Genesis 7

¹Bôbo kæ bè sɨ Nuwà na zɨ læ̂ antêynɨ̀ àbaŋ zɨ̂ ìsas i ndo nɨ̀ và bòm ta ma yeyn meyn na à n-ghɨ kɨ và wul àtì-ati antêynɨ̀ nɨ̀ ghelɨ mbzɨ nô ghɨ̀ jɨ̀m. ²Lì nyamsɨ laynɨsɨ kɨ tɨ̀nki tɨ̀ jɨ̀m, ndû nô mɨ ìnki ì kà lî sɨlûmnɨ̀sɨ̀ nsòmbo nɨ sɨ kisɨ nsòmbo, wà nî wa li kɨmɨ ɨ sisɨ̀ a sɨ n-layn wi kɨ tɨ̀nki tì jɨ̀m lî nô mɨ ìnki ì kà kɨ i lûmnɨ̀ nɨ iki. ³Li kɨmɨ mɨ̀nyuyn kɨ tɨ̀nki tɨ̀ jɨ̀m. Wa lî ɨnlûmnɨ̀ nsòmbo, wa lì ɨnki kɨ̀mɨ nsòmbo ta ka ngœ̀ àteyn faŋ. ⁴Mɨ n-suʼsɨ̂ ìvɨ ibàm i mɨ̂chi nsòmbo a yi suʼi faŋ kɨ̀ faŋ sɨ a mɨ̂chi mɨ̀vɨm ɨ̀n kæ̀, suʼî nɨ̀nchuè suʼî nɨ̀ntuʼ. Mɨ nì tèyn bèbsɨ nô mɨ ghà ta mà fàytɨ kɨ na jelɨ̀ atû nse afêyn. ⁵Nuwà nɨn læ meyn nì nô àwo à jɨ̀m kɨ ighel ta Bôbo bè sɨ̂ ŋweyn.

Ànkuŋa chɨytɨ mbzɨ

⁶Ànkuŋa nɨn læ se sɨ gvì a mbzɨ ma Nuwà lema meyn na sɨ ghɨ bèŋsɨ̀ ighɨ ntufa. ⁷Ŋêyn wî ŋweyn nɨ̀ woyn ŋweyn ghɨ lûmnɨ̀ nɨ̀ ghɨ ki, àŋena ɨ leʼ ànkuŋ ateyn ɨ zɨ abaŋ. ⁸Nyamsɨ laynɨsɨ nɨ sisɨ̀ a sɨ n-layn wi, nɨ̀ mɨ̀nyûyn, nô mɨ nɨ̀ ìnkì afo a zuesɨnɨ-a à kà ta kɨ nà n-jelɨ̀ atû nse, ɨ gvì sɨ Nuwà. ⁹Nô mɨ alûmnɨ̀ à kà ɨ gvî baʼsɨ kɨ nɨ aki-a kɨ ighel ta Fɨyini fɨ bè. ¹⁰Mɨ̀chi chwò nsòmbo ànkuŋ a bemnɨ-a gvì ɨ chɨytɨ kɨ nse ì jɨ̀m.

¹¹A nà n-ghɨ a mɨchi njvàsɨ̀ nsòmbo a njoŋ a bêŋ ghè a Nuwà nɨn luyn bèŋsɨ̀ ighɨ ntufa ateyn, jvasɨ ɨ bùʼtɨ̀ sɨ isas i nse, tɨvɨtɨ nà sfɨsà kɨ tèyn, ¹²ɨ læ suʼi sɨ a mɨchi mɨ̀vɨm ɨ̀n kæ̀ suʼi nɨ̀nchuè, suʼi nɨ̀ntuʼ

¹³A ghɨ tì ma Nuwà ŋêyn wi nɨ̀ woyn ŋweyn ghɨ lûmnɨ̀ ma à ti Shêm, ŋêyn Hâm nɨ̀ Jafèt nɨ̀ ghɨ̀ki àŋena leʼ meyn kɨ achi nâ ghè, ɨ̀ zɨ abaŋ afî a wu n-bayn tî. ¹⁴Àŋena nɨn læ se sɨ zɨ, ɨ lì tɨ̀nkì tɨ nyamsɨ kɨ tɨ̀ jɨ̀m, ɨ sɨ maʼnɨsɨ nɨ ɨ sɨtwaʼsɨ nô mɨ tɨ̀nkì tɨ ɨfwo tɨ li tìtɨ̀ a tɨ n-jelɨ̀ chwô atû nse kɨ tɨ̀ jɨ̀m nɨ̀ tɨ̀nkì tɨ mɨnyùyn tɨ, nô mɨ nɨ̀ ghà ɨlvɨ̀ vzɨ̂ a kɨ nà n-tâyn chwô iyvɨ. ¹⁵Nô mɨ àfo a li-a à kà nɨn læ meyn gvì, gvi kɨ ɨ̀ bwo ɨ̀ bwò Nuwà ɨ we abaŋ afu. ¹⁶Nô mɨ ìnki gha nɨn læ meyn zɨ abaŋ nâ ghè, alûmnɨ̀-à ɨ zɨ̂ baʼsɨ kɨ nɨ aki-a. Ghɨ n-læ zɨ kɨ ighel ta Bôbo Fɨyini bè sɨ̂ Nuwà. Sɨ ibàm ateyn, nô Nuwà nɨ̀ ngeŋ ŋweyn ɨ boŋ zɨ, Bôbo ɨ kɨ̀ŋ ɨ̀chfɨ abaŋ.

¹⁷Ivɨ i faŋ nà suʼi kɨ suʼi sɨ a mɨchi mɨ̀vɨm ɨ̀n kæ̀, mu ɨ luyn koʼ kɨ koʼ ɨ làysɨ̀ àbaŋ ateyn sɨ atû nse. ¹⁸Mu ɨ læ luyn koʼ kɨ atû nse tèyn, a baŋnɨ-a nà sɨ leŋ atû mù. ¹⁹Mu mɨ̀ ateyn ɨ læ ghaŋ awo ɨ koʼ ɨ chɨytɨ kfɨynsɨ ghaʼlɨnɨsɨ nô sɨ̀ jɨ̀m a mbzɨ. ²⁰Mɨ n-læ meyn luyn ɨ koʼ chɨytɨ kfɨyn zɨ̀ a yì ghaʼ gòʼsɨ̀ yi nà sɨ ghɨ isæ mu chem nô sɨ a ntàmsɨ̀ ntufa. ²¹Nô mɨ ghà ta kɨ nà n-jelɨ̀ atû nse nɨn læ meyn kfɨ. Mɨ̀nyûyn ɨ kfɨtɨ, nyamsɨ maʼnɨsɨ kfɨtɨ, nyamsɨ ɨtwaʼsɨ kfɨtɨ nô mɨ nɨ̀ ghà ɨ̀lvì atû nse ɨ kfɨ nô ghelɨ ɨ boŋ kfɨtɨ. ²²Nô mɨ ghà ta kɨ nà n-zuêsɨ̀ a nse nɨn læ meyn kfɨ. ²³À ti ta Bôbo nɨn læ mèsi nô mɨ ghà vzɨ̂ a kɨ n-zuêsɨ̀ atû nse afêyn. Wu n-læ meyn zuetɨ ghelɨ, ɨ zuetɨ nyamsɨ, ɨ zuetɨ mɨ̀nyuyn, ɨ zuetɨ nô mɨ̀fôlɨ̀ ɨ̀n jɨ̀m ta mɨ nà n-jelɨ̀ chwô atu nse. A n-læ faŋ kɨ Nuwà nɨ̀ ghelɨ ghɨli ghì a ŋweyn àŋena nɨn læ nà ghɨ antêynɨ̀ àbaŋ. ²⁴Ànkuŋ nâ kì nɨn læ faŋ a nse sɨ a mɨchi ɨvɨ nɨ̀ mɨ̀chi mɨ̀vɨm ɨ̀n tâyn.