Genesis 9

Fɨyini fɨ ɨ yɨ mɨkâyn ŋêyn Nuwà

¹Fɨyini fɨ ɨ boysɨ Nuwà ɨ kæ be sɨ̂ ŋweyn ŋêyn woyn ŋweyn na, “Yì na bzɨ-à ta ka yì dvɨ ɨ̀ yam ndù a mbzɨ. ²Mɨ n-ni-à a nô nyamsɨ mbzɨ sɨ̀ jɨ̀m na yeyn zɨ̀ sɨ nà fâyn nô sɨ a ŋaŋ baʼsɨ̂ nɨ̀ mɨ̀nyûyn mzɨ̀ a mɨ̀ n-tâynɨ̀ chwô iyvɨ nô ɨ̀n jɨ̀m nô mɨ nɨ̀ ghà ɨ̂lvɨ̀ ta kɨ n-jelɨ̀ chwô atû nse nɨ̀ sfɨ sìsɨ̀ a sɨ̀ n-ghɨ a jvâ nô sɨ̀ jɨ̀m. Ma fu meyn ɨ̀fwo nâ wèyn na yì na saʼa. ³Nô mɨ ghà ta kɨ n-jelɨ̀ chwô a mbzɨ afêyn na ghɨ kɨ àfo a yɨnɨ-a sɨ̂ zɨ̀. Mɨ n-læ meyn fu ɨfwo vzɨ̀ a wu n-koʼ ɨtwaʼ nô ɨ̀ jɨ̀m na yì na yɨ sɨ ɨfwo yɨnɨ. Ma fu meyn bàʼsɨ nô mɨ ghà ɨ̂lvɨ̀ atû àteyn lvɨ̂yn na yì na yɨ-a. ⁴Mɨtì ka wùl nɨ̂n læ̀ kfɨ̀l nyam mɨ̀luŋ bu jêl ateyn bòm ta nyàm nɨ̀n chî kɨ bòm mɨ̀luŋ. ⁵À zuè mɨ ndà zuè wul a wù læ̂ taŋ ɨchfɨ ŋweyn sɨ̂ mà. À zue nyam zuè wul a mà zue nyam àteyn. ⁶À læ̀ zuè mɨ ndà wul, a wù læ boŋ kfɨ ma à zue kɨ̀ mɨ wul bòm ta mɨ n-læ faytɨ wul wu nà fɨsɨ̂ mà. ⁷Sɨ̂ zɨ̀ yì na bzɨ̂ ndu-à ta ka yì dvɨ ɨ̀ lùynsɨ mbzɨ.”

⁸Fɨyini fɨ fi kæ bè sɨ̂ Nuwà ŋêyn woyn ŋweyn na, ⁹“Mɨ n-yɨ mɨ̀kâyn ghesɨ̀và lvɨ̂yn zɨ̂ woyn ghya nô ghɨ̀ jɨ̀m, ¹⁰baʼsɨ̂ nɨ̀ nyamsɨ nô sɨ̀ jɨ̀m ta sɨ n-læ fvɨ̀ abaŋ ɨ sɨ maʼnɨsɨ nɨ ɨsɨ ɨtwaʼsɨ nɨ̀ mɨ̀nyûyn, nô mɨ nɨ̀ ghà ɨ̀lvì vzɨ̂ a kɨ læ̀ nà fî chi a nse zuêsɨ̀-à. ¹¹Mɨ n-yɨ mɨ̀kâyn ghesɨ̀và mà læ̀ bu fì bebsɨ̂ wì mbzɨ nɨ̀ mu mà læ̀ bu fì fvɨsɨ wi ànkuŋ na kɨ bebsɨ mbzɨ.”

¹²Fɨyini fɨ taŋi tì ɨ bè na, “Ɨyêyn nɨ̀n ghɨ nchwæ mɨ̀kàyn nâ mzɨ̀ a mɨ n-yɨ ghesɨ̀và nɨ̀ àjâŋ kì a kɨ læ̀ koʼ ibàm, baʼsɨ̂ nɨ̀ ɨ̀fwo ɨ zuesɨnɨ nô ɨ̀ jɨ̀m. ¹³Ma lem meyn ìfɨ̀linjoŋnjoŋ nɨ̀ mà a mbàʼsɨ̀ sɨ a nchwæ mɨ̀kàyn nâ ghàyn a mɨ n-yɨ ghesɨ̀ mbzɨ tèyn. ¹⁴À læ̀ nà ghɨ nô mɨ ɨlvɨ gha ta mà fvɨsɨ mbàʼsɨ̀ iyvɨ, ìfɨ̀linjoŋnjoŋ i dyô, ¹⁵ma kfàʼtɨ̀ mɨ̀kâyn mzɨ̀ a mà yɨ ghesɨ̀nà nô nɨ̀ ɨ̀fwo ɨ̀ jɨ̀m ta wu n-chi na, ivɨ i læ̀ bu fì suʼî wì na ànkuŋa fvɨ ɨ̀ bebsɨ mbzɨ. ¹⁶À læ̀ nà ghɨ nô mɨ ɨlvɨ gha ta yi fvɨ̀ a mbàʼsɨ̀ ma yeyn, ma kfàʼtɨ̀ mɨ̀kâyn nâ mèyn a mà yɨ ghesɨ̀ mbzɨ ì jɨ̀m tèyn bòm ta mɨ̀ faŋ meyn kɨ̀ samoʼ.”

¹⁷Fɨyini fɨ ɨ fi kæ be sɨ̂ Nuwà na, “À ti nchwæ mɨ̀kàyn nâ mzɨ̀ a mà yɨ ghesɨ̀nà nô nɨ̀ ɨ̀fwo ɨ̀ jɨ̀m ta wu n-chi atû nse.”

Nuwà ŋêyn woyn ŋweyn

¹⁸Nuwà nɨn læ fvɨ̀ abaŋ ŋêyn woyn ŋweyn ghɨ̀ tal ma à ti Shêm nɨ̀ Hâm nɨ̀ Jafèt. Hâm nà n-ghɨ bò ghelɨ Kenàn. ¹⁹Nô ghelɨ ghɨ̀ jɨ̀m a mbzɨ nɨn ghɨ ma à n-læ bzɨ kɨ woyn Nuwà nâ ghèyn ghɨ̀ tal. ²⁰Nuwà nà n-felɨ gveynsɨ. Wu nà n-ghɨ wul ɨwû àsɨ sɨ tòʼ ɨ gvêyn mɨ̀tam mɨ̀ gɨ̀lêbsɨ̀. ²¹A læ nà ghɨ achi a li-a wu nyvɨ mɨlûʼ ma ghɨ fàytɨ nɨ̀ mɨ̀tam mɨ̀ gɨ̀lêbsɨ̀ nâ mzɨ̀ mɨ ku, wu choʼtɨ ndzɨsɨ ɨ nyìŋì kɨ nɨ̀ ìsas i yumi a ŋweyn ɨtwò. ²²À nà n-ghɨ ta Hâm ɨ bò ghelɨ Kenàn yèyn tî ta bò ŋweyn nɨn nyɨŋ kɨ nɨ̀ ìsas i yumi, wu fvɨ ndu fèʼtɨ̀ sɨ̂ woyn nà ŋweyn abe. ²³Ta wù fèʼtɨ̀ tî, Shêm ŋêyn Jafèt ɨ lì àbâs afo ɨ ghal chwòsɨ̀ a mbèʼsɨ̀ nɨ̀ àŋena ɨ zɨ kɨ nɨ̀ ìbam i nɨ̀ ìbam i ɨ chɨytɨ bò àŋena ateyn. Shêm ŋêyn Jafèt nà n-buʼsɨ̂ ìkêʼ tì ta ka àŋena faŋ tɨ̀ yeyn isas i bò àŋena. ²⁴À nà n-ghɨ ta mɨ̀lùʼ mɨ̀ àteyn làni sɨ asɨ nɨ̀ Nuwà wu keli ìwo zɨ̀ a àngòʼsɨ̀ a wayn nɨ̀ ŋweyn kì nì mòm, ²⁵ɨ kæ bè na, “Ma tè meyn Kenàn! Wù læ̀ faŋ kɨ sɨ a fɨ̂kòynɨ̀ sɨ̂ woynà ŋweyn.” ²⁶Wù n-fi meyn bè ɨ kfeynsɨ na,

“Ikoʼsɨ-i nɨn ndû sɨ̂ Bôbo Fɨyini fɨ Shêm. Kenàn læ̀ faŋ kɨ sɨ akòs sɨ̂ Shêm.

²⁷Fɨyini fɨ ni woyn Jafèt dvɨ ɨ̀ nì woyn ŋweyn læ nà chî kɨ akaʼ àmòʼ ŋêyn woyn Shêm, mɨtì Kenàn faŋ kɨ̀ sɨ akòs sɨ̂ Jafèt.”

²⁸À nà n-ghɨ ta ànkuŋa chwò, Nuwà ɨ fi chi kfeynsɨ bèŋ ighɨ ì tal nɨ̀ bèŋsɨ̀ mɨ̀vɨm ɨ̀n tâyn. ²⁹Yi ti ndêyn na Nuwà nɨ̀n læ chɨ̀yntɨ chi bèŋ ighɨ bulamòʼ nɨ̀ bèŋsɨ̀ mɨ̀vɨm ɨ̀n tâyn ɨ kfɨ.