wì Bôbo Fɨyini. Bôbo Fɨyini ɨ kàyn na àŋena læ̀ yeyn wi ilaʼ zɨ̀-ì a wu n-læ chfɨ̀nɨ sɨ̂ ghɨ̀bo àŋena. Ilaʼ ateyn i nà n-jofà, ɨfwo ɨ yɨnɨ koʼ ateyn nô a jûŋ. 7À ti nà n-ghɨ woyn ghêl ghì a ghɨ n-faŋ tì yvɨ̀nɨ Bôbo a Joshwà nɨn sɨ ɨnwam àŋena a Gilgàl. Ghɨ n-sɨ ɨnwam àŋena bòm ta ghɨ n-bzɨ àŋena a nse ìyum ɨ faŋ tɨ̀ sɨ. 8Ghɨ n-sɨ ɨnwam ghelɨ Isìlæ̀, àŋena faŋ kɨ a ndo nô ta ka ɨnwam àŋena yum.
9Bôbo kæ bè sɨ̂ Joshwà na, “Ma lisi meyn ìwumi i Ijìb zɨ̀ sɨ a yi atu layn.” À ti iwo zɨ̀-ì a ghɨ n-toŋtɨ alêʼ ateyn sɨ koʼ sɨ chem layn na Gilgàl.
10A na n-ghɨ aleŋ ɨlvɨ ikfa a mɨchi njvàsɨ̀ kæ̀ a njoŋ nâ ghè, ghelɨ Isìlæ̀ ɨ yɨ ayɨ iyaʼsɨ alèʼ ghè a àŋena nɨn læ bɨ̀ ateyn a Gilgàl, ibal i Jèlikò. 11À nà n-ghɨ ta ghɨ yɨ ayɨ Iyaʼsɨ, ɨtuʼ layn kɨ layn àŋena zɨ̀tɨ̀ sɨ yɨ ɨfwo ɨlvɨ vzɨ̀ a wu nà n-lema ilaʼ afu. Àŋena na n-yɨ àbayn bula fɨ̀shɨ̀k, nɨ̀ àsaŋ a nyoʼnɨ-a. 12Àŋena nɨn læ zɨ̀tɨ sɨ yɨ ɨfwo nâ vzɨ̀ nô mɨ ɨlvɨ gha Fɨyini fɨ faŋ tɨ̀ fì tɨ̀ tsɨ̀ynsɨ ɨfwo ɨ yɨnɨ vzɨ̀ a ghɨ nà n-toŋtɨ na manà tì sɨ̂ àŋena. Àŋena nà sɨ yɨ kɨ ɨ̀fwo ɨ yɨnɨ ma ghɨ kfì a nse kenàn.
Ghelɨ Isìlæ̀ ɨ tɨm yɨ Jèlikò
13A na n-ghɨ ta Joshwà ndù bàʼsɨ a ntèʼ Jèlikò, wu ki ndùsɨ̀ ɨ yeyn wul wu ti nɨ̀ fɨnyuèfɨ a ŋweyn awu. Joshwà koʼ ndù ɨ bɨf sɨ̂ ŋweyn na, “Wa n-ghɨ wul àbàs nɨ̀ ghès ma wà n-ghɨ mbàynɨ̀ yes a?”
14Wùl ateyn bè na, “Mɨ n-ghɨ wi abàs a li-a. Mà gvì ta atu a sugèyʼsɨ̀ nɨ̀ Bôbo.” Joshwà ɨ suʼi ɨ nyiŋì ɨ kfɨsɨ ìkêʼ i ŋweyn a nse sɨ ngvɨmlɨ ŋweyn ɨ kæ be sɨ̂ ŋweyn na, “Fèʼtɨ kɨ iwo zɨ̀-ì a wà n-kɨŋ na mà ni. Mɨ n-ghɨ wul ɨ̀ fèlɨnɨ nɨ̀ và.”
15Atu a sugèyʼsɨ̀ nɨ̀ Bôbo nâ kì ɨ bè sɨ̂ Joshwà na, “Choʼtɨ gvɨsɨ sɨ a wa ɨvɨ̀, bòm ta alêʼ kèyn a wà n-ti ateyn tèyn nɨn ghɨ àlêʼ a layna,” Joshwà ɨ choʼtɨ kɨ ta wù bè.