Isaiah 48

¹Ghelɨ ndo nɨ̀ Jàkôb, yì yvɨtɨ.

Yì yvɨtɨ, ɨ zɨ̀ ghì a ghɨ n-toŋtɨ na ghelɨ Isìlæ̀ ma yi fvɨ̀ ɨtweŋ nɨ̀ Judà. Yì yvɨtɨ, ɨ zɨ ghì a yi n-yɨ mɨkâyn (chfɨ̀nɨ) izɨyn nɨ̀ Bôbo Fɨyini ɨ bè na yi nkoʼsɨ̂ Fɨyini fɨ ghelɨ Isìlæ̀ mɨtì lêm wì ichfɨ̂nɨ̀ ì zɨ-i.

²Yi n-nî tì bê na yi n-ghɨ ghelɨ ntèʼ i laynɨ nɨ̀ Fɨyini fɨ, yeʼtɨ̂ ɨwuyn nɨ̀ Bôbo Fɨyini ɨ Bò Ɨ̀dwaʼ Ɨ̀ Jɨ̀m.

³Nô mɨ ghà ta kɨ n-læ gàyn, mɨ n-læ meyn fèʼtɨ̀ sɨ̂ zɨ̀, mɨ nà n-fêʼtɨ̀ mɨ ɨlvɨ gha, ma nì yi gvɨ̀tɨ gayn kɨ ighel.

⁴Mɨ n-læ nà nî mɨtì, kya kɨ nô kya na yi n-to nɨ̀ àtu-a. Mɨ nà n-kya na mbɨ sisɨ ni meyn yi na boynɨ̂ wì sɨ ngvɨs zɨ kɨ ta yi n-boynɨ wi sɨ ngvɨs akas. Mbɨ sisɨ nɨn to a yi ɨwùyn kɨ̀ ta idyayn.

⁵À ti iwo zɨ̀ a mɨ n-læ fèʼtɨ awo kì a kɨ læ̀ jæ gayn sɨ̂ zɨ̀ nô sɨ ɨtuʼ. Mɨ n-læ meyn nì yi keli jæ ta ka kɨ gayn. Mɨ n-læ nà nî tì na ka yì na bè na à n-nî ɨ̀nfyèʼsɨ̀ vzɨ vzɨ̀ a yì fàytɨ nɨ̀ ɨ̀nkàʼ nà koʼsɨ-à.

⁶Yi yvɨ meyn fì yeyn awo nâ kèynà nô à jɨ̀m a mɨ n-læ bè na kɨ læ̀ gaynà. Yì kàʼ lvɨ̂yn a yì na fèʼtɨ̀ ta yi n-læ nà ghɨ (gaynà). Sɨ zɨ̀tɨ lvɨ̂yn, mɨ n-nì fêʼtɨ̀ àwo a fɨ-a a li-a sɨ̂ zɨ̀. Mɨ n-nì fêʼtɨ̀ àwo a li-a kì a kɨ n-ghɨ a n-lèytɨ yi kya wi.

⁷Awo nɨn ghɨ ma ghɨ faytɨ kɨ̀ lvɨ̂yn. Awo nâ kèynà nɨn ghɨ bula yi timi yvɨ. Mɨ n-læ lèytɨ awo ateyn na ka wùl læ̂ nà ghaŋsɨ̂ ɨ̀wuyn bê na, ‘Mɨ n-læ meyn nà kya àwo nâ kèynà.”

⁸Yi bû tìmi nà kya kèsa sɨ yvɨ mɨ yvɨ, kɨ̀ sɨ ɨtuʼ ɨ mu, ɨtuŋlɨ ɨ̀vzɨ bû tìmi yvɨ. Mɨ n-læ meyn nà kya na yì kæ keli a yi na tɨm tɨ̀kfɨm sɨ̂ ɨ̀nfyèʼsɨ̀ vzɨ bê na, à ti nà bu sɨ̂ ɨ̀mêyn ma awo nâ kèyna bu gàyn. Yì lum sɨ to nɨ̀ àtu-a sɨ̂ mà kɨ̀ sɨ a nzɨ̀tɨ.

⁹Mɨtì bòm wul ɨ vzɨ̀ a mɨ n-ghɨ ŋweyn. Mɨ n-kul àtem sɨ faŋ tɨ̀ nyàŋsɨ̀ sɨ fu ngeʼ sɨ̂ zɨ̀. Mɨ n-weynsɨ̂ kɨ weynsɨ bòm ìkoʼsɨ zɨ̀ a tɨlaʼ tɨ mbzɨtɨ læ̀ nà koʼsɨ ma. Mɨ n-kul àtem tèyn ta ka mà faŋ tɨ̀ mèsi zɨ sɨ atû nse.

¹⁰Ma momsɨ meyn zɨ tòynɨ a ngeʼsɨ têyn ta ghɨ n-nî ghɨ nyòʼ àso ɨkwo a fɨfâ sɨ nì na kɨ na jofà. Mɨtì ma bû nì na yì toynɨ ɨvɨ̀s. Mɨ n-læ ni na yì toynɨ a ngeʼ sɨ bemnɨsɨ.

¹¹Mà læ̀ bœ̂sɨ̀ zɨ̀ bòm wul ɨ vzɨ̀ a mɨ n-ghɨ ɨ̀ŋweyn. Mà læ̀ bœ̂sɨ̀ zɨ̀ kɨ bòm ìzɨyn ì yemi. Mà kàʼ ma bû vìsi na ghɨ bebsɨ izɨyn ì yemi, ma mà kàʼ ma bû bɨ̀mi na ghɨ li ikoʼsɨ ì yemi fù sɨ̂ wùl ɨ wûlù.

¹²Yì yvɨtɨ sɨ̂ mà a ghelɨ isas i ndo nɨ̀ Jàkôb. Yì yvɨtɨ sɨ̂ mà a ghelɨ Isìlæ̀ ghì a mà chòʼ meyn na à n-ghɨ ghelɨ̀ ghem. Mɨ n-ghɨ nzɨ̀tɨ ghɨ ngòʼsɨ.

¹³À n-læ faytɨ ma ɨ faytɨ mbzɨ yèyn nɨ̀ ɨ̀wû wom. À n-læ faytɨ ma ɨ faytɨ ìyvɨ nô mɨ nɨ̀ ghà vzɨ̂ a kɨ n-ghɨ ateyn. Mɨ n-læ jàŋ iyvɨ nɨ̀ nse, àŋena ɨ làlì ɨ timi kɨ ɨlvɨ ɨ̀mòʼ. (Mɨ n-læ be kɨ bê, iyvɨ i nɨ̀ nse ɨ nà sɨ ghɨ kɨ ghɨ kɨ ɨlvɨ ɨ̀mòʼ.)

¹⁴Yì gvi yvɨ̀ŋtɨ̀ nô zɨ ghɨ̀ jɨ̀m ɨ̀ yvɨ̀tɨ. Ànfèʼsɨ̀ a li-a nɨn ghɨ a kɨ timi fèʼtɨ̀ iwo yèynì a? Fèʼtɨ na wùl ɨ̀ vzɨ̀ a Bôbo Fɨyini choʼ nɨn nî ìwo zɨ̀ a Fɨyini fɨ bàʼtɨ kûm Babilòn a. Wù nì kèʼ Babilòn ɨ̀ tɨm yɨ̀ sugèyʼsɨ àŋena.

¹⁵À n-læ be kɨ nô mà iwo nâ yèynì. À n-nì mà na wù ni iwo nâ yèynì. Nô mɨ ghà ta mɨ n-kɨŋ na wù ni læ̀ nà ndû kɨ nɨ̀ àsɨ-a.

¹⁶Yì kɨŋtɨ bàʼsɨ sɨ̂ mà, ɨ̀ yvɨ̀tɨ ìwo zɨ̀ a mɨ n-bê. Kɨ̀ sɨ a nzɨ̀tɨ mbzɨ ma bu timi nà bê ìwo a nlèytɨ. Iwo ateyni se sɨ gàyn ma nà ghɨ afu. À ti iwo zɨ̀ a Bôbo Fɨyini nɨn bê. Bôbo Fɨyini tum meyn mà lvɨ̂yn na mà ni ifêl i ŋweyni. Wù fu meyn àdyaʼ sɨ̂ mà.

¹⁷Bôbo Fɨyini ɨ mbœ̀sɨ̀ ɨ Fɨyini fɨ laynɨ fɨ nɨ̀ ghelɨ Isìlæ̀ nɨn bè na, “À nà n-ghɨ mà Bôbo Fɨyini ɨ Fɨyini fifɨ. Mɨ n-yeʼî zɨ̀ nɨ̀ àwo kì a ka kɨ na gâmtɨ̀ zɨ̀. À dyèyn mà dzɨ zɨ̀ a ka yì na chî ateyn. (À dyèyn mà dzɨ zɨ̀ a ka yì na jelɨ̀ ateyn.)

¹⁸À n-læ nà ghɨ na yì yvɨ iwo ì yemi, lêm tɨ̀saʼ temtɨ, ma yi n-kelɨ kɨ mɨlvɨ ɨ̀n jɨ̀m, a nchînɨ̀ àtì-ati nɨ̀ zɨ̀ na ghɨ kɨ ta jva ighaʼnɨ ɨlvɨ ta yi n-leŋ ɨwuyn.

¹⁹Ma woyn woyn ghi sɨ ghɨ kɨ ta asese a mbæ̀ jvà. Woyn ɨ ghɨ ghɨ taŋ lê ɨ̀tu. Ma izɨyn i àŋena kàʼ yi bu læ̀ le sɨ atû nse, ma bû læ̀ vìsi na ilaʼ i li tɨm yɨ̀ zɨ.

²⁰Yì nyaŋsɨ lù sɨ ilaʼ i Babilòn kàsi nà kfâ. Yì leʼ sɨ ilaʼ nɨ̀ ghelɨ Babilòn. Yì na byal fêʼtɨ̀ ìwo nâ yèynì nɨ̀ ìsaŋlɨ i luʼa. Yì tum ɨ̀ fèʼtɨ̀ tɨghaŋ tɨ mbzɨ tɨ̀ jɨ̀m, fêʼtɨ̀ na Bôbo Fɨyini kasi meyn yuyn teyn ghelɨ ŋweyn ɨ ghelɨ Isìlæ̀.

²¹Àŋena nɨn læ toynɨ a nse iyum bula ɨtoŋ mu yum àŋena. Wù n-læ meyn bàs ìwu, mu nà fvɨ̂ ateyn. Mɨ nɨn fvɨ meyn iwu àŋena nà nyvɨ-a.

²²Bôbo Fɨyini nɨn bè na, “Mbôynɨ̀ nɨn ghɨ wi sɨ̂ ghelɨ ghì a ghɨ n-nî awo a bɨ-a. (Ghelɨ awo a bɨ-a nɨn kelɨ wi mbôynɨ̀ nô sakos.)