Isaiah 65

Bôbo Fɨyini nɨn saʼ ghelɨawo a bɨ-a ɨ̀ bœ̀sɨ̀ ghelɨ ŋweyn

¹Bôbo Fɨyini nɨn be meyn na, “Ghelɨ yeyn meyn mà, bùla ghɨ tî nà kɨŋ mà. Ma dyeyn meyn ngêŋ yem sɨ̂ ghelɨ bula ghɨ tî nà bɨfɨ mà. Ma dyêyn meyn ngêŋ yem sɨ̂ tɨ̀laʼ tɨ tɨ dzɨ̂ sɨ̂ mà mɨtì mɨ nà n-bê kɨ na mà wèyn, gvɨ̂tɨ̀ sɨ gàmtɨ zɨ.

²Fɨyini fɨ ɨ bè sɨ̂ ghelɨ Isìlæ̀ na, ‘Ma naysɨ meyn ɨ̀wu wom sɨ achi a fɨ̂blɨ̀̀-à jâŋ ghelɨ na ghɨ gvi, àŋena leʼ sɨ yvɨ ma. Àŋena to meyn nɨ̀ àtu-a ɨ̀ kàsi sɨ a ma ibàm.’

³À n-ghɨ ghelɨ nî àwo a bɨ-a kya kɨ nô kya. Àŋena nô ghɨ̀ jɨ̀m nɨn nî na mà na nyôʼsɨ̀ ɨ̀toŋ kɨ̀ mɨlvɨ ɨ̀n jɨ̀m, nyôʼ illeŋ ɨbwaŋ ifu nɨ̀ mɨyini mɨ̀ àteyn.

⁴Àŋena nɨn ndû duʼ ɨlwèʼ ghè a ghɨ n-ngvɨmì ghelɨ ateyn. Ghɨ n-ndû ghɨ chi afu ɨ nà taŋî tàŋi sɨ̂ nkfɨsɨ nsesɨ. Àŋena nɨn kfɨlɨ njwò njfɨnyàm fî kfɨlɨ nyam sɨ lisɨ sɨ layn wi ta isaʼi nɨn dyêyn, nyvɨ mu mɨ̀ njwò àteyn.

⁵Àŋena nɨn se sɨ ni tî ghɨ nà bê sɨ̂ ghelɨ ghɨ li na,‘Ka yi n-kɨ̀ŋtɨbàʼsɨ sɨ̂ mà, yì leʼ sɨ a ma ngùŋ bòm ta mɨ n-layn ta isaʼi nɨn dyêyn chwô và. Ghelɨ nâ ghèyn nɨn ghɨ kɨ ta Fɨleʼ ɨlvɨ ta fɨ n-zɨ a wùl azue. Àŋena nɨn ni-a ɨtoŋ wom balî kûm àŋena kɨ̀ ta ɨyvɨs vzɨ̀ a wu n-bali kɨ mɨlvɨ (mɨchi) ɨ̀n jɨ̀m.

⁶Mà sɨ ghɨ ma ma choʼnɨ meyn sɨ fu ngeʼ sɨ̂ àŋena. Iwo zɨ̀ a mɨ n-nì nî sɨ̂ àŋena ghɨ ghɨ wi sɨ weynsɨ. Samoʼ mɨ n-nì lâʼ àŋena kɨ̀ ɨfyèʼ ɨ mbɨsɨ nɨ̀ àŋena.

⁷Mɨ n-màʼ ngeʼ a yi atu baʼsɨ̂ nɨ̀ ghɨ̀bo ghi. À n-bê mà Bôbo Fɨyini bòm ta àŋena nɨn koʼsɨ mɨyini a kfɨynsɨ. Àŋena nɨn bebsɨ̂ ìzɨyn ì yemi a kfɨynsɨ. Mɨ n-fu ngeʼ sɨ̂ àŋena kɨ̀ ighel ta mbɨ àŋena nɨn ghɨ. Mɨ n-làʼ àŋena sɨ awo afî a àŋena ti meyn nì koʼ.

⁸Bôbo Fɨyini bè na,

“Mɨtì, mɨ n-nì bebsɨ̂ wi àŋena ghɨ̀ jɨ̀m. Wùl ɨ nì nà kam mɨ̀lûʼ a mɨtàm, ɨ̀ sesɨ màʼi ilɨŋ ateyn, wùl ɨ̀lvì ɨ nà chwotɨ̂ bê na ka wu n-màʼì bòm ta mɨ̀lùʼ bu ghɨ ateyn. Yi n-ghɨ kɨ ighel ta mɨ n-nì nî bòm ghelɨ ghɨ felɨnɨ nɨ̀ mà. Mɨ n-nì bebsɨ̂ wi àŋena ghɨ̀ jɨ̀m afu.

⁹Mɨ n-nì boysɨ̂ ghelɨ Isìlæ̀ a àŋena bzɨ yam. Àŋena læ̀ lî ìlaʼ ì yemi zɨ̀ a yi n-ghɨ a kfɨynsɨ a Judà nà kelɨ-a. Àŋena nɨn ghɨ ghelɨ̀ ghem ghì a mà choʼ lèm sɨ a nyɨŋ . Àŋena læ̀ lî ìlaʼ ateyn naa à n-ghɨ ìlaʼ i àŋena. À n-ghɨ ìlaʼ zɨ̀ a ghelɨ ghɨ felɨnɨ nɨ̀ mà læ̀ nà chi ateyn.

¹⁰Ibal i Shalòn ì læ̀ nà ghɨ àlêʼ kì a yi n-lêm njɨ̀ sisɨ nɨ̀ bzɨsɨ afu, a ibal i Achòl na ghɨ àlêʼ ì a yi n-lêm nyam sisɨ na sɨ na yvɨ̀tɨ̀ afu. Ghelɨ ghì a ghɨ n-yeʼtɨ a ma ɨwùyn læ̀ nà yvɨ njùŋ.

¹¹Mɨtì sɨ̂ zɨ̀ ghî a yi chàs meyn Bôbo Fɨyini ɨ̀ lèʼ sɨ nà koʼsɨ a kfɨyn ilaynɨ nɨ̀ mà, yi ndu chwòsɨ̀ ɨ̀fwo ɨ yɨnɨ abaŋ nɨ̀ Gâd ɨ Fɨyini fɨ atu a juŋà, màʼ mɨ̀lûʼ sɨ̂ Menì ɨ Fɨyini fìfɨ̀ a fɨ n-fu ichi i juŋì.

¹²Mɨ n-nì ni-à a ghɨ zuetɨ zɨ iwòŋ. Zɨ̀ ghî nô ghɨ̀ jɨ̀m a yi n-yvɨnɨ wi Bôbo Fɨyini læ̀ kfɨ mɨ̀lùmchuŋ ma à bɨ̀mi kɨ̀ zɨ sɨ kfɨ. Yi n-kelɨ sɨ læ̀ sɨ gayn têyn bòm ta ma jaŋ meyn zɨ̀ yi faŋ tɨ̀ bɨ̀mi. Ma taŋi meyn sɨ̂ zɨ̀ yi faŋ tɨ̀ yvɨ̀tɨ. Yi ti meyn nà nî àwo a bɨ-a kɨ̀ nô a ma asɨ. Yì choʼnɨ meyn sɨ nà nî awo kì a mɨ n-bâyn.

¹³Bôbo Fɨyini kæ sɨ nà bê na,

“Ghelɨ ghɨ felɨnɨ nɨ̀ mà læ̀ nà yɨ-a mɨtì zɨ kfɨ jeŋ. Àŋena læ̀ nà kelɨ àfo sɨ nyvɨ mɨtì yi læ̀ nà kfɨ ɨ̀toŋ ɨ yumnɨ. Ghelɨ̀ ghem læ̀ nà saŋlɨ̂ kɨ saŋlɨ mɨtì a ghɨ na wumsɨ̂ kɨ wumsɨ zɨ.

¹⁴Ghelɨ̀ ghem læ̀ se sɨ saŋlɨ nà yem njàŋsɨ̀ mɨtì a yì na dzɨ̀ bòm ìlûm zɨ̀ a yi n-yvɨ a yi a mɨ̂tèm. Yi læ̀ nà koynsɨ̂ dzɨ̂ bòm mɨ̀lùmchuŋ mzɨ̀ a yi n-yvɨ.

¹⁵Ghelɨ ghì a mà choʼ lèm læ̀ nà lî àzɨyn à ki-a te mbàynɨ̀ sɨ àŋena nɨ̀ ànkeyna. Nô mà Bôbo Fɨyini ɨ bò ɨ̀dwaʼ ɨ̀ jɨ̀m læ̀ ni-a a yì kfɨ ikfɨ i bzɨ-i, mɨtì mà læ̀ fu ìzɨyn i fɨ-i sɨ̂ ghelɨ̀ ghem.

¹⁶Mà læ̀ fu ìzɨyn i fɨ-i tî a nô mɨ ndà na bɨfɨ ìboysɨ ilaʼ nâ ghàyn toynɨ̂ kɨ izɨyn nɨ̀ Fɨyini fìfɨ̀ a fɨ n-bê mɨ na gha nî kɨ tì. Nô mɨ ndà na chfɨ̀nɨ̀ sɨ ni iwo ilaʼ nâ ghàyn chfɨ̂nɨ̀ toynɨ̂ kɨ izɨyn nɨ̀ ɨ̀nfeynfɨ. Yi læ̀ nà ghɨ tèyn bòm ta mà læ̀ bu fì nyôʼsɨ̀ wì ɨtoŋ sɨ̂ zɨ̀ ɨ̀ lèsɨ̀ àwo a bɨ-a nɨ̀ zɨ̀.

Fɨyini fɨ ɨ nì faytɨ̂ ìyvɨ i fɨ-i, fɨ̀ fàytɨ nse ifɨ.

¹⁷Bôbo Fɨyini nɨn bè na, “Mɨ n-bom ìyvi i fɨ-i ɨ̀ bom nse ifɨ. Wùl læ̀ nà bu fì bêtɨ̀ wì awo a chwonɨ-a ɨ̀ læ̀ faŋ tɨ̀ fì tɨ̀ kfàʼtɨ mɨ kfaʼtɨ.

¹⁸Yì na saŋlɨ̂ kɨ saŋlɨ fî dêŋsɨ̀-à bòm àbâʼlɨ̀ kì a mɨ n-nì bâʼlɨ̀. Mɨ n-nì bâʼlɨ̀ Jèlusalèm a à na ghɨ àlêʼ nô mɨ ndà ɨ kôŋ sɨ nà ghɨ afu. Ghelɨ ghì a ghɨ n-læ nà chi afu læ̀ nà saŋlɨ-à.

¹⁹Nô mà læ̀ nà dêŋsɨ̀ bòm Jèlusalèm. Mà læ̀ nà ki àŋena koŋà. Wùl læ̀ bu fì yvɨ wi idzɨ̂ yi fvɨ̂ koʼ a Jèlusalèm. Wùl ɨ ghɨ wi sɨ læ̀ sɨ fì sɨ dzɨ ikumi ɨwùyn.

²⁰À læ̀ nà ghɨ a mzɨ ifɨ nɨ̀ Fɨyini fɨ nâ ghàyn, wàyn ɨtwelâ ɨ bu fì kfɨ wi. Wùl læ̀ nà dvɨynà wu jæ kfɨ. Wùl læ̀ kæ kfɨ ghɨ bèŋ ɨvɨ, a à na ghɨ ma wù tèyna kfɨ̀ kfɨ. Wùl ɨ̀ kfɨ bula wù chem bèŋ ɨvɨ à nà ghɨ ma à te Fɨyini tè ŋweyn.

²¹À læ̀ nà ghɨ ɨtuʼ nâ ghàyn, ghelɨ ɨ bâʼlɨ̀ ndosɨ àŋena ghɨ nà chî ateyn. Ghelɨ læ̀ nà yelɨ gveynsɨ mɨtàm nɨ̀ àŋena ghɨ nà kœ̂ mɨ̀tam mɨ̀ àteyn.

²²Àŋena læ̀ kasî bâʼlɨ̀ ndosɨ àŋenasɨ a ghelɨ ghɨ lû na chî ateyn (na chî kɨ nô ateyn) Àŋena læ̀ bu fì tôʼ wì ɨfwo ɨ yɨnɨ na ghelɨ ghɨlû na yɨ-a. Kɨ̀ ighel ta fɨkâʼfɨ nî fɨ nà chi sɨ a ndyèyn ìdyà ghelɨ̀ ghem læ̀ nà chî kɨ tì. Ghelɨ̀ ghem ghì a mà chòʼ meyn lèm læ̀ boynɨ̂ yɨ ɨ̀fwo vzɨ̀ a àŋena nɨn felɨ̀ nɨ̀ ɨ̀wu àŋena.

²³Àŋena læ̀ nà felɨ̀ ìfêl i àŋena yi lê wì salû. Àŋena læ̀ nà bzɨ̂ woyn afu nseʼi ɨ ghɨ wi. Àŋena læ̀ nà ghɨ ghelɨ ma à bòysɨ Bôbo Fɨyini. Bôbo Fɨyini læ̀ boysɨ̂ àŋena baʼsɨ̂ nɨ̀ woyn woyn àŋena.

²⁴Àŋena læ̀ nà se sɨ jem kɨ jem, ma bèynsɨ kɨ beynsɨ. Àŋena na bu taŋî kɨ taŋi ma yvɨ kɨ yvɨ.

²⁵Nyamsɨ abo læ̀ nà yɨ ŋêyn woyn njɨ̀sɨ̀ akaʼ àmòʼ. Bzɨkemsɨ ɨ yɨ ŋêyn mbòŋsɨ̀ kɨ̀ alêʼ àmòʼ. Mbamsɨ læ̀ nà mûʼ kɨ àbɨ̂l. Nyam ì lì læ̀ bu fì fu wi ngeʼ sɨ̂ ìlì a kfɨyn i laynɨ nɨ̀ mà. Nyam ì lì læ bu fì zue wi ìlì. À n-bê mà Bôbo Fɨyini.