Genesis 8

¹À nà n-ghɨ tì Fɨyini fɨ bu kya kɨ kya na Nuwà nɨ̀n ghɨ antêynɨ̀ àbaŋ afî ŋêyn nyam sìsɨ̀ nô sɨ̀ jɨm. Wu nì afyef a li-a chwò, mû mzɨ̀ ɨ nà sɨ suʼi ndu-à, ²jva sìsɨ̀ a sɨ nà n-fvɨ̂ isas i nse tì ɨ yum, ivɨ zɨ̀ ɨ boŋ teyna. ³Mû mzɨ̀ ɨ suʼi kɨ têyn, a nà ghɨ ibàm i mɨ̂chi ɨvɨ nɨ̀ mɨ̀chi mɨ̀vɨm ɨ̀n tâyn, mû mɨ̀ àteyn ɨ nà sɨ suʼi mèsi ndu-à. ⁴A nà sɨ fî ghɨ ibàm i mɨ̂chi njvàsɨ̀ nsòmbo a njoŋsɨ ìvɨm, abaŋ a Nuwà kì ɨ gvi timi alèʼ a li-a atû kfɨynsɨ Alalàt. ⁵Mû mzɨ̀ ɨ læ suʼi kɨ têyn, a nà ghɨ achi a kɨ asɨ-a a njoŋsɨ ìvɨm ghɨ nà sɨ ki yeyn ɨ̀tu ɨ kfɨynsɨ. ⁶Mɨ̀chi ɨ fi chwò mɨ̀vɨm ɨ̀n kæ̀, Nuwà ɨ dzɨ̀sì windù î lì ta wu n-læ faytɨ ɨwùyn abaŋ, ⁷ɨ tum àŋwòʼi-ngumi, kɨ nà tàyn kɨ tèyn ndû ki ɨ̀lwêʼ kasî tâyn gvi-à. ⁸Wu læ fi tum fɨ̀nlàynɨ̀ na fɨ ndu yeyn nâ mû suʼi meyn mèsì sɨ a nse a. ⁹Mɨtì fɨ̀nlàynɨ̀ fɨ ateyn fɨ ndù ɨ faŋ tɨ yeyn alêʼ sɨ gvɨ̀ bòm ta mû nà n-bu ghɨ kɨ ɨlwêʼ ɨ̀ jɨ̀m atû nse. Fɨ kasi tayn gvì. Nuwà ɨ fvɨ̀sɨ̀ àwu ɨ dyèyn fɨ gvɨ̀ ateyn, wu kasi zɨsɨ sɨ antêynɨ̀ àbaŋ. ¹⁰Wu chìtɨ̀, mɨ̀chi chwò nsòmbo, wu fi kasi tum fɨ̀nlàynɨ̀ fɨ ateyn. ¹¹Fɨ tayn ndù ɨ ni kasi gvì aleŋ ɨlvɨ ikfa, wu se sɨ ki ma fɨ lum meyn ìfvɨ i fɨ̂kàʼ iyvɨ-ì ɨchfɨ̀. Nô mɨ ɨlvɨ gha, Nuwà ɨ keli na mû suʼi meyn mèsì sɨ a nse. ¹²Wu chìtɨ̀, mɨ̀chi fi chwò nsòmbo, wu kasi tum fɨ̀nlàynɨ̀ fìfɨ̀, fɨ tayn ndù, mɨtì ɨ faŋ tɨ̀ fì tɨ̀ kasi sɨ gvì. ¹³A læ nà ghɨ achi a kɨ asɨ-a a bêŋ ghè a Nuwà lèma nà sɨ ghɨ bèŋ ighɨ ntufa nɨ̀ bèŋ ìmòʼ ateyn, mû mzɨ̀ ɨ yum nô ɨ̀n jɨ̀m sɨ a nse, Nuwà ɨ choʼ atu a abaŋ ɨ ki yeyn ta ɨlwêʼ yùmi mèsì. ¹⁴A læ nà ghɨ a mɨ̂chi mɨ̀vɨm ɨ̀m bò a njoŋsɨ̀ bò nô alêʼ a mu-a nà bu ghɨ wi alèʼ. ¹⁵Fɨyini fɨ kæ be sɨ̂ Nuwà na, ¹⁶“Zɨ̂ wî vâ fvɨ sɨ abaŋ zɨ̂ wôyn ghi nɨ̀ ghɨ̀ki àŋena ¹⁷Yi se sɨ fvɨ̀ yi lì ɨ̀fwo ɨ zuesɨnɨ vzɨ̀ a wu n-ghɨ antêynɨ̀ àbaŋ nô ɨ̀ jɨm, yì li mɨnyuyn nô ɨ̀n jɨ̀m nɨ̀ nyamsɨ nô sɨ̀ jɨ̀m nô mɨ nɨ̀ ghà ɨ̂lvɨ̀ vzɨ̂ a kɨ n-jelɨ̀ atû nse ta ka ɨfwo nâ wèyn fvɨ ndù bzɨ ɨ̀ yam ndù a mbzɨ.” ¹⁸Nô mɨ ɨlvɨ gha Nuwà ɨ lì wî ŋweyn nɨ̀ woyn ghɨ lûmnɨ̀ nɨ̀ ŋweyn baʼsɨ̂ nɨ̀ ghɨ̀ki àŋena, ŋêyn àŋena fvɨ̀. ¹⁹Nyamsɨ nɨ̂n læ meyn fvɨ̀ sɨ abaŋ nô sɨ̀ jɨ̀m, mɨ̀nyûyn ɨ fvɨ̀, baʼsɨ̂ nô mɨ nɨ̀ ghà ɨ̂lvɨ̀ vzɨ̂ a kɨ nà n-njelɨ̀ atû nse. À nà n-fvɨ̂ nô mɨ ghà fvɨ̂ baʼsɨ̂ kɨ̀ nɨ̀ ɨ̀fwo ɨlvɨ sɨ a ɨ̀nkì nâ ghè (à nà n-se sɨ fvɨ nô mɨ ìnkì ɨfwo ɨ̀kfà fvɨ̂ kɨ akaʼ àmòʼ). ²⁰Nuwà ɨ bàʼlɨ̀ àbaŋ ifu ɨ nà sɨ lì kɨ àfo àmoʼ àmòʼ antêynɨ̀ tɨ̀nkì tɨ ɨ̀fwo tɨlaynɨ tìtɨ̀ a tɨ n-fvɨ̀ abaŋ nyôʼ sɨ ifu sɨ̂ Bôbo Fɨyini atû àteyn. ²¹Ta wù n-yôʼ tî alɨ̂mtɨ̀ ateyn a nà sɨ fvɨ-à, lɨ̂mtɨ̀ jôf kɨ tèyn sɨ̂ Bôbo Fɨyini. Wu kæ bè na, mà læ̀ bu fì te wi mbzɨ bòm ghelɨ. Mɨ n-kya kɨ nô na mɨ̀tem mɨ̀ àŋena nɨn befa, àŋena duʼ mɨ ɨlvɨ gha kfâʼtɨ̀ kɨ mbɨ, kɨ̀ sɨ zɨ̀tɨ ta àŋena bu lælɨ. Mà læ̀ bu fì bebsɨ̂ wì ɨfwo vzɨ̀ a wu n-chi a mbzɨ ta mà bèbsɨ lvɨ̂yn ²²Kɨ̀ sɨ chem ta mbzɨ bu ghɨ, ghɨ na lum tôʼ kɨ toʼ ɨfwo fî kasî kfî kɨ kfi. Ɨlwêʼ na lum sayn kɨ sayn fî kasî lum kɨ lum. Lùm nɨn faŋa nà lum bayn kɨ tèyn, bèŋ ɨ ni fi kasi chfɨ kɨ chfɨ. Chuè na yisî bayna, ɨtuʼ ni fi kfa jɨ kɨ jɨ. Afo a læ̀ bu fì ndû wì alèʼ.