Isaiah 47
This book is a draft. It has been translated but has not yet finished checking, and is published here so the community can read and respond to it.
Ghɨ læ tɨm yɨ Babilòn
1Bôbo Fɨyini be meyn na, “Ilaʼ i Babilòn, wà n-ghɨ ta waynda ngòyn, kya wi wul ɨ lûmnɨ̀. Suʼi ɨ dùʼi abɨ̀l. Dùʼi a nse a ghɨ wi achɨ a tɨ̂fòyn (koʼnɨnɨ-a) a waynda ngòyn Babilòn, bòm ta ghɨ na bu fì tɨm wi tɨkfɨm a wa ɨwùyn, bu fì yeyn wi na wà n-kelɨ wi na wà n-tôʼnɨ̀ wì.
2Nguʼtɨ lvɨ̂yn ɨ nà gvâ àbayn iti. Choʼ lìsi ndzɨ sìsɨ̀ a wà chɨ̀l ikêʼ ateyn tì. Koʼsɨ ndzɨ shyasɨ. Ka wa n-chɨl afyeyn à kya. Koʼsɨ ndzɨ shyasɨ ɨ zɨ dyàŋ jvasɨ.
3Wà læ̀ jelɨ̀ nɨ̀ ìsas i yumi ɨ̀ wùmsɨ ngêŋ zyâ. Mà læ̀ fu ngeʼ sɨ̂ Babilòn ɨ̀ faŋ tɨ̀ vìsi nô wul ɨ̀mòʼ.
4Izɨyn i mbœ̀sɨ̀ yes nɨn ghɨ Bôbo Fɨyini ɨ Bò Ɨ̀dwaʼ ɨ̀ jɨ̀m. Mbœ̀sɨ̀ yes nɨn ghɨ Fɨyini fɨ laynɨfɨ nɨ̀ ghelɨ Isìlæ̀.
5Waynda ngòyn ɨ Babilòn, kɨŋ alêʼ kɨ fɨ̂m kɨ tèyn ɨ̀ lèytɨ̀ ateyn. Wà lêytɨ̀ wa chimi kɨ têyn moŋ. Ghelɨ na bu fì toŋtɨ̂ wì vâ na nàfòyn tɨ̀laʼ tɨ mbzɨ.
6Mɨ n-læ meyn nyòʼsɨ̀ ɨ̀toŋ sɨ̂ ghelɨ̀ ghem.. Mɨ n-fu meyn ngeʼ sɨ̂ ghelɨ̀ ghem ɨ we àŋena a yi awu. Mɨtì yi faŋ tɨ̀ kòynsɨ isuyn sɨ̂ àŋena. Yi n-læ meyn fu nfeʼ i bemnɨ sɨ̂ ghɨ̀ lema.
7Wà n-læ meyn nà ghaŋsɨ̂ ɨ̀wuyn, kfâʼtɨ̀ na wà na ghɨ nàfòyn mbzɨ nô ta ka ghɨ̀ læ̂ ghɨ̀. Wà n-bu læ kitɨ awo kì a wà n-nî. Wà n-bu læ nà kfâʼtɨ̀ ìwo zɨ̀ a yi kàʼ a yi gayn sɨ̂ và bòm nchînɨ̀ zyâ.
8Yì yvɨtɨ iwo zɨ̀ a mɨ n-bè sɨ̂ zɨ̀ lvɨ̂yn. Babilòn yi n-kɨŋ sɨ yɨ ɨfwo ɨ jûŋ. Yi n-kfâʼtɨ̀ na ilaʼ i li kàʼ yi bû læ̀ tɨm yɨ̀ vâ. Wà n-ghaŋsɨ̂ ɨ̀wuyn bê na wùl ɨ̀lvì (Ilaʼ i li) nɨn ghɨ wi a bu kɨ mà. Wà n-ghaŋsɨ̂ ɨ̀wuyn bê na mà kàʼ ma bû læ̀ nà ghɨ wî nkfɨ. Ma fi bè na mà læ̀ lê wì woyn ghem.
9Awo nâ kèynà læ̀ gâyn sɨ̂ và kɨ̀ ɨlvɨ ɨ̀mòʼ. Awo nâ kèyn nô à jɨ̀m læ̀ gâyn kɨ achi àmòʼ. Wà læ̀ lê wôyn ghya ɨ̀ lè lûm vâ. Ngeʼ nâ sèynsɨ̀ nô sɨ̀ jɨ̀m læ̀ kolî và nô mɨ ta wà n-fyeŋ fɨnyaʼ fɨ bemnɨfɨ, fyeŋ kɨ a dzɨsɨ a dzɨsɨ.
10Zɨ̀ ghelɨ Babilòn, yì ti n-kfâʼtɨ̀ na awo a bɨ-a nɨ̀ zɨ-a nɨn gàmtɨ̀ (bœ̀sɨ̀) zɨ̀. Yì ti nà bê na à n-ghɨ kɨ zɨ̀ ghelɨ ghɨ li bu ghɨ wi. Itof ì zɨ-i nɨ̀ àwo kì a yi n-kya jɨŋsɨ meyn zɨ̀. Yì na ghaŋsɨ̂ ɨ̀wuyn bê na, “À n-ghɨ kɨ mà a mbzɨ wùl ɨ̀lvì ɨ bu fì ghɨ wi.
11Mɨtì ngeʼ ì bemnɨ nɨn kolî zɨ̀, a ifɨyntɨ ì zɨ-i faŋ tɨ̀ tàmtɨ̀. Ngeʼ nâ yèyn nɨn kolî zɨ̀ a yì na kya wi sɨ leʼ iyeynì. (bula yi tî nà kfâʼtɨ̀-à (kya).
12Yì na fyeŋ læ̂ mɨ̀nyaʼ mzî nɨ̀ mɨ̀fvɨ̂ mzɨ̂. Yì na yeʼtɨ̂ a mɨnyaʼ nɨ̀ mɨ̀fvɨ̂ mzɨ̀ a yi n-læ nà felɨ̀ sɨ̂ ŋweyn ɨtuʼ ta yi nà n-ghɨ woynda. Yì na yeʼtɨ̂ kɨ ateyn ɨlvɨ fɨli a ngeʼsɨ faŋ tɨ̀ kòli zɨ. Yì na yeʼtɨ̂ kɨ ateyn ɨlvɨ fili a yi faynsɨ mbàynɨ̀ sisɨ.
13Zɨ̀ ghelɨ Babilòn, itebtɨ zɨ̀ a yì fsɨ̀ sɨ̂ ghelɨ mɨfvɨ̀ nɨ̀ ghelɨ mɨnyaʼ ɨ (mesi meyn adyaʼ sɨ a yi ɨwùyn. (nî meyn yi bol). Ghelɨ ghì a ghɨ n-fyeŋtɨ awo sɨ̂ mɨ̀njèyn fvɨ gvì. Ghelɨ ngàŋ nɨ̀ zɨ̀ ghì a ghɨ kɨ mɨ̀njêyn, fêʼtɨ̀ kɨ njoŋ nɨ̀ njoŋ awo kì a kɨ n-læ̀ jæ gayn sɨ̂ zɨ̀. Àŋena fsɨ zɨ sɨ a ngeʼ ghè a yì n-ghɨ sɨ koli zɨ (tî).
14Samoʼ, àŋena nɨn ghɨ ta ɨwi, ɨvɨsɨ ghɨ sɨ læ̀ sɨ nyòʼ na wu fɨ, ma àŋena læ̀ bœ̂ wì sɨ ilemi i ɨvɨ̀s nâ ghàyn. Ɨkfêtɨ̀ ɨvɨ̀s læ̀ nà ghɨ wi ta wùl kàʼ a wù duʼi nà yosa.
15À ti ta ghelɨ ngàŋ læ̀ gôʼsɨ̀ kɨ ɨvɨ̀s. Àŋena ghì a ghɨ fèlɨ̀ meyn sɨ̂ àŋena kɨ̀ sɨ ɨtuʼ wayndà nɨ̀ và. Nô mɨ ndà ɨ jasɨ kɨ a ŋweyn a dzɨ, wùl ɨ ghɨ wi a wù kàʼ a wù bœsɨ zɨ sɨ a ngeʼ.