Joshua 3

Ghelɨ Isìlæ̀ ɨ dyàŋ jvâ Jodàn

¹Ɨtuʼ nɨn bɨs meyn layn achi a li-a Joshwà ɨ lù ŋêyn ghelɨ Isìlæ̀ nô ghɨ̀ jɨ̀m a ntèʼ Shìtîm ɨ ndu chem ɨchfɨ jvâ Jodàn ɨ kas mɨtwo ɨ bɨ̀ afu ɨ jæ sɨ dyàŋ. ²A nà ghɨ ibàm i mɨchi ɨ̀n tal ghelɨ ghɨ tisɨnɨ jèlɨ kɨ alêʼ nâ kì a àŋena nɨn bɨ̀ ateyn kɨ à jɨ̀m, ³bê sɨ̂ ghelɨ na, “Yi yeyn ta ghelɨ isas i ndo nɨ̀ levì bèʼi àntayntayn a mɨ̂kàyn nɨ̀ Bôbo Fɨyini fifɨ yi fvɨ kɨ ghɨ̀ jɨ̀m ɨlwèʼ afî a yi n-ghɨ ateyn ɨ jùmtɨ̀ àŋena. ⁴Yì kæ jùmtɨ àŋena, a àŋena dyeyn dzɨ sɨ̂ zɨ̀ bòm ta yi bû tìmi nà ghɨ abàs afêyn. Yi n-kelɨ sɨ nà jelà, fu àghaf kɨ koʼ ndû ntàmsɨ̀ nkam, sɨ̂ àntayntayn ateyn a. Ka yì na jelɨ̀ baʼsɨ à.”

⁵Joshwà nɨ̀n bê meyn sɨ̂ ghelɨ ateyn na, “Yì baʼtɨ ngêŋ sisɨ nà ghɨ nɨ̀ ìlayn i asɨ nɨ̀ Bôbo Fɨyini bòm ta wu n-læ̀ nî ìwo ɨchfɨ̀ ɨyumnɨ sɨ̂ ghesɨ̀nà a libɨs.”

⁶Wu taŋi tì ɨ bè sɨ̂ ngàŋsɨ ndô Fɨyinisɨ̀ na, “Yì beʼi àntayntayn a mɨkàyn nɨ̀ Bôbo ɨ̀ nà ndû asɨ nɨ̀ ghelɨ.” Àŋena bèʼì ɨ nà ndu-à.

⁷Bôbo ɨ bè sɨ̂ Joshwà na, “Mɨ n-zɨ̀tɨ̀ sɨ nì na ghelɨ Isìlæ̀ na ngvɨmlɨ̂ và layn ta ka àŋena keli na mɨ n-ghɨ ghesɨ̀và kɨ̀ ta mɨ læ nà ghɨ ghesɨ̀ Mosìs. ⁸Bè sɨ̂ ngàŋsɨ ndô Fɨyini sìsɨ̀ a sɨ bèʼi àntayntayn a mɨ̂kàyn kì na, ‘Yi ndu chem a mbæ̀ jvà Jodàn, yi zɨ timi antêynɨ̀ àteyn.’”

⁹Joshwà ɨ bè sɨ̂ ghelɨ Isìlæ̀ na, “Yì gvi yvɨ iwo zɨ̀ a Bôbo Fɨyini fifɨ bè. ¹⁰À ti ta yi n-keli na Fɨyini fìfɨ̀ a fɨ n-chi nɨn ghɨ a yi antêynɨ̀, fì kèli kɨ̀mɨ na Fɨ n-sàŋ fvɨsɨ̀ ghelɨ Kenàn nɨ̀ ghelɨ Hêt kɨ̀mɨ nɨ̀ ghelɨ Belìz nɨ̀ ghelɨ Gilgàsh kɨ̀mɨ nɨ̀ ghelɨ Amò baʼsɨ̂ nɨ̀ ghelɨ Jebùs, kɨ̀ a yi asɨ. ¹¹Àntayntayn a mɨ̂kàyn nɨ̀ Bôbo vzɨ̀ a wù n-saʼ mbzɨ ì jɨ̀m nɨn zɨ̂ a jvâ Jodàn sɨ a yi asɨ, ¹²a yì choʼtɨ ghelɨ njvàsɨ̀ bò kɨ asas a ndo nɨ̀ ghelɨ Isìlæ̀ à jɨm, choʼ kɨ ɨ̀mòʼ isas i ndo. ¹³Ngàŋsɨ ndô Fɨyini sìsɨ̀ a sɨ bèʼi àntayntayn a mɨ̂kàyn nɨ̀ Bôbo vzɨ̀ a wù n-saʼ mbzɨ ì jɨ̀m na tom gvî nɨ̀ àvɨ a a jvâ Jodàn tèyn, a jvà teyna, a mû mzɨ̀ a mɨ̀ n-kalì timi kɨ alêʼ àmòʼ.”

¹⁴A nà ghɨ ta ghelɨ Isìlæ̀ fvɨ̀ sɨ alèʼ ghè a àŋena nɨn bɨ̀ ateyn sɨ dyaŋ jvâ Jodàn, ngàŋsɨ ndô Fɨyini sìsɨ a sɨ n-bèʼi àntayntayn a mɨ̂kàyn kì ɨ nà ndû asɨ nɨ̀ àŋena. ¹⁵À nà n-ghɨ tì a ghɨ ɨ̀lvɨ ankuŋ a Jodàn, a ghɨ kɨmɨ ɨlvɨ ghê a ghelɨ nɨn kfî ɨfwo ɨ yɨnɨ ateyn. Mɨtì ngàŋsɨ ndô Fɨyini sìsɨ̀ a sɨ n-bèʼì àntayntayn a mɨ̂kàyn nɨ̀ Bôbo nà tom gvî nɨ̀ avɨ-a ɨchfɨ jvâ tèyn, ¹⁶yi teyna kɨ teyna ɨ nà bu kàli wì. Mû mzɨ̀ a mɨ̀ n-ghɨ abàs ikuè ɨ timi kɨ alèʼ àmòʼ nô a ndyèyn alèʼ ghɨ toŋtɨ̂ na Adàm a mbæ̀ Zaletàn, mû mzɨ̀ a mɨ nà n-kalì ndû a jvâ ighaʼnɨ ghè a ghɨ n-toŋtɨ na Alabà ma à ti jvâ fɨ̀ngvaŋ ɨ boŋ teyna. Ghelɨ ateyn ɨ dyaŋ ndù a Jèlikò. ¹⁷Ngàŋsɨ ndô Fɨyini sìsɨ̀ a sɨ n-bèʼi àntayntayn a mɨ̂kàyn nɨ̀ Bôbo ɨ timi kɨ antêynɨ̀ jvâ Jodàn kɨ̀ a ki jvà, ghelɨ Isìlæ̀ ɨ dyaŋ kɨ a ki jvà tèyn ɨ mèsì.