Genesis 26

Yisàk ŋêyn Abimelèk

¹À n-læ nà ghɨ ta Yisàk nɨ̀n chi a Gelà, jèŋ i bemnɨ ìlì ɨ fi ku afu kɨ̀ ta yi n-læ ku ɨtuʼ nɨ̀ Abɨ̀làhâm. Yisàk ɨ leʼ ndù a Gelà alèʼ ghè a Abimelèk ɨ fòyn ghelɨ Fìlisìyà nà n-chi ateyn. ²À nà n-ghɨ tì ma Bôbo Fɨyini fvɨ meyn ikèʼ nɨ̀ Yisàk ɨ bè na, “Ka wa n-ndù a Ijìb. Wa chî kɨ alèʼ ghè a mɨ nì dyêyn sɨ̂ và. ³Chitɨ ilaʼ afêyn, mà na tôʼnɨ̀ nɨ̀ và ɨ̀ bòysɨ và. Mɨ n-fu ìlaʼ yèynì sɨ̂ và nô ì jɨ̀m nɨ̀ wôyn ghya, sɨ luynsɨ mɨkâyn mzɨ̀ a mɨ n-læ yɨ ghesɨ̀ bò vâ Abɨ̀làhâm. ⁴Mɨ n-boysɨ̂ và ɨ̀ nì a wôyn ghya na dvɨ̂ kɨ ta mɨnjêyn iyvɨ. Mɨ n-læ̀ fu ìlaʼ yèynì nô ì jɨ̀m sɨ̂ àŋena. Mà læ̀ boysɨ̂ tɨ̀laʼ tɨ̀ jɨ̀m a mbzɨ toynɨ̂ a woyn nɨ̀ và, ⁵bòm ta Abɨ̀làhâm nɨ̀n læ meyn yvɨnɨ mà ɨ lèm tɨ̀saʼ temtɨ ɨ nì nô mɨ ghà ta mɨ nà n-kɨŋ na wù ni.” ⁶Bôbo ɨ taŋi tì nô mɨ ɨlvɨ gha Yisàk ɨ faŋ kɨ a Gelà.

⁷Ghɨ̀lûmnɨ̀ ɨ nà sɨ bɨf sɨ̂ Yisàk afu na Làbikà nɨn ghɨ ndà sɨ̂ ŋweyn a, wu bê kɨ sɨ̂ àŋena na, “À n-ghɨ jêmtɨ̀ yem.” Wù nà n-bê tì bòm ta wu nà n-kya na Làbikà nɨ̀n ghɨ kɨ nô àtu a ngòyn, wu fâyn na ghelɨ ateyn kàʼ a ghɨ zue zɨ sɨ li Làbikà.

⁸Yisàk nɨ̀n læ meyn chi a Gelà sɨ a ndyèyn ìdyà. A læ nà ghɨ achi a li-a Abimelèk ma à ti fòyn ghelɨ Fìlisìyà ɨ se sɨ ki sɨ fvɨ̀sɨ̀ a wundù ɨ yeyn Yisàk wu yêylɨ̀ wî ŋweyn. ⁹Ta Abimelèk yèyn tî ɨ tum jàŋ Yisàk ɨ bè sɨ̂ ŋweyn na, “Wùl ɨ wi wèyn nɨ̀n ghɨ tèyn a ghɨ kɨ nô wî vâ, bòm ghà ta wà tî wam bè na à n-ghɨ jêmtɨ̀ zyâ a?” Yisàk ɨ bèynsɨ̀ ɨ bè na, “Mà tî nà fâyn na wùl kàʼ a wù zue ma sɨ li ŋweyn.”

¹⁰Abimelèk ɨ bɨf sɨ̂ ŋweyn na, “Wà ti mòm ghà sɨ̂ ghès teyn a? Wùl ìlaʼ nɨ̀ ghès ɨlvɨ nà n-chi nɨ̀ wî vâ a à na ghɨ ma wà ni meyn na ghèsɨ̀ nî mbɨ.”

¹¹Wu n-tàŋi tì nô mɨ ɨlvɨ gha ɨ chwòsɨ̀ ìsaʼ na, “À læ̀ nì bèbsɨ mɨ ndà iwo sɨ̂ Yisàk, kèsa sɨ̂ wî ŋweyn, a ghɨ zue kɨ̀ zue wul àteyn.”

¹²Yisàk nɨn læ meyn fèlɨ̀ ɨ̀fwo ɨ yɨnɨ ilaʼ afu kɨ̀ a bêŋ nâ ghè wu koʼ nô sɨ idvɨ̀ bòm ta Bôbo nà n-ghɨ ma wu boysɨ meyn ŋweyn. ¹³Wu nà sɨ kelɨ ɨ̀fwo kɨ̀ sɨ idvɨ̀ ɨ nà sɨ ghɨ nô wul ɨ̀ghaʼnɨ. ¹⁴Wù nà n-kelɨ bzɨsɨ nɨ̀ nyamsɨ mbòloʼ nɨ̀ ghelɨ ghɨ felɨnɨ kɨ̀ sɨ idvɨ̀. Ghelɨ Fìlisìyà ɨ nà sɨ ghêʼ ŋweyn, ¹⁵ɨ kæ kfɨ̀ysɨ tɨbɨ tɨ mu nɨ̀ Yisàk tìtɨ̀ a ghelɨ ghɨ felɨnɨ nɨ̀ bò ŋweyn nɨn læ tɨm.

¹⁶Ta àŋena nì tî Abimelèk ɨ kæ be sɨ̂ Yisàk na, “Wà to meyn chwò ghès nô sɨ a ŋaŋ, lù sɨ a ghès ilaʼ.”

¹⁷Yisàk ɨ lu sɨ alèʼ nâ ghè ɨ ndu kas mɨtwo mɨ̀ ŋweyn ɨfyàyn ɨ Gelà ɨ nà sɨ chî afu. ¹⁸Yisàk nɨ̀n læ meyn kasi làf tɨ̀bɨtɨ mu tìtɨ̀ a bò ŋweyn nɨn læ tɨm jæ ta ka ghelɨ Fìlisìyà kfɨysɨ ta wù kfɨ. Wù n-læ làf tî ɨ nà toŋtɨ̂ kɨ azɨyn afî a bò ŋweyn nɨn læ fu.

¹⁹A læ nà ghɨ achi a li-a ghelɨ ghɨ felɨnɨ nɨ̀ Yisàk ɨ tɨm ɨ ndu bùʼ ìsɨ i lɨmàlɨ̀mà i li ɨfyàyn ɨ Gelà yi yvɨ̂tɨ̀ kɨ tèyn. ²⁰Ta àŋena yèyn tî àngùmnɨ̀-à ɨ fvɨ̀ antêynɨ̀ nɨ̀ nchìsɨ nyâmsɨ̀ nɨ̀ ghelɨ Gelà nɨ ɨ sɨ Yisàksɨ̀ ɨ sɨ Gelàsɨ̀ ɨ bê na, “Isɨ i lɨmàlɨ̀mà yèynì nɨn kelɨ ghès.” Yisàk ɨ kæ chfɨ̀ izɨyn ateyn na Esèk ma à ti àngùmnɨ̀ bòm ta ghelɨ ŋweyn nà n-gûmnɨ̀ atû àteyn ŋêyn ghelɨ Gelà. ²¹Àŋena fi tɨm ibɨ i mu ili, ghelɨ ateyn ɨ fi gvi kɨ nɨ̀ àngùmnɨ-à afu. Yisàk ɨ kæ chfɨ̀ izɨyn ateyn na Sitnà ma à ti ichoʼ avɨ̀. ²²Yisàk ɨ lù sɨ a afu ɨ fi ndu tɨm kfeynsɨ ìbɨ i mu i li wùl ɨ faŋ tɨ̀ fì tɨ̀ gvì nɨ̀ àngùmnɨ-à ateyn, wu chfɨ̀ ìzɨyn ateyn na Lehobòt bê na, “Bôbo Fɨyini fu meyn àlêʼ sɨ̂ ghesɨ̀nà, ghesɨ̀nà ɨ ghɨ sɨ dvɨ̀ sɨ fì sɨ yam ilaʼ nâ ghàyn.”

²³Wù n-læ meyn lù sɨ afu ɨ koʼ a Beshebà. ²⁴Bôbo ɨ ni fvɨ̀ a ŋweyn ikèʼ nɨ̀ntuʼ ɨ bè sɨ̂ ŋweyn na, “À n-ghɨ mà Bôbo ɨ Fɨyini fɨ Abɨ̀làhâm, ka wa n-fàyn bòm ta mɨ n-ghɨ ghesɨ̀và amoʼ. Mɨ n-boysɨ̂ và ɨ̀ fù woyn sɨ̂ và kɨ̀ sɨ idvɨ̀ bòm wul ɨ̀ felɨnɨ nɨ̀ mà Abɨ̀làhâm ɨ bò vâ.”

²⁵Bôbo nɨn taŋi tî Yisàk ɨ bàʼlɨ̀ abaŋ ifu alèʼ nâ ghè ɨ nà koʼsɨ̂ ŋweyn ateyn. Wù n-læ meyn kas kɨmɨ ɨ̀two, ghelɨ ghɨ felɨnɨ nɨ̀ ŋweyn ɨ tɨm ibɨ i mu afu.

²⁶À nà n-ghɨ ta Yisàk nɨ̀n ghɨ a Beshebà, Abimelèk ɨ fòyn Gelà ŋêyn wùl ɨ̀ vzɨ̀ a wu nà n-tebtɨ ŋweyn, ghɨ toŋtɨ̂ na Ahuzàt nɨ̀ bò ndo ìwoŋ nɨ̀ ŋweyn ghɨ toŋtɨ̂ na Fìkôl ɨ gvì sɨ yeyn Yisàk. ²⁷Àŋena nɨn gvì tî Yisàk ɨ bɨf sɨ̂ àŋena na, “Yi n-gvî sɨ yeyn ma sɨ a gha ma yi ti meyn chùʼlɨ nɨ̀ mà ɨ̀ sàŋ mà sɨ a yi ilaʼ a?”

²⁸Àŋena ɨ bèynsɨ̀ ɨ bè na, “Ghèsɨ yeyn meyn kɨ̀ nô samoʼ na Bôbo nɨn ghɨ zɨ̂ ŋweyn ɨ̀ kfàʼtɨ̀ na yi n-jofɨ̀ na ghèsɨ̀ gvi ghesɨ̀nà yɨ mɨkâyn nà chî kɨ nô nɨ̀ mbôynɨ̀. ²⁹Mɨ̀kâyn mɨ̀ àteyn nɨn ghɨ na wà læ̀ nî wì iwo i bzɨ-i ili sɨ̂ ghès, kɨ̀ ighel ta ghès nɨn bu læ nì sɨ̂ và. Ghèsɨ ti meyn tòʼnɨ̀ nɨ̀ và ɨ̀ tsɨ̀ynsɨ và wà lû kɨ nɨ̀ mbôynɨ̀ ɨ̀ nà sɨ ghɨ lvɨ̂yn ma Bôbo boysɨ meyn và.”

³⁰Àŋena nɨn tàŋi tî nô mɨ ɨlvɨ gha Yisàk ɨ kfè ɨ̀fwo ɨ yɨnɨ ŋêyn àŋena ɨ yɨ ɨ fi nyvɨ. ³¹Ɨtuʼ ɨ bɨsɨ layn Yisàk ŋêyn Abimelèk ɨ yɨ mɨkâyn. Àŋena nɨn yɨ mɨkâyn mɨ̀ àteyn nô mɨ ɨlvɨ gha Yisàk ɨ tsɨynsɨ àŋena, àŋena kasi kfa kɨ nɨ̀ mbôynɨ̀.

³²A nà n-ghɨ kɨ achi nâ ghè ghelɨ ghɨ felɨnɨ nɨ̀ Yisàk ɨ gvi bè sɨ̂ ŋweyn na, “Ghèsɨ yeyn meyn mu ibɨ afî a ghès tî tɨ̀m tî.” ³³Yisàk ɨ kæ chfɨ̀ izɨyn ateyn na Shibà ma à ti alêʼ a mɨ̂kàyn. Sɨ koʼ sɨ chem layn ghɨ n-toŋtɨ̂ kɨ ntèʼ àteyn na Beshebà ma à ti ibɨ i mu i mɨ̂kâyn.

³⁴À nà n-ghɨ ta Esò lèma ɨ̀ chem bèŋsɨ̀ mɨ̀vɨm ɨ̀n kæ̀ wu mala Judìt ɨ wâyn Belì nɨ̀ Basemàt ɨ wâyn Elòn, a ghɨ kɨ ghelɨ Hêt. ³⁵Ghɨ̀kì nâ ghèyn ghɨ̀bò têyn nɨn læ meyn nì Yisàk ŋêyn wî ŋweyn Làbikà ɨ nà saŋlɨ̂ wì nô sakos.