Ezra 8

Ghelɨ ghì a ŋêyn ghɨ̀ Ezɨ̀là nɨn læ kasi kfa amoʼ

¹Tèyn nɨn ghɨ ɨ̀tu asas a ndo vzɨ̀ a ghesɨ̀ àŋena nɨn læ kasi kfa sɨ a Babilòn amoʼ ɨtuʼ nɨ̀ fòyn Atazezès baʼsɨ̂ nɨ̀ ghelɨ ghì a ghɨ n-læ nyàʼ azɨyn a àŋena asas:

²Geshòm ɨ wul ìsas i ndo nɨ̀ Finihàs,

Danìyèl ɨ wul ìsas i ndo nɨ̀ Itamà,

Hatùsh ɨ wul ìsas i ndo nɨ̀ Devìt. ³Sàkàliyà ɨ wul ɨ̀ ndo nɨ̀ Balush baʼsɨ̂ nɨ̀ ghelɨ ndo nɨ̀ àŋena ghɨ li ɨvɨ nɨ̀ ghelɨ mɨ̀vɨm ɨ̀n tâyn ta ghɨ nyàʼ azɨyn a àŋena.

⁴Elìyehonày ɨ wâyn Zèlahayà ta wu nà n-ghɨ wul ɨ̀ ndo nɨ̀ Bahat Mowàb baʼsɨ̂ nɨ̀ ghelɨ ighɨ ì bò,

⁵ŋêyn wâyn ŋweyn Shèkànayà ɨ wâyn Jàhazìyèl ɨ wul ɨ̀ ndo nɨ̀ Zatù baʼsɨ̂ nɨ̀ ghelɨ ighɨ ì tal ŋêyn ŋweyn.

⁶Ebed ɨ wâyn Jonatàm, ɨ wul ɨ̀ ndo nɨ̀ Adìn baʼsɨ̂ nɨ̀ ghelɨ mɨ̀vɨm ɨ̀n tâyn ŋêyn ŋweyn.

⁷Jèshayà ɨ wâyn Àtalìyà ɨ wul ɨ̀ ndo nɨ̀ Elàm baʼsɨ̂ nɨ̀ ghelɨ mɨ̀vɨm nsòmbo ŋêyn ŋweyn.

⁸Zèbàdayà ɨ wâyn Mikèl ɨ wul ɨ̀ ndo nɨ̀ Shèfàtayà baʼsɨ̂ nɨ̀ ghelɨ mɨ̀vɨm nfama ŋêyn ŋweyn.

⁹Obàdayà ɨ wâyn Jehìyèl ɨ wul ɨ̀ ndo nɨ̀ Jùwâb baʼsɨ̂ nɨ̀ ghelɨ ighɨ ì bò nɨ̀ ghelɨ njvàsɨ̀ nfama ŋêyn ŋweyn.

¹⁰Shèlomìt ɨ wâyn Jòsìfayà, ɨ wul ɨ̀ ndo nɨ̀ Banì baʼsɨ̂ nɨ̀ ghelɨ ɨvɨ nɨ̀ ghelɨ mɨ̀vɨm ntufa ŋêyn ŋweyn.

¹¹Sàkàliyà ɨ wâyn Bebày ɨ wul ɨ̀ ndo nɨ̀ Bebày baʼsɨ̂ nɨ̀ ghelɨ mɨ̀vɨm ɨ̀m bò nɨ̀ ghelɨ njvàsɨ̀ nfama ŋêyn ŋweyn.

¹²Jòhanàn ɨ wâyn Hàkatàn ɨ wul ɨ̀ ndo nɨ̀ Azgàd baʼsɨ̂ nɨ̀ ghelɨ ɨvɨ nɨ̀ ghelɨ ìvɨm ŋêyn ŋweyn.

¹³Ghelɨ ndo nɨ̀ Àdonkàm ghì a ghɨ n-læ kfa gòʼsɨ nà n-ghɨ Elifelèt nɨ̀ Juwèl nɨ̀ Shemayà baʼsɨ̂ nɨ̀ ghelɨ mɨ̀vɨ̂m ntufa ŋêyn àŋena.

¹⁴Ghelɨ ndo nɨ̀ Bigvày nà n-ghɨ Yutày nɨ̀ Zakù baʼsɨ̂ nɨ̀ ghelɨ mɨ̀vɨ̂m nsòmbo ŋêyn àŋena.

Ezɨ̀là ɨ yeyn/keli ghelɨ ghì a ka ghɨ na felɨ̀ a ndô Fɨyini

¹⁵Mɨ n-li meyn ghelɨ nâ ghèyn ghesɨ̀ àŋena ɨ ndu yvɨ̀ŋtɨ̀ a mbæ̀ jvà afî a yì n-kalì ndû a ntèʼ Àhavà ɨ bàʼlɨ̀ mɨ̀two afu ɨ chi ateyn sɨ a mɨchi ɨ̀n tal. Mɨ n-se meyn sɨ tòʼ sɨ ki àntêynɨ̀ nɨ̀ àŋena ɨ yeyn ngàŋsɨ ndô Fɨyini mɨtì ɨ faŋ tɨ̀ yeyn nô wul ɨ̀ ndo nɨ̀ Levì afu. ¹⁶Ma kæ sɨ jàŋtɨ ghelɨ ghɨ tisɨnɨ ma à ti Ezɨ̀là nɨ̀ Alìyèl nɨ̀ Shèmayà nɨ̀ Elnatàn nɨ̀ Jalìb kɨ̀mɨ nɨ̀ Elnatàn nɨ̀ Natàn nɨ̀ Sàkàliyà nɨ̀ Meshulàm baʼsɨ̂ nɨ̀ ghelɨ ghɨ tofɨnɨ, ma à ti Jòyalìb nɨ̀ Elnatàn . ¹⁷Mɨ n-be meyn na àŋena ndu yeyn Idò ɨ wul ɨ vzɨ̀ a wù n-tisɨ ghelɨ a Kàsifìyà ɨ fèʼtɨ̀ ìwo zɨ̀ a ka àŋena ndu bè sɨ̂ Idò nɨ̀ woynà ŋweyn ghì a ghɨ nà n-ghɨ ghelɨ ndo nɨ̀ Levì nɨ̀ ghelɨ ghì a ghɨ n-felɨ̀ a ndô Fɨyini ta ghɨ n-chi afu ta ka àŋena fu ghelɨ sɨ̂ ghès a ghɨ gvi nà felɨ̀ a ndô Fɨyini. ¹⁸Ghɨ ndu bè tì àŋena fu Shèlèbayà sɨ̂ ghès ɨ wul ɨ̀ ndo nɨ̀ Malì ɨ wâyn Levì vzɨ̀ a à nà n-ghɨ wâyn Isìlæ̀, a ghɨ wul kya ìfêl baʼsɨ̂ nɨ̀ ghelɨ njvàsɨ̀ nfama a ghɨ woyn Shelèbayà nɨ̀ woynà ŋweyn. ¹⁹Àŋena nɨn fi meyn keli ghelɨ ghɨ chɨ̂yntɨ̀ ghɨ mɨ̀vɨm ɨ̀m bò a ghɨ Hàshabayà ŋêyn Jèshayà ɨ wul ɨ̀ ndo nɨ̀ Mèlalì nɨ̀ woynà ŋweyn baʼsɨ̂ nɨ̀ woyn jêmtɨ̀ sɨ ŋweynsɨ. ²⁰Àŋena nɨn fi meyn fu ghelɨ ighɨ ì bò nɨ̀ ghelɨ mɨ̀vɨm ɨ̀m bò antêynɨ̀ nɨ̀ ghelɨ ghì a ghɨ n-felɨ̀ a ndô Fɨyini ma à n-læ choʼtɨ lèm Devìt ŋêyn chyeʼsɨ ŋweynsɨ na anôyn a ghêl nâ kèynà na gàmtɨ̀ ghelɨ ndo nɨ̀ Levì nɨ̀ ìfel ì. Azɨyn a àŋena nô ghɨ̀ jɨ̀m nà n-ghɨ ma ghɨ nyaʼ meyn lèm.

Ezɨ̀là ɨ tisɨ ghelɨ ghɨ bam ɨchfɨ̂ ɨ fi jèm

²¹À nà n-ghɨ a mbæ̀ jvà Shavà, alèʼ nâ ghè a ghès nɨn yvɨ̀ŋtɨ, ma bè na ghɨ bam ɨchfɨ̂ ta ka ghès maʼ ngêŋ seysɨ a nse asɨ nɨ̀ Fɨyini fɨ ɨ̀ jèm wù ni ghès nɨ̀ wôyn ghes jel kfa a jûŋ nɨ̀ ɨ̀fwo vzɨ̀ a ghès nɨn kelɨ. ²²Mɨ n-læ meyn nà wumi-à sɨ chwotɨ fòyn na wù fu ghes nɨ̀ Sugèyʼ sìsɨ̀ a sɨ n-jêl a nse nɨ̀ ɨ sîsɨ̀ a sɨ n-jêl atû nyamsɨ kfaŋ sɨ chi ghes sɨ̂ mbàynɨ̀ sìsɨ̀ a sɨ n-ghɨ a dzɨ bòm ta ghès nɨn be meyn sɨ̂ fòyn na Fɨyini fɨ nɨn ghɨ ŋêyn ghelɨ ghì a ghɨ n-samsɨ sɨ̂ nfeynfɨ dyêyn àtem a juŋà sɨ̂ àŋena mɨtì yabsɨ̂ ɨ̀toŋ nô sɨ a ŋaŋ sɨ̂ ɨghî a ghɨ bèyn jɨ̀m sɨ̂ nfeynfɨ. ²³À ti iwo zɨ̀ a ghès nɨn læ bam ɨchfɨ̂ ɨ jèm ɨ chwotɨ Fɨyini na fɨ kɨŋtɨ ghes fì bèynsɨ̀ ìjêm ì yesi.

Tɨfu na ghɨ ni ifêl ateyn a ndô Fɨyini

²⁴Mɨ n-choʼtɨ meyn ngàŋsɨ ndô Fɨyini sɨ ghaʼnɨ sɨ lisɨ njvàsɨ̀ bò antêynɨ̀ nɨ̀ ngàŋsɨ ndô Fɨyini sɨ ghaʼnɨsɨ azɨyn a àŋena ɨ ghɨ Shèlebayà nɨ̀ Hàshàbiyà baʼsɨ̂ nɨ̀ woynà àŋena ghɨ li ìvɨm. ²⁵Mɨ n-feʼ meyn ìfûʼ i aso ɨkwo a fɨfâ nɨ̀ ìghɨ aso ɨkwo a baŋnɨ-a baʼsɨ̂ nɨ̀ ɨ̀fwo ɨ felɨnɨ vzɨ̀ a fòyn ŋêyn chyeʼsɨ ŋweynsɨ nɨ̀ ghelɨ ghɨ felɨnɨ nɨ̀ ŋweyn nô nɨ̀ ghelɨ Isìlæ̀ ghɨ̀ jɨ̀m ghî a ghɨ nà n-ghɨ afu nà sɨ ghɨ ma ghɨ fu meyn na ghɨ fel ateyn a ndô Fɨyini, ɨ fu sɨ̂ ngàŋsɨ ndô Fɨyini sɨ ghaʼnɨsɨ ateynsɨ. ²⁶Mɨ n-feʼ meyn fu kɨmɨ àso ɨkwo a fɨfâ sɨ̂ àŋena kilùsɨ̀ nkam mɨ̀vɨm ɨ̀m bò nɨ̀ nkam sɨ̀ bò nɨ̀ ɨ̀vɨ nɨ̀ ɨ̀fwo ma ghɨ fàytɨ nɨ̀ àso ɨkwo kilùsɨ̀ nkam sɨ̀ tal nɨ̀ ìghɨ ì kæ̀ nɨ̀ Kilùsɨ aso ɨkwo a baŋnɨ-a kilùsɨ̀ nkam sɨ̀ tal nɨ̀ ìghɨ ì kæ̀, ²⁷nɨ̀ ɨ̀kfaŋ alèlalel ma ghɨ fàytɨ nɨ̀ àso ɨkwo a baŋnɨ-a wu lî kilùsɨ̀ nfama baʼsɨ̂ nɨ̀ ɨ̀fwo ɨ̀ bwò ma ghɨ fàytɨ nɨ̀ ìdyayn i wu jôf njêytɨ̀ ghɨ kɨ tèyn ta aso ɨkwo a baŋnɨ-a.

²⁸Mɨ n-be meyn sɨ̂ àŋena na, “Yi n-layna kɨ̀ ighel ta ɨfwo wèyn nɨn layn. Aso ɨkwo a fɨfâ kèyn nɨ̀ a baŋnɨ-a nɨn ghɨ ìfu ta ghɨ fù sɨ̂ Bôbo Fɨyini ɨ Fɨyini fɨ ghɨ̀bo ghi sɨ fu àyòŋnɨ̀ kûm ìboysɨ i nfeynfɨ. ²⁹Yì faytɨ tòʼnɨ̀ nɨ̀ ɨ̀ŋweyn ɨ̀ ndù fèʼ asɨ nɨ̀ ngàŋsɨ ndô Fɨyini sɨ ghaʼnɨsɨ nɨ̀ ghelɨ ndo nɨ̀ Levì nɨ̀ ɨ̀tu asas a ndo a Isìlæ̀ ɨ lèm a ɨlwèʼ/lûmsɨ̀ ghê a ghɨ n-lêm ɨfwo ateyn a ndo nɨ̀ Bôbo Fɨyini a Jèlusalèm. ³⁰Wu taŋi tì ngàŋsɨ ndô Fɨyini nɨ̀ ghelɨ ndo nɨ̀ Levì ɨ fsɨ aso ɨkwo a fɨfâ ateyn baʼsɨ̂ nɨ̀ àso ɨkwo a baŋnɨ-a nɨ̀ ɨ̀fwo ɨ felɨnɨ ɨ laynɨ vzɨ̀ a ghɨ n-fèʼ ɨ fu na ghɨ ndu nɨ̀ ɨ̀ŋweyn a ndô Fɨyini a Jèlusalèm.

Ghɨ jèl ɨ gvi chem a Jèlusalèm

³¹À nà n-ghɨ a mɨchi njvàsɨ̀ bò a njoŋ ɨ yî àsɨ a bêŋ/a njoŋ ìmòʼ a bêŋ, ghès ɨ lù sɨ a jvâ Ahavà sɨ gvì a Jèlusalèm. Fɨyini fɨ nà ghɨ ghesɨ̀ nfeynfɨ amoʼ ɨ kɨ̀ŋtɨ̀ ghès sɨ̂ mbàynɨ̀sɨ̀ nɨ̀ ghelɨ ghɨ choŋnɨ a dzɨ, ³²ghèsɨ gvi zɨ a Jèlusalèm ɨ yvɨ̀tɨ̀ sɨ a mɨchi ɨ̀n tal.

³³A nà ghɨ a mɨchi ɨ̀n kæ̀ ghès ɨ ndù a ndo nɨ̀ Fɨyini feyfɨ ɨ fèʼ ɨ fu aso ɨkwo a fɨfâ nɨ̀ a baŋnɨ-a nɨ̀ ɨ̀fwo ɨ laynɨ vzɨ̀ ɨ fu sɨ̂ Melemòt ɨ wâyn Yulìyà vzɨ̀ a à nà n-ghɨ ngàŋ ndô Fɨyini. A nà n-ghɨ tì, Elizà ɨ wâyn Finihàs ɨ ghɨ ŋêyn ŋweyn nɨ̀ Jòzabàd ɨ wâyn Jeshùwà baʼsɨ̂ nɨ̀ Nòyadìyà ɨ wâyn Binuyì ta àŋena nà n-ghɨ ghelɨ ndo nɨ̀ Levì. ³⁴Ghɨ n-taŋ meyn nô mɨ ghà ɨ fèʼ ɨ nyàʼ ɨ lèm ɨ̀fyêʼ ateyn ɨlvɨ nâ ghè.

³⁵Ghelɨ ghì a ghɨ n-kasi kfa sɨ ilaʼ atum ɨ fu ifu i nyoʼnɨ-i sɨ̂ Fɨyini fɨ Isìlæ̀ fɨ̀ a ghɨ mbòŋsɨ̀ njvàsɨ̀ bò sɨ̂ ghelɨ Isìlæ̀ nô ɨ̀ jɨ̀m nɨ̀ ɨ̀ywaʼ mɨ̀vɨm bulamòʼ nɨ̀ ɨ̀ywaʼ ntufa nɨ̀ bzɨsɨ njɨ̀sɨ̀ mɨ̀vɨm nsòmbo njvàsɨ̀ nsòmbo baʼsɨ̂ nɨ̀ ìfu i na Fɨyini fɨ lesɨ fu àŋena a ghɨ bzɨsɨ ndoŋ njvàsɨ̀ bò. Àŋena nɨn læ nyoʼ kɨ nyoʼ tɨfu nâ tèyntɨ̀ nô tɨ̀ jɨ̀m. ³⁶Àŋena nɨn feʼtɨ meyn kɨmɨ sɨ̂ ghelɨ ghì a fòyn lèm na ghɨ na tisɨ̂ ghelɨ a injɨyn i jvâ Yuflèt isaʼ ghè a fòyn fu, ghelɨ ghɨ tisɨnɨ ateyn ɨ fu igâmtɨ̀ sɨ̂ ghelɨ nâ ghèyn ɨ fi gàmtɨ̀ ìfêl zɨ̀ a ghɨ nà n-nî a ndô Fɨyini.