Ezra 7

Ezɨ̀là ɨ kasi kfa nɨ̀ ànkùmtɨ̀ anòyn a ghêl a li-a a Jèlusalèm

¹Bèŋsɨ̀ nɨn chwo meyn nô sɨ a idvɨ̀ ibàm awo nâ ghàyn, a nà ghɨ ɨtuʼ ta Àtazezès ɨ fòyn Besìyà koʼ achɨ, Ezɨ̀là ɨ wâyn Sèlayà ɨvzɨ̂ a à nà n-ghɨ wâyn Àzalìyà ɨ wâyn Hìlkayà, ²ɨ wâyn Shalòm ɨ wâyn Zadòk, ɨ wâyn Ahitùb, ³ɨ wâyn Àmalìyà ɨ wâyn Azalìyà ɨ wâyn Màlayòt, ⁴ɨ wâyn Zèlahayà ɨ wâyn Uzì ɨ wâyn Bukì, ⁵ɨ wâyn Àbishùwà ɨ wâyn Finihàs, ɨ wâyn Èlizà ɨ wâyn Alòyn ɨ ngàŋ ndô Fɨyini i ghaʼnɨ. ⁶Ezɨ̀là nâ wèyn nɨn læ kasi kfa sɨ a Babilòn. Wu nà n-ghɨ ndyèynsɨ̀ ìsaʼ, faytɨ̂ kya ìsaʼ i Mosìs nô a jûŋ, izɨ̂ a Bôbo Fɨyini ɨ Fɨyini fɨ Isìlæ̀ fɨ̀ nɨn læ fu. Fòyn nɨn fu meyn nô mɨ ghà ta wù n-bɨf bòm ta Bôbo Fɨyini nà n-ghɨ ŋêyn ŋweyn. ⁷Ghelɨ Isìlæ̀ ghɨ li baʼsɨ̂ nɨ̀ ngàŋsɨ ndô Fɨyini nɨ̀ ghelɨ ndo nɨ̀ Levì nɨ̀ ghelɨ njàŋsɨ̀ nɨ̀ ghelɨ ghì a ghɨ n-chî achfɨ̂ a mbàyn kì a kɨ n-zɨ gvî ilaʼ nɨ̀ ghelɨ ghì a ghɨ n-felɨ̀ a ndô Fɨyini ɨ boŋ kasi kfa a Jèlusalèm a bêŋ afî a fòyn Àtazezès luyn bèŋsɨ̀ nsòmbo ateyn achɨ.

⁸Ezɨ̀là nɨn læ kasi kfa zɨ a Jèlusalèm a njoŋ sɨ̀ tâyn a bêŋ nâ ghàyn a fòyn nɨn læ luyn bèŋsɨ̀ nsòmbo achɨ ateyn. ⁹A nà n-ghɨ tì ma wù n-læ zɨ̀tɨ ijêl i ŋweyn sɨ kasi sɨ kfa achi a kɨ asɨ-a a njoŋ ɨ yî àsɨ a bêŋ ɨ kfa zɨ a Jèlusalèm achi a kɨ asɨ-a a njoŋ sɨ̀ tâyn bòm ta Fɨyini nà n-ghɨ ŋêyn ŋweyn, kɨ̂ŋtɨ̀ ŋweyn. ¹⁰Fɨyini fɨ nɨn toʼnɨ nɨ̀ Ezɨ̀là tì bòm ta wù n-læ meyn fu ngêŋ ŋweyn sɨ faytɨ sɨ yeʼi sɨ keli isaʼ i Fɨyini sɨ nà chî ta yi n-bê fî yeʼî ghelɨ ghɨ li nɨ̀ ìnyeyni a Isìlæ̀.

Fòyn Àtazezès ɨ nyàʼ ɨ fu adyaʼ sɨ̂ Ezɨ̀là

¹¹Ɨyêyn nɨ̀n ghɨ ŋwàʼlɨ̀ zɨ̀ a fòyn Àtazezès nɨn nyaʼ fu sɨ̂ Ezɨ̀là ɨ ngàŋ ndô Fɨyini vzɨ̀ a à nà n-ghɨ ndyèynsɨ̀ ìsaʼ, ɨ wul ma wù yeʼi meyn nà faytɨ̂ kya nô mɨ ghà kûm tɨ̀saʼ tɨ Bôbo Fɨyini fɨ Isìlæ̀.

¹²Ŋwàʼlɨ̀ yèyn lù sɨ̂ Àtazezès ɨ fòyn tɨ̀ fòyn, ndû sɨ̂ Ezɨ̀là ɨ ngàŋ ndô Fɨyini zɨ̀ a à n-ghɨ ndyèynsɨ̀ ìsaʼ nɨ̀ Fɨyini fìfɨ̀ a fɨ n-ghɨ iyvɨ.

Mɨ n-toŋtɨ̂ và.

¹³Mɨ n-fu sɨ isaʼ na nô mɨ wul ɨ̀ Isìlæ̀ ɨ̀ kfà vzɨ̂ a wù n-ghɨ a ma ilaʼ baʼsɨ̂ nɨ̀ ngàŋsɨ ndô Fɨyinisɨ̀ nɨ̀ ghelɨ ndo nɨ̀ Levì, ta wù n-kôŋ sɨ kfa a Jèlusalèm zɨ̂ ŋweyn kàʼ a wù na kfâ. ¹⁴Ghesɨ̀ chyeʼ semsɨ nsòmbo nɨn tum và na wà ndu yeyn nâ ghelɨ nɨn lêm ti isaʼ i Fɨyini fyafɨ zɨ̀ a wà fàytɨ yèʼi nà kya tì a ilaʼ i Judà nô nɨ̀ ntèʼ Jèlusalèm a. ¹⁵Wà n-kelɨ kɨmɨ sɨ lì aso ɨkwo a fɨfâ nɨ̀ a baŋnɨ-a ta fòyn ŋêyn chyeʼsɨ ŋweynsɨ fù sɨ̂ Fɨyini fɨ Isìlæ̀ fìfɨ̀ a fɨ n-chi a Jèlusalèm kɨ̀ nô nɨ̀ mɨ̀têm mɨ̀ àŋena ɨ̀n jɨ̀m, ¹⁶baʼsɨ̂ nɨ̀ àso ɨkwo a fɨfâ nɨ a baŋnɨ-a nô à jɨ̀m kì a yì kàʼ a yì li abàs a Babilòn nô nɨ̀ tɨ̀fu tìtɨ̀ a ghelɨ ŋêyn ngàŋsɨ̀ ndô Fɨyini nɨn fu sɨ a àyòŋnɨ̀ a funɨ-a sɨ̂ Fɨyini fɨ na ghɨ baʼlɨ ndô Fɨyini fɨ àŋena fɨ ateyn a Jèlusalèm. ¹⁷Ka yi n-faŋ tɨ̀ li ɨkwo nâ wèyn sɨ yuyn mbòŋsɨ̀ nɨ̀ ɨ̀ywaʼ nɨ̀ bzɨsɨ njɨ̀sɨ̀ ateyn baʼsɨ̂ nɨ̀ ɨ̀fwo asɨ asɨ vzɨ̀ a ka ghɨ fu bàʼsɨ nɨ̀ nyam nâ sèynsɨ̀ nɨ̀ mɨ̀lùʼ mɨ̀ àteyn, ɨ chɨ̀yntɨ̀ ɨ fu ɨfwo nâ wèyn sɨ̂ Fɨyini fɨ abaŋ ifu ghè a kɨ n-ghɨ a ndo nɨ̀ Fɨyini fifɨ a Jèlusalèm.

¹⁸Yì nì têyn, a à na ghɨ ma ghelɨ Isìlæ̀ ghì a yi n-ghɨ amoʼ ni-a yi nì nô mɨ ghà vzɨ̂ a yi n-jôf kfeynɨ nɨ̀ àso ɨkwo a fɨfâ nɨ̀ a baŋnɨ-a a li-a kì a kɨ faŋ kɨ̀ ighel ta isaʼi Fɨyini fifɨ nɨn dyêyn. ¹⁹Yi n-kelɨ sɨ fu ɨfwo vzɨ̀ nô ɨ̀ jɨ̀m sɨ̂ Fɨyini fìfɨ̀ a fɨ n-chɨ/ghɨ a Jèlusalèm a ghɨ tî fù sɨ̂ zɨ̀ tî na ghɨ na koʼsɨ̂ Fɨyini nɨ̀ ɨ̀ŋweyn a ndo nɨ̀ Fɨyini fifɨ. ²⁰Yì kàʼ a yì fî bɨf nô mɨ ghà vzɨ̂ a à n-ghɨ alêʼ à ki-a sɨ fu a ndo nɨ̀ Fɨyini fifɨ a ghɨ fu sɨ̂ zɨ̀ alèʼ ghè a ghɨ n-lêm ɨfwo ateyn a ntoʼ.

²¹Mà ɨ fòyn Àtazezès na sɨ fu sɨ a isaʼ lvɨ̂yn sɨ̂ ghelɨ ghì nô ghɨ̀ jɨ̀m a ghɨ n-lêm ɨfwo a injɨyn i jvâ na àŋena nɨn kelɨ sɨ lutɨ sɨ fu nô mɨ ghà vzɨ̂ a Ezɨ̀là ɨ ngàŋ ndô Fɨyini zɨ̀ a yì n-dyêynsɨ̀ ghelɨ nɨ̀ ìsaʼ i Fɨyini fìfɨ̀ a fɨ n-ghɨ iyvɨ nɨn bɨf sɨ̂ zɨ̀. ²²Yi n-fu chem kilùsɨ ɨkwo ɨ fɨfâ nkam sɨ̀ tal nɨ̀ ìghɨ ì kæ̀ nɨ̀ kilùsɨ̀ asaŋ a wît nkamsɨ ìvɨm nɨ̀ litàsɨ mɨvɨ̀l mɨ̀ olìfsɨ̀ nkam sɨ̀ bò baʼsɨ̂ nɨ̀ fɨ̀ngvaŋfɨ nô mɨ ɨfyèʼ ɨ̀ kfà. ²³Nô mɨ ghà vzɨ̀ a Fɨyini fìfɨ̀ a fɨ n-ghɨ iyvɨ bè na ghɨ ni a ndo nɨ̀ nfeynfɨ yì visi ghɨ ni iwo ateyn a ndo nɨ̀ nfeynfɨ kɨ̀ ighel ta fɨ n-kɨŋ bu tî a Fɨyini fɨ̀ yabsɨ ɨtoŋ sɨ̂ fòyn nɨ̀ nyɨsɨ ndo nɨ̀ ŋweynsɨ. ²⁴Zɨ̀ ghî a ghɨ n-lêm ɨfwo abàs injɨyn i jvâ nɨn kelɨ sɨ nà kya na yi n-kelɨ wi adyaʼ sɨ nà be-à ngàŋsɨ ndô Fɨyinisɨ̀ ɨ lâʼ nɨ̀ ghelɨ ndo nɨ̀ Levì nɨ̀ ghelɨ njàŋsɨ̀ nɨ̀ ghelɨ ghì a ghɨ n-duʼ achfɨ̀ a mbàynsɨ̀ nɨ̀ ɨghî a ghɨ n-felɨ̀ a ndô Fɨyini baʼsɨ̂ nô mɨ nɨ̀ ndà vzɨ̂ a wù n-felɨ̀ a ndo nâ ghàyn.

²⁵Sɨ̂ và a Ezɨ̀là, fèlɨ nɨ̀ ìtof i Fɨyini fyafɨ zɨ̀ a wà n-kelɨ tî ɨ choʼtɨ ghelɨ ghɨ saʼnɨ nɨ̀ ghɨ tisɨnɨ ghì a ghɨ n-kya isaʼ i Fɨyini kɨ ì jɨ̀m ghɨ na tisɨ̂ ghelɨ nô ghɨ̀ jɨ̀m abàs injɨyn i jvâ Yuflèt. Wà n-kelɨ nô mɨ ndà vzɨ̀ a wù n-kya wi isaʼ i Fɨyini nɨ̀ ìnyeyni. ²⁶Ghɨ n-kelɨ sɨ zue nô mɨ ndà vzɨ̂ a wù n-yvɨnɨ wi isaʼ i Fɨyini fyafɨ nɨ̀ iyi fòyn ì kèsa ghɨ n-jûm fvɨsɨ̀ ŋweyn sɨ antêynɨ̀ nɨ̀ ghelɨ a kèsa ghɨ ghal ɨ fsɨ ɨfwo ŋweyn a kèsa ghɨ n-fô fo ŋweyn a ndô nchaʼa.

Ezɨ̀là ɨ koʼsɨ/bemsɨ Fɨyini

²⁷Wu n-bè na ikoʼsɨ-i nɨn ndû sɨ̂ Bôbo Fɨyini ɨ Fɨyini fɨ ghɨ̀bo ghesɨ fìfɨ̀ a fɨ kùm atem a fòyn nì na wù ni ndô Fɨyini a Jèlusalèm na kelɨ ìkoʼnɨ a dzɨ nâ ghàyn. ²⁸À n-ghɨ kɨmɨ nfeynfɨ a fɨ dyèyn atem a juŋà sɨ̂ mà asɨ nɨ̀ fòyn baʼsɨ̂ nɨ̀ chyeʼsɨ ŋweynsɨ nɨ̀ ghelɨ ghɨ felɨnɨ nɨ̀ ŋweyn ghɨ to. Mà tî kèli àtem a to-a ɨ̀ yvɨ̀ŋtɨ̀ ghelɨ Isìlæ̀ ghɨ tisɨnɨ ghesɨ̀ àŋena kasî kfa bòm ta Bôbo Fɨyini femfɨ ti nà ghɨ ghesɨ̀ nfeynfɨ.