Isaiah 13
This book is a draft. It has been translated but has not yet finished checking, and is published here so the community can read and respond to it.
Saʼgha i bɨ kûm ghelɨ Babilòn
1Iyêyn nɨn ghɨ saʼgha kûm ghelɨ Babilòn ta Bôbo Fɨyini nɨn læ dyèyn sɨ̂ Isayà ɨ wâyn Amòz, wu yeyn ta wù yèyn a jem.
2Saʼsha àteyn nà n-bê na, làysɨ abâs a ndzɨ̀sɨ/afo iyvɨ sɨ a nchwæ atû kfɨ̀yn nô àfo a ɨ koʼ wi ateyn/iyum, ɨ byal jàŋtɨ̀ sugèyʼsɨ̀ na, ‘Yì keʼ àŋena/ghelɨ Babilòn, yì zɨ achfɨ̀ a mbàyn nɨ̀ ghelɨ ghɨ tisɨnɨ.
3Ma fu/chwosɨ meyn sɨ a isaʼ sɨ̂ ghelɨ ghɨ laynɨ nɨ̀ mà. Ma jaŋtɨ meyn sugèyʼ sɨ tosɨ nɨ̀ mà na àŋena gvi sìsɨ̀ ghelɨ ghì a ghɨ n-nî ɨtoŋ wom yafa, ɨ ghelɨ ghì a ghɨ n-saŋlɨ ta ghɨ tɨm yɨ̀ ma.
4Yvɨ ta gyasɨ nɨn gvî a kfɨyna, kɨ̀ ta gyasɨ (ghelɨ ghɨ dvɨnɨ-a) inôyn i ghêl a. Yvɨ ta tɨlaʼtɨ nɨn nû a, kɨ̀ ta tɨlaʼ tɨ dvɨnɨtɨ a tɨ yvɨ̀ŋtɨ̀. Bôbo Fɨyini ɨ Bò Ɨ̀dwaʼ ɨ̀ jɨ̀m nɨn yvɨ̂ŋtɨ̀ sugèyʼsɨ̀ na sɨ tɨm iwoŋ.
5Àŋena nɨn ghɨ ma ghɨ lù a tɨ̂laʼ nô a ndyèyn ɨ̀ lù kɨ̀ a tɨ̂ghaŋ tɨ mbzɨ tɨ̀ jɨ̀m. À n-ghɨ sugèyʼ sìsɨ̀ a Bôbo Fɨyini nɨn nî a a sɨ fu ngeʼ sɨ̂ ghelɨ bòm ɨ̀toŋ ɨ yafɨnɨ nɨ̀ ŋweyn./ Bôbo Fɨyini ŋêyn sugèyʼ sìsɨ̀ a sɨ n-fu ngeʼ sɨ̂ ghelɨ bòm ɨ̀toŋ ɨ yafɨnɨ nɨ̀ ŋweyn nɨn gvi-à. Sugèyʼ sɨ ateynsɨ nɨn ghɨ ma sɨ lù a tɨ̂laʼ nò a ndyèyn, ɨ̀ lù kɨ̀ tɨghaŋ tɨ mbzɨ tɨ̀ jɨ̀m sɨ bebsɨ kɨ ghelɨ ghɨ̀ jɨ̀m.
6Yì na dzɨ-à, kumî ɨ̀wuyn sɨ̂ ngêŋ sisɨ bòm ta ɨlvɨ Bôbo Fɨyini baʼsɨ meyn, ɨlvɨ vzɨ̀ a Bò Ɨ̀dwaʼ ɨ̀ jɨ̀m nɨn fu ngeʼ sɨ̂ ghelɨ ŋweyn ateyn.
7Iwo ateyni læ̀ ni-à a ifynì ku ghelɨ a nô mɨ ɨ̀wuyn nda boli a nô wùl na kelɨ wi adyaʼ sɨ nì iwo.
8Ifâyn i bemnɨ-i læ̀ ku àŋena, a àŋena na ghɨ kɨ a mɨ̂lùmchuŋ. Àŋena læ̀ nà luŋ kɨ ta wul ɨ wi ɨlvɨ ta wàyn nɨn lum ŋweyn. Kè læ̀ nà ki kè ghɨ kɨ nɨ̀ ìkayn i fî faynà.
9Yì yeyna, achi a Bôbo Fɨyini nɨn baʼsɨ̂ gvi-à, achi a bɨ-a kì a wu n-dyèyn ɨtoŋ ɨ yafɨnɨ nɨ̀ ŋweyn, fu ngeʼ i bemnɨ sɨ̂ ghelɨ. Wu læ̀ ni-à a ghɨ bebsɨ ilaʼ i mbzɨ yèyn a yi na ghɨ kɨ ta nse iyum ɨ zuèlɨ/bèbsɨ ghelɨ ghɨ bɨ ghì a ghɨ n-chi ateyn.
10Nô mɨ̀njêyn ɨ̀n jɨ̀m ta mɨ̀ n-ghɨ iyvɨ læ̀ nà bayn wi achi nâ ghè, a ɨchfɨ̂ iyvɨ i sal a ɨlwêʼ na fɨ̂m kɨ tèyn tìk a nô mɨ njoŋ na bayn wi.
11Bôbo Fɨyini bè na, “Mɨ n-nì bebsɨ̂ mbzɨ yèyn bòm mbz sìsɨ a ghɨ n-nî ateyn, ɨ̀ bèbsɨ ghelɨ awo a bɨ-a bòm mbɨsɨ àŋena. Mɨ n-ni-à a ghelɨ ghì a ghɨ n-lêm na ghɨ n-chwô ghelɨ ghɨ li kfɨnɨ, ɨ̀ nì a ghelɨ ghì a ghɨ n-ghaŋsɨ ɨwuyn na ngvɨmlɨ-à.
12Ghelɨ ghì a ghɨ læ̀ nà bu chi ta mà bèbsɨ mbzɨ læ̀ nà læ̂ kɨ tèyn. Yi læ̀ nà to sɨ yeyn wul kɨ̀ ta yi n-to sɨ keli aso ɨkwo a bɨŋnɨ-a kì a kɨ n-lû a Ofì.
13À ti iwo zɨ̀ a mà læ̀ nî a iyvɨ i neʼa, ɨ̀ nì a mbzɨ yèyn kɨŋtɨ sɨ alèʼ ghè a yì n-ghɨ ateyn ɨlvɨ ta Bôbo Fɨyini ɨ̀ Bò Ɨ̀dwaʼ ɨ̀ jɨ̀m dyèyn ɨtoŋ ɨ yafɨnɨ nɨ̀ ŋweyn sɨ̂ àŋena.
14Nô ghelɨ ghɨ̀ jɨ̀m læ̀ nà nyɨŋ leʼnɨ̂ kɨ ta ngwo i telâ a yì n-leʼ wul ɨ byemnɨ, leʼ kɨ ta njɨ̀sɨ̀ a sɨ n-kelɨ wi nchì. Nô mɨ ndà læ̀ kasî ndû sɨ yeyn ghelɨ ŋweyn nô mɨ ndà ɨ leʼ ndû kɨ a àŋena ilaʼ.
15Ghɨ/sugèyʼsɨ mbàynɨ̀sɨ̀ læ̀ nà ghalɨ nô mɨ ndà ta wù n-mômsɨ̀ sɨ leʼ, chuʼ zue kɨ nɨ̀ ìwoŋi. Ghɨ læ̀ zuetɨ̂ ghelɨ ghì a ghɨ ghàytɨ nô ghɨ̀ jɨ̀m nɨ̀ mɨ̀nyuè.
16Sugèyʼsɨ̀/mbàynɨ̀sɨ̀ læ̀ zuetɨ̂ woyn ghɨ bolɨ nɨ̀ àŋena mɨtì kelɨ wi iwo sɨ bè, ghɨ læ̀ choŋ lù nɨ̀ ɨ̀fwo ɨ jûŋ ndosɨ nɨ̀ aŋena, ɨ̀ ghalɨ chi nɨ̀ ghɨ̀ki àŋena kɨ̀ nô asɨ nɨ̀ àŋena.
17Yì yeyna, “Mɨ n-nì tum/tutɨ̂ ghelɨ Midìyàn a àŋena gvi kèʼ ghelɨ Babilòn. À n-ghɨ ghelɨ ma ghɨ kàʼ ghɨ bû lɨ̀sɨ àŋena nɨ̀ àso ɨkwo a fɨfâ, ma ghɨ kàʼ ghɨ bû yùyntɨ àŋena nɨ̀ àso ɨkwo a baŋnɨ-a.
18Sugèyʼsɨ Midìyànsɨ̀ læ̀ tɨm zuetɨ̂ woynda tɨ̂kùŋ a Babilòn nɨ̀ mɨ̀nchaʼ. Àŋena læ̀ koynsɨ̂ wì isuyn sɨ̂ woyn ghɨ bolɨ, ɨ faŋ tɨ̀ kòynsɨ mɨ sɨ̂ woyn ghɨ telâ.
19Babilòn, ilaʼ zɨ̀ a yi n-jofɨ̀ chwô nô mɨ ìlaʼ ì kà a mbzɨ, ghelɨ Babilòn nɨn ghaŋsɨ̂ ɨ̀wuyn bòm ìŋwâʼ ateyn. Bôbo Fɨyini nɨn tɨm bebsɨ̂/yɨ ìlaʼ ateyn kɨ̀ ta wù n-læ bebsɨ Sodòm nɨ̀ Gòmolà.
20Ghɨ n-bebsɨ̂ Babilòn a nô wùl læ faŋ tɨ̀ fì tɨ̀ chi ateyn, a nô wùl læ̂ faŋ tɨ̀ fì tɨ̀ bàʼlɨ̀ ateyn nô mɨ ajàŋ à kà. Nô mɨ wul ɨ̀ Alàb ta àŋena nɨn jelɨ̀ chwô kɨ chwo læ̀ kasɨ wì ɨtwo ŋweyn ateyn, a nô mɨ nchì bzɨsɨ ɨ̀mòʼ læ̂ faŋ tɨ̀ yɨ̀sɨ bzɨsɨ ŋweyn afu.
21Mɨtì à læ̀ nà chî kɨ nyamsɨ nse iyum a Babilòn, ɨ̀nyâmnɨ̀ ɨ ghaʼlɨnɨ ɨ chî a ndosɨ nɨ̀ ìlaʼ afu, ɨ̀ngêynɨ̀ læ̀ nà chî afu, bzɨsɨ ɨtwaʼsɨ ɨ châʼtɨ̀ kal afu.
22Nyamsɨ lisɨ a ghɨ n-toŋtɨ na Henàsɨ̀ læ̀ nà bufɨ fvɨ̀ gvì ɨbwaŋ nchì nɨ̀ ghelɨ Babilòn, bɨsɨ ɨtwaʼsɨ ɨ bufɨ-a. Mɨ̀nsòŋnɨ̀ læ̀ nà dzɨ̂nɨ̀ fvɨ̂ gvî ɨbwaŋ nchì a Babilòn, bɨsɨ ɨtwaʼsɨ ɨ bufɨ fvɨ̀sɨ̀ gvî a ndo sɨ jûŋsɨ̀ nɨ̀ ghelɨ ghɨ to afu. Ɨlvɨ kfeyn meyn ta ka ghɨ bebsɨ Babilòn. Ghɨ taŋ meyn mɨ̀chi mɨ̀ àŋena.