Joshua 2

Lahàb ŋêyn gvèsɨ̀

¹Joshwà ɨ wâyn Nûn nɨn jâŋ meyn ghelɨ ghɨ̀ bò a Shìtîm ɨ tum na àŋena dyaŋ ndù ɨ̀ nyàʼtɨ ki ilaʼ ateyn. Wu n-bè sɨ̂ àŋena na, “Yì ndu nyaʼ ki abâs ilaʼ nâ kì ɨ̀ fàytɨ ki ntèʼ Jèlikò sɨ a nyɨŋ.” Àŋena ndu zɨ a ndo nɨ̀ wùl ɨ wi ɨ̀ jèlɨnɨ ɨlvì ghɨ toŋtɨ̂ na Lahàb. ²Àŋena nɨn zɨ a ndo nâ ghè nô mɨ ɨlvɨ gha, wùl ɨ ndu fèʼtɨ sɨ̂ fòyn Jèlikò ɨ bè na, “Mbæ̀, ghelɨ Isìlæ̀ ghɨli zɨ meyn a ntèʼ afêyn lvɨ̂yn nɨ̀ntuʼ sɨ nyaʼtɨ sɨ ki ntèʼ yêyn.” ³Fòyn Jèlikò ɨ tum ntum sɨ̂ Lahàb na ghɨ ndu bè sɨ̂ ŋweyn na, “Fvɨ̀sɨ gvi nɨ̀ ghelɨ ghì a ghɨ gvì a wa ndo tì, bòm ta àŋena gvì sɨ nyaʼtɨ sɨ ki ilaʼ yèynì.” ⁴À nà n-ghɨ tì, ma Lahàb li meyn ghelɨ ateyn ɨ̀ lèytɨ̀. Wu bè sɨ̂ ghelɨ ntum nâ ghì na, “Ghelɨ ghɨli ni meyn gvì kɨ̀ nô a ma ndo, ma kya wi na àŋena lù wo a, ⁵ɨlvɨ kfeyn ta ka ghɨ kɨŋ mbàyn aleŋ ɨlvɨ ikfa, àŋena fvɨ lù. Mɨ n-kya wi na àŋena nì fvɨ̀ ndù wo a. Yì nyɨŋ a àŋena ibàm. Yì kàʼ a yì koli àŋena.” ⁶À nà n-ghɨ tì, ma Lahàb koʼsɨ meyn ɨ̀ lèytɨ̀ àŋena atû ndo nɨ̀ ŋweyn antêynɨ̀ nkfɨ̀ sɨ lisɨ ta wù sàŋtɨ̀. ⁷Ghelɨ ateyn ɨ fvɨ̀ ɨ nà sɨ kɨŋ ndû nɨ̀ gvè sɨ ateynsɨ dzɨ a alèʼ ghè a ghɨ nà dyâŋ jvâ Jodàn ateyn. Àŋena nɨn fvɨ sɨ a ntèʼ nô mɨ ɨlvɨ gha, ghɨ fò ɨ̀chfɨ mbàyn. ⁸A ni nà ghɨ jæ ta ka gvèsɨ ateynsɨ nyiŋi, Lahàb ɨ koʼ ɨ yeyn àŋena atû ndo, ⁹ɨ bè sɨ̂ àŋena na, “Mɨ n-kya na Bôbo Fɨyini fu meyn ìlaʼ yèynì sɨ̂ zɨ̀ ghelɨ Isìlæ̀. Ghes nɨn fâyn zɨ̀ nô sɨ a ŋaŋ. Nô ghelɨ ghɨ̀ jɨ̀m a ntèʼ afêyn nɨn yeyn gvî nɨ̀ zɨ̀ nô mɨ ɨlvɨ gha, àŋena nà chɨŋtɨ̂ faynà. ¹⁰Ghèsɨ yvɨ meyn ta Bôbo nɨ̂n yùmsɨ jva ì baŋnɨ, yi dyàŋ ta yi n-fvɨ̀ sɨ a Ijìb. Ghèsɨ yvɨ meyn kɨ̀mɨ ta yi n-læ zuetɨ tɨfôyn tɨ Amò ma à ti Sihòn nɨ̀ Og, àŋena chî injɨyn i Jodàn. Yi n-læ meyn zuetɨ àŋena ɨ bebsɨ tɨ̀laʼtɨ àŋena nô tɨ̀ jɨ̀m. ¹¹A nà ghɨ ta ghèsɨ̀ yvɨ awo ateyn, ifayn ì ɨ ku ghes, ghès ɨ na bu fì kelɨ wi atem sɨ nù bòm ta ghèsɨ nà n-fâyn zɨ. Ghèsɨ nà n-fâyn bòm ta ghèsɨ nà n-kya na Bôbo Fɨyini fifɨ nɨn ti a yi ibàm, a saʼ ɨ̀nfeynfɨ iyvɨ nɨ̀ nse. ¹²Mɨ n-kɨŋ lvɨ̂yn na yì chfɨnɨ sɨ̂ mà sɨ a izɨyn nɨ̀ Bôbo Fɨyini fifɨ na yi n-dyêyn àtem a juŋà sɨ̂ ìsas i ndo nɨ̀ mà kɨ̀mɨ ta mà dyèyn sɨ̂ zɨ̀. Yì dyeyn nchwæ samoʼ na, ¹³yi n-gvì sɨ bebsɨ ntèʼ Jèlikò ɨ faŋ tɨ̀ zue bò wom nɨ̀ nà wom nɨ̀ woynà ghem ghɨlûmnɨ nɨ ghɨki nɨ̀ àsas a ndosɨ nɨ̀ àŋena. Yì chfɨnɨ sɨ̂ mà na yi n-zuetɨ̂ wì ghes.” ¹⁴Gvèsɨ ateynsɨ ɨ bè sɨ̂ ŋweyn na, “Ghès kæ sɨ faŋ tɨ̀ ni iwo zɨ̀-ì a ghèsɨ̀ chfɨ̀nɨ̀, Fɨyini fɨ mèsì ghès. Wà kæ sɨ faŋ tɨ̀ feʼtɨ iwo zɨ̀-ì a ghèsɨ̀ gvì sɨ nì afêyn, a ghèsɨ̀ dyeyn atem a juŋà sɨ̂ zɨ̀ ɨlvɨ ta Bôbo fu ilaʼ nâ yèynì sɨ̂ ghès.” ¹⁵Lahàb ɨ fvɨ̀sɨ̀ nkfɨ̀ abùʼ a ndo àŋena ghaŋlɨ ateyn ɨ fvɨ chàʼ bòm ta ndo ŋweyn nà n-ghɨ ma yì ghàŋtɨ̀ kɨ̀ a mbàyn ghè a yi n-jɨ̂ŋ kali ntèʼ. ¹⁶Wu n-nî tî ɨ bè sɨ̂ gvèsɨ ateynsɨ na, “Yì koʼ a kfɨyn ta ka ghelɨ ghì a ghɨ n-kɨŋ zɨ faŋ tɨ̀ yèyn zɨ. Yi koʼ yi lèytɨ̀ afu sɨ a mɨchi ɨ̀n tal sɨ chem ta ka àŋena kasi kfa a yì kæ lu sɨ nà ndû a yi alèʼ.”

¹⁷Ghelɨ ateyn nɨ̀n se sɨ lù ɨ bè sɨ̂ Lahàb na, “Ghès nɨn lèm îchfɨ̂nɨ̀ ì yesi sɨ̂ và kɨ̀ ɨlvɨ ta wà nì iwo zɨ̀-ì a ghès nɨn bè. ¹⁸Ghèsɨ læ̂ zɨ ilaʼ afêyn, wa ghaŋsɨ àbâs a ndzɨsɨ a baŋnɨ-a kèyn abùʼ afêyn a wà fvɨ̀sɨ sùʼsɨ ghes ateyn tèyn. Wà ghaŋsɨ nô mɨ ɨlvɨ gha, wa lì bò vâ nɨ̀ nà vâ nɨ̀ woynà ghya baʼsɨ̂ nɨ̀ ghelɨ isas i ndo nɨ̀ bò vâ ghɨ̀ jɨ̀m, zɨ̂ àŋena na ghɨ kɨ a wa ndo. ¹⁹À kæ sɨ fvɨ̀ mɨ ndà a wa ndo a àŋena antêynɨ̀ ghɨ zue, awu à kesa bu nà ghɨ ateyn. Mɨtì ma wùl kæ sɨ kùm wùl zɨ̂ àŋena ɨ ghɨ a ndo, a iwo ateyn i fe a ghès atu. ²⁰Mɨtɨ̀ wà kæ sɨ fèʼtɨ iwo zɨ̀-ì a ghèsɨ̀ gvi ìnyeyni sɨ̂ wùl, ghèsɨ bû fì lèm ìchfɨ̂nɨ̀ zɨ̀-ì a wà nì ghèsɨ chfɨ̂nɨ̀.”

²¹Lahàb ɨ bɨmi ɨ bè sɨ̂ àŋena na, “Mɨ n-nî kɨ ta yì bè.” Àŋena lù nô mɨ ɨlvɨ gha, wu kul abâs a ndzɨsɨ a baŋnɨ-a kì abùʼ a ndo nâ ghè.

²²Gvèsɨ ateynsɨ nɨn fvɨ̀ tî ɨ koʼ ndu lèytɨ̀ atû kfɨ̀ynsɨ ɨ chi afu sɨ a mɨchi ɨ̀n tal nô ta ka ghelɨ ghì a ghɨ nà n-kɨŋ àŋena kasi kfa a Jèlikò. A nà n-ghɨ tì ma ghelɨ Jèlikò nâ ghi kɨŋ meyn àŋena kɨ ɨlwêʼ ɨ̀ jɨ̀m a dzɨ ɨ̀ faŋ tì yeyn. ²³A nà ghɨ ibàm i mɨ̂chi ɨ̀n tal, ghelɨ nâ ghì ghɨ̀bò ɨ kasi kàlì sɨ a kfɨyn afî ɨ dyàŋ jvâ Jodàn ɨ ndu yeyn Joshwà ɨ wâyn Nûn ɨ fèʼtɨ nô mɨ ghà ta yi gàyn. ²⁴Àŋena nɨn fèʼtɨ tî ɨ bè sɨ̂ Joshwà na, “Yi n-ghɨ samoʼ na Bôbo fu meyn ìlaʼ nâ zɨ̀ nô ì jɨ̀m sɨ̂ ghesɨ̀nà. Ghelɨ ilaʼ nâ ghì nô ghɨ̀ jɨ̀m nɨn fâyn ghesɨ̀nà.”