Isaiah 64
This book is a draft. It has been translated but has not yet finished checking, and is published here so the community can read and respond to it.
1Bôbo Fɨyini, mɨ n-jêm na wà buʼ iyvɨ ɨ̀ sùʼi gvì (a nse). Suʼi gvi kfɨynsɨ na chɨŋtɨ̂ faynà a wa asɨ a Bôbo.
2Kɨ̀ ta ɨvɨsɨ nɨn ku a nkɨsɨ wu nà fɨ-a, wu n-se sɨ fɨ isas i mu, mɨ bi. Suʼi gvi a Bôbo Fɨyini tɨlaʼ tɨ mbzɨtɨ na chɨŋtɨ̂ fâyn và. Gvi nî mbàynɨ̀ shyasɨ keli wul ɨ vzɨ̀ a wà n-ghɨ ɨ̀ŋweyn.
3Bôbo Fɨyini wà n-læ meyn suʼi a nse ɨtuʼ mu. Wà n-ni meyn àwo a kaynɨ-a ghèsɨ kya wi mɨ kya (ghès ɨ kfâʼtɨ̀ wì mɨ kfaʼtɨ). Suʼi gvi ɨ nì kfɨynsɨ na chɨŋtɨ̂ faynà a wa asɨ.
4Kɨ sɨ a nzɨ̀tɨ mbzɨ, wùl bû tìmi yeyn, bula wùl ɨ̀ timi yvɨ. Wùl bû tìmi nà kfâʼtɨ̀ mɨ kfaʼtɨ iwo zɨ̀ a Fɨyini fɨ bàʼtɨ meyn sɨ̂ ghelɨ ghì a ghɨ n-kôŋ ɨnfeynfɨ.
5Wà n-læ meyn nà gâmtɨ̀ ghelɨ ghì a ghɨ n-kôŋ vâ, nî àwo a àtì-ati. Wà n-læ meyn nà gâmtɨ̀ ghelɨ ghì a ghɨ n-yvɨnɨ (bêtɨ̀) tɨsaʼ tyatɨ jelɨ̀ kɨ ta wà n-kɨŋ. Mɨtì wà n-nyoʼsɨ meyn ɨ̀toŋ sɨ̂ ghès bòm ta ghès nɨn nî meyn mbɨ. Samoʼ ghèsɨ tô meyn nɨ̀ àtu-a sɨ̂ và kɨ̀ sɨ ɨtuʼ mu. Ghès ti kàʼ ghèsɨ bœ̀ a dzɨ ì kà?
6Ghès ghelɨ ghɨ̀ jɨ̀m sɨ ghɨ ta ghelɨ ghì a ghɨ n-layn wi ta isaʼi nɨn dyèyn. Awo a juŋà kì a ghès nì meyn nô à jɨ̀m sɨ chaʼnɨ̂ chàʼnɨ ta abas a ndzɨsɨ kì a ghɨ n-yês ɨvɨ ateyn. Mbɨ yes yesɨ meyn lìsì ghès kɨ̀ ta afyefà lìsì tɨ̀fvɨ tɨ ɨnkàʼ.
7Wùl ɨ̀ bu fì ghɨ wi a wù n-koʼsɨ vâ a Bôbo Fɨyini. Wùl ɨ bu fì ghɨ wi a wù n-yeʼtɨ̂ a vâ. Wà beyn meyn jɨm sɨ̂ ghès ɨ̀ màʼì ghès bòm mbɨ seysɨ.
8Mɨtì a Bôbo wà n-ghɨ bò wes. Ghès nɨn ghɨ kɨ àchaʼ a ntòyn, wa ghɨ bò àlàm. Ghès nô ghɨ̀ jɨ̀m nɨn ghɨ ma à fàytɨ kɨ̀ vâ (ifêl awu nɨ̀ và).
9Ghès nɨn chwotɨ̂ a Bôbo, ka wa n-nyòʼsɨ̀ ɨ̀toŋ sɨ̂ ghès sɨ a ŋaŋ a Bôbo. Ka wa n-fì kfàʼtɨ̀ (bètɨ̀) àwo a bɨ-a nɨ̀ ghès. Wà n-kya na ghès nô ghɨ̀ jɨ̀m nɨn ghɨ ghelɨ̀ ghya.
10Ntèʼsɨ ghaʼlɨnɨ sìsɨ̀ a wà n-læ choʼ ɨ lèm sɨ a nyɨŋ sɨ ghɨ kɨ sɨ yum. Zayòn kasi meyn sɨ a nse iyum. Jèlusalèm ɨ ghɨ wùl ɨ bu chî wì ateyn (afu).
11Ghɨ nyoʼ meyn ndô zya i laynɨ nì và yì fɨ nô ì jɨ̀m. Ghɨ nyoʼ meyn ndô Fɨyini zɨ̀ a ghɨ̀bo ghesɨ nà n-koʼsɨ ateyn. Ghɨ nyoʼ meyn bèbsɨ ɨ̀fwo ɨ jûŋ vzɨ̀ a ghès tî nà lêm ateyn wu fɨ kètɨ̀.
12Samoʼ, wa n-faŋ wi tɨ̀ gàmtɨ ghes a ngeʼ afêyn a Bôbo. Samoʼ, wa n-faŋ wi tɨ̀ yvɨ idzɨ̂ ì yesi ɨ̀ faŋ tɨ̀ fì tɨ̀ fù ngeʼ i bemnɨ a ghès atu.