Isaiah 49

Wùl ɨ̀ felɨnɨ nɨ̀ Bôbo Fɨyini

¹Zɨ̀ ghì a yi n-ghɨ a mbæ̀sɨ jvâsɨ̀ yì yvɨtɨ. Zɨ̀ ghî a yi n-ghɨ a tɨ̂laʼ tɨ ghɨ a ndyèyn yì toʼ yvɨ̀tɨ. Ghɨ n-læ se sɨ bzɨ ma, ma Bôbo Fɨyini sɨ ghɨ ma wù choʼ meyn mà. Mɨ nà n-bu ghɨ kɨ ɨ̀lvà nɨ̀ nà wom, wu choʼ ma na mà na ghɨ wul ɨ̀ felɨnɨ nɨ̀ ŋweyn.

²Wù n-læ meyn nì itaŋi i ɨ nà fvɨ̂ a ma ɨchfɨ̀ tofɨ ta fɨnyuè fɨ iwòŋ. Wù n-læ meyn kɨ̀ŋtɨ̀ mà nɨ̀ àwu a ŋweyna. Wù n-nî meyn ma nà ghɨ ta fɨ̀nchya ɨlvɨ ta ghɨ chòbtɨ, ghɨ ta fɨ̀nchya a ghɨ chòbtɨ lèm a bò.

³Wù n-be meyn sɨ̂ mà “Wà n-ghɨ wul ɨ̀ felɨnɨ nɨ̀ mà. Isìlæ̀, ghelɨ læ̀ nà koʼsɨ̂ mà bòm và.

⁴Mɨtì ma bèynsɨ̀ ɨ bè na, “Ma felɨ meyn ìfêl iyum. Ma bebsɨ meyn ɨ̀lvɨ wom nɨ̀ àdyaʼ à kema kɨ̀ salû. Mɨ n-kya samoʼ na nô mɨ ghà wom, Fɨyini fɨ nɨn kya. Ɨmyaʼtɨ ɨ̀ wom nɨn kya kɨ Fɨyini femfɨ.

⁵Bôbo Fɨyini be meyn lvɨ̂yn na à n-læ faytɨ ma faytɨ và ɨ we ɨlvà nɨ̀ nà vâ na wà na ghɨ wul ɨ̀ felɨnɨ nɨ̀ mà. Wù n-læ choʼ ma na mà yvɨŋtɨ ghelɨ ndo nɨ̀ Jàkôb ghɨ kasi gvì sɨ̂ ŋweyn. Wu n-choʼ ma na mà baʼtɨ(yvɨŋtɨ) ghelɨ Isìlæ̀ ghɨ kasi gvì nà koʼsɨ̂ ŋweyn (Gvi sɨ̂) ŋweyn.

⁶Wà n-ghɨ wi kɨ wul ɨ̀ felɨnɨ nɨ̀ mà, ghɨ wi kɨ li isas i ndo nɨ̀ Jàkôb na yì kasi gvì sɨ̂ mà, ɨ kasi li gvi nɨ̀ ghelɨ Isìlæ̀ ghì a mà faŋ tɨ̀ zuetɨ. Mɨ n-nì-à a wà na ghɨ ta ibayn sɨ̂ ghelɨ ɨtum ta ka nô ghelɨ ghɨ̀ jɨ̀m a mbzɨ keli ibœ̂ bòm và.

⁷Bôbo Fɨyini nɨn ghɨ mbæ̀sɨ̀ ghelɨ Isìlæ̀. À n-ghɨ Fɨyini fɨ laynɨ fɨ a ghelɨ Isìlæ̀ nɨn koʼsɨ. Wu n-bè sɨ̂ ɨvzɨ̂ a tɨlaʼ tɨ mbzɨtɨ nɨn chasɨ chasɨ fî bâyn ŋweyn ma wù felɨ sɨ̂ ghelɨ ghɨ saʼnɨ. Bôbo Fɨyini ɨ toŋtɨ ŋweyn ɨ bè na, “Tɨfôyntɨ̀ læ̀ lalì sɨ achɨ a tɨ̂fòyn ɨ̀ gvì nà koʼsɨ̂ và, ghelɨ ghɨ tisɨnɨ a mbzɨ læ̀ nà gvî nguʼtɨ̂ a wa asɨ. Ghɨ læ̀ nà nî àwo nâ kèynà bòm wul ɨ vzɨ̀ a Bôbo Fɨyini nɨn ɨ̀ŋweyn, ni-à bòm ta wù n-bê mɨ na gha nî kɨ tì, ɨ Fɨyini fɨ laynɨfɨ nɨ̀ ghelɨ Isìlæ̀ fî a fɨ chòʼ vâ.”

Jèlusalèm ɨ kasi nà ghɨ kɨ ta yì n-læ nà ghɨ sɨ asɨ

⁸Bôbo Fɨyini bè meyn na, “Ɨlvɨ ɨ nì kfeyna a yì gamtɨ vâ na yì yvɨtɨ meyn ìwo zɨ̀ a wà n-læ bè. Achi-a kfeyn meyn na mà bœsɨ vâ ɨ̀ gàmtɨ̀ và. Yì yvɨtɨ! Lvɨ̂yn nɨn ghɨ àchi kì a ka fɨ bœsɨ zɨ ateyn.

⁹Ghɨ læ̀ bê sɨ̂ ghelɨ ghì a ghɨ n-ghɨ a ndô nchaʼ na àŋena fvɨ. Bè sɨ̂ ɨghî a ghɨ n-ghɨ ɨlwèʼ wu fɨ̂m kɨ tèyn na àŋena fvɨ ɨ̀ yèyn ibayn. Àŋena læ̀ fvɨ-à nà ghɨ ta njɨ̀sɨ̀ a ghɨ n-jelɨ̀ toynɨ nɨ̀ ɨ̀nseynsɨ a nse iyum. Ɨfwo ɨ yɨnɨ dvɨ̂ kɨ tèyn a mbæ̀sɨ dzɨ. Àŋena læ̀ nà ghɨ ta njɨ̀sɨ̀ ɨlvɨ ta sɨ kfɨl ɨyol a kfɨynsɨ.

¹⁰Jèŋ læ̀ bu fì yafɨ wi àŋena, a ɨlwêʼ ɨ lumnɨ læ̂ nà bu fì ghɨ wi, chuè ɨ bu fì ghɨ wi sɨ nà lûm ghaʼ àŋena. Mà læ̀ tôʼnɨ̀ nɨ̀ àŋena, a àŋena na jelɨ̀ a dzɨsɨ asɨ a lɨmàlɨ̀mà ɨ ghɨ ateyn.

^11Màlæ̀ ni-à a dzɨ sɨ tosɨ na chwô a kfɨynsɨ. Mà læ̀ faytɨ̂ dzɨ ito a kfɨyn a ghelɨ̀ ghem chwo ateyn.

¹²Samoʼ, ghelɨ̀ ghem læ̀ lû ɨlwèʼ ɨ ndyèynsɨ̀ ɨ̀ gvì. Ghelɨ læ̀ lû abàs ikuè, a ghli lu abàs ghè a ɨchfɨ̂ iyvɨ i nɨn sœ ateyn. Ghɨli læ̀ lû a Synèn a Ijìb.

¹³Iyvɨ i na yema saŋlɨ-à. Mbzɨ, yì na saŋlɨ-à. Kfɨynsɨ ɨ yem àyòmbaŋ saŋlɨ-à. Yì na saŋlɨ-à bòm ta Bôbo Fɨyini nɨn nkfɨmtɨ̂ ghelɨ ŋweyn. Ghɨ sɨ nì sɨ koynsɨ isuyn sɨ̂ ghelɨ ŋweyn ghì a ghɨ n-yeyn ngeʼ.

¹⁴Mɨtì ghelɨ Jèlusalèm ɨ bè na, “Bôbo Fɨyini maʼi meyn ghès. Bè na Bôbo Fɨyini lesɨ meyn ghès.”

¹⁵Bôbo Fɨyini kæ bèynsɨ̀ sɨ bɨf na, “A nàwàyn ti kàʼ a wù lesɨ wayn vzɨ̀ a wù n-nyoŋsɨ a? A wù ti kàʼ a wù faŋ tɨ̀ kòynsɨ isuyn sɨ̂ wàyn vzɨ̂ a wù bzɨ a? Samoʼ, ghɨ̀kì ghɨli nɨn lêsɨ̀ woyn àŋena mɨtì ma mà kàʼ ma bû læ̀ lèsɨ̀ zɨ̀.

¹⁶Zɨ̀ ghelɨ Jèlusalèm, mà kàʼ ma bû læ̀ lèsɨ̀ zɨ̀. Ma nyaʼ meyn ìzɨyn ì zɨ-i a ma ital awu.

¹⁷Ghelɨ ghì a ka ghɨ kasi bàʼlɨ̀ Jèlusalèm nɨn gvì kɨ lvɨ̂yn, mɨtì a ghelɨ ghì a ghɨ tî bèbsɨ leʼ(lu).

¹⁸Yì ki ɨ̀ yeyn iwo zɨ̀ a yi n-gâyn antêynɨ̀ nɨ̀ zɨ̀ ghelɨ Jèlusalèm sɨ yvɨ̀ŋtɨ kɨ ɨlwèʼ ɨlwèʼ sɨ nà kfâ. Samoʼ samoʼ ta mɨ n-ghɨ Fɨyini fìfɨ̀ a fɨ n-chi. Wa nì nà saŋlɨ̂ sɨ(bòm) ghelɨ ghya. Wa nì nà saŋlɨ̂ bòm ghelɨ̀ ghya kɨ̀ ta wî lum nî wu nà saŋlɨ̂ bòm tɨ̀fu tɨ ŋweyntɨ.

¹⁹Ghɨ n-læ meyn bebsɨ ìlaʼ ì zɨ-i yi nà sɨ ghɨ kɨ iyum, mɨtì yi nì nà læ̂ lvɨ̂yn nô sɨ a ŋaŋ sɨ̂ ghelɨ ghì a ghɨ n-gvî sɨ nà chi ateyn. Ghɨ nì fsɨ và sɨ ɨwu nɨ̀ ghelɨ ghì a ghɨ n-bebsɨ vâ a àŋena leʼ ɨ̀ ndù nô a ndyèyn.

²⁰Wôyn ghi ghì a ghɨ bzɨ ɨtum læ̀ bê sɨ̂ zɨ̀ na, “Ilaʼ yèynì nɨn læ̂ sɨ̂ ghès, ghès nɨn kɨŋ àlêʼ kɨ ghaʼ kɨ tèyn sɨ nà ghɨ afu.

²¹Àŋena læ̀ bê tì a wùl na kayntɨ̂ kɨ sɨ a ŋweyn a ngeŋ na, “A ti bzɨ kɨ̀ nô ghès woyn ghèyn a? Woyn ghesɨ nɨn læ meyn kfɨtɨ. Ghès nɨn faŋ nà chemsɨ̂ kɨ fɨ̀sɨ. Ghès nɨn læ̀ nà ghɨ ɨtum ta ghelɨ ndô nchaʼ. Ghès na ghɨ afu ta ghelɨ ɨlvɨ ta ghɨ màʼì maʼi. Woyn ghèyn ti lù wo lvɨ̂yn tèyna a? À ti lèmsɨ sɨ nda àŋena na ghɨ lema a?

²²Bôbo Fɨyini ɨ Bò Ɨ̀dwaʼ ɨ̀ Jɨ̀m nɨn bè sɨ̂ ghelɨ ŋweyn na,

“Mà læ̀ dyêyn nchwæ sɨ̂ ɨ̀tum, mà læ̀ dyeynà a àŋena li kfa nɨ̀ woyn ghɨ lûmnɨ̀. Àŋena læ̀ nà yoyô woyn ghɨkì sɨ kasi sɨ kfa nɨ̀ àŋena.

²³Tɨfôyntɨ̀ læ̀ nà ghɨ ta bæ̀ sɨ̂ woyn ghi. Ghɨ̀ki ntoʼ ɨ ghɨ ta nì sɨ̂ àŋena. Ghɨ læ̀ nguʼ a àŋena asɨ ngvɨ̀mlɨ àŋena. Tɨfôyntɨ̀ ŋêyn ghɨ̀ki ntoʼ læ̀ nà ngvɨmlɨ̂ zɨ̀, yvɨnɨ̂ zɨ̀, a yì kæ sɨ keli na à n-ghɨ mà Bôbo Fɨyini, fì kèli na nô mɨ ndà vzɨ̀ a wù n-yeʼtɨ a ma læ̀ wûmi wì.

²⁴Sugèyʼsɨ bemnɨsɨ kæ sɨ tɨm yɨ ilaʼ ɨ̀ ghàytɨ fsɨ ɨfwo, wùl ɨ̀ bû nà ghɨ sɨ ghal sɨ fsɨ sɨ̂ àŋena. Sugèyʼsɨ̀ kæ ghaytɨ ghelɨ ɨtwaʼ iwòŋ nà nyâblɨ̀ nɨ̀ àŋena wùl ɨ̀ bû læ̀ ghal fsɨ̀ ghelɨ ateyn sɨ adyaʼ.

²⁵Mɨtì Bôbo Fɨyini ɨ kasi bèynsɨ̀ ɨ bè na,

“Samoʼ, à n-ghɨ mɨ ghelɨ ghì a ghɨ ghàytɨ ɨtwaʼ iwòŋ na ghɨ læ̀ ghal fsɨ a. Ghɨ læ̀ kasî fsɨtɨ̂ ɨ̀fwo vzɨ̀ a sugèyʼsɨ̀ læ̀ tɨm yɨ ilaʼ ɨ̀ bèʼì lù nɨ̀ ɨ̀ŋweyn. Mà læ̀ nû fsɨ woyn ghi sɨ̂ àŋena.

²⁶Mà læ̀ ni-à a mbàynɨ sisɨ na kasî zuetɨ̂ ngeŋsɨ àŋena. Mà læ̀ ni-a a jeŋsɨ na yafɨ àŋena sɨ nà zuetɨ ghelɨ àŋena fî kelɨ ɨ̀toŋ ɨ baŋnɨ. Àŋena nɨn læ̀ se sɨ zuetɨ ngeŋsɨ fì nyòʼsɨ̀ ɨ̀toŋ a ghelɨ mbzɨ nò ghɨ jɨ̀m keli na mɨ n-ghɨ Bôbo Fɨyini vzɨ̀ a mɨ n-bœ̂sɨ̀ ghelɨ, fvɨsɨ̀ ghelɨ sɨ a nchaʼ. Àŋena nì kelî na mɨ n-ghɨ Fɨyini fìfɨ̀ a ghelɨ nɨn koʼsɨ fɨ kelɨ àdyaʼ.