Isaiah 46
This book is a draft. It has been translated but has not yet finished checking, and is published here so the community can read and respond to it.
Mɨyini mɨ̀ Babilòn
1Bêl nɨ̀ Nebò nɨn ghɨ mɨyini mbzɨ̀ a ghelɨ Babilòn nɨ̀n koʼsɨ. Iyi Bêl nɨ̀ Nebò mæ̂ meyn mèsì kɨ̀ mesi. Ghɨ li meyn ɨ̀nfyèʼsɨ̀ aŋena ɨ̀ kùl atû nyamsɨ̀ nà ndû nɨ̀ ɨ̀nfyèʼsɨ̀ ateyn. Ghɨ lî meyn Mɨyini mɨ̀ àŋena nà yeʼtɨ̂ nyamsɨ nɨ̀ ɨ̀mêyn. Nyamsɨ ateynsɨ jelɨ meyn bol nà wo sɨ jèl.
2Ɨ̀nfyèʼsɨ̀ ateyn nɨ̀ ghelɨ ghì a ghɨ n-koʼsɨ jel ɨ̀ bol nà felɨ-à. Ma mɨ̀ kàʼ mɨ̀ bû gàmtɨ na ka ghɨ li lù nɨ̀ ɨ̀mêyn baʼsɨ̂ nô nɨ̀ àŋena. Mɨtì ghɨ ghaytɨ meyn lù nɨ̀ ɨ̀mêyn ta ghɨ ghàytɨ ghelɨ ndô nchaʼ.
3Ghelɨ isas i ndo nɨ̀ Jàkôb, yì yvɨtɨ iwo zɨ̀ a mɨ n-bê. Zɨ ghɨ̀ jɨ̀m ghì a ghɨ faŋ a Isìlæ̀, yì (faytɨ/toʼ) yvɨ̀tɨ. Ma toʼnɨ meyn koʼ nɨ̀ zɨ̀ kɨ̀ sɨ zɨ̀tɨ ta ghɨ læ timi nɨ̀ ɨ̀lvâ vzɨ. Ma beʼi meyn jèl nɨ̀ zɨ̀ kɨ̀ sɨ ɨtuʼ ta ghɨ n-læ bzɨ zɨ.
4À n-ghɨ kɨ mà wêyn a ka mà na tôʼnɨ̀ nɨ̀ zɨ̀. Mà na tôʼnɨ̀ nɨ̀ zɨ̀ nô ta ka yì dvɨyn têyn ɨtu vzɨ fɨf. À n-læ faytɨ ma faytɨ zɨ̀. Mɨ n-nì nà tôʼnɨ̀ nɨ̀ zɨ̀. Mɨ n-nì gâmtɨ̀ bœ̂sɨ̀ zɨ̀.
5“Wùl nɨ̀n ghɨ wi ta ghɨ kàʼ a ghɨ feʼnɨ ŋweyn ŋêyn Fɨyini fɨ. Wùl ɨ ghɨ wi a ŋêyn Fɨyini fɨ nɨn ghɨ ighel.
6Ghelɨ ghɨ li nɨn nî ghɨ fvɨ̀sɨ̀ àso ɨkwo a baŋnɨ-a sɨ a àŋena bòsɨ̀, ghɨli fèʼ àso ɨkwo a fɨfâ ɨfyèʼ. Àŋena lì àso ɨkwo ateyn ghɨ làʼ bò àlàm wu faytɨ ànfèʼsɨ̀ nɨ̀ ànkeyna. Ghelɨ ghì a ghɨ n-kelɨ ànfèʼsɨ̀ ateyn a ɨ nguʼ asɨ ateyn ɨ koʼsɨ.
7Ghelɨ ghɨ beʼinɨ châʼsɨ̀ ghɨ tom a mbèʼ ɨ ndu tom alèʼ nɨ̀ ànkeyna, kɨ nà ti kɨ ti afu nêʼlɨ̀ wì, ma kɨ kàʼ kɨ bû jèl. Wùl ɨ̀ jêm sɨ̂ ànfèʼsɨ̀ ateyna kɨ bû bèynsɨ̀ ma kɨ kàʼ kɨ bû gàmtɨ̀ ŋweyn.
8Zɨ̀ ghî a yi n-chasɨ ma, yì betɨ. Yì toʼ (faytɨ) kfàʼtɨ awo kì a mà nì meyn sɨ̂ zɨ̀.
9Yì betɨ awo kì a mɨ n-læ nì sɨ̂ zɨ̀ kɨ̀ sɨ a nzɨ̀tɨ (ɨtuʼ mu). Mɨ n-ghɨ Fɨyini, fɨyini fɨ lifɨ ɨ ghɨ wi. Mɨ n-ghɨ Fɨyini, fɨyini fɨ lifɨ ɨ ghɨ wi ta ma.
10Mɨ n-nî ma fèʼtɨ̀ ìwo jæ na yi læ̂ gàyn. Mɨ n-nî ma fèʼtɨ̀ àwo kì a ka mà læ nì, yi læ nà ghɨ kɨ tì. Mɨ n-kelɨ kɨ sɨ læ̀ sɨ nì iwo zɨ̀ a mɨ n-kôŋ (a mà bàʼtɨ sɨ nì.)
11Ma jaŋ meyn wul dzɨ abàs ghè a ɨchfɨ̂ iyvɨ i nɨn sal ateyn. Wùl àteyn nɨn ghɨ ta mbuʼ àwùmawum. Ma jaŋ meyn ŋweyn na wù gvi nɨ̀ àwo kì a mà bàʼtɨ meyn sɨ nì. Ma be meyn, ghɨ sɨ nì na yi gayn. Ma baʼtɨ meyn, ghɨ sɨ ni kɨ ta mà bàʼtɨ.
12Zɨ̀ ghî a yi n-to nɨ̀ àtu a, yì yvɨtɨ iwo zɨ̀ a mɨ n-bè. Zɨ̀ ghî a yì chòʼnɨ sɨ nà nî awo a bɨ-a, yì yvɨtɨ mà be.
13Mɨ n-ni-à a n-chînɨ̀ àtì-ati nɨ̀ mà dyeyn lvɨ̂yn. Yi n-lì wi ndyèyn sɨ jæ gàyn. Mɨ n-boysɨ̂ zɨ̀ ghelɨ Zayòn. Mɨ n-fu ìghaʼ ì yemi sɨ̂ ghelɨ Isìlæ̀.