Genesis 27

Yisàk ɨ boysɨ Jàkôb

¹À n-læ nà ghɨ ta Yisàk lèma dvɨ̀yn nà bu tòʼ yeyn wi ɨlwêʼ, ɨtuʼ ɨ layn achi a li-a wu jàŋ Esò ɨ wâyn ŋweyn ɨlwema ɨ bè na, “Wâyn wom,” Wu bèynsɨ̀ na, “Mà wèyn.”

²Yisàk ɨ bè sɨ̂ ŋweyn na, “Mà sɨ ghɨ tèyn ma ma lema meyn mɨ̀chi mêm tɨmsɨ. ³Li awoŋ à kya nɨ̀ fɨ̀nchyafɨ ɨ seʼ ku gvì nɨ̀ nyàm sɨ̂ mà. ⁴Wà ku kfa gvì wa kfè a dzɨ ghè a mɨ n-nî ma nà kôŋ ateyn mà kfɨl ɨ̀ bòysɨ và jæ ta ka mà kfɨ.”

⁵Wù nà n-taŋi sɨ̂ Esò tì, Làbikà ɨ nyaʼ yvɨtɨ-à. A nà ghɨ ta Esò fvɨ̀ sèʼ ibyem, ⁶Làbikà ɨ bè sɨ̂ Jàkôb ɨ wayn ìkòŋ nɨ̀ ŋweyn na, “Ma ni meyn nyaʼ ɨ̀ yvɨ̀ ta bò vâ nɨn bê sɨ̂ wâynà vâ ɨ̀lwema na, ⁷‘Seʼ ɨ kfa nɨ̀ nyàm ɨ kfè a dzɨ ghè a mɨ n-nî ma nà kôŋ ateyn mà kfɨl ɨ̀ bòysɨ và kɨ̀ ighel ta Fɨyini fɨ bàʼtɨ jæ ta ka mà kfɨ.’ ⁸Faytɨ yvɨtɨ ìwo zɨ̀-ì a ka mà bè sɨ̂ và lvɨ̂yn a wâyn wom ɨ ni kɨ ighel ta mà bè. ⁹Fvɨ ndu a mbàyn bzɨsɨ ɨ kutɨ woyn bzɨsɨ ghɨ jûŋ ghɨ̀ bò ɨ sɨ gvì nɨ̀ àŋena mà kfe kɨ̀ nô a dzɨ ghè a bò vâ n-nî wu nà kôŋ ateyn. ¹⁰Mɨ n-kfè-à a wà li ndù fù sɨ̂ bò vâ a wù kfɨl ɨ̀ bòysɨ và jæ ta ka wù kfɨ.”

¹¹Jàkôb ɨ bè sɨ̂ nà ŋweyn na, “Wâynà wom Esò nɨn kelɨ nyuŋsɨ a ŋweyn ɨwùyn ma kelɨ wi. ¹²Mà kæ nì ndù bò wom mômtɨ̀ mà a wù keli na ma lɨsɨ meyn ŋweyn ɨ̀ kwo tè ma te.”

¹³Nà ŋweyn ɨ bè sɨ̂ ŋweyn na, “Visi a wâyn wom ndòyn àteyn fe a ma atu. Ni kɨ ta mà bè. Ndu gvi nɨ̀ bzɨsɨ ateynsɨ sɨ̂ mà.”

¹⁴Jàkôb ɨ ndu kutɨ gvì nɨ̀n seynsɨ wu kfè ɨ̀fwo ɨ yɨnɨ kɨ̀ nô a dzɨ ghè a bò ŋweyn n-nî wu nà kôŋ ateyn. ¹⁵Làbikà ɨ lì nô ndzɨsɨ jûŋsɨ̀ nɨ̀ Esò ɨ wâyn ŋweyn ɨlwema ɨ màʼ ɨwùyn nɨ̀ Jàkôb ɨ wâyn ŋweyn ɨtwelâ, ¹⁶ɨ fi lì gvɨ bzɨ ɨ lom akœ nɨ̀ Jàkôb ɨ fi lom ìlì a ŋweyn ɨtoŋ. ¹⁷Wu n-læ nì tî nô mɨ ɨlvɨ gha ɨ lì ɨ̀fwo ɨ yɨnɨ vzɨ̀ a wù nì kfè tî ɨ fu sɨ̂ Jàkôb na wù ndu fù sɨ̂ bò ŋweyn.

¹⁸Wu ndù nɨ̀ ɨ̀fwo ɨ yɨnɨ ateyn sɨ̂ bò ŋweyn ɨ toŋtɨ ŋweyn wu bɨmi ɨ bɨf na, “À n-ghɨ và nda a?”

¹⁹Jàkôb ɨ bè sɨ̂ bò ŋweyn na, “À n-ghɨ mà Esò ɨ wayn ɨ̀lwema nɨ̀ và. Ma ni meyn ìwo zɨ̀-ì a wà nì bè na mà ni. Làli læ ɨ kfɨl nyam yèyn a mà kfa nɨ̀ nyeyn tèyn ɨ boysɨ mà.”

²⁰Yisàk ɨ bɨf sɨ̂ Jàkôb na, “Wà jèlɨ̀ ti sɨ nyàŋsɨ̀ sɨ ku nyam àteyn tèyn a wâyn wom?” Jàkôb ɨ bè na, “À nì Bôbo Fɨyini fyafɨ na mà nyaŋsɨ yèyn nyam àteyn.”

²¹Yisàk ɨ bè sɨ̂ ŋweyn na, “Kɨŋtɨ gvi mà momtɨ vâ yèyn na wà ti n-ghɨ kɨ nô wâyn wom Esò a.”

²²Jàkôb ɨ kɨŋtɨ ndù a ngùŋ nɨ̀ bò ŋweyn wu mòmtɨ̀ ɨ̀wuyn ŋweyn ɨ bè na, “Mɨ n-yvɨ gyâ Jàkôb mɨ̀tì akœ-a ɨ ghɨ àkœ a Esò.” ²³Yisàk nɨn bu læ keli na à n-ghɨ Jàkôb ɨ boysɨ ŋweyn bòm ta akœ a ŋweyn a nà n-kelɨ nyuŋsɨ kɨ ta akœ a wâynà ŋweyn Esò. ²⁴Yìsàk nɨ̀n fi meyn bɨf sɨ̂ Jàkôb na, “A ti n-ghɨ kɨ nô và wâyn wom Esò a?” Wu bèynsɨ̀ na, “À n-ghɨ kɨ nô mà Esò.”

²⁵Yisàk ɨ bè na, “Fu læ gvì nɨ̀ nyàm zɨ̀ a wà kfa kfè mà kfɨl ɨ̀ boysɨ và.” Jàkôb ɨ fu sɨ̂ ŋweyn wu yɨ mèsì, wu gvì nɨ̀ mɨ̀lùʼ wu nyvɨ. ²⁶Bò ŋweyn ɨ yɨ mèsì ɨ bè sɨ̂ ŋweyn na, “Gvi baʼnɨ ma a wâyn wom.”

²⁷Jàkôb ɨ ndu baʼnɨ ŋweyn Yisàk ɨ yvɨ alɨ̂m a ndzɨsɨ nɨ̀ ŋweyn, nô mɨ ɨlvɨ gha ɨ boysɨ ŋweyn ɨ bè na,

“Ndzɨsɨ wâyn wom sɨ nɨn lɨ̂mtɨ̀ ku ta gveyn ɨlvɨ ta Bôbo bòysɨ.

²⁸Mɨ n-jêm na Fɨyini fɨ suʼsɨ amyâʼ a gvêynsɨ̀ nɨ̀ và sɨ na yvɨ̂tɨ̀-à, ɨfwo ɨ yɨnɨ faytɨ̂ lemâ, ɨ̀nkàʼ ɨ kolâ mɨ̀tam mɨ fu mɨ̀lûʼ.

²⁹Mɨ n-jêm kɨmɨ na Fɨyini fɨ ni tɨlaʼtɨ læ̀ nà felɨ̀ sɨ̂ và, ngvɨmlɨ̂ và ɨ̀ nì wà na saʼ woynà ghya ghɨ ngvɨmlɨ̂ và.

À læ̀ tè nô mɨ ndà vâ a Fɨyini fɨ te ŋweyn, à boysɨ nô mɨ ndà vâ a Fɨyini fɨ boysɨ ŋweyn.”

³⁰Yisàk nɨn læ boysɨ mèsi Jàkôb wu nà fvɨ ndû kɨ tèyn Esò ɨ kasî kfâ gvî sɨ ɨtwaʼ ibyem. ³¹Esò ɨ kfè nyam zɨ̀ a wù seʼ kù ɨtwaʼ ɨ gvì nɨ̀ nyeyn sɨ̂ bò ŋweyn ɨ bè na, “Làli ɨ kfɨl nyam zɨ̀ a mà seʼ ku ɨ boysɨ mà.”

³²Bò ŋweyn ɨ bɨf sɨ̂ ŋweyn na, “À n-ghɨ và nda a?” Wu bè na, “À n-ghɨ ma Esò ɨ wâyn vâ ɨlwema.”

³³Ta wù tàŋi tî iwo ateyn i ɨ bem sɨ̂ Yisàk wu nà sɨ chɨŋ kɨ tèyn ɨ bɨf na, “À sæ̀ gvì ndà nɨ̀ nyàm ɨ̀twaʼ zɨ̀ afêyn a? Ma kfɨlɨ meyn ɨ̀ bòysɨ ŋweyn kɨ̀ lvɨ̂yn jæ ta ka wà zɨ gvì, iboysɨ ateyn i ɨ ghɨ sɨ faŋ kɨ faŋ.”

³⁴Esò ɨ nà yvɨ gvî nɨ̀ ìwo ateyn i têyn ɨ byal dzɨ̀ ɨ bè sɨ̂ bò ŋweyn na, “Mɨ n-chwotɨ̂ a bà boŋ boysɨ ma.”

³⁵Yisàk ɨ bè sɨ̂ ŋweyn na, “Wâynà vâ gvî meyn ɨ̀ lɨ̀sɨ mà ɨ̀ fsɨ iboysɨ ì zæ.”

³⁶Esò ɨ bè sɨ̂ ŋweyn na, “Ba yi ti n-ghɨ samoʼ na izɨyn i ŋweyn yèynì na Jàkôb nɨn ghɨ ìlɨsɨ? À sɨ ghɨ ìngal ì bò ta wù lɨ̀sɨ ma. Wù ti meyn fsɨ ɨlwemâ wom, à na sɨ ghɨ lvɨ̂yn wù fsɨ ìboysɨ ì yemi. Ba yi ti n-ghɨ na iboysɨ i li bu fì ghɨ wi na wà fu sɨ̂ mà.”

³⁷Yisàk ɨ bèynsɨ̀ ɨ bè na, “Ma lem meyn na wu læ̀ saʼ và, a ghelɨ isas i ndo nɨ̀ ŋweyn nô ghɨ̀ jɨ̀m na felɨ̀ kɨ sɨ̂ ŋweyn. Ma fi meyn fu ɨfwo ɨ yɨnɨ sɨ̂ ŋweyn nɨ̀ mɨ̀lûʼ ɨ̀n jùŋ. Mà ti kàʼ a mà fu nô ghà sɨ̂ và lvɨ̂yn a wâyn wom.”

³⁸Esò ɨ bɨf sɨ̂ bò ŋweyn na, “Wà nì nà kelɨ ìboysɨ kɨ̀ sɨ̂ wayn ɨ̀ mòʼ a bà? Boŋ boysɨ ma. Wu n-tàŋi tî ɨ fu nkeʼ ìdzɨ̀.”

³⁹Bò ŋweyn ɨ bè sɨ̂ ŋweyn na,

“Wà læ̀ nà chî alèʼ ɨfwo ɨ yɨnɨ ɨ koʼ wi ateyn nô sakos, ivɨ i suʼî wì afu.

⁴⁰Wà læ̀ nà chî nû kɨ nu, felɨ̀ kɨ sɨ̂ wâynà vâ,

yvɨ̂tɨ̀ wì nô ta ka wà læ̂ leʼ fvɨ̀ sɨ a ŋweyn isas i saʼ.”

Jàkôb ɨ leʼ ndù sɨ yeyn Labàn

⁴¹Bò ŋweyn nɨn læ taŋi tî Esò ɨ nà sɨ bâyn Jàkôb nô sɨ a ŋaŋ bòm ta wù chòŋ iboysɨ i ŋweyn, ɨ bè sɨ a ŋweyn a ngeŋ na, “Bò wom nɨn kfɨ-a, a ghɨ dzɨ mèsì ìkfɨ i ŋweyn nô mɨ ɨlvɨ gha a mà zue Jàkôb.”

⁴²A nà ghɨ ta Làbikà yvɨ na Esò nɨ̀n baʼtɨ̂ sɨ zue Jàkôb, wu tum jàŋ Jàkôb ɨ bè sɨ̂ ŋweyn na, “Wâynà vâ ɨlwema nɨn baʼtɨ̂ sɨ zue vâ sɨ yvɨ̀sɨ atem a ŋweyn. ⁴³Faytɨ yvɨtɨ ɨ ni kɨ têyn ta mɨ n-bê a wâyn wom. Leʼ lu kɨ lvɨ̂yn ɨ ndu yeyn wâynà wom Labàn, a Halàn. ⁴⁴Ndu wa chitɨ̂ zɨ̂ ŋweyn sɨ chem ta ka atem a wâynà vâ yvɨtɨ. ⁴⁵Atem a wâynà vâ læ̀ yvɨ̀tɨ̀ nô mɨ ɨtuʼ gha, wù lêsɨ̀ ìwo zɨ̀-ì a wà nì sɨ̂ ŋweyn a mà tum ɨ̀ jàŋ và a wà kasi gvì. Mɨ n-kôŋ wì sɨ wo zɨ ghɨ̀ jɨ̀m achi àmòʼ.”

⁴⁶Làbikà nɨn tàŋi mèsi tî ɨ kæ bè sɨ̂ Yisàk na, “Mɨ n-ghɨ tèyn kôŋ wi ghɨ̀ki Hêt ghèyn a Esò màla têyn nô sakos. Jàkôb ti kæ fì ndù wi ilaʼ nâ ghàyn a mà kfɨ.”