Isaiah 63

Achi kì a Fɨyini fɨ læ̀ sɨ̂sɨ̀ mɨkfɨ ɨ̀ kàsi yùyn ghelɨ ŋweyn ateyn.

¹Wùl ɨ̀ nchì nɨn læ meyn nà kayntɨ̂ na, “À n-ghɨ ndà wêyn a wu n-gvì dzɨ a Edòm a? À n-ghɨ ndà wêyn a wù n-gvî dzɨ a ntèʼ Bozla a? Ndzɨsɨ ŋweynsɨ nɨn ghɨ ma mɨ̀lûŋ yoʼ meyn ateyn. À n-ghɨ ndà vzɨ̂ a wù n-gvî a, ma wù maʼ meyn dzɨsɨ jûŋsɨ̀ a. Wù n-gvî nɨ̀ àdyaʼ a bemnɨ-a.”

²Wùl ɨ̀ nchì nɨn læ meyn bɨf sɨ̂ ŋweyn na, “Bòm ghà ta ndzɨ shyasɨ nɨn kêʼ kɨ mɨluŋ mɨluŋ têyn a? ndzɨ shyasɨ nɨn bâŋ kɨ ta ndzɨsɨ wûl vzɨ̀ a wù n-kam mɨtam fvɨsɨ̀ mɨ̀lûʼ.

³Wu n-beynsɨ meyn ɨi bè na, “Mà lù alèʼ ghè a mà na jelɨ̀ tɨ̀laʼ tɨ ɨtum. Ma jeylɨ meyn àŋena kɨ̀ ta wùl jèylɨ̀ mɨtam ibɨ ghè a ghɨ n-kam mɨlûʼ ateyn. À jèylɨ̀ kɨ̀ ma nìnyɨŋ jèylɨ̀ àŋena. Mà nì nà jêylɨ̀ àŋena ɨtoŋ ɨ yafɨnɨ, mɨ̀lûŋ mɨ̀ àŋena saylɨ ndù a ma ndzɨsɨ ɨ̀ bèbsɨ ndzɨ semsɨ nô sɨ̀ jɨ̀m.

⁴A nà n-ghɨ tì ma ma lêm meyn na mɨ n-fu ngeʼ sɨ̂ ghelɨ Edòm bòm mbɨsɨ àŋena. A fî ghɨ ɨlvɨ vzɨ̀ a ka mà kasi yuyn tèyn ghelɨ̀ ghem sɨ a ngeʼsɨ ghè a àŋena nà n-yeyn.

⁵Mɨ n-momsɨ meyn sɨ keli wul ta ka wù gamtɨ ma, mɨtì wùl ɨ nà ghɨ wi. Iwo ateyni nɨn ghaʼ meyn mà na nô wùl ɨ̀ mòʼ bû fvɨ̀ na ghesɨ̀ ŋweyn nî ifêl nâ yèynì. À ti ta mɨ n-læ tɨm yɨ mbàynɨ̀ semsɨ nɨ̀ àdyaʼ à kema, ɨtoŋ ɨ baŋnɨ nɨ̀ ma ni meyn ma keli àdyaʼ ɨ̀ tɨm yɨ àŋena.

⁶Mɨ n-læ meyn nyòʼsɨ̀ ɨ̀toŋ ɨ jèylɨ̀ tɨ̀laʼ tɨ mbzɨ. Mɨ n-nyoʼsɨ meyn ɨ̀toŋ ɨ nì àŋena jɨŋi tèyn ta ghelɨ a ghɨ n-yvɨ mɨlûʼ mɨ̀ ku. Ma zuetɨ àŋena mɨ̀lûŋ mɨ̀ àŋena ɨ nà leŋ a nse.

Bôbo Fɨyini nî meyn njùŋ sɨ̂ ghelɨ Isìlæ̀

⁷Mɨ n-nì nà fêʼtɨ̀ ìkôŋ i mɨ̂kàyn zɨ̀ a Bôbo Fɨyini nɨn kelɨ sɨ̂ ghelɨ ŋweyn. Mɨ n-nì nà fêʼtɨ̀ àwo kì a wù nì kɨ ghɨ sɨ nà koʼsɨ ŋweyn bòm ànkeyna. Mɨ n-nì nà fêʼtɨ̀-à, lî nchwʼ a ghɨ àwo kì a Bôbo Fɨyini nì sɨ̂ ghesɨ̀nà. Wù koynsɨ meyn ìsuyn ɨ̀ nì àwo a juŋà sɨ̂ ghelɨ Isìlæ̀ kɨ dvɨ̂ kɨ tèyn. Mɨ n-nì nà fêʼtɨ̀ àwo nâ kèynà toynɨ̂ ikòŋ i kaynɨ-i zɨ̀ a wù n-kelɨ sɨ̂ ghelɨ ŋweyn.

⁸Bôbo Fɨyini nɨn be meyn na, “Samoʼ Isìlæ̀ nɨn ghɨ ghelɨ̀ ghem. À n-ghɨ wôyn ghem ma àŋena kàʼ ghɨ bû lɨ̀sɨ mà.” Wu n-bè tî ɨ lì àŋena ɨ nà sɨ ghɨ mbœ̀sɨ̀ àŋena.

⁹Àŋena na se sɨ nà yeyn ngeʼ wu nà boŋ yeyn ngeʼ ŋêyn àŋena amoʼ. Wù se sɨ yeyn, wu tum nchì Fɨyini zɨ̀ a yì n-baʼsɨ sɨ̂ ŋweyn, yi ndu fvɨ̀sɨ̀ àŋena sɨ a ngeʼ afu. Kɨ̀ sɨ ɨtuʼ ɨ mu, Bôbo Fɨyini nɨn læ meyn nà kôŋ ghelɨ Isìlæ̀ koynsɨ̂ ìsuyn sɨ̂ àŋena.

¹⁰Mɨtì àŋena ɨ nà to kɨ nɨ̀ àtu-a sɨ̂ Bôbo Fɨyini. Àŋena nà n-to nɨ̀ àtu-a sɨ̂ Bôbo Fɨyini, ni-à ayvɨs a ŋwaʼnɨ-a nà nyôʼsɨ̀ ɨ̀toŋ. Àŋena nɨn læ se se sɨ ni tî, Bôbo Fɨyini ɨ kasi nà sɨ ghɨ mbàynɨ̀ ghelɨ Isìlæ̀ ɨ nà nû àŋena kɨ̀ nô nɨ̀ ngêŋ ŋweyn.

¹¹Aŋena kæ sɨ kasi sɨ kfàʼtɨ (betɨ) ɨtuʼ mu. Àŋena nɨn kfaʼtɨ meyn ɨ̀tuʼ vzɨ̀ a Bôbo Fɨyini nà n-nî awo a kaynɨ-a sɨ̂ àŋena toynɨ̂ a Mosìs ŋêyn ghelɨ ntum nɨ̀ ŋweyn ghɨ li.

¹²Àŋena nɨn bɨfɨ meyn na, ‘Wùl ɨ̀ vzɨ̀ bà a wu n-læ li àŋena ɨ nì àŋena dyàŋ jva i ghaʼnɨ a ki jvà a (bà a?) Wùl ɨ̀ vzɨ̀ a wu n-læ tum na wù na tisɨ̂ ghelɨ Isìlæ̀ ɨ tum Ayvɨs a Ŋwaʼnɨ-a antêynɨ̀ nɨ̀ àŋena a/ba lvɨ̂yn a?’

¹³Wu n-læ tisɨ ghelɨ ghɨ toynɨ a ki jvà ighaʼnɨ. Àŋena nɨn læ dyaŋ kɨ ta nyâm kfaŋ nî yi nà jelɨ̀ a nse iyum.

¹⁴Àŋena nɨn læ meyn nà jelɨ̀ yvɨ̂tɨ̀-à adyaʼ nɨ̀ Àyvɨs a Ŋwaʼnɨ-a. Àŋena nɨn læ jèlɨ yvɨ̀tɨ kɨ ta nyasɨ mbòloʼ ɨlvɨ ta sɨ lù a kfɨyn kàlì ibal. Bôbo Fɨyini, à ti ta wà n-læ lìsi ghelɨ̀ ghya kɨ̀ sɨ ijya sɨ ijya ɨ nì izɨyn ì zæ ɨ nà ngaŋtɨ-à ghelɨ ngvɨmlɨ̂ và.

¹⁵Bôbo Fɨyini ta wà n-ghɨ iyvɨ, ki ghes alèʼ a laynɨ-a nɨ̀ và. Alêʼ kì a iŋwâʼ ì zæ nɨn ghɨ ateyn. Ghèsɨ bu fì yeyn wi adyaʼ à kya, yeyn wi ikôŋ ì zæ nɨ̀ ìkoynsɨ isuyn nɨ̀ và.

¹⁶Bôbo Fɨyini, wà n-ghɨ bò wes. Abɨ̀làhâm kæ mo ghes, Isìlæ̀ ɨ faŋ tɨ̀ kèli/kemnɨ na ghès nɨn ghɨ woyn ŋweyn mɨtì Bôbo Fɨyini, wà n-ghɨ bò wes. Wà n-ghɨ bò wes sɨ a ndyèyn ìdyà. Wà n-ghɨ mbœ̀sɨ̀ yes kɨ̀ sɨ ɨtuʼ mu.

¹⁷O Bôbo Fɨyini, wà vìsi na ghès tosɨ mɨtem mês sɨ̂ và ta ghɨ̀ ghà, ɨ̀ kàsi sɨ a wa ibàm a? Wà nì na mɨ̀têm mês kosa sɨ a wa ɨwùyn ta ghɨ̀ ghà? Ghès na bu fì koʼsɨ̂ wì vâ a. Kasi gvi gàmtɨ ghes a Bôbo ghelɨ ghɨ felɨnɨ nɨ̀ và. Gàmtɨ ghes a Bôbo ɨ ghelɨ ghì a wà n-choʼ lèm sɨ a nyɨŋ na à n-ghɨ ghelɨ̀ ghya.

¹⁸Ghelɨ̀ ghya ghì a wa n-choʼ lèm nɨn læ koʼsɨ vâ a wa ndo kɨ̀ sɨ a fɨ̂lêŋnɨ̀ fɨ ɨlvɨ têyn, mɨtì mbàynɨ̀ seysɨ bebsɨ meyn ndo i laynɨ nɨ̀ và nâ yèyn.

¹⁹Bôbo Fɨyini ghèsɨ̀ sɨ ghɨ kɨ ta ghelɨ a ghɨ bû tìmi nà yvɨnɨ̂ ìsaʼ ì zæ. Ghès sɨ ghɨ kɨ ta ghelɨ ghì a wà bû tìmi bè achi a li-a na ghès nɨn ghɨ ghelɨ̀ ghya.