Genesis 28

¹Yisàk ɨ jàŋ Jàkôb sɨ toŋtɨ ŋweyn ɨ fu nfàsì-fàsì sɨ̂ ŋweyn ɨ bè na, “Ka wa n-læ̀ ndù wi a Kenàn. ²Lu kɨ lvɨ̂yn ɨ ndù a ndo nɨ̀ bò nà vâ Betwèl a Badan Alàm ɨ ndù wi antêynɨ̀ nɨ̀ woyn lùmsɨ nà vâ Labàn. ³Mɨ n-jêm na Bôbo Fɨyini ɨ bò ɨ̀dwaʼ ɨ̀ jɨ̀m boysɨ vâ ɨ̀ fù woyn sɨ̂ và nô sɨ idvɨ àŋena lema ndù sɨ a ilaʼ i ghaʼnɨ-i, ⁴na wù boysɨ zɨ̂ woyn ghya nɨ̀ ìboysɨ zɨ̀ a wu n-bòysɨ Abɨ̀làhâm nɨ̀ ìnyeyni ta ka wà keli ilaʼ yèynì a wà n-chi ateyn sɨ a wul ɨ̀ gvinɨ têyn kɨ̀ samoʼ.” ⁵Yìsàk nɨn tàŋi tî ɨ tsɨynsɨ Jàkôb na wu ndu yèyn Labàn a Badan Alàm. Labàn nà n-ghɨ wâynà Làbikà bò àŋena ɨ ghɨ Betwèl ɨ wul ɨ̀ Alàm. Làbikà ɨ ghɨ nà Jàkôb ŋêyn Esò.

⁶A nà ghɨ ta Esò yvɨ na bò ŋweyn boysɨ meyn Jàkôb ɨ̀ tsɨ̀ynsɨ ŋweyn na wù ndu ɨ̀ màla wul ɨ wî Badan Alàm ɨ̀ fì fu nfàsì nfàsì sɨ̂ ŋweyn na, ka wu n-ndù wi a Kenàn ⁷ɨ̀ fì yvɨ kɨ̀mɨ na Jàkôb yvɨnɨ meyn nà ŋweyn ŋêyn bò ŋweyn ɨ̀ ndù a Badan Alàm, ⁸ɨ keli kɨ keli na bò ŋweyn bu tî nà kôŋ ghɨ̀ki Kenàn ghì a wu n-læ màla tî. ⁹Wu n-kèli tî ɨ ndu mala kfeynsɨ wi ɨ̀lvì a ghɨ wâyn Ishmàyêl Izɨyn i ŋweyn ɨ ghɨ Màhalàt. Màhalàt nà n-ghɨ Jêmtɨ̀ Nebayòt ghɨ wâyn Ishmàyêl, Ishmàyêl ɨ ghɨ wâyn Abɨ̀làhâm.

Jèm ɨ chɨ Jàkôb a Betèl

¹⁰À n-læ nà ghɨ ta Jàkôb lù sɨ a Beshebà ɨ nà ndû a Halan, ¹¹ɨ jèl ɨ chem alèʼ a li-a ɨtuʼ ɨ jɨ wu dùʼì sɨ chi afu, ɨ ni se sɨ nyɨ̀ŋì ɨ lì ngòʼ ì lì ɨ lèm atu a ŋweyn ateyn ɨ nà sɨ bunî-à. ¹²Jèm ɨ chɨ ŋweyn wu yeyn afo kɨ ghɨ ta ɨkoʼ, ti a nse dyefɨ̀ koʼ chem iyvɨ, nchìsɨ Fɨyini sɨ koʼ kɨ ateyn tèyn kalì-à. ¹³Wu se sɨ ki Bôbo ti a ŋweyn a ngùŋ, wu bè sɨ̂ ŋweyn na, “À n-ghɨ mà Bôbo Fɨyini fɨ bòbò vâ Abɨ̀làhâm nɨ̀ bò vâ Yisàk. Mɨ n-fu ìlaʼ yèynì a wà nyɨŋ ateyn tèyn sɨ̂ và zɨ̂ wôyn ghya. ¹⁴Mɨ n-fu woyn sɨ̂ và ghɨ dvɨ̂ kɨ ta abɨ̂l a nse, a àŋena læ yam ndû kɨ̀ tɨghaŋ tɨ ilaʼ nâ yèynì tɨ̀ jɨ̀m. Nô ghelɨ ghɨ̀ jɨ̀m a mbzɨ læ̂ kèli ìboysɨ toynɨ̂ kɨ a vâ zɨ̂ woyn ghya. ¹⁵Mà na ghɨ ghesɨ̀và, tôʼnɨ̀ nɨ̀ và nô mɨ a wo ta wa ndû ɨ̀ læ̀ kasî gvî nɨ̀ và ilaʼ afêyn. Mà læ̀ visî wì vâ nô ta ka mà læ̂ nì ìwo zɨ̀-ì a mà chfɨ̀nɨ̀ sɨ̂ và.”

¹⁶A nà ghɨ ta Jàkôb yèmà ɨ̀ kfàʼtɨ̀ jem àteyn, wu be kɨ sɨ a ŋweyn a ngeŋ na, “Bôbo Fɨyini nɨn ghɨ kɨ nô afêyn. Ma bu tî nà kya.” ¹⁷Wù n-læ meyn nà sɨ fàynà ɨ bè na, “Alêʼ kèynà nɨn bema! Fɨyini fɨ nɨn ghɨ kɨ nô alèʼ nâ ghàyn. Kɨ n-ghɨ kɨ ta ɨchfɨ mbàyn vzɨ̂ a wu n-zɨ ndû iyvɨ.”

¹⁸Ɨtuʼ ɨ bɨs ɨ layn Jàkôb ɨ lì ngòʼ zɨ̀ a wù tî nyɨ̀ŋi ɨ̀ lèm àtu a ŋweyn ateyn tì ɨ tom a nse ɨ sfɨ̀ytɨ̀ mɨ̀vɨl atu àteyn sɨ a nchwæ na Fɨyini fvɨ meyn a ŋweyn ikèʼ alèʼ nâ ghè. ¹⁹Ghɨ nà n-toŋtɨ̂ ntèʼ nâ zì sɨ a asɨ na Lûz, Jàkôb ɨ chfɨ̀ ìzɨyn ateyn lvɨ̂yn na Betèl.

²⁰Wù n-læ nì tî ɨ chfɨ̀nɨ̀ ɨ bè na, “Bôbo Fɨyini ti kæ sɨ nà ghɨ ghesɨ̀ ŋweyn ɨ̀ tòʼnɨ̀ nɨ̀ mà ijèl afêyn ɨ̀ fu ɨfwo ɨ yɨnɨ sɨ̂ mà nɨ̀ ndzɨsɨ, ²¹ma læ̂ jèl ɨ̀ kàsi kfa kɨ̀ nô a jûŋ a ghès abe, a mà na koʼsɨ̂ kɨ ŋweyn. ²²Ngòʼ yèyn a mà tòm sɨ a nchwæ têyn na ghɨ ndô Fɨyini, ma lî nô mɨ̀ ghà ta wà bòysɨ ma nɨ̀ ànkeyna, gwôtɨ̀ ɨlwêʼ ìvɨ̀m fu alêʼ àmòʼ sɨ̂ và.”