Joshua 1

Bôbo Fɨyini ɨ lèm Joshwà sɨ a wûl ɨ tisɨnɨ

¹À nà n-ghɨ ta Mosìs ɨ wul ɨ̀ fèlɨnɨ nɨ̀ Bôbo kfɨ, Bôbo bè sɨ̂ Joshwà ɨ wâyn Nûn vzɨ̀ a wu nà n-gamtɨ Mosìs na, ²“Mosìs ɨ wul ɨ̀ fèlɨnɨ nɨ̀ ma kfɨ meyn. Wà n-kelɨ sɨ baʼtɨ lvɨ̂yn na zɨ̂ ghelɨ ghèyn nô ghɨ̀ jɨ̀m dyaŋ jvâ Jodàn ɨ̀ ndu ilaʼ afî a mɨ n-kelɨ sɨ fu sɨ̂ zɨ̀ ghelɨ Isìlæ̀. ³Mɨ nì fu nô mɨ àlêʼ à kà sɨ̂ zɨ̀ ta yì tom avɨ à ki-a ateyn kɨ̀ ighel ta mà tî chfɨ̀nɨ̀ sɨ̂ Mosìs. ⁴Ilaʼ ateyn i nɨn zɨ̂tɨ̀ kɨ a nse ìyum abàs itsɨyn sɨ chem atû kfɨ̀ynsɨ a ntèʼ Lebanòn abàs ikùe. Yi ndû chem kɨmɨ a jvâ ighaʼnɨ a Yuflèt nɨ̀ jvâ Medìtèlenìyà abàs ghè a ɨchfɨ-yvɨ nɨn sœ ateyn, fî ndû chem ilaʼ nɨ̀ ghelɨ Hît nô ì jɨ̀m. ⁵Nô wùl læ̀ tɨm yɨ wi vâ nô ta ka ghɨ̀ læ̂ ghɨ̀. Mà na lum ghɨ kɨ ghesɨ̀và kɨ̀ ta mɨ n-læ nà ghɨ ghesɨ̀ Mosìs. Mà læ̀ visî wì vâ ɨ̀ læ̀ faŋ tɨ̀ lèsɨ vâ.”

⁶“Ka wa n-fàyn, wa kelɨ àtem a to-a bòm ta wà n-kelɨ sɨ li ghelɨ ghèyn sɨ ndu nɨ̀ àŋena ilaʼ ghè a mɨ n-læ chfɨ̀nɨ sɨ̂ ghɨ̀bo bò àŋena na mɨ n-fu sɨ̂ àŋena. ⁷Ka wà na faynà, wa kelɨ àtem a to-a. Wa tôʼnɨ̀ sɨ nà lem tɨsaʼ tìtɨ̀ a wùl ɨ fèlɨnɨ nɨ̀ mà Mosìs nɨ̂n fu sɨ̂ và. Ka wa n-chas tɨsaʼ nâ tèyntɨ̀ nô a dzɨ ìlì. Wà kæ sɨ ni têyn a nô awo à kya à jɨ̀mà na jelɨ̀ kɨ àti-ati. ⁸Ka wa n-læ̀ faŋ tɨ̀ nà lum jâŋ kɨ jaŋ ŋwàʼlɨ̀ ìsaʼ nâ yèyn. Wa mêʼnɨ̀ kɨ mɨlvɨ ɨ̀n jɨ̀m ta ka wà na faytɨ̂ nî àwo kì a ghɨ nyàʼ a ŋwàʼlɨ̀ ìsaʼ nâ ghàyn. Wà kæ sɨ ni têyn a wà keli ighaʼ ɨ̀ nà nî mɨ ghà yi ndû kɨ a jûŋ. ⁹Ba ma bê meyn sɨ̂ và na wà na to-a. Ka wà na fàynà, ka iwo i nɨn fù ngeʼ sɨ̂ và bòm ta Bôbo Fɨyini fyafɨ nɨn ngàmtɨ̀ và nô mɨ wo ta wà ndù.”

¹⁰Joshwà ɨ kæ be sɨ̂ ghelɨ ghɨ tisɨnɨ nɨ̀ ghelɨ Isìlæ̀ na, ¹¹“Yì jel ɨ̀ fèʼtɨ̀ sɨ̂ ghelɨ ghesɨ̀nà nô ghɨ̀ jɨ̀m na à læ̀ nà ghɨ ɨlvɨ a chwò a libɨs a àŋena dyaŋ jvâ Jodàn ɨ̀ ndù lì ìlaʼ zɨ-ì a Bôbo chfɨ̀nɨ̀ sɨ fu sɨ̂ àŋena na ghɨ na chî ateyn. Yì li ɨfwo ɨ yɨnɨ wu dvɨ̂ kfeynɨ-à.”

¹²Joshwà nɨn taŋi tî ɨ bè sɨ̂ ghelɨ isas i ndo nɨ̀ Lubèn nɨ̀ ghelɨ isas i ndo nɨ̀ Gâd nɨ̀ ghelɨ ndo nɨ̀ Mànasè ghɨli na, ¹³“Ka yi n-lèysɨ̀ ìwo zɨ-ì a Mosìs ɨ wul ɨ̀ fèlɨnɨ nɨ̀ Bôbo nɨ̂n bè sɨ̂ zɨ̀ na, ‘Bôbo ɨ Fɨyini fifi nɨn fu ìlaʼ nâ yèynì a yì na chî ateyn kɨ nɨ̀ mbôynɨ̀.’ ¹⁴Ghɨ̀ki ghi nɨ̀ wôyn ghi nɨ̀ nyâm sɨsɨ nɨn faŋ kɨ injɨyn i jvâ Jodàn afêyn a Mosìs nɨn læ fu sɨ̂ zɨ̀. Mɨtì a ghelɨ ghì a ghɨ kàʼ a ghɨ tɨm iwoŋ, kelɨ ɨ̀fwo iwòŋ a zɨ̀ antêynɨ̀ dyaŋ jvâ Jodàn sɨ a asɨ. Yi n-kelɨ sɨ gàmtɨ woynà ghi, ¹⁵nô ta ka Bôbo Fɨyini fu mbôynɨ̀ sɨ̂ àŋena kɨ̀mɨ ta wù fù sɨ̂ zɨ̀, ta ka àŋena boŋ kèli ilaʼ zɨ̀-ì a Bôbo Fɨyini ɨ bò vzɨ nɨn fu sɨ̂ àŋena. A à na ghɨ sɨ a ibàm ateyn a yì kæ kasi sɨ gvì a yɨ ilaʼ afêyn sɨ nà chî ateyn. Alêʼ nâ kèynà nɨn ghɨ àlêʼ kì a Mosìs, ɨ wul ɨ̀ fèlɨnɨ nɨ̀ Bôbo nɨn læ fu sɨ̂ zɨ̀ injɨyn i jvâ Jodàn abàs ghè a ɨchfɨ̂ izue nɨn sal ateyn.”

¹⁶Àŋena bè sɨ̂ Joshwà na, “Ghès nɨn nî nô mɨ ghà ta wà bè na ghès ni, ɨ̀ ndù nô mɨ wo ta wà bè na ghès ndu. ¹⁷Ghès na yvɨnɨ̂ và kɨ ighel ta ghès tî nà yvɨnɨ Mosìs. Ghès nɨn jêm na Bôbo Fɨyini fyafɨ na ghɨ zɨ̂ ŋweyn kɨ ighel ta fɨ tî nà ghɨ ŋêyn Mosìs. ¹⁸À kæ sɨ faŋ mɨ ndà tì yvɨ̀nɨ iwo zɨ-ì a wà bè, a ghèsɨ̀ zue ŋweyn. Wà kelɨ atem ato-a, ka wà na faynà.”